Santa Gianna Beretta Molla

28 ta' April

Gianna Beretta twieldet fl-4 ta’ Ottubru 1922, ġewwa Magenta, Italja.  Kienet l-għaxar tifla f’familja ta’ 13-il tifel u tifla. It-trobbija tagħha kienet ġo familja tipika Kattolika taljana ta’ dak iż-żmien u rċeviet l-edukazzjoni Kattolika tagħha kemm mid-dar u anke mill-iskola. Kienet tinvolvi ruħha fl-isports popolari tal-lokal, skiing u tixxabbat mal-muntanji.  

Meta kellha għoxrin sena, bdiet l-istudji tagħha fil-mediċina fl-Università.  Aktar tard fis-sena 1949, hi gradwat mill-Università ta’ Pavia, kemm fil-mediċina u anke fil-kirurġija. Kien għalhekk li fis-sena 1950, hi fetħet klinika fir-raħal fejn twieldet – Magenta. Baqgħet tistudja u speċjalizzat fil-pedjatrija mill-Università ta’ Milan, biex tkun tista’ tagħti attenzjoni speċjali lill-ommijiet u lit-trabi.  

Kien hemm żmien meta Gianna, ikkunsidrat li tingħaqad ma ħuha, li kien qassis, il-Brażil. Imma rrealizzat li l-missjoni tagħha kienet fil-mediċina f’pajjiżha. Saret membru tas-Soċjetà ta’ San Vinċenz de Paul, u ddedikat is-servizz appostoliku tagħha lin-nies fil-bżonn u lill-anzjani. Offriet anke s-servizzi tagħha lill-Azzjoni Kattolika, moviment lajk li hu mpenjat li jxerred it-Tagħlim Nisrani.  

Meta kellha 32 sena, hi ltaqgħet ma’ wieħed inġinier jismu Pietro Molla, iżżewwġu fl-1955 bil-ħsieb li jħaddnu iż-żwieġ u l-bini ta’ familja Kattolika soda bħala vokazzjoni. Bejn is-snin 1956 u 1959 huma kellhom tlett itfal: Pierluigi, Maria Zita u Laura. Imbagħad fl-1961 saret taf li ser ikollha r-raba’ tarbija.  

Kmieni fit-tqala tagħha ndunaw li barra li kienet qegħda ġġorr tarbija kellha wkoll tumur. Kien hemm numru ta’ għażliet quddiema, inkluż l-abort, li kien jista’ jsalvalha ħajjitha imma mhux dik tat-tarbija tagħha. Hija għażlet li tipprova tneħħi t-tumur u ssalva lit-tarbija. L-operazzjoni kienet suċċess u t-tqala tagħha kompliet, iżda mhux mingħajr kumplikazzjonijiet. Gianna kompliet bil-ħajja u x-xogħol tagħha sakemm Gianna weldet it-tarbija u semmietha Emanuela. 

Madankollu, wara t-twelid tat-tarbija, Gianna żviluppatilha marda, peritonite settika, infezzjoni li xterditilha fid-demm tagħha. Mietet fit-28 ta’ April 1962, ġimgħa wara li weldet lill-bintha.  

Meta kibret, t-tifla tagħha Gianna Emanuela, hi wkoll saret tabiba. Fis-sena 2004, hi kienet preżenti għall-kanonizzazzjjoni ta’ ommha, flimkien ma’ missierha Pietro Molla u l-familja tagħhom.  

Santa Gianna Beretta Molla ġiet kanonizzata għall-erojiżmu tagħha talli kienet lesta li tmut għall-bintha u hekk kif matul it-tbatija tagħħa nsistiet: “Jekk trid tiddeċiedi bejni u t-tarbija, toqgħodx lura: agħżel it-tarbija.”  

L-istorja tal-ħajja ta’ Santa Gianna Beretta Molla tippreżenta sitwazzjoni delikata li mhux faċli titkellem fuqha mat-tfal . Wieħed jista’ jikkonsidra wkoll li ma jibdiex djalogu fuq din il-kwisjoni ta’ saħħa ta’ omm li qed tistenna tarbija u tat-tarbija li qegħda fil-ġuf tagħha. Ħallu t-tfal jistaqsu l-mistoqsijiet huma, għaliex l-mistoqsijiet tagħhom jistgħu jiggwidaw x’tip ta’ diskussjoni hija addatta skont l-età tagħhom.   

  •  Agħti tweġibiet sempliċi skont ma jistaqsu t-tfal. Huma mhux lesti li jisimgħu ħafna spjegazzjoniet. 
  •  Irridu niftakru li t-tfal għandhom reazzjonijiet differenti mill-adulti meta jiltaqgħu ma’ esperjenzi b’sensittività emozzjonali. Dawn jistgħu jqanqlu fihom biża u ansjetà, speċjalment jekk xi ħadd fil-familja tagħhom ikun għaddej minn sitwazzjoni simili jew kundizzjoni medika.  
  • Tista’ ssib li tgħinek tispjega li minn dak iż-żmien li kienet tgħix Santa Gianna sallum, saru passi kbar fix-xjenza u l-kura medika għas-saħħa kemm tal-omm kif ukoll tat-tarbija. 
  •  Forsi l-akbar tagħlima li wieħed jista’ jieħu minn Santa Gianna hija l-altruiżmu sħiħ tagħha.  
  • Qatt mhu kmieni wisq biex immexxu lil uliedna biex kuljum jagħmlu għażliet żgħar ta’ altruiżmu biex b’hekk jippreparaw għall-għażliet akbar aktar tard fil-ħajja.  
  • Waħda mill-ewwel kliem li t-tfal jitgħallmu jgħidu hija ‘tiegħi’ u din jużawha l-ħin kollu biex jitolbu għall-ġugarelli, l-ikel u għall-ħelu, anke mal-adulti qrib tagħhom! Din l-inklinazzjoni naturali se tiżviluppa f’sens ta’ intitolament li jġiegħel lil uliedna jitimgħu l-ego tagħhom u jistennew li kulħadd jagħmel minn kollox biex jisodisfa l-bżonnijiet tagħhom, u b’hekk jiżviluppaw il-mentalità ta’ ‘jien, jien, jien’.   
  • Ejjew inħeġġu lil uliedna biex jaqsmu dak li għandhom u mhux jistennew li jkollhom kollox kif iridu huma kemm fil-logħob kif ukoll fl-attivitajiet.  

Ħin tat-talb 

Nitolbu:

  • Għall-ommijiet li qed jistennew tarbija. 
  • Għat-trabi fil-ġuf. 
  • Għat-tobba u l-qwiebel li jgħinu lin-nisa tqal biex ikomplu jieħdu ħsiebhom anke wara li titwieled it-tarbija. 
  • Għax-xjenzati biex ikomplu bir-riċerka tagħhom fil-kura medika.  

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.