Santa Tereża tal-Bambin Ġesù

Meta kienet tifla, Tereża kienet pjuttost imqarba u rasa iebsa, u kienet tirrabja meta l-affarijiet ma jmorrux kif trid hi.  Ħeġġeġ lit-tfal biex jidentifikaw ruħhom ma’ dawk il-karatteristiċi negattivi li kellha Santa Tereża fi tfulitha.  Ħallihom jitkellmu dwar sitwazzjonijiet fejn huma wkoll aġixxew bl-istess mod. Dan jista’ jkun l-ewwel pass lejn l-għarfien tagħhom infushom billi jirrikonoxxu n-nuqqasijiet tagħhom. Dan jgħinhom jirrealizzaw li, meta kienet tifla, Tereża setgħet iġġib ruħha b’ċerti modi li bihom iġibu ruħhom huma kultant. Iddiskuti magħhom x’wassalha biex tinbidel.

Il-“Mixja ż-Żgħira” ta’ Santa Tereża kienet tinvolvi li “nagħmlu affarijiet żgħar b’mod kbir,” billi nagħmluhom b’imħabba kbira. Involvi lit-tfal f’diskussjoni dwar kif, bħala familja, nistgħu nimxu fuq il-“Mixja ż-Żgħira” – billi nagħmlu dak li hemm bżonn isir, mingħajr dewmien u mingħajr tgergir, kemm jekk jogħġobna u kemm jekk le, jew kemm jekk inħossuna lesti għalih u kemm jekk le – u billi nitolbu lil Ġesù jgħinna meta nsibuha diffiċli biex nagħmlu dan.

Minbarra li ġiet ipproklamata Duttur tal-Knisja (titlu mogħti lil xi qaddisin għat-tagħlim u għall-qdusija tagħhom), hi wkoll meqjusa bħala l-qaddisa Patruna tal-Missjoni. Anke jekk hi stess qatt ma kienet missjunarja, Santa Tereża talbet ħafna u offriet it-tbatijiet tagħha għall-bżonnijiet tal-missjunarji. It-tfal ukoll għandhom jiġu mħeġġa biex isegwu dan l-eżempju ta’ Santa Tereża. Tista’ tikkunsidra wkoll li tgħin lit-tfal f’pajjiżi fqar permezz ta’ organizzazzjonijiet bħall-Missio. It-tfal stess jistgħu jwarrbu xi flus milli jaqilgħu biex imorru għal dan il-għan. Tista’ wkoll tgħin xi tifel u tifla b’korrispondenza li tista’ tkun proġett għall-familja kollha u li tista’ tibda f’Jum il-Missjoni.

Ħin tat-Talb mal-Familja:

Għin lit-tfal jibdew talba personali b’dan il-kliem: “Grazzi Ġesù talli tgħini meta ____ (insibha diffiċli biex niżbarazza l-kamra tiegħi, nobdi mill-ewwel, nerġa’ nagħmel ħbieb ma’ min inkun iġġilidt, per eżempju).”