San Luqa

Huwa biss fl-Evanġelju ta’ San Luqa li nsibu rakkonti dettaljati dwar it-Twelid u t-tfulija ta’ Ġesù.  Jidher li dawn ir-rakkonti ġejjin mill-perspettiva tal-Madonna!  

Luqa jenfasizza l-imħabba ta’ Kristu lejn dawk li kienu mwarrba mis-soċjetà: il-foqra, il-lebbrużi, il-pagani (dawk li ma kinux Lhud), is-Samaritani (nies li l-Lhud ma kinux jassoċjaw magħhom) u n-nisa, li kienu meqjusa inferjuri f’soċjetà ddominata mill-irġiel. Luqa juri kif Ġesù kien jieħu ħsieb mhux biss lil dawk li kellhom bżonn l-għajnuna għall-bżonnijiet fiżiċi tagħhom, iżda wkoll lil dawk li kienu jixxenqu għall-ħniena u l-maħfra. 

– Iddiskuti mat-tfal: għad għandna nies fis-soċjetà tagħna li huma emarġinati (jiġifieri mwarrba, imżebilħa jew meqjusa bħala inferjuri)? Dan id-djalogu jista’ jitlaq mill-perspettivi sempliċi tat-tfal iż-żgħar (li x’aktarx  jinkludu anke qtates u klieb bla dar!) għal waħda aktar matura ma’ tfal akbar sabiex jirrealizzaw li anke fis-sena 2026 għad hemm nies imwarrba fil-marġini tas-soċjetà; il-foqra, dawk bla dar, nies ta’ razez oħra, immigranti irregolari u persuni bi bżonnijiet speċjali, kemm fiżiċi kif ukoll mentali.

– Ħallihom jesprimu l-fehmiet tagħhom dwar x’jista’ jkun il-kontribut pożittiv tagħhom fi ħdan iċ-ċrieki immedjati tagħhom u lil hinn minnhom. L-Evanġelju ta’ San Luqa naqraw ħafna parabboli sbieħ, bl-aktar magħrufa huma tas-Samaritan it-Tajjeb (Luqa 10: 29-37) u tal-Iben il-Ħali (Luqa 15: 11-32). Luqa bbaża r-rakkonti tal-mirakli fuq manifestazzjoni tal-fidi.  Eżempji ta’ dawn huma meta Ġesù kkalma l-maltempata (Luqa 8: 25) u meta Ġesù fejjaq il-lebbrużi (Luqa 17: 19). Tista’ tħeġġeġ lit-tfal biex ipinġu waħda minn dawn l-istejjer u jżidulha kitba qasira tal-għażla tagħhom.

Il-Ktieb tal-Atti tal-Appostli jiffoka fuq kif il-Knisja kibret fid-dinja. F’dan il-ktieb naqraw dwar il-miġja tal-Ispirtu s-Santu fuq id-dixxipli u l-ħidma tal-Appostli, b’mod partikolari dik ta’ San Pawl. Luqa ltaqa’ ma’ San Pawl u akkumpanjah fil-vjaġġ tiegħu lejn Ruma meta seħħ in-nawfraġju f’Malta. Dan l-episodju naqrawh f’Kapitlu 28 tal-Atti tal-Appostli.  Pawlu dam Malta għal ftit taż-żmien, u sakemm dam hawn xandar l-Aħbar it-Tajba lill-nies tagħna u għamel xi mirakli. Minħabba f’hekk, il-Maltin saru nsara u bdew jemmnu f’Ġesù. B’hekk, il-poplu Malti sar Kristjan u emmen fi Kristu.

San Pawl jirreferi għal Luqa bħala t-“Tabib għażiż” (Kolossin 4: 14). Luqa jibqa’ magħruf għall-attenzjoni li kien jagħti lill-bżonnijiet fiżiċi tal-oħrajn għalhekk huwa l-Qaddis Patrun tat-tobba.

Luqa kien missjunarju li vvjaġġa ħafna ma’ San Pawl.  Aħna wkoll nistgħu nkunu missjunarji u nwasslu l-Kelma ta’ Alla lill-oħrajn.

Aħna nxandru l-messaġġ tal-Evanġelju:

1. meta permezz tal-imġiba tagħna nħobbu lin-nies bil-mod kif iħobb Alla,
2. meta nkunu ġenerużi u ngħinu lill-oħrajn,
3. meta nsellmu lill-oħrajn (mhux biss lill-ħbieb tagħna!),  
4. meta nkunu lesti naħfru u nitolbu maħfra
5. meta ma nibżgħux nesprimu l-fehmiet Insara tagħna mal-oħrajn.

Dawn kollha huma modi ta’ kif nistgħu nxandru l-Kelma t’Alla.

Ħeġġeġ lit-tfal biex isemmu eżempji mill-ħajja tagħhom ta’ kuljum.

Ħin tat-talb mal-Familja:

Ħallu ftit ħin biex tapprezzaw il-fatt li Ġesù bierek lil dawk li, bħal Luqa, emmnu minkejja li “ma rawx” – Il-qawmien ta’ Ġesù mill-Imwiet (Ġwanni 20, 29). Ħeġġu lit-tfal biex jagħmlu stqarrija tal-fidi personali. Eż. “Ġesù, jien nemmen fik; nemmen li batejt u miett għalina; nemmen li qomt mill-mewt…”

Offru talb ta’ radd il-ħajr għall-ħidma tat-tobba u l-infermiera li jieħdu ħsieb il-morda f’diversi sitwazzjonijiet. Nitolbu l-interċessjoni ta’ San Luqa biex imexxihom u jipproteġihom fil-ħidma tagħhom.