Il-Bambina

Illum il-festa tat-Twelid tal-Imqaddsa Verġni Marija, jew kif nafuha wkoll, il-festa ta’ Marija Bambina jew il-Vitorja. Din hija festa solenni għalina l-Maltin, jiġifieri, il-Papa, fil-fatt kien Papa Franġisku li minħabba l-avvenimenti li ġraw f’Malta fit-8 ta’ Settembru, iddikjara li din il-festa tkun iċċelebrata bħala solennità, anke meta taħbat il-Ħadd.

Illum, aħna l-Maltin, ma niftakrux biss fit-twelid tal-Madonna, imma niftakru wkoll li bħal-lum, fl-1565, kien temm l-Assedju l-Kbir u aktar tard fl-1943, rajna t-tmiem tat-Tieni Gwerra Dinjija.

Ma hemm xejn fl-Evanġelji dwar it-twelid tal-Madonna jew dwar it-tfulija tagħha. Li nafu huma minn kitbiet, imsejħa Apokrafa (jiġifieri kitbiet reliġjużi li nkitbu fiż-żminijiet li nkitbet l-Iskrittura, imma l-Knisja ma tqishomx li huma spirati mill-Ispirtu s-Santu, bħalma huma l-kotba tal-Bibbja). Nafu iżda li t-twelid tal-Madonna kien fil-pjan ta’ Alla biex iwettaq il-pjan ta’ salvazzjoni u jseħħ dak li kien miktub li “x-xebba titqal u tiled iben, u ssemmih Għimmanu-el.” (Is 7, 14)

Skont it-tradizzjoni, omm u missier Marija, kienu Anna u Ġwakkin. Hi twieldet fir-raħal ta’ Nazaret u l-ġenituri tagħha nisslu fiha mħabba kbira lejn Alla u fidi qawwija fih. Dan nistgħu nixduh mit-tweġiba tagħha lill-Anġlu Gabrijel, meta qalilha li hi ser tkun Omm Alla. Minħabba l-fidi qawwija u soda tagħha, hi aċċettat il-pjan ta’ Alla għaliha. Dik l-‘iva’ ta’ Marija kellha impatt tant kbir, li għandna nħossuh sal-lum.

L-Evanġelju tal-lum, huwa mill-bidu ta’ San Mattew u jagħti lista’ twila ta’ ismijiet, jibda minn Abraham sakemm jasal f’Ġesù. Hija l-ġenealoġija ta’ Ġesù. Għalkemm jista’ jkun li ma nibqgħux attenti għall-ismijiet, huwa tajjeb li narawhom sew u nkunu nafu min huma. Hija lista twila li tinkludi, irġiel u nisa, u fiha wkoll nies li għexu sew u oħrajn li għamlu għażliet ħżiena ħafna. Dan jurina li Alla ma jużax biss nies li huma mexjin fit-triq it-tajba, iżda jagħżel lil kulħadd, jagħżel nies bħalna li ma aħniex perfetti. Din il-lista ta’ nies li huma umani bħalna, turina li Alla dejjem żamm il-wegħda tiegħu li jimxi mal-poplu tiegħu.

F’din is-silta nisimgħu dwar it-tnissil ta’ Ġesù. Nafu li Marija ħarġet tqila qabel ma kienet qed tgħix ma’ Ġużeppi. Ġużeppi kien raġel ġust. Kieku kellu jimxi mal-liġi, hu kien jiċħad lil Marija u titħaġġar. Iżda hu kellu l-biża’ ta’ Alla, hu kellu fidi f’Alla, għalhekk aċċetta l-messaġġ li ngħata, biex jieħu lil Marija b’martu u jaċċetta lit-tarbija bħala l-Messija mwiegħed.

Aħna lkoll twelidna minn omm, u aħna wkoll ġenituri. Jekk inħarsu lura nindunaw li dak li aħna llum, kellhom effett fuqu dawk li rabbewna. Fi tfulitu, Ġesù kien immexxi minn ommu Marija. U nafu li anke meta beda l-ħajja pubblika tiegħu, Marija kienet preżenti wkoll, u baqgħet miegħu sa taħt is-salib. Kemm Marija, kif ukoll Ġużeppi wettqu l-missjoni tagħhom, kienu ġenituri tajba għal Ġesù u dejjem baqgħu fidili lejn Alla. Alla kien magħhom dejjem. Lilna Alla fdalna lill-uliedna. Kif qegħdin inwettqu din il-missjoni tagħna? Aħna kif qegħdin ninfluenzaw lit-tfal tagħna? Qegħdin inġibu ruħna ta’ ġenituri nsara? Bħal Marija u Ġużeppi, irridu nafdaw fih u nagħmlu dak li jixtieq. U Alla jkun magħna, imexxina u jipprovdilna dak li għandna bżonn.