San Publiju

22 ta' Jannar

Fl-Atti tal-Appostli 28, 7-10, Publiju jissemma b’mod prominenti ħafna. Madankollu, dan il-qaddis hu marbut mill-qrib mat-tradizzjoni Maltija.

Kienet is-sena 60 W.K. meta Malta kienet taħt il-ħakma Rumana. Il-Maltin kienu meqjusa bħala barbari għax ma kinux jitkellmu la bil-Latin u lanqas bil-Grieg. Ir-Rumani għażlu lil Publiju, Malti ta’ prestiġju għoli, biex iżomm l-ordni u jamministra l-Ligi Rumana fil-gżira. Kien ngħata t-titlu ta’ Protos jew Prinċep, bħala rappreżentant tal-poplu.

Vapur fi triqtu lejn Ruma b’276 persuna abbord – il-biċċa l-kbira tagħhom kienu priġunieri, fosthom San Pawl – inkalja mal-kosta Maltija.  San Luqa jirrakkonta, “Fl-inħawi kien hemm l-artijiet tal-kap tal-gżira, li kien jismu Publiju. Hu laqagħna u żammna għandu bi ħbiberija kbira għal tlett ijiem.” Dak il-ħin stess, San Pawl fejjaq lill-missier Publiju, li kien marid serjament bid-diżenterija.

Publiju ħa ħsieb li, matul it-tliet xhur li damu hawn in-nies li kienu salvaw mill-għarqa, jingħataw dak kollu li kellhom bżonn għall-ħtiġijiet bażiċi tagħhom.  Barra minn hekk, il-Maltin għabbew fuq il-vapur il-provvisti meħtieġa meta dan kien lest biex jieħu lill-ekwipaġġ u lill-priġunieri fi triqithom lejn Ruma (Atti 28, 10).

Meta San Pawl telaq mill-gżira flimkien mal-oħrajn, Publiju mhux biss kompla jirrappreżenta l-Liġi Rumana fil-gżira, imma sar il-bniedem li beda jippromovi l-Fidi Nisranija. Huwa beda jwettaq ir-rwol ta’ Isqof ta’ Malta.

Huwa maħsub li San Publiju miet martri waqt il-persekuzzjoni tal-Insara fi żmien l-Imperatur Adrijanu. Il-poplu Malti huwa grat lejn San Publiju għax kien permezz tiegħu u ta’ San Pawl li l-Kristjaneżmu wasal f’Malta u kompla jiffjorixxi minn dak iż-żmien bikri fl-istorja tal-Kristjaneżmu.

San Publiju hu wieħed mit-tliet Qaddisin Patruni ta’ Malta flimkien ma’ San Pawl u Santa Agata.

Iddiskuti mat-tfal jekk humiex konxji ta’ sitwazzjonijiet simili li qed iseħħu fil-baħar Mediterran. Ħeġġiġhom jesprimu l-fehmiet tagħhom jekk ikunu akbar fl-età; jekk għadhom żgħar, għinhom jifhmu dwar is-sitwazzjoni ta’ qsim il-qalb tal-‘migranti fuq id-dgħajjes.

Mexxi d-diskussjoni biex huma jifhmu kemm hu serju l-fatt li ssalva n-nies irrispettivament mill-kulur tal-ġilda, il-kultura u t-twemmin. Għinhom isibu modi kif jistgħu jgħinu lil dawn it-tfal refuġjati li jkunu l-iskola magħhom.

Mill-ftit informazzjoni li għandna dwar San Publiju, jispikkaw il-kwalitajiet tal-ġenerożità u l-ospitalità tiegħu.   Hu ħa azzjoni biex juri l-imħabba li kellu lejn dawk li kienu jbatu. 

Aħna wkoll nistgħu nagħmlu dan billi naqsmu dak li għandna ma’ ħaddieħor u li nkunu ġenerużi. Tajjeb li naħsbu wkoll f’xi affarijiet li nistgħu nagħtu, bħal ħwejjeġ, gvieret, ġugarelli, jew logħob lil xi ċentru għar-refuġjati.

Malta kompliet tħaddan it-twemmin Nisrani li ppriedkalna San Pawl immexxija mill-Isqfijiet tagħna. Il-mexxejja tal-komunità Kattolika Maltija huma l-Arċisqof, L-Isqof li jgħinu u l-Isqof ta’ Għawdex. Tajjeb li ninkuraġġixxu lit-tfal biex jitgħallmu l-ismijiet tal-mexxejja tal-Knisja. Tista’ tagħmel chart bl-ismijiet u xi ritratti ta’ dawn il-mexxejja.

Tista’ tissuġġerilhom ukoll li jiktbuhom ittra jew email biex jintroduċu lilhom infushom, jirringrazzjawhom tal-ħidma pastorali tagħhom u jwegħduhom it-talb tagħhom.

San Publju huwa wieħed mill-Qaddisin Patruni ta’ Malta. Huwa wkoll il-Qaddis Patrun tal-parroċċa tal-Furjana. Tajjeb li t-tfal isiru jafu dwar il-Qaddis Patrun tal- tal-belt jew tar-raħal tagħhom.

Ħin tat-Talb mal-Familja

  • Nitolbu għall-mexxejja tal-Knisja, il-Papa, l-Arċisqof, l-Isqfijiet u s-saċerdoti.  
  • Nitolbu lil Alla biex ikompli jagħtihom is-saħħa u l-kuraġġ biex iwettqu r-rieda tiegħu.
  • Nirringrazzjaw lil Alla li tana dawn in-nies biex imexxuna fil-fidi tagħna
  • Nitolbu għall-migranti kollha, għal dawk li ġew sfurzati jitilqu minn pajjiżhom, u għal dawk li jistgħu jkunu fil-periklu li jintilfu fuq il-baħar jew fil-maltemp matul dawn ix-xhur tax-xitwa.

San Publiju kien l-ewwel Isqof ta’ Malta. Bħala mexxej, hu baqa’ kuraġġjuż u sod fil-fidi tiegħu anke f’sitwazzjonijiet diffiċli. Il-Maltin jirringrazzjaw lil San Publiju u lil San Pawl li wasslulna l-fidi daqshekk kmieni fl-istorja tal-Kristjaniżmu.

Araw dan il-vidjow biex titgħallmu aktar dwar kif jintgħażlu l-Isqfijiet.

Inkantaw u Niżfnu!

Ejjew nifrakru kif nżommu sod fil-Fidi tagħna billi niżfnu u nkantaw flimkien ma’ din id-diska.

TpenġijaNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.