Aħna lesti?

It-32 Ħadd ta’ Matul is-Sena

Fil-parabbola tal-għaxar xebbiet, Ġesù jisħaq fuq il-bżonn li nkunu ppreparati għal meta niltaqgħu wiċċ imb’wiċċ miegħu. Ħadd ma jaf meta ser tkun eżatt l-aħħar ġurnata ta’ ħajtu. Li nistgħu nagħmlu huwa li nippreparaw għaliha. Tisma’ l-aħbarijiet, tinduna li l-mewt ma teħlisha lil ħadd, ma hemmx età.

Ma’ liema xebbiet nistgħu nqabblu lilna nfusna? Ma’ dawk il-ħamsa l-għaqlin jew mal-ħamsa boloh? Forsi meta nisimgħu l-parabbola ngħidu: “Dejjem nisimgħu li għandna naqsmu dak li għandna. Il-ħames xebbiet għaqlin, għaliex ma tawx ftit miż-żejt tagħhom?”  Ħemm raġuni partikolari għaliex dan ma setax isir.

Toħroġ x’ħin toħroġ, dejjem tara nies li biex iżommu ruħhom b’saħħithom joħorġu jimxu. Tara oħrajn jiġru. Jista’ jkun li dawn ma jagħmluhx hekk minħabba saħħithom, iżda wkoll bħala taħriġ għal xi maratona. Jista’ jkun li hemm membri tal-familja tagħna stess li jagħmlu dan. Meta tasal il-maratona, ma nistgħux immorru aħna minflokhom, anke jekk huma nies li huma qrib ħafna tagħna, anke jekk ta’ kuljum aħna għamilna l-istess rotta tagħhom bil-karozza! Ma nistgħux immorru għall-maratona għax m’aħniex ippreparati u lanqas dawk li huma ppreparati ma jistgħu jgħinuna, għax it-tħejjija li għamlu ma jistgħux jaqsmuha ma’ oħrajn. Bl-istess mod, ħaddieħor ma jistax jagħtina mill-fidi tiegħu. Li jista’ huwa, li bl-eżempju tiegħu, aħna ninbidlu u mil-lum nibdew nieħdu l-ħajja nisranija b’serjetà u impenn.

Aħna lkoll imsejħa biex nikbru fir-relazzjoni tagħna ma’ Alla, biex ngħixu ta’ vera nsara. Hemm min jieħu dan bis-serjetà, u jimpenja ruħu sew. Li jgħix ta’ nisrani, kuljum u kullimkien, hija prijorità f’ħajtu. Madanakollu hemm min jaħsibha differenti. Forsi, b’mod żbaljat naħsbu li għadna żgħar, għad baqagħlna biex immutu, għad baqa’ żmien biex nirranġaw is-sitwazzjoni. Allura ngħixu kif nixtiequ issa, u mbagħad aktar ‘l quddiem ikun għad baqa’ biżżejjed żmien biex nieħdu l-fidi tagħna bis-serjetà. Kif għedna, ħadd ma jaf meta ser tkun l-aħħar ġurnata tiegħu. U ngħiduha kif inhi, meta nkunu drajna ngħixu b’ċerta stil ta’ ħajja mhux lakemm tibdilha. Nieħdu d-dieta per eżempju. Kemm minna nibdew dieta u malajr naqtgħu qalbna, għax drajna nieklu li rridu u x’ħin irridu. L-istess nistgħu ngħidu għat-tipjip, tisma’ lil min jgħidlek, nista’ nieqaf inpejjep meta rrid, imma lkoll nafu li dan mhux vera. Dan jiġri wkoll fil-ħajja spiritwali tagħna, jekk din mhijiex prijorità illum, għada ser insibuha aktar diffiċli.

Ġesù qiegħed jgħidilna biex nilqgħuh kuljum. Il-ħajja mgħaġġla li ngħixu tista’ taljenana minn dak li hu verament importanti. U minħabba f’dan nitilfu l-opportunitajiet li Ġesù joffrielna ta’ kuljum, li narawh f’dawk ta’ madwarna u fil-bżonnijiet tagħhom. Ma nindunawx li hu qiegħed magħna fid-diffikultajiet u l-problemi tal-ħajja tagħna. Ma nagħmlux ħin biex kuljum niltaqgħu miegħu fit-talb.

Ġesù jħallina fil-libertà biex nagħżlu. Irridu nindunaw bl-istediniet li jagħmlilna. Inkunu bħax-xebbiet għaqlin u nagħżlu li nħobbu lill-oħrajn, li naqdu lill-oħrajn. Bħala ġenituri nibdew mill-familja tagħna stess. U fuq kollox nagħmlu ħin għat-talb kemm dak personali u anke flimkien bħala familja. Niftakru wkoll, li familja li titlob flimkien, tibqa’ flimkien.

Qari mill-Evanġelju skont San Mattew (Mt 25, 1-13)

F’dak iż-żmien, Ġesù qal lid-dixxipli tiegħu din il-parabbola: “Is-Saltna tas-Smewwiet ixebbhuha ma’ għaxar xebbiet li ħarġu bl-imsiebaħ tagħhom biex jilqgħu l-għarus. Ħamsa minnhom kienu boloh u ħamsa għaqlin, il-boloh ħadu l-imsiebaħ imma ma ħadux żejt magħhom, waqt li l-għaqlin ħadu mhux biss l-imsiebaħ iżda wkoll iż-żejt fil-kwies. L-għarus iddawwar ma ġie, u għalhekk ilkoll ħadhom in-ngħas u raqdu.

Imbagħad f’nofs ta’ lejl instama’ min jgħajjat: “Ara l-għarus! Oħorġu ilqgħuh!”. Dawk ix-xebbiet qamu lkoll u ħejjew l-imsiebaħ tagħhom. Iżda l-boloh qalu lill-għaqlin: “Agħtuna ftit żejt minn tagħkom, għax l-imsiebaħ tagħna jintfew”. Qabżu l-għaqlin u qalu: “Għandu mnejn ma jibqax biżżejjed, la għalina u lanqas għalikom! L-aħjar morru għand tal-ħanut u ixtru għalikom”.

Xħin dawk marru biex jixtru jiġi l-għarus; dawk li kienu lesti daħlu miegħu għall-festa tat-tieġ, u l-bieb ingħalaq. Saflaħħar waslu wkoll ix-xebbiet l-oħra, u bdew jgħidu: “Sinjur, Sinjur, iftħilna!”. Iżda hu weġibhom u qal: “Tassew, ngħidilkom, lilkom ma nafkomx”.

Ishru, mela, għaliex la tafu l-jum u lanqas is-siegħa”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Aħseb dwar kif tqassam il-ġurnata tiegħek. Hemm ħin ta’ talb?
  4. Tista’ tiddeskrivi l-familja tiegħek bħala waħda verament nisranija? Jekk le, ipprova li ftit ftit idaħħal dawn id-drawwiet: talb flimkien, tieħdu sehem fil-quddiesa flimkien, taqraw mill-Bibbja, tgħinu lill-oħrajn, li taraw li l-kliem li tużaw bejnietkom ikun kliem ta’ mħabba, li tipprattikaw il-maħfra. Tistgħu wkoll tingħaqdu ma’ grupp nisrani fi ħdam il-Knisja, li jista’ jgħinkom, kemm bħala familja, kif ukoll b’mod individwali.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mattew (25, 1-13);
    ii. Xemgħa mixgħula;
    iii. IIl-mejda jew post fejn hemm il-Bibbja, xemgħa, miksija bi drapp aħdar;
    iv. Computer/laptop bil-qari u clips.
  6. Mur fil-parti tat-tfal skont l-etajiet u għamilha flimkien magħhom.
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti tal-Prayer Spaces għall-mument ta’ talb flimkien bħala familja.

Tfal, meta intom tkunu ser tagħmlu xi party, jew tkunu ser tmorru għal xi picnic, jew ser issiefru, x’tagħmlu? Tippreparaw jew le? Ġesù, illum jgħidilna li xi darba għad niltaqgħu miegħu fil-ġenna, u rridu nibdew nippreparaw għal dik il-ġurnata mil-lum!

  • Ġesù jrid li aħna nkunu tfal bravi kuljum
  • Bibbja tat-tfal, jew nistgħu nsibu l-ġrajjiet li hemm aktar il-quddiem bħala clips fuq l-internet

Fiż-żmien ta’ Ġesù, it-tiġijiet kienu jsiru b’mod differenti. Il-bridesmaids kienu jistennew barra d-dar tal-għarusa sakemm jasal l-għarus. L-għarus kien jasal, ġeneralment kien ikun bil-lejl. Dak iż-żmien ma kellhomx mobiles biex l-għarus jgħidilhom x’ħin kien ser jasal, għalhekk ġieli kellhom jistennew għal ħin twil ħafna. Lanqas ma kellhom elettriku, kellhom biss xi fanal, jew xemgħa, jew bħal dawn ix-xebbiet xi musbieħ

Biex jixgħel, il-musbieħ ikollu ż-żejt u meta jdum mixgħul, iż-żejt jinħela u wieħed ikun irid iżid aktar. L-għarus fil-parabbola dam ma ġie, u mhux il-bridesmaids kollha kienu ġabu iktar żejt magħhom. Dawk li ma ġabux marru jippruvaw jixtru, iżda l-għarus laħaq ġie u l-party beda u dawk li marru jixtru baqgħu barra!

Intom tafu tfal, li Ġesù dejjem jgħidilna biex inkunu bravi. Ma nistgħux ngħidu, aħna għadna żgħar u nistgħu nagħmlu li rridu, meta nikbru nibdew nobdu u nkunu bravi. X’taħsbu? Jekk nidraw ngħidu l-gideb, ser ikun faċli biex ma nibqgħux ngħidu l-gideb? Jekk bħalissa ma nkunux rridu naqsmu l-ħelu li jkollna, meta nikbru ser inkunu rridu naqsmu l-ħelu? Jekk aħna meta mmorru l-knisja ma noqgħodux kwieti, meta nikbru ser noqgħodu attenti? U jekk waqt il-laqgħat tad-duttrina ma noqgħodux bravi, meta ser nibdew noqgħodu bravi? Jekk xi ħaġa nidraw nagħmluha, nibqgħu nagħmluha.  Mela aħjar nagħmlu affarijiet tajba mil-lum u nibqgħu nagħmluhom.

Hija ħaġa tajba li nippreparaw meta nkunu ser immorru għal xi picnic. 
Intom x’tippreparaw? 
U l-mama u l-papa, x’jippreparaw? 

Immaġinaw, li intom ma teħdux il-ballun, jew xi logħob ieħor magħkom. X’ser toqgħodu tagħmlu waqt il-picnic? Jew il-mama u l-papa nsew iġibu l-ikel magħhom. X’ser tagħmlu? Xi ħadd ikollu jitlaq mill-picnic u jmur lura d-dar għalih jew imur f’xi ħanut jixtri, u ma jibqax jieħu gost mal-oħrajn fil-picnic. Mela qabel ma nagħmlu xi ħaġa, nippreparaw tajjeb għaliha.

Ġesù jgħidilna li xi darba aħna ser immorru ħdejh il-ġenna. Biex immorru l-ġenna rridu nkunu tfal bravi. Ġesù jgħidilna kif għandna nkunu tfal bravi. Insibu dak li jgħidilna Ġesù fil-Bibbja. Fil-Bibbja hemm ħafna stejjer. Hemm stejjer anke ta’ qabel ma Ġesù twieled f’Betlehem. Minn dawn l-istejjer nitgħallmu kif inkunu tfal bravi. Matul din il-ġimgħa, il-ġenituri tagħkom ser jaqrawlkom jew jurukom, xi stejjer mill-Bibbja. Wara tkellmu flimkien dwar x’taħsbu li qiegħed jgħidilkom Ġesù.

Nota lill-ġenituri:

Dawn huma xi stejjer li tistgħu taqraw matul din il-ġimgħa. Użaw Bibbja tat-tfal, fejn it-tfal jistgħu jsegwu l-ġrajja bl-istampi. Tistgħu wkoll issibu dawn l-istejjer fuq l-internet. Fil-parentesi hemm fejn issibu l-ġrajja fil-Bibbja, bħala referenza għalikom:

  • David u Ġonatan (1 Samwel 18-20) – tema: il-ħbiberija sinċiera
  • Rut u Nagħomi (Rut 1-4) – tema: il-ħbiberija
  • Salm 23 – tema: nafda lil Alla dejjem
  • Il-Missierna (Mattew 6, 9-13; Luqa 11, 1-4) – tema: it-talb fil-ħajja tagħna
  • Ġesù jfejjaq wieħed mifluġ (Luqa 5, 17-26) – tema: il-ħbiberija, is-sagrament tal-qrar: ngħidu sorry għall-għażliet ħżiena li nagħmlu
  • Is-Samaritan it-tajjeb (Luqa 10, 25-37) – tema: ngħinu lill-oħrajn
  • In-nagħġa l-mitlufa (Luqa 15, 3-7) – tema: Ġesù jiddejjaq meta ma nkunux bravi u jifraħ ħafna meta ngħidu sorry
  • Ġesù jfejjaq għaxar lebbrużi (Luqa 17, 11-19) – tema: Ġesù jixtieq li nitolbu u ngħidu grazzi ta’ dak kollu li jagħtina.

Irroddu s-salib.

Ġesù, aħna rridu nkunu tfal bravi. Irridu nħobbuk u nobduk. Jiddispjaċina meta nagħmlu għażliet ħżiena. Aħna rridu nkunu bħal dawk il-bridesmaids li kellhom iż-żejt magħhom u setgħu jużawh meta spiċċa dak li kien hemm fil-musbieħ.

Flimkien nisimgħu, inkantaw u niżfnu: This little light of mine u għall-lyrics.

Jekk intom qegħdin fl-iscouts, tafu li għandhom motto li jgħid: “Kunu ppreparati.” Dan mhux motto tal-iscouts biss, huwa l-motto ta’ Ġesù wkoll! Nisimgħu l-Evanġelju u naraw għalxiex Ġesù jridna nkunu ppreparati.

  • L-Ispirtu s-Santu jagħtina l-għajnujna biex ngħixu kif jixtieqna Ġesù
  • Printouts tal-musbieħ
  • Lapsijiet
  • Kuluri
  • Imqass
  • Kartonċina jew il-printout issir mal-ewwel fuq karta naqra ħoxna
  • Glue
Printout tal-musbieħ Download

Fil-parabbola tal-lum Ġesù jgħid storja dwar tieġ. F’dawk iż-żminijiet, it-tiġijiet kienu jsiru differenti mil-lum. Il-bridesmaids kienu jmorru jistennew ħdejn id-dar tal-għarusa, biex meta jasal l-għarus, kulħadd imur fejn kien ser isir it-tieġ. Il-bridesmaids ma kienux ikunu jafu l-ħin li kellu jasal l-għarus. Ġeneralment kien ikollhom idumu jistennew ħafna u l-għarus ġieli kien jasal meta jkun dalam! Ma kellhomx la torches bil-batteriji, la mobiles u lanqas dawl tal-elettriku. Meta jidlam, dawn il-bridesmaids kienu jixgħelu l-musbieħ. Il-musbieħ kien ikun żgħir tat-tafal u fih kien ikun hemm iż-żejt biex jixgħel il-ftila. Fil-parabbola ta’ Ġesù kien hemm għaxar xebbiet. Kollha kienu jafu li kien ser ikollhom idumu jistennew. Ħamsa minnhom, ġabu aktar żejt magħhom biex jużawh meta jispiċċa dak li kellhom fil-musbieħ. Kienu Scouts tajba dawn il-bridesmaids! Imma l-ħamsa l-oħra, ma tawx kas u ma ħadux aktar magħhom u kellhom imorru jfittxu biex jaraw minfejn jistgħu jixtru aktar. Waqt li kienu għand tal-ħanut, wasal l-għarus u telaq għall-festa mingħajrhom.

Aħna nafu li xi darba, aħna għad imorru l-ġenna ħdejn Ġesù. Ħadd ma jaf meta ser immorru. Ġesù jgħidilna li mhux kulħadd ser imur il-ġenna. Ser imorru biss dawk li jħobbuh u li jobduh. Ġesù jixtieq li kulħadd imur il-ġenna, imma jaf li hemm min, bħal dawk il-bridesmaids boloh, ma jippreparax dak li ser ikollu bżonn.

Aħna kif nistgħu nippreparaw biex imorru l-ġenna?
Kif ser inħobbu u nobdu lil Ġesù? (nitolbu, imorru l-quddies, nitqarbnu, inqerru, ngħinu u nħobbu lill-oħrajn, naqsmu dak li għandna, naħfru).

Importanti li dawn l-affarijiet tajbin nagħmluhom kuljum u mhux xi darba kultant! Mhux faċli li kuljum insibu ħin biex nitolbu, mhux dejjem ikollna aptit ngħinu lill-oħrajn. Ġesù jafu dan. Għalhekk huwa tana rigal ieħor biex jgħinna. Minbarra li tana nies bħall-ġenituri, saċerdoti, katekisti u ħbieb biex jgħinuna ngħixu ħajja tajba, u jgħinuna nagħmlu għażliet tajba, Ġesù tana wkoll lill-Ispirtu s-Santu. Meta tkunu Year 7 jew u ser tiċċelebraw sagrament ieħor – is-Sagrament tal-Griżma tal-Isqof. Matul dawn is-snin, u matul il-bqija tal-ħajja tagħkom, ser tibqgħu titgħallmu kif l-Ispirtu s-Santu jista’ jgħinnkom, jagħtikom il-kuraġġ u l-qawwa biex intom tagħmlu dak li jixtieq Ġesù. L-Ispirtu s-Santu jgħinna biex aħna nkunu bħal dawk ix-xebbiet l-għaqlin u mhux bħal dawk il-boloh.

Fil-printouts tal-imsiebaħ, iktbu dak li tistgħu tagħmlu biex tkunu bħax-xebbiet għaqlin. Tistgħu tiktbu aktar minn eżempju wieħed f’kull musbieħ. Tistgħu tatuhom il-kulur u jekk mhux fuq karta ftit ħoxna, waħħluhom fuq kartonċina u aqtgħu mad-dawra. Dawn l-imsiebaħ ħalluhom f’postijiet differenti mad-dar kollha: ħdejn is-sodda, mal-fridge, ħdejn il-computer, bħala bookmark fil-kotba tal-iskola, biex matul il-ġurnata tiftakru x’għandkom tagħmlu.

Inroddu s-salib

Ġesù aħna rridu nippreparaw minn issa biex xi darba niġu ħdejk fil-ġenna. Spirtu s-Santu għinna inti biex nagħmlu għażliet tajba, biex inħobbu lil kulħadd u mhux biss lil dawk li jħobbuna, li ngħinu lil kulħadd u mhux biss lil dawk li jgħinuna. Spirtu s-Santu agħtina l-ħeġġa biex nibqgħu nsiru nafu lil Ġesù. Ammen.

Flimkien nisimgħu u nkantaw: This little light of mine.

1. Fl-Evanġelju tal-lum, ix-xebbiet boloh, naqashom xi ħaġa. X'kellhom nieqes?

Correct! Wrong!

2. Skont il-parabbola tal-lum, fejn kienu x-xebbiet boloh hekk kif wasal l-Għarus?

Correct! Wrong!

3. Meta wasal l-għarus, ingħata bidu għal xi ħaġa. X'kien dan?

Correct! Wrong!

4. X'talbu ix-xebbiet boloh lis-Sinjur?

Correct! Wrong!

Fuljett Ħadd-32Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.