San Ġwann Marija Vianney

4 t’Awwissu

San Ġwann Marija Vianney huwa aktar magħruf magħna bħala l-Kurat t’Ars (Kurat hija kelma oħra minflok Kappillan).

Fi żmien it-tfulija tiegħu, Vianney kien jgħix fi Franza. Kienet għaddejja r-Rivoluzzjoni Franċiża u kien żmien imqalleb ħafna. In-nies ma setgħux jipprattikaw ir-Reliġjon u l-quddies u t-tqarbin kien isir bil-moħbi ġo xi dar. Ta’ 13-il-sena, rċieva l-Ewwel Tqarbin bil-moħbi fir-razzett ta’ missieru waqt li l-ħaddiema baqgħu jaħdmu bħas-soltu biex ma jiġbdux l-attenzjoni tal-Awtorità Rivoluzzjonarja.

Vianney żamm sod fit-twemmin tiegħu u minkejja li ma kienx intelliġenti ħafna, il-Mulej għażlu biex isir saċerdot magħruf għall-kelma ħelwa u konvinċenti tiegħu, li wasslet biex ħafna nies iduru lejn il-Mulej. Dan seħħ f’Ars, villaġġ żgħir fi Franza, fejn hu kien kappillan.

Bil-ħidma tiegħu, għalkemm tidher sempliċi, imma sinċiera u ġenwina, ibbażata fuq ħajja eżemplari u mħabba lejn Ġesù, huwa kabbar il-familja tal-parroċċa.

Il-Papa Piju, erba’ snin wara li għamlu qaddis, ħatru bħala l-qaddis Patrun tal-Kappillani u l-Qassisin.

Aħna mdawwrin bi knejjes sbieħ u b’saċerdoti li lesti jagħtu servizz kuljum. Spiss nieħdu din il-barka “for granted.” Ma napprezzawx din il-famija, magħmula mill-parroċċa tagħna, famija li tgħaqqadna mal-familja universali – il-Knisja Kattolika.

Ejjew ngħinu lit-tfal jaraw il-knisja parrokkjali aktar bħala familja!

Ħeġġeġ lit-tfal jagħmlu proġett żgħir fuq il-parroċċa tagħkom. Issuġġerilhom li jagħmluha ta’ ġurnalisti u jfittxu informazzjoni (jekk it-tfal żgħar, agħtihom din l-informazzjoni inti). Ikun interessanti għalihom li jsibu okkażjoni li huma stess jitkellmu mal-kappillan u jsiru familjari miegħu.

Jistgħu jiġbru informazzjoni fuq:

  • X’jismu l-Kappillan
  • Ix-xogħol tal-Kappillan
  • Lil min iddedikata l-Parroċċa
  • Id-data tal-Festa tal-Parroċċa
  • Il-ħinijiet tal-Quddies
  • Jekk fil-Parroċċa hemmx:
    • Saċerdoti oħra
    • Knejjes oħra
    • Kunventi ta’ patrijiet u sorijiet
    • Għaqdiet tal-lajci li jaħdmu fil-Parroċċa

Numru ta’ parroċċi flimkien jiffurmaw Djoċesi, li tkun immexxija minn Isqof. Il-Parroċċi ta’ Malta huma magħqudin f’Arċidjoċesi mmexxija mill-Arċisqof u mill-Isqof li jgħinu. Il-Parroċċi t’Għawdex huma magħqudin fi Djoċesi mmexxija mill-Isqof. It-tfal jistgħu jfittxu l-ismijiet ta’ dawn l-Isqfijiet.

Fil-Ħin tat-Talb mal-Familja:  ħeġġeġ lit-tfal biex jgħidu talba ta’ radd il-ħajr lil Alla għall-knisja parrokkjali tagħhom, għall-knejjes li għandna madwarna, għas-saċerdoti kollha li jwasslulna lil Kristu Ħaj waqt l-Ewkaristija.

San Ġwann Maria Vianney twieled f’familja fqira ta’ bdiewa tant li hu kien jirgħa n-nagħaġ. Kienet diffiċli ħafna li Vianney isir saċerdot imma hu qatt ma qata’ qalbu. Meta sar qassis, hu kien Kappillan ta’ Ars fejn hawn in-nies kellhom apatija lejn Alla imma bid-determinazzjoni tiegħu, Vianney ressaq ħafna nies lejn Alla speċjalment permezz tas-Sagrament tal-Qrar.

Illum għażel “puzzle” biex tagħmilha. Importanti li ma tieqafx f’nofs din l-attività biex inti titgħallem ma taqtax qalbek u tkun determinat biex tlesti din il-“puzzle.”

Logħba oħra hi li tpoġġi gallettina fuq moħħok. Bil-movimenti ta’ wiċċek biss, prova wassal il-gallettina sa’ ħalqek biex tikolha mingħajr ma tmissha b’idek! Jekk taqa’, taqtax qalbek, ibqa’ prova! Jekk tkun determinat jirnexxilek żgur!

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.