San Publiju

Iddiskuti mat-tfal jekk jafux fatti oħra li ġraw fil-Mediterran. Għinhom jifhmu kemm ibatu l-immigranti fuq id-dgħajjes fil-Mediterran. Għinhom jifhmu kemm hu serju l-fatt li ssalva n-nies irrispettivament mill-kulur tal-ġilda, il-kultura u t-twemmin. Għinhom isibu modi kif jistgħu jgħinu lil dawn it-tfal refuġjati li jkunu magħhom l-iskola.

Il-ftit li għandna miktub fuq San Publiju jurina l-ġenerożita’ tiegħu u l-ospitalita li kellu. Hu ħa azzjoni biex juri l-imħabba li kellu lejn min ibati. Dan jinvolvi li naqsmu dak li għandna u li nkunu ġenerużi. Forsi f’din il-pandemija mhux idejali li nilqgħu nies ġo darna għalkemm tajjeb li ninkuraġġixxu t-tfal li jekk ikun ġej xi ħadd jiġi minna bħan-nanniet u zijiet, li jilqgħuhom bil-ferħa. Tajjeb li naħsbu wkoll f’xi affarijiet bħal ħwejjeġ, gvieret, ġugarelli, jew logħob li nistgħu nagħtu lil xi refuġjati.

Malta baqgħet iżżomm il-Fidi Nisranija li ppriedkalna San Pawl immexxija mill-Isqfijiet tagħha. L-isqof t’Għawdex li kellna qabel ġie magħżul Kardinal u issa jgħix Ruma. Tajjeb li ninkuraġġixxu t-tfal biex jitgħallmu l-ismijiet tal-mexxejja tal-knisja. Tista’ tagħmel chart bl-ismijiet u xi ritratti ta’ dawn il-mexxejja .

Tista tissuġġerixxi li t-tfal jiktbu ittra jew email lil dawn il-mexxejja jirringrazzjawhom għax-xogħol tagħhom u jwegħduhom it-talb tagħhom. San Publiju huwa wieħed mill-Padruni ta’ Malta u ukoll Padrun tal-parroċċa tal-Furjana. Inkuraġġixxi t-tfal isibu stampi tal-Padrun tal-parroċċa tagħhom u wkoll jiktbu fuqhom.

Iddedika ftit ħin ta’ talb għall-Mexxejja tal-Knisja. Semmihom b’isimhom. Nirringrazzjaw ‘l Alla li tana lil dawn il-mexxejja biex jiggwidawna fil-Fidi. Nitolbu biex Alla jkompli jgħinhom u jqaddishom. Nitolbu wkoll għall-immigranti li kellhom jitilqu pajjiżhom u jaħarbu bil-baħar. Nitolbu speċjalment biex il-Bambin jeħlishom mill-perikli tal-baħar speċjalment fix-xitwa. Inpoġġuhom taħt il-protezzjoni tal-Madonna, Omm Alla.