Ġisem u Demm Imqaddes

Corpus Christi

Illum qegħdin niċċelebraw il-festa ta’ Corpus Christi, il-Ġisem u d-Demm Imqaddes ta’ Ġesù. Il-qari tal-quddiesa kollha jiffukaw b’xi mod fuq din it-tema. L-ewwel qari mill-ktieb tad-Dewteronomju tenfassiza wkoll l-importanza tal-Kelma ta’ Alla fil-ħajja tagħna.

L-Evanġelju tal-lum huwa minn San Ġwann, li ma jagħtix ir-rakkont tal-aħħar ċena kif qegħda fl-evanġelji l-oħra, imma minflok insibu diskors twil tal-ġrajja tat-tkattir tal-ħobż u ħut. Wara dan il-miraklu, jew kif imsejħa fl-Evanġelju ta’ San Ġwann, sinjal, in-nies aktar ifittxu lil Ġesù. Lin-nies jgħidilhom li l-manna fid-deżert sostniet lil-Lhud fid-deżert. Imma din tagħthom biss is-saħħa fiżika meħtieġa. Issa Ġesù, jgħid li hu l-ħobż tal-ħajja, u dan mhux bħall-manna, għax l-effett tal-manna hu temporanju, Ġesù wegħdna li l-ġisem tiegħu jagħtina s-salvazzjoni ta’ dejjem. 

Min sema’ lil Ġesù jgħid dan il-kliem, li se jagħti ġismu bħala ikel, ma setgħax jifhmuh. Imma dak li jagħmel Alla, aħna mhux bil-fors nifmuh. Għalhekk jissejjaħ misteru. Misteru mhuwiex xi sigriet li Alla jrid jaħbi minna allura jkollna nemmnuh ta’ bilfors. Misteru huwa xi ħaġa li bil-limitazzjonijiet tal-moħħ tagħna aħna ma aħniex se naslu li nifhmu. Bl-għajnuna tal-Ispirtu s-Santu u aktar ma nikbru fir-relazzjoni tagħna ma’ Alla, aktar nifhmu l-misteri, iżda mhux se nifhmuhom jew nirraġunawhom bħalma nsolvu xi problema matematika!

Meta nitqarbnu Ġesù isir parti minna, kif il-ħobż u l-inbid isiru parti minn ġisimna, Ġesù jsir parti mir-ruħ tagħna. Hekk kif l-Ispirtu s-Santu jibdel il-ħobż u l-inbid, fil-ġisem u demm ta’ Kristu, hekk jgħin lilna wkoll biex bit-tqarbin nersqu eqreb ta’ Ġesù u tal-oħrajn.

Qari mill-Evanġelju skont San Ġwann (Ġw 6, 51-58)

F’dak iż-żmien, Ġesù qal lin-nies: “Jiena hu l-ħobż il-ħaj, li niżel mis-sema. Jekk xi ħadd jiekol minn dan il-ħobż jgħix għal dejjem. U l-ħobż li jiena nagħti huwa ġismi għall-ħajja tad-dinja”. Fuq hekk il-Lhud tlewmu bejniethom, u bdew jgħidu: “Kif jista’ dan jagħtina ġismu biex nikluh?”. Ġesù mela qalilhom: “Tassew, tassew ngħidilkom, jekk ma tiklux il-ġisem ta’ Bin il-bniedem u ma tixorbux demmu, ma jkollkomx il-ħajja fikom. Min jiekol ġismi u jixrob demmi għandu l-ħajja ta’ dejjem, u jiena nqajmu mill-imwiet fl-aħħar jum. Għax ġismi huwa tassew ikel, u demmi hu tassew xorb.

Min jiekol ġismi u jixrob demmi jibqa’ fija u jiena fih. Bħalma bagħatni l-Missier, li hu ħaj, u jiena ngħix b’Missieri, hekk ukoll min jiekol lili, hu wkoll jgħix bija. Dan huwa l-ħobż li niżel mis-sema; mhuwiex bħal dak li kielu missirjietkom u mietu; min jiekol dan il-ħobż jgħix għal dejjem”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. San Irinew jgħid, il-mod ta’ ħsieb tagħna huwa sintonizzat għall-Ewkaristija, u l-Ewkaristija, tikkonferma l-mod kif naħsbu.” Staqsi lilek innifsek, “jien sintonizzat/a għall-Ewkaristija?” Jekk le, x’qiegħed iżommni l-bogħod minn dan l-ikel spiritwali?
  4. Ftakar, li l-Ewkaristija hija l-akbar rigal li jagħtina Alla. Huwa ikel għal din il-ħajja u għal dik li ġejja. Bħala nisranija hija l-quċċata tal-ħajja tagħna. Matul din il-ġimgħa pprova ersaq għall-Ewkaristija aktar minn darba.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    a. Bibbja bil-qari minn San Ġwann (6, 51-58)
    b. Xemgħa mixgħula
    c. Il-mejda jew post fejn hemm il-Bibbja u xemgħa miksija bi drapp abjad
    d. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Illum niċċelebraw il-festa tal-Ġisem u d-Demm Imqaddes ta’ Ġesù. Fl-Evanġelju tal-lum Ġesù jgħidilna li meta nitqarbnu aħna nsiru persuni aħjar, insiru nixbħuh u nsalvaw.

  • Ġesù hu l-ħobż tal-ħajja, hu jagħtina l-ħajja ta’ dejjem
  • Ġesù wkoll irid jaqsam il-ħajja tiegħu magħna, permezz tat-tqarbin, għax hu jħobbna
  • 500g tqiq plain
  • 4g ħmira
  • Ftit melħ
  • 325ml ilma fietel

Il-ħobż huwa ikel sempliċi, li jittiekel f’ħafna pajjiżi madwar id-dinja, u nsibu kwalitajiet differenti ta’ ħobż ukoll. Tistgħu ssemmu xi kwalitajiet ta’ ħobż? Hemm il-ħobż abjad, hemm dak ismar, dak imsejjaħ multigrain, naan, ciabatta, pitta, fost oħrajn. Intom tafu li hemm numru ta’ nies li jagħtu sehemhom biex isir il-ħobż? (il-bidwi, il-furnar, tal-ħanut) Fl-Evanġelju tal-lum, Ġesù jgħid li hu ‘l-ħobż tal-ħajja’ u min jiekol minn dan il-ħobż jgħix għal dejjem. Ġesù kien qiegħed jitkellem dwar ħobż speċjali ħafna. Hu kien qiegħed jitkellem dwar l-Ewkaristija. Numru minnkom għadkom kif iċċelebrajtu l-Ewwel Tqarbina tagħkom; din kienet ġurnata speċjali ħafna. Kull darba li imorru l-quddies, u nirċievu l-Ewkaristija, Ġesù jiġi għandna u aħna naqsmu l-ħajja tiegħu għax hu jħobbna. Jekk nixtiequ nkunu bħal Ġesù, irridu nagħmlu bħalu, irridu nħallu lil Ġesù jgħidilna kif jixtieq li ngħixu. Dan mhux dejjem faċli. Ħafna drabi rridu kuraġġ kbir biex nobdu lil Ġesù.

Issa ser nagħmlu ftit ħobż u naħsbu dwar kif Ġesù, jixtieqna li ngħixu. L-ewwel pass: inħaltu l-ingredjenti flimkien ġo skutella. It-tieni pass: nagħġnu l-għaġina.  Waqt li qed tagħġnu l-għaġina aħsbu dwar dawk l-affarijiet li jirrabjawk, jew jagħmlulek qalbek sewda, u offrihom lil Ġesù. Ftakar li Ġesù ta ħajtu għalina, fuq salib, sabiex kollox jista’ jiġġedded. It-tielet pass: nistennew! Aqsmu l-għaġina fi tnejn u poġġuhom ġo skutelli separati. Għattu l-iskutelli bil-cling film u ħalluhom għal sagħtejn. Waqt li l-ħmira qed tgħola, aħsbu kif tistgħu tikbru bħala familja, kif jixtieq Ġesù. Tistgħu titolbu aktar? Tistgħu wkoll turu aktar ħniena ma’ xulxin u taqsmu dak li għandkom flimkien. Ir-raba’ pass: aħmu l-ħobż. Ixgħelu l-forn fuq temperatura ta’ 2000C. Fuq tilar midluk bil-butir jew miksi bil-karta tal-forn, poġġu l-għaġina li tkun iffurmajt f’forma ta’ ħobża żgħira. Aħmu għal nofs siegħa jew sakemm tara li saret. Waqt li l-ħobż qiegħed isir, aħsbu dwar dawk in-nies li ma għandhomx x’jieklu, għid talba biex ma jkunx hawn aktar ġuħ u faqar. Il-ħames pass: nieħdu gost nieklu l-ħobż flimkien u ma ninsewx nagħtu l-ħobża l-oħra lil xi ħadd, biex naqsmu l-imħabba u x-xogħol tagħna ma’ oħrajn. Qabel ma tagħmlu dan, għidu grazzi lil Alla għal dan il-ħobż.

Mulej Alla, grazzi tax-xemx u tax-xita li jkabbru l-frott u l-ħxejjex. Grazzi Mulej, tal-ikel li nieklu. Grazzi Mulej, li inti tieħu ħsiebna. Għinna biex aħna naqsmu dak kollu li għandna.

Isimgħu s-song, You are the bread of life.   

Illum niċċelebraw is-Solennità tal-Ġisem u tad-Demm Imqaddes ta’ Ġesù, Corpus Christi. Ġesù tana r-rigal tiegħu nnifsu fl-Ewkaristija.

  • Ġesù jqabbel lilu nnifsu mal-ħobż; hu differenti mill-ħobż li nieklu, għax dak li jagħtina Ġesù jibqa’ għal dejjem
  • Bħalma l-ħobż issir parti minna meta niekluha, hekk ukoll Ġesù jixtieq jiġi għandna fit-tqarbin

(b’dan l-ammont nagħmlu 2 ħbejżiet żgħar, jekk tixtiequ tagħmlu aktar, żidu l-ingredjenti skont il-bżonn)

  • 500g tqiq plain
  • 4g ħmira
  • Ftit melħ
  • 325ml ilma fietel

Fl-Evanġelju tal-lum, Ġesù jwiegħedna l-ħajja ta’ dejjem. Hu jgħid li hu l-ħobż li jwassalna għal din il-ħajja. Meta ninġabru għall-quddiesa, nirċievu l-Ewkaristija, aħna ningħaqdu ma’ Ġesù b’mod speċjali u ma’ xulxin, biex niffurmaw il-Ġisem ta’ Kristu – familja waħda.

Il-ħobż huwa ikel komuni llum, bħalma kien fi żmien Ġesù. Hemm ħafna tipi differenti ta’ ħobż. Tistgħu taħsbu f’xi ftit minnhom? Ħobż abjad, ismar, bagels, baquettes, pitta, naan, huma biss xi ftit minnhom. Il-ħobż isostnina u jtaffielna l-ġuħ. Biex inkunu nistgħu nifhmu l-Evanġelju tal-lum, irridu nkunu nafu x’kienet il-ġrajja li seħħet qabel. Folla kbira kienet inġabret biex tisma’ lil Ġesù. Ġesù kien bierek ħames ħobżiet u żewġ ħutiet, u ta jieklu aktar minn 5000 persuna. Minħabba dan il-miraklu kien hemm ħafna nies li emmnu li Ġesù ġie mingħand Alla. Il-ġurnata ta’ wara, din il-folla ta’ nies baqgħet miexja wara Ġesù, riedu jaraw miraklu ieħor; iżda minflok, Ġesù jispjega l-miraklu, is-sinjal, li hu kien għamel u kompla jgħid li hu kien jagħtihom ħobż ħaj mis-sema. Kulmin jiekol minn dan il-ħobż, jgħix għal dejjem. Ġesù jgħix f’dawk kollha li jieħdu minn dan il-ħobż. Ġesù kien qiegħed jitkellem dwar ir-rigal speċjali tal-Ewkaristija. Fl-Ewkaristija, il-ħobż u l-inbid, jinbidlu u jsiru l-Ġisem u d-Demm ta’ Kristu. Meta nieħdu sehem fl-Ewkaristija, Ġesù jkun qiegħed preżenti magħna, u permezz tal-komunjoni tagħna (tal-għaqda) tagħna, aħna naqsmu l-ħajja ta’ dejjem.

Ser nagħmlu l-ħobż tagħna u naqsmuh mal-familja u ħbieb. Ara li għandek l-ingredjenti kollha.

L-ewwel pass: inħalltu l-ingredjenti flimkien ġo skutella. It-tieni pass: naġnu l-għaġina. It-tielet pass: nistennew! Naqsmu l-għaġina fi tnejn u npoġġuhom ġo skutelli separati. Ngħattu l-iskutelli bil-cling film u nħalluhom għal sagħtejn. Ir-raba’ pass: naħmu l-ħobż. Nixgħelu l-forn fuq temperatura ta’ 2000C. Fuq tilar midluk bil-butir jew miksi bil-karta tal-forn, poġġu l-għaġina li tkunu ffurmajtu f’forma ta’ ħobża żgħira. Aħmu għal nofs siegħa jew sakemm taraw li saret. Il-ħames pass: ħudu gost tieklu l-ħobż flimkien. Tinsewx tagħtu l-ħobża l-oħra lil xi ħadd, biex taqsmu l-imħabba u x-xogħol tagħkom ma’ oħrajn.

Inroddu s-salib

Mulej Alla, fl-ikla tal-Ewkaristija niftakru u niċċelebraw il-ħajja tiegħek fina. Għinna ngħixu flimkien bħala ġisem wieħed ta’ Kristu. Dan nitolbuh, f’isem Ġesù Kristu. Ammen,

Isimgħu din is-song, Eucharist Song.

Fuljett_ corpusNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.