Illum naqraw kif il-Fariżej niżlu minn Ġerusalemm biex imorru fejn kien Ġesù. Il-Fariżej u l-Iskribi ma kellhomx f’moħħhom li jmorru jisimgħu lil Ġesù biex jitgħallmu minnu, iżda aktar biex jiksbu xi provi li jkunu jistgħu jużaw kontrih. F’din il-ġrajja narawhom jaqbdu ma’ tradizzjoni li kellhom dwar il-ħasil tal-idejn. Dan ma kienx ħasil tal-idejn, kemm ikollhom
idejhom nodfa qabel jieklu, iżda kien ritwal sħiħ. L-oriġini ta’ dan ir-rit kien li l-idejn nodfa jirriflettu r-ringrazzjament tagħhom lil Alla għal ġid li tagħhom. Madanakollu, maż-żmien, dawn ir-ritwali bdew jiżdiedu u jidħlu f’ħafna dettall u rqaqat. Minħabba dawn l-esiġenzi, intilef l-iskop u s-sinifikat tal-ġest.
Il-Fariżej jakkużaw lil Ġesù li d-dixxipli li kienu miegħu kienu qegħdin jittraskuraw it-tradizzjonijiet reliġjużi tagħhom. Ġesù ma jaqax f’din in-nassa. Minflok, huwa jaqleb l-argument fuqhom, tant li jgħajjarhom ipokriti, “nies ta’ wiċċ b’ieħor.” Ġesù jċanfarhom għaliex għall-Fariżej, dawn ir-ritwali u tradizzjonijiet kienu importanti ħafna imma tilfu t-tifsira vera tagħhom. Il-Fariżej kienu jsegwu dawn it-tradizzjonijiet għal wiċċ in-nies u biex juru li huma aqwa mill-bqija tal-poplu. Ma tantx kienu jagħmlu dan għall-imħabba ta’ Alla, daqs kemm għall-ftaħir u l-unur personali. F’qalbhom ma kienx hemm imħabba u ħniena għall-proxxmu. Għal Ġesù dak li hemm fil-qalb tal-bniedem hu ferm aktar importanti. Ir-relazzjoni tal-persuna ma’ Alla ma setgħetx titqies minn kemm wieħed josserva dawn it-tradizzjonijiet u jieqaf magħhom biss. L-istess jgħid lilna llum, meta nagħmlu affarijiet għal wiċċ in-nies u mhux minħabba t-twemmin u l-fidi tagħna. Għalhekk per eżempju, għandna nistaqsu lilna nfusna, għalfejn immorru l-quddies nhar ta’ Ħadd? Meta nagħti karità, nagħmel hekk fil-preżenza tal-oħrajn, biex jarawni, jew inkella b’mod anonimu? Nibgħat lit-tfal għal-laqgħat ta’ katekeżi biex ikunu bħall-oħrajn u jagħmlu l-Ewwel Tqarbina u l-Ġriżma, jew għax nemmen fl-importanza tal-formazzjoni Nisranija tat-tfal?
Ġesù jwissina. Il-bniedem jagħti minn dak li għandu. Jekk qalbu mimlija għira ma jistax iħobb u jgħin lill-oħrajn. Għalhekk Ġesù jelenka dawk il-karatteristiċi koroh li bniedem jista’ jkabbar f’qalbu: “żína, serq, qtil, adulterju, regħba, ħażen, qerq, libertinaġġ, għira, malafama, suppervja u bluha.” L-ebda rit ta’ ħasil tal-idejn ma jista’ jpatti u jnaddaf dawn il-kwalitajiet ħżiena fil-bniedem. Minflok, hija biss l-aċċettazzjoni tal-Kelma ta’ Alla, u wieħed iħalli din il-Kelma tbiddlu u tnaddaflu lil qalbu.
Il-liġi ta’ Alla għandha tkun l-aktar importanti fil-ħajja tagħnan u għandha tkun hi li tmexxina. Biex nagħmlu dan irid ikollna kuxjenza ffurmata. Dan iwassal li ngħixu u nagħmlu għażliet mhux skont ma nħossu u naħsbu aħna, iżda skont ir-rieda ta’ Alla. Il-kuxjenza niffurmawha meta naqraw il-Kelma ta’ Alla, mit-tagħlim li nirċievu mill-Knisja, mill-omeliji, mid-diskussjonijiet ma’ direttur spirtwali, mix-xhieda ta’ nsara oħra.
Qari mill-Evanġelju skont San Mark (Mk 7:1-8,14-15,21-23)
F’dak iż-żmien, il-Fariżej u xi wħud mill-kittieba li ġew minn Ġerusalemm inġabru ħdejn Ġesù, u raw li xi wħud mid-dixxipli tiegħu kienu qegħdin jieklu b’idejhom mhumiex indaf, jiġifieri mhumiex maħsulin. Għax il-Fariżej, u l-Lhud kollha, biex iħarsu t-tradizzjoni ta’ missirijiethom, ma jmissux ikel qabel ma jkunu ħaslu jdejhom sewwa; hekk ukoll wara li jerġgħu lura mis-suq, ma jiklux jekk ma jinħaslux; u għandhom bosta drawwiet oħra li baqgħu marbutin magħhom minn żmien għal ieħor, bħalma huma l-ħasil tat-tazzi u tal-buqari u tal-ktieli tal-bronż. Mela, il-Fariżej u l-kittieba staqsewh: “Dan l-għala d-dixxipli tiegħek ma jġibux ruħhom skont it-tradizzjoni ta’ missirijiethom, imma jieklu b’idejhom mhumiex indaf?”
Iżda hu weġibhom: “Sewwa ħabbar Iżaija fuqkom, ja nies ta’ wiċċ b’ieħor, bħalma hu miktub: ‘Dan il-poplu bix-xufftejn biss jagħtini ġieħ, imma qalbhom hija ’l bogħod minni. Fiergħa hi l-qima li jagħtuni; jgħallmu duttrina li mhijiex għajr preċetti tal-bnedmin’. Hekk intom, twarrbu l-kmandamenti ta’ Alla biex tħaddnu t-tradizzjoni tal-bnedmin”.
Raġa’ sejjaħ in-nies lejh u qalilhom: “Isimgħuni, intom ilkoll, u ifhmuni! Ma hemm xejn minn barra li meta jidħol fi bniedem itebbgħu; imma dak li joħroġ minn ġol-bniedem, dak hu li jtabba’ lill-bniedem. Għax hu minn ġewwa, mill-qalb tal-bniedem, li joħorġu l-ħsibijiet il-ħżiena, żína, serq, qtil, adulterju, regħba, ħażen, qerq, libertinaġġ, għira, malafama, suppervja u bluha. Dal-ħażen kollu minn ġewwa joħroġ u jtabba’ lill-bniedem”.
Il-Kelma tal-Mulej
Tifħir lilek Kristu
Istruzzjonijiet u għan
- Aqra sew l-Evanġelju biex issir aktar familjari miegħu.
- Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
- Meta aħna nagħmlu eżami tal-kuxjenza, inkunu qegħdin naraw kemm qegħdin nimxu skont ir-rieda ta’ Alla. Dan l-eżerċizzju ma għandnix inħalluh biss għal meta mmorru nqerru, iżda għandhu jkun aktar ta’ spiss, jekk jista’ jkun ta’ kuljum. Jekk dan ma tagħmlux, ibda billi ssib ħin matul din il-ġimgħa u staqsi lilek innifsek xi mistoqsijiet:
a. X’post għandu t-talb fil-ħajja ta’ kuljum
b. Nafda f’Alla, jew nafda aktar fil-kapaċitajiet tiegħi jew tal-oħrajn?
ċ. X’eżempju qed nagħti
d. Kif inġib ruħi mal-bqija tal-familja, ma’ sħabi, fuq il-post tax-xogħol?
e. Nirrispetta lili nnifsu u lill-oħrajn
f. Kif nuża l-media soċjali? - Permezz tal-Evanġelju tal-lum, Ġesù urina kif ma għandnix inkunu. Min-naħa l-oħra, is-salm responsorjali tal-lum, jagħtina mudell fuq xhiex għandna nimxu. Aqrah fil-mod u itlob permezz tiegħu:
Mulej, min jgħammar fid-dar tiegħek?
Min jgħix bla ħtija u jagħmel it-tajjeb,
min jgħid is-sewwa f’qalbu;
min ma jqassasx bi lsienu.
Min ma jagħmilx deni lil ġaru,
u ma jgħajjarx lil għajru;
min ma jistmax lill-bniedem ħażin,
imma jweġġaħ lil dawk li jibżgħu mill-Mulej.
Min jislef u ma jitlobx imgħax,
u ma jixxaħħamx kontra min hu bla ħtija.
Min jagħmel dan qatt ma jitħarrek. - Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
i. Bibbja bil-qari minn San Mark (7:1-8,14-15,21-23)
ii. Xemgħa
iii. Il-mejda fejn hemm il-Bibbja, miksija bi drapp aħdar
iv. Buqar bl-ilma, fliskatur, xugaman
v. Computer/laptop bil-qari u clips - Mur fil-parti tat-tfal skont l-etajiet u għamilha flimkien magħhom
- Addatta din il-parti skont kif hemm bżonn, tiddejjaqx tkun kreattiv
- Mur fil-parti Itlob id-dar għall-mument ta’ talb flimkien bħala familja
Illum ser niltaqgħu ma’ nies imsejħa Fariżej. Il-Fariżej kienu jistudjaw il-liġi ta’ Alla, imma mhux dejjem kienu jgħixu kif jixtieq Alla! Dawn il-Fariżej jindunaw li l-ħbieb ta’ Ġesù ma kienux qegħdin jobdu d-drawwijiet tagħhom u jistaqsu lil Ġesù għalfejn qiegħed iħallihom jagħmlu hekk.
- Ġesù jgħallimna li mhux dak kollu li jidher sabiħ, huwa bilfors tajjeb.
- Ritratt tat-tifel / tifla
- Kartonċina daqs ta’ A4
- Qalb (mudell mehmuż)
- Imqass
- Gloj
- Lapes / kuluri
- Żewġ kaxex (jew aktar, skont kemm hemm tfal), waħda mgeżwra f’karta sabiħa u l-oħra mgeżwra f’karta mqatta’ jew f’gazzetta.
- Pakkett tal-ħelu jew ċikkulata jew rigal żgħir (dan jitpoġġa fil-kaxxa mgeżwra fil-karta mqatta’ jew gazzetta)
- Pakkett tal-ħelu vojt, jew wrapping taċ-ċikkulata jew xi toy imkisser (dan jitpoġġa fil-kaxxa mgeżwra sabiħ)
Illum qabel ma nibdew, ser tirċievu rigal! (il-ġenituri juru l-kaxex)
F’idejkom, biex tagħżlu liema tridu intom.
Għalfejn għażilt dik il-kaxxa u mhux l-oħra?
X’taħseb li fiha l-kaxxa?
It-tfal jistgħu jiftħu l-kaxxa.
X’sibt?
Għoġbok dak li sibt?
Għalfejn?
Aħna nistennew li xi ħaġa li minn barra tidher kerha, ma tkunx tajba. Xi drabi anke meta fit-triq naraw lil xi ħadd li ma tantx hu nadif jew bil-ħwejjeġ imqattgħin, naħsbu li dik il-persuna mhijiex persuna tajba. Meta naraw lil xi ħadd liebes sabiħ u b’riħa tfuħ, naħsbu li dik il-persuna hija tajba. Ġesù, illum qiegħed jgħidilna biex noqgħodu attenti. Mhux bilfors li dik il-persuna li hi fqira u maħmuġa hija persuna ħażina. Lanqas il-persuna li tkun liebsa sabiħ ma hi bilfors persuna tajba. Meta rajna l-kaxxa s-sabiħa stennejna li nsibu xi ħaġa sabiħa ġo fiha u ma stennejniex li nsibu l-ħelu/ċikkulata/toy fil-kaxxa l-kerha. Ġesù jgħidilna li Alla ma jagħtix ħafna kas ta’ kif nidhru minn barra. Huwa jara iktar dak li hemm ġewwa fina. Alla jrid li aħna nkunu tfal li nħobbu lill-oħrajn, li ngħinu, li naqsmu dak li għandna, li nitolbu, li nieħdu gost imorru nitkellmu miegħu l-knisja, li ngħidu l-verità. Ma jridx li nkunu tfal li nirrabjaw, niġġieldu, nigdbu, ma noqogħdux bravi fil-knisja.
Ġesù, ma rrabjax mal-Fariżej għax kienu jaħslu jdejhom qabel ma jieklu! Ġesù rrabja għax huma kienu jaħsbu li meta jobdu r-regoli jkunu qegħdin jogħġbu lil Alla. Ġesù kien jaf li għalkemm kienu jobdu ħafna regoli, f’qalbhom ma kellhomx kwalitajiet sbieħ. Huma ma kienux jagħtu kas tan-nies u jgħinuhom, kienu jaħsbu li huma nies speċjali u li huma aħjar mill-oħrajn.
Kif se jkollna qalbna sabiħa u nadifa?
Aktar ma nsiru ħbieb ta’ Ġesù u nagħmlu bħal Ġesù, aktar qalbna ssir sabiħa u nadifa. Għalhekk irridu nisimgħu l-istejjer mill-Bibbja, nitgħallmu dwar Ġesù, nitkellmu miegħu u nitolbu.
Illum għandkom ritratt tagħkom, kartonċina u qalb. (nota lill-ġenituri: l-qalb ipprintjawha daqs li hi u r-ritratt joqgħodu fuq il-kartonċina A4. Aqtgħu max-xifer tal-qalb.) L-ewwel għaddu minn fuq il-kliem li hemm fil-qalb, bil-lapes jew bil-kuluri. Waħħlu r-ritratt tagħkom u l-qalb fuq il-kartonċina. Jekk tixtiequ tistgħu tpinġu mad-dawra tar-ritratt u madwar il-qalb. Din waħħluha mal-fridge jew freezer, biex tfakkarkom li intom tridu tkunu tfal bravi, kif jixtieqkom Ġesù.
Inroddu s-Salib
Għażiż Ġesù, inti turina kif għandna nħobbu lilek u lil xulxin. Għinna biex nagħmlu dak li tixtieq inti u biex ikollna qalbna mimlija b’dak li hu tajjeb u sabiħ. Ammen.
Bħala parti mit-talba, isimgħu, Jesus look inside my heart.
Introduzzjoni
Fl-Evanġelju tal-lum nisimgħu kif il-Fariżej u l-Iskribi ċanfru lid-dixxipli minħabba li kisru xi tradizzjonijiet reliġjużi. Il-Fariżej kienu mexxejja. Kienu jistudjaw il-liġi ta’ Alla u kienu jafuha sew. Kienu jilbsu differenti mill-bqija tan-nies biex jingħarfu. Ġesù ma kienx jaqbel magħhom għax moħħhom kien aktar li josservaw u jobdu dawn it-tradizzjonijiet milli l-liġi ta’ Alla, li kienu jafu bl-amment.
- Ġesù jgħallimna li l-aktar ħaġa importanti hi dak li joħroġ minn qalbna
- Flixkun tal-plastic vojt
- Buqar bl-ilma
- Sponża, jekk jista’ jkun maqtugħa forma ta’ qalb
- Washable markers
- Friskatur bl-ilma u s-sapun
- Xugaman
Ġenituri: uru lit-tfal il-flixkun tal-ilma vojt u staqsu:
Dan x’inhu? (flixkun vojt)
X’fih? (xejn / arja)
X’jiġri jekk nagħmlu rasu l-isfel fuq raskom? (xejn)
Jekk nagħfsu quddiem wiċċkom? (tħoss bħal riħ … l-arja ħierġa minnu)
(ġenituri: imlew il-flixkun bl-ilma)
Issa għadu mimli bl-arja? (le)
Jekk nagħmlu rasu l-isfel fuq raskom, x’jiġri? (nixxarbu!)
Illum Ġesù dak huwa li qiegħed jgħallimna! Li l-mod li wieħed jidher minn barra mhux daqstant importanti. Huwa ħafna aktar importanti dak li hemm ġewwa dak li jkun! Il-flixkun baqa’ jidher l-istess, kemm meta kellu l-arja fih u kemm meta kellu l-ilma. Madanakollu, meta taqilbu fuqek, bl-ewwel wieħed ma tixxarrabx u bit-tieni wieħed tixxarrab. L-istess jiġri lilna. Jekk persuna f’qalbha għandha l-imħabba, il-ħniena, il-paċenzja u kwalitajiet sbieħ oħra, meta tkun mal-oħrajn, dak huwa dak li hi tista’ twassal. Din il-persuna tkun tħobb lill-oħrajn, tgħinhom, taqsam magħhom dak li għandha. Iżda jekk f’qalba għandha r-rabja, il-mibgħeda, l-għira, meta tkun mal-oħrajn mhux ser turi imħabba u ħniena, mhux ser titkellem bil-ħlewwa, mhux ser tkun lesta li taqsam dak li għandha mal-oħrajn. Ġesù jgħidilna li ħafna aktar importanti dak li hemm f’qalbna, milli kif nidhru minn barra.
Il-Fariżej kienu jagħtu aktar importanza lil dak li jidher minn barraKienu jilbsu sabiħ u differenti mill-oħrajn, kienu jridu lin-nies jarawhom jobdu r-regoli reliġjużi kollha. Per eżempju, waħda mir-regoli kienet li nhar ta’ Sibt ma jaħdmux, allura anke jekk kienu jiltaqgħu ma’ xi ħadd li għandu bżonn l-għajnuna ma kienux jgħinuh, għax is-Sibt ma kienu jagħmlu xejn ħlief jitolbu. Ġesù għalhekk jirrabja magħhom! Dan l-iżball, nistgħu nagħmluh aħna wkoll. Ejjew nieħdu eżempju ta’ tifel fl-iskola. Dan it-tifel, li kien jismu John kien bravu, u kien jobdi lit-teachers, dejjem jagħmel il-homework u jistudja. Darba minnhom filgħaxija, ċempillu ħabib tiegħu Peter, li kellu l-mama’ tiegħu l-isptar. Peter, ma kienx laħaq jagħmel il-homework u talab lil John jgħinu biex l-għada jkun jista’ jagħti l-homework lit-teacher. Minkejja dan, John qallu li ma setax għax inkella t-teacher tinduna li għamel il-homework miegħu u tagħtih ‘copied’. Huwa veru li aħna mhux suppost li nikkuppjaw il-homework minn fuq xulxin, imma dan ma jfissirx li ma nistgħux ngħinu lill-oħrajn biex jifhmu l-homework u jkunu jistgħu jagħmluh! Għal John kien aktar importanti li jobdi r-regoli milli jgħin lill-ħabib tiegħu.
Aħna bħal min irridu nkunu? Bħal Ġesù li kellu qalbu mimlija bl-imħabba ta’ Alla, jew bħall- Fariżej li kellhom qalbhom mimlija bir-regoli u moħħhom kien f’dak li jaħsbu n-nies dwarhom?
Ġesù jaf li aħna mhux dejjem ikollna ħsibijiet sbieħ u li mhux dejjem jirnexxielna nagħmlu għażliet tajba, li f’qalbna mhux dejjem ikollna kwalitajiet sbieħ. Għalhekk tana s-sagrament tal-qrar, għalhekk tana ġenituri, għalliema u katekisti biex jgħallmuna, għalhekk jixtieq li naqraw il-ġrajjiet mill-Bibbja u mmorru l-quddies regolari. Dawn kollha jgħinuna biex ineħħu minn qalbna dak li hu ħażin u minflok nimlewha b’dak li hu tajjeb.
Ejjew naraw x’effett għandhom l-għażliet ħżiena tagħna. Għandkom l-isponża forma ta’ qalb. Kull darba li nagħmlu għażla ħażina din qed timmarka lil qalbna. Pereżempju għidt gidba (immarkaw il-qalb bil-marker), ma obdejtx lill-mama (erġaw immarkaw il-qalb). Għal kull eżempju mmarkaw il-qalb: iġġielidt ma’ ħija, għidt kelma pastaża, ħadt pakkett ħelu mingħajr ma staqsejt ….
Xi ġrala l-qalb? Għadha nadifa daqs kemm kienet fil-bidu?
Meta jiddispjaċina ta’ dak li nkunu għamilna ħażin, nitolbu skuża u mmorru nqerru.
Aqbdu l-qalb u daħħluha fil-frixkatur bl-ilma u sapun u nxarbuha sew u nagħsruha. Il-marker jitlaq meta jinħasel bl-ilma u s-sapun. Hekk ukoll qalbna titnaddaf meta nitolbu skuża u mmorru nqerru! Ġesù hekk jixtieq: li qalbna dejjem tkun nadifa u sabiħa.
Inroddu s-salib.
Grazzi Ġesù li wrejtna kemm hu sabiħ li jkollna qalbna sabiħa u nadifa u li dan huwa aktar importanti milli l-mod kif nidhru minn barra. Agħtina l-għajnuna tiegħek biex aħna nsiru aktar nixbu lilek u f’qalbna jkollna biss l-imħabba ta’ Alla.
Nagħlqu t-talba tagħna u nisimgħu, Looking at my heart.
Dalwaqt.
Kif tuża din il-paġna
Dwar 
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
