San Ġwann Bosco

31 ta' Jannar


San Ġwann Bosco twieled f’Becchi, raħal żgħir ħdejn Turin, l-Italja. Ma kienx martri li ħalla ħajtu għall-Fidi, hu la kien tejologu kbir lanqas xi kittieb famuż jew xi riformatur kbir tal-Knisja.

Il-kobor u l-qdusija ta’ Dun Bosco kibret mill-kariżma li kellu. Hu kien kapaċi jiġbed lejh ħafna nies speċjalment żgħażagħ. Għax hu “kien juri l-imħabba ta’ Alla”.

Fiż-żmien li kien jgħix Dun Bosco, ħafna subien, il-biċċa l-kbira tagħhom orfni, kienu jiġru mat-toroq. Kienu fqar, bil-ġuħ u llitterati. Ħafna drabi kienu jispiċċaw jisirqu, jiġġieldu, jitkellmu ħażin, iweġġgħu lil xulxin fi ġlied aħrax u jispiċċaw fil-ħabs.

Kien għal dawn is-subien li Dun Bosco iddedika l-missjoni tiegħu, ħajtu. Hu beda jiltaqa’ ma’ das-subien kull nhar ta’ Ħadd filgħodu fejn ħoloq opportunità biex jgħallem lil das-subien fuq il-Fidi, biex jgħaddu xi ftit tal-ħin jitolbu miegħu u wkoll biex jilgħabu. Bil-mod il-mod ħoloq Ċentru taż-Żgħażagħ, ftit wara ħoloq dar fejn das-subien kienu jorqdu u wkoll Oratorju.

Omm Don Bosco li b’imħabba kienu jsejħulha “Mamma Bosco” jew “Mamma Margherita”, kienet tgħinu ħafna fil-missjoni tiegħu. Kienet taqdi lis-subien f’kull bżonn tagħhom. Hija kienet qisha omm fl-Oratorju, hija kienet tgħin lit-tfal anke psikoloġikament.

Is-Salesjani bdew il-missjoni tagħhom anke hawn Malta fin-1903 u din għadha sejra sal-lum!

Billi San Ġwann Bosco kien ġej minn familja fqira u kien orfni, kellu jaħdem ħafna biex jasal fejn xtaq, li jsir saċerdot. Meta beda l-missjoni ma’ dawn it-tfal tat-triq kellu ħafna x’jinkwetah imma hu qatt ma qata’ qalbu. Hu qatt ma qata’ qalbu imma kompla bix-xogħol tal-missjoni tiegħu b’ħafna perseveranza.

Il-perseveranza hija virtu li t-tfal għandhom bżonn jiżviluppaw biex jiffaċċjaw l-isfidi għax waqt li qed jikbru jindunaw li l-ħajja mimlija sfidi.

Iddiskuti mat-tfal xi sitwazzjonijiet fejn huma għandhom bżonn ikollhom kunfidenza fihom infushom, fejn ikollhom bżonn jipperseveraw:

  • Xogħol tal-iskola,
  • attivitajiet sportivi,
  • anke fejn jirbħu jew jitilfu imqar logħoba żgħira.

Ħafna xogħol biex nitgħallmu l-perseveranza jiddependi minna l-adulti. 

Fil-messaġġi tagħna l-kbar tajjeb li jinkludu li:

L-iżbalji huma opportunitajiet biex nitgħallmu, allura m’għandniex naqtgħu qalbna meta mmorru ħażin.

Għandna nfaħħru u ninkuraġġixxu l-isforzi tagħhom meta ma jaqtgħux qalbhom.

San Ġwann Bosco kien jemmen li l-missjoni tiegħu kellha tkun ibbażata fuq l-imħabba biex issolvi l-konflitti u tbiegħed iż-żgħażagħ mill-vjolenza.

Il-vjolenza ma tfissirx bil-fors abbuż fiżiku. Tista’ tkun bil-kliem jew emozzjonalment. It-tnejn jistgħu iweġġgħu. 

Iddiskuti mat-tfal kif ħassewhom meta ġġieldu, jew kellhom xi argument sħun mal-ħbieb, mal-ġenituri jew membri oħra tal-familja.

Kif ħassewhom? X’għamlu? Kif ħassewhom wara?

Meta u kif jaħsbu li huma ġabu l-paċi jew ġabu l-ġlied?

Iddiskuti l-ħiliet biex tirranġa xi ġlied:

  1. Ieqaf u aħseb qabel ma tagħmel xi ħaġa.
  2. Uża messaġġi fejn turi x’inti tħoss bħal “ Inħossni mweġġa meta…” 
  3. Iddiskuti biex issib soluzzjoni jew kompromess.
  4. Itlob skuża meta hemm bżonn.

Meta aħna l-kbar inkunu involuti f’xi konflitt u fl-istess ħin inkunu rridu nikkoreġu, tajjeb li nagħmlu dan fil-privat meta aħna t-tnejn inkunu kkalmajna. Tajjeb ukoll li nispiċċaw b’kelma ta’ nkuraġġiment f’kuntest ta’ mħabba.

Waqt ħin ta’ talb nirringrazzjaw l’Alla li:

  • pprovdielna l-għalliema u katekisti li jużaw ħinhom biex jippreparaw lezzjonijiet biex jgħallmuna
  • għal ħafna nies qalbhom tajba li addottaw it-tfal u li jħobbuhom u jgħinuhom jikbru bla ħafna tbatija

Nitolbu l’Alla biex juri t-triq it-tajba lil dawk li  tbegħdu minnU. Nitolbu wkoll lill-Madonna biex tgħinna nimxu wara Ġesu’ bil-ferħa.

Bħalma kien jgħid San Ġwann Bosco, ejja nagħmlu ħilitna mill-aħjar li nistgħu biex naqdu d-doveri tagħna fid-dar, fl-iskola, waqt ix-xogħol u waqt il-logħob biex naqdu lill-Mulej bil-ferħ.  

Għalkemm missier Dun Bosco miet meta kien għadu żgħir, u hu trabba f’familja fqira, ommu xorta waħda ħeġġietu sabiex ikompli jistudja. Hu sar saċerdot u għen bosta tfal orfni u żgħażagħ. Dun Bosco dejjem ħabb u jara li kulħadd hu kuntent!

Ejjew naraw dan il-film dwar il-ħajja ta’ San Ġwann Bosco.

Inħobbu u nieħdu ħsieb xulxin!

Aqbad ftit karti u ikteb messaġġi differenti fejn turi li tħobb, tgħin u titlob għall-oħrajn. Qassam dawn ma’ sħabek l-iskola, mal-familja u ma’ dawk li huma weħidhom. Dawn l-azzjonijiet iż-żgħar jistgħu jagħmlu lill-oħrajn kuntenti!

TpenġijaNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.