San Nikola

Sa minn mindu kien għadu żgħir ħafna kien jgħaddi ħafna żmien jaqra l-Bibbja u kiber sod fil-fidi lest li jiġġieled għal dak li kien jemmen. Dak li kien isaħħu kienet il-Bibbja. Minn hawn kien jieħu kull informazzjoni li kien juża.

Matul il- ġimgħat ta’ qabel il-Milied tajjeb li ngħinu lit-tfal biex isiru familjari mal-istorja tat-twelid ta’ Ġesù. mhux bħala storja minn xi ktieb komuni imma bħala storja mill-Bibbja, mill-kelma t’Alla, li twassalna biex nirriflettu u nitolbu.

• Tista’ tuża l-istejjer tal-Milied matul l-Avvent kollu.
• Tista tuża xi Bibbja tat-tfal jew il-Vanġeli ta’ San Mattew u San Luqa.
• Imbagħad ikantaw xi għanja tal-Milied. Tħallix is-songs għall-aħħar ġranet biss.
• It-tfal jistgħu ipinġu xeni tal-Milied li meta jitwaħħlu flimkien jiġu juru kif ġrat l-istorja kollha. Tista tniżżel ukoll minn hawn.

San Nikola huwa assoċjat ħafna mal-għoti tar-rigali.

X’inhu rigal?

Huwa xi ħaġa mogħtija għax trid biex turi imħabba mingħajr ma tistenna xejn lura.

Tista ssaqsi t-tfal f’hiex jiftakru meta jisimgħu il-kelma ‘rigal’. Tista tkompli tiddiskuti li r-rigali mhux bil-fors dawk li jkunu mgeżwra f’karti kuluriti.  Tnejn mill-isbaħ rigali li nistgħu nagħtu huma: il-ħin u l-imħabba.

Aħna nagħtu dawn iż-żewġ rigali biex nirringrazzjaw, biex nuru l-imħabba tagħna, biex nuru li aħna ħsibna fuq dik il-persuna. Dawn jistgħu ikunu nies li jieħdu ħsiebna, ġenituri, ħbieb tal-qalb. Dawn ir-rigali jimlew bil-ferħ il-qalb ta’ min jirċevihom. Jinkuraġġuna  li nċemplu lil tal-familja jew lill-ħbieb sempliċiment biex tgħid, “Kif int?” jew “Kont qed naħseb fik.” Ikun sabiħ li l-ġenituri jħallu t-tfal iċemplu huma, dan itihom aktar gost.

• Il-Milied qed joqrob. Fakkar lit-tfal li l-Milied huwa ċ-ċelebrazzjoni tal-birthday ta’ Ġesù.
• X’tip ta’ rigal nistgħu noffru lil Ġesù.?
• Għinhom jiskopru li atti ta’ mħabba, xi sagrifiċċji żgħar li nagħmlu matul l-Avvent huma rigali li jogħġbu ħafna lil Ġesù.
• Għin lit-tfal il-kbar jitkellmu fuq dak li rebħu matul il-ġurnata..
• Tista tipprepara envelopes bl-ismijiet taż-żgħar, (il-kbar jistgħu jiktbuhom huma) biex fihom jiġbru “ir-rigali” li jkunu taw lil Ġesù.

Għeżież ġenituri, l-isbaħ rigali li nistgħu nagħtu lit-tfal tagħna huma l-Ħin u l-Imħabba. Dawn huma aktar prezzjużi mill-ġugarelli li jqumu ħafna flus jew minn xi safra. Huma jibqgħu jiftakru fihom wisq aktar milli jiftakru fil-ġugarelli li jkunu nkisru. Lit-tfal tkun tajthom “biċċa minn ħajtek” għax ħajjitna hija magħmula miż-żmien.