Thumbs up, thumbs down

Darba waħda Ġesù qalilna storja dwar iż-żerrriegħa tas-sikrana u l-qamħ li jikbru flimkien fl-istess għalqa. Din l-istorja qalilna biex nifhmu x’inhi s-Saltna t’Alla. Huwa jqabbel is-sikrana ma’ persuni li jagħmlu l-ħażin u jqabbel il-qamħ ma’ persuni li jagħmlu t-tajjeb.

Kemm inħossuna ferħanin meta nkunu mdawrin bi ħbieb u persuni oħra li jkunu twajba magħna u jgħinuna nikbru bl-aħjar mod. Għall-kuntrarju, inħossuna vera mdejqin meta xi ħbieb jew persuni oħra jagħmlulna affarijiet ħżiena li jfixxkluna milli nikbru sew;  bħal per eżempju meta jaqbdu magħna għal xejn, jgħajjruna jew jibbuljawna.

Qatt ħsibt kif bħaż-żerriegħa tas-sikrana u l-qamħ, tista’ inti ukoll tkun qed tiżra’ kemm il-ħażin jew it-tajjeb f’qalbek stess?

Il-prayer space li ser nagħmlu  jisimha Thumbs Up – Thumbs Down u għaliha għandna bżonn:

2 Kartonċiniet ta’ daqs A4, Markers, Lapes jew biro.

Agħlaq is-swaba ta’ jdejk  biex tifforma Thumbs Down. Aħseb fid-drabi meta inti għidt xi kliem iebes u li jweġġa lil xi ħadd. Jew forsi meta int stess kont li qbadt ġlieda, għajjart jew ibbuljajt lil xi ħadd. Issa ħu l-kartoncina u fuqha pinġi l-forma ta’ jdejk b’thumbs down u aqta’ madwarha. Ikteb jew pinġi dwar dak li ħsibt fuq il-kartoncina.

Issa agħlaq is-swaba ta’ jdejk biex tifforma Thumbs Up. Aħseb fid-drabi meta inti għidt kliem ta’ nkorraġġiment lil xi ħadd, waqqaft xi ġlieda u b’hekk ġibt il-paċi u l-armonija. Issa ħu l-kartoncina u fuqha pinġi l-forma ta’ jdejk b’thumbs up u aqta’ madwarha. Ikteb jew pingi dwar dak li ħsibt fuq il-kartoncina

Issa ejja nagħlqu ftit għajnejna u nitolbu lil Alla jgħinna biex bħaż-żerriegħa tal-qamħ, nikbru aktar f’persuni tajba u li nagħtu eżempju tajjeb.

Dendel il-kartoncin b’Thumbs Up u Thumbs Down fejn tarahom biex tiftakar twarrab dak li hu ħażin u tapprezza dak li hu tajjeb u sabiħ f’ħajtek għall-ġid tiegħek u tal-oħrajn.