San Nikola

Matul il-ġimgħat ta’ qabel il-Milied tajjeb li ngħinu lit-tfal biex isiru familjari mal-istorja tat-twelid ta’ Ġesù, mhux bħala storja minn xi ktieb komuni imma bħala storja mill-Bibbja, mill-kelma t’Alla, li twassalna biex nirriflettu u nitolbu.

• Tista’ tuża l-istejjer tal-Milied matul l-Avvent kollu.
• Tista’ tuża l-Bibbja tat-Tfal jew il-Vanġeli ta’ San Mattew u San Luqa.
• Imbagħad ikantaw xi għanja tal-Milied. Tħallix is-songs għall-aħħar ġranet biss.
• It-tfal jistgħu jpinġu xeni tal-Milied li meta jitwaħħlu ma’ xulxin juru kif ġrat l-istorja kollha. Tista’ tniżżel ukoll minn hawn.

San Nikola huwa assoċjat ħafna mal-għoti tar-rigali.

X’inhu rigal?

Huwa xi ħaġa mogħtija volontarjament biex turi affezzjoni, mingħajr ma tistenna ħlas lura.

Staqsi lit-tfal x’jiġihom f’moħħhom meta jisimgħu l-kelma ‘rigal’.  Kompli ddiskuti magħhom li r-rigali m’għandhomx għalfejn ikunu mgeżwra f’karti kkuluriti u żigarelli.   Tnejn mill-aqwa rigali li wieħed jista’ jagħti huma: il-ħin u l-imħabba

Aħna nagħtu dawn iż-żewġ rigali biex nirringrazzjaw, biex nuru l-imħabba tagħna, biex nuru li aħna ħsibna fuq dik il-persuna. Dawn jistgħu jkunu nies li jieħdu ħsiebna, ġenituri, ħbieb tal-qalb. Dawn ir-rigali jimlew bil-ferħ il-qalb ta’ min jirċevihom.

Ħeġġeġ lit-tfal biex iċemplu lin-nanniet, lill-qraba qrib jew lill-ħbieb tal-qalb sempliċiment biex jgħidu: “Kif int?” jew “Kont qed naħseb fik”. Ikun sabiħ li l-ġenituri jħallu t-tfal iċemplu huma, dan itihom aktar gost.

• Il-Milied qed joqrob. Fakkar lit-tfal li l-Milied huwa ċ-ċelebrazzjoni tal-birthday ta’ Ġesù.
• X’tip ta’ rigal nistgħu noffru lil Ġesù?
• Għinhom jiskopru li atti ta’ mħabba, xi sagrifiċċji żgħar li nagħmlu matul l-Avvent huma rigali li jogħġbu ħafna lil Ġesù.
• Ħalli lit-tfal il-kbar jiktbu l-‘kisbiet’ tagħhom tal-ġurnata fuq biċċiet tal-karti.
• Tista’ tipprepara envelopes bl-ismijiet taż-żgħar, (il-kbar jistgħu jiktbuhom huma) biex fihom jiġbru “ir-rigali” li jkunu taw lil Ġesù.

Għeżież ġenituri, l-isbaħ rigali li nistgħu nagħtu lit-tfal tagħna huma l-Ħin u l-Imħabba. Dawn huma aktar prezzjużi mill-ġugarelli li jqumu ħafna flus jew minn xi btala. Huma jibqgħu jiftakru fihom wisq aktar milli jiftakru fil-ġugarelli li jkunu nkisru jew intremew.   

Fittex dawn il-mumenti bħala ‘rigal’ speċjali tiegħek. B’hekk tkun qed tagħtihom “biċċa minn ħajtek”, għax ħajjitna hija magħmula miż-żmien.