Programm kateketiku (it-2 term)

KKK 2207:

Il-familja hi dik il-komunità li fiha, sa mit-tfulija, wieħed jista’ jitgħallem il-valuri morali, jibda jagħti ġieħ lil Alla u jitgħallem juża sewwa l-libertà tiegħu. Il-ħajja fil-familja hi d-dħul għall-ħajja fis-soċjetà.

Għan tal-laqgħa:

• Bħal Ġesù aħna għandna familja.
• Din hija rigal ieħor mingħand Alla. Alla jagħtina nies biex iħobbuna u jieħdu ħsiebna.

Prayer Table:

• Il-Bibbja
• Xemgħa
• Drapp ħadra (jekk ir-Randan jintuża l-vjola)
• Ritratti li ġabu t-tfal tal-familji tagħhom

Riżorsi u tħejjija qabel il-laqgħa:

• fittex stampi tal-familja mqaddsa
• fittex stampi ta’ attivitajiet li nagħmlu flimkien mal-familja

Song: Say please, sorry and thank you

Tajjeb li niftakru:

Inkunu sensittivi għas-sitwazzjonijiet varji li t-tfal ġejjin minnhom. Minbarra l-familja mqaddsa, l-ebda familja ma hi ideali. Inkunu attenti jekk xi tfal ma jkunux qed iħossuhom komdi li jitkellmu, l-anqas ma nħalluhom jitkellmu dwar affarijiet personali tal-familja tagħhom, inkunu prudenti u ndawru d-diskors. It-tfal ma hemmx għalfejn jidħlu f’dettall speċjalment jekk huma jgħixu fi djar differenti matul il-ġimgħa (minħabba separazzjoni/divorzju). Inwasslu l-messaġġ li Alla jħobb lil kulħadd.

Talba:

Radd tas-salib

Grazzi Ġesù ta’ din il-ġurnata. Grazzi tar-rigali sbieħ li għandi, tad-dinja, tal-ħolqien, tal-ħbieb u ħafna nies li jħobbuni u jgħinnuni.

Il-laqgħa:

Ġesù kellu familja. Tafu min kienet il-familja ta’ Ġesù?

Il-Madonna kienet il-mama tiegħu u San Ġużepp il-papa. Kienu joqgħodu f’raħal żgħir jismu Nazaret. Ġużeppi kien mastrudaxxa, kien jagħmel affarijiet differenti mill-injam. Ġesù kien jgħinu lil San Ġużepp u anke lill-Madonna kien jgħina wkoll. Kienu jieklu flimkien u anke jitolbu flimkien ukoll. Ġieli kienu jiltaqgħu mal-ħbieb u jagħmlu festa. Il-familja mqaddsa hija l-Madonna, San Ġużepp u Ġesù.

Aħna wkoll ngħixu f’familja. Bħal familja mqaddsa aħna nħobbu lil xulxin u ngħinu lil xulxin ukoll.

Inħallu lit-tfal isemmu l-membri tal-familja tagħhom.

Nuru l-istampi li ppreparajna u nħallu lit-tfal jiddeskrivu x’qed jaraw

Nistaqsu:

X’qed jagħmlu?
Kif nafu li jħobbu lil xulxin?
Kif tista’ turi li jien tħobb lill-familja tiegħek? Inħallu lit-tfal jagħtu eżempji. Nitkellmu dwar l-użu tal-kliem please, thank you, sorry u nisimgħu s-song.
Kif nafu li qed jgħinu lil xulxin?
Inti kif tista’ tgħin lill-familja tiegħek? Inħallu lit-tfal jagħtu eżempji.

Aħna kuljum nieklu imma xi drabi dawn l-ikliet ikunu aktar speċjali. Nuru stampi ta’ ikliet tal-Milied, birthdays, picnics. Inħallu lit-tfal jitkellmu dwar dawn l-okkazzjonijiet u kif iħossuhom meta ikla tkun aktar speċjali

Talba:

Grazzi Ġesù tal-familja tiegħi, tan-nies li jħobbuni,

Grazzi li nistgħu (ħalli lit-tfal isemmu dawk l-affarijiet li jagħmlu flimkien mal-familja tagħhom …. Jieklu, jilgħabu, jitolbu)

Ġesù, Ġużeppi u Marija għinnuna meta nkunu d-dar

Ġesù, Ġużeppi u Marija għinnuna meta nkunu l-iskola

Ġesù, Ġużeppi u Marija għinnuna meta nkunu qegħdin nilgħabu

Ġesù, Ġużeppi u Marija għinnuna meta nkunu qed ngħinu lill-oħrajn.

Ġesù, Ġużeppi u Marija għinnuna biex inħobbu lill-familha tagħna, kif intom kontu tħobbu lil xulxin.

Ammen.

Lill-familja:

F’din il-laqgħa t-tfal tgħallmu li:

• Ġesù kien jgħix f’familja
• Fil-familja ta’ Ġesù, kienu jħobbu lil xulxin, jgħinu lil xulxin, jitolbu flimkien u jieħdu gost flimkien
• It-tfal ukoll jgħixu f’familja u bħal Ġesù huma jħobbu lill-familja tagħhom, jgħinu fid-dar, jitolbu mal-familja tagħhom u jieħdu gost flimkien

Sibu ħin, forsi waqt l-ikla tal-Ħadd u tkellmu dwar dak li tieħdu gost tagħmlu flimkien bħala familja. Kulħadd għandhu jingħata ċans jitkellem. Ħudu nota ta’ dak li jgħid kulħadd biex kemm hu possibli żżidu minn dawn l-okkażżjonijiet li ssemmew.