Difensur tagħna

Is-Sitt Ħadd tal-Għid

Huwa faċli li ngħidu li nħobbu lil Alla, iżda li nobdu dak li qalilna Ġesù titlob minna l-insara mpenn akbar. Ġesù jgħidilna li għandna nħobbu lil Alla u lil xulxin. Forsi tinstema faċli, iżda meta rridu nħobbu lil dawk li jwaqqgħuna għaċ-ċajt jew jipprovokawna, irridu nitolbu lill-Ispirtu s-Santu biex jagħtina l-qawwa tal-fejqan tiegħu.

L-Ispirtu s-Santu mhux biss qiegħed magħna, iżda hu qiegħed fina bħala sors ta’ kuraġġ u qawwa interjuri. Dan hu l-istess Spirtu li ħadem fil-ħajja ta’ Ġesù. Hu ġie mogħti lilna fil-magħmudija u fil-griżma tal-Isqof. Permezz ta’ din il-preżenza, Ġesù jibqa’ għal dejjem fil-Knisja, u aħna nistgħu naqsmu mill-ħajja ta’ Alla u l-missjoni ta’ Ġesù.

Dan l-Evanġelju jkompli ma’ tal-ġimgħa l-oħra. Ġesù qiegħed waqt l-Aħħar Ikla u jgħid lid-dixxipli li hu kien ser jitlaq minn magħhom biex imur lura għand il-Missier. Dak in-nhar, huma ma fehmux eżatt dak li Ġesù kien qiegħed jgħidilhom; aħna, iżda, nafu eżatt x’ried ifisser. Sabiex ma jaqtgħux qalbhom, Ġesù jwiegħed l-għotja tal-Ispirtu s-Santu. B’hekk huma ma jħossuhomx bħall-iltiema, jew minsija. Ġesù jkompli jinkoraġġihom (u lilna wkoll) biex ikollna l-istess relazzjoni mal-Missier, kif għandu hu. Dan nistgħu niksbuh permezz tad-don tal-Ispirtu. Aħna mistiedna nieklu ma’ Alla, u b’dan il-mod naqsmu mal-ħajja vera ta’ Alla. Jekk nieqfu u nirriflettu xi tfisser eżatt din l-istedina, nindunaw li bl-istess mod li Ġesù kien ikonċeput mill-Ispirtu s-Santu u ġie jgħix fostna, hekk ukoll, hu għadu preżenti fina permezz tal-Ewkaristija. Permezz tal-Ewkaristija aħna sirna l-Ġisem ta’ Kristu.

Ġesù spjega lid-dixxipli li hu u l-Missier huma ħaġa waħda, u hu l-Ispirtu s-Santu li qiegħed magħna u jgħinna nagħrfu li aħna wlied Alla, u ma aħniex iltiema. Huwa dan l-istess Spirtu li jmexxina biex ngħixu ta’ nsara fil-familja tagħna, u biex inkomplu nuru l-imħabba tagħna lejn Ġesù, meta nobdu l-kmandamenti.

Qari mill-Evanġelju skont San Ġwann (Ġw 14: 15-21)

F’dak iż-żmien, Ġesù qal lid-dixxipli tiegħu: “Jekk tħobbuni, ħarsu l-kmandamenti tiegħi. U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem, l-Ispirtu tal-verità, li d-dinja ma tistax tirċevih, għax hija la tarah u lanqas tagħrfu. Iżda intom tagħrfuh, għaliex jgħammar magħkom, u huwa fikom. Ma nħallikomx iltiema. Nerġa’ niġi għandkom. Ftit ieħor, u d-dinja ma taranix aktar. Iżda intom għad tarawni, għax jiena ngħix, u intom ukoll għad tgħixu. F’dak il-jum intom tagħrfu li jiena f’Missieri, u intom fija u jiena fikom. Min iżomm il-kmandamenti tiegħi u jħarishom, dak hu li jħobbni; u min iħobb lili, iħobbu wkoll il-Missier, u jiena wkoll inħobbu u nurih lili nnifsi”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  2. Bħala wlied Alla, aħna nistgħu nafdaw fl-Ispirtu li jmexxina u jħarisna u jsaħħaħ il-ħajja nisranija tagħna. Ma ninsewx li l-Ispirtu huwa t-tielet persuna tat-Trinità Qaddisa. Matul din il-ġimgħa, flimkien mal-familja ddiskutu bejnietkom dak li tafu dwar l-Ispirtu s-Santu.
  3. Ir-riħ huwa simbolu tal-Ispirtu s-Santu, xi drabi jkun bħall-żiffa, oħrajn bħall-uragan! Hekk kif l-Ispirtu jmexxina bħar-riħ, x’għandna bżonn biex naġġixxu? Żiffa jew uragan? Aħseb kif jista’ jkun qiegħed isejjaħlek l-Ispirtu llum.
  4. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (14: 15-21)
    ii. Xemgħa
    iii. Il-mejda fejn hemm il-Bibbja, miksija bi drapp abjad
    v. Computer/laptop bil-qari u clips
  5. Mur fil-parti tat-tfal skont l-etajiet u għamilha flimkien magħhom
  6. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum, Ġesù jgħidilna li jekk inħobbuh, għandna nobdu l-kmandamenti u li Alla jħobb lil dawk li jisimgħu u jħobbu lil Ibnu, li jurina min hu l-Missier.

  • Jekk ngħidu li nħobbu lil Ġesù, irridu nobdu l-kmandamenti
  • Ġesù staqsiena biex inħobbu lil Alla u lil xulxin
  • Printout tal-qalb
  • Kuluri/stickers biex tiddekoraw bihom
  • Kartonċina/gloj/imqass
  • Hole punch/żigarella
PrintoutNiżżel

Fl-Evanġelju tal-lum, Ġesù jitkellem dwar l-importanza li nisimgħu t-tagħlim tiegħu, u biex nuru lill-oħrajn, li aħna nħobbu lil Ġesù, għandna nobdu l-kmandamenti. Il-kmandament il-kbir li tana Ġesù hu li nħobbu lil Alla b’dak kollu li aħna, u nħobbu lill-oħrajn. 

Għalhekk, jekk ngħidu li nħobbu lil Ġesù, irridu nuru dan f’dak li nagħmlu. Faċli tgħid lil xi ħadd li tħobbu, imma huwa aktar diffiċli li turi lil din il-persuna li tħobbha. Ġeneralment huwa aktar faċli li nuru li nħobbu lil dawk li aħna qrib tagħhom, il-ġenituri, aħwa u ħbieb. Aħna nistgħu ngħinu u nkunu qalbna tajba fid-dar u fl-iskola. Nistgħu nobdu lill-ġenituri tagħna, lill-għalliema u lill-katekisti. Nistgħu naqsmu l-affarijiet li għandna ma’ ħutna, u noqgħodu magħhom meta jkunu mdejqa, u huma għandhom jagħmlu l-istess meta aħna nkunu mdejqa. Tinsewx li aħna lkoll ulied Alla. Alla jħobbna lkoll, għax aħna lkoll speċjali. Biex nobdu l-kmandamenti, irridu naħsbu wkoll f’ħutna li joqgħodu f’pajjiżi oħra. Kif taħsbu li nistgħu nagħmlu dan? Aħna nistgħu nitolbu lil Alla biex jipprovdilhom dak li għandhom bżonn. Nistgħu wkoll nuru l-imħabba tagħna lejn l-oħrajn meta nieħdu ħsieb l-ambjent, id-dar tagħna lkoll. Ma għandnix narmu affarijiet mal-art, minflok wara xi picnic new barbeque, għandna nieħdu l-affarijiet u narmuhom id-dar. Lanqas ma għandna naħlu ilma u elettriku, ma nħallux dawl mixgħul meta ma nkunux fil-kamra. Hawn ħafna tfal, fid-dinja, li ma għandhomx ilma tajjeb għax-xorb jew ilma biex jinħalsu. Lil dawn it-tfal nistgħu ngħinuhom meta nagħtu flus lill-organizzazzjonijiet bħal WaterAid, li jipprovdu ilma nadif u affarijiet bħall-toilets u showers lil dawn in-nies fil-bżonn. Aħna nuru li nħobbu bħal Ġesù meta naħsbu fl-oħrajn u ngħinuhom. Ejjew nagħmlu d-dinja post aħjar fejn ħadd ma hu fqir jew bil-ġuħ.

Biex tiftakru fil-kmandament ta’ Ġesù, għandkom il-printout tal-qalb. Aqtugħha u waħħluha fuq kartonċina. Tistgħu tagħtuha l-kulur u tiddekorawha. Agħmlu toqba fin-naħa ta’ fuq u għaddu żigarella mit-toqba biex tkunu tistgħu ddendluha fil-kamra tagħkom. Illum huwa Jum l-Omm, tistgħu tagħtuha l-qalb biex turuha kemm tħobbuha!

Isimgħu s-song, Heal the World .

Inroddu s-salib

Ġesù, inti ġejt fid-dinja biex turina kif għandna ngħixu. Għinna biex nobdu l-kmandament tiegħek li nħobbu lil xulxin u nagħmlu dak kollu li nistgħu biex nieħdu ħsieb l-oħrajn, speċjalment lill-fqar. Nitolbuk ukoll biex tbierek lill-ommijiet f’dan il-jum speċjali. Ammen.

Ġesù kien jaf li kien wasal il-ħin li hu jmur lura għand il-Missier u waqt l-Aħħar Ikla, iwiegħed lid-dixxipli li ma kienx ser iħallihom waħedhom, iwiegħedhom li jibgħatilhom għajnuna speċjali, jibgħatilhom difensur, lill-Ispirtu s-Santu.

  • Difensur hija kelma oħra għall-Ispirtu s-Santu
  • Ġesù lilna wkoll jagħtina r-rigal tal-Ispirtu s-Santu, nirċevuh fil-magħmudija
  • Printout tal-qlub
  • Kartonċina 
  • Kuluri 
printoutNiżżel

Fl-Evanġelju tal-lum, nisimgħu lil Ġesù waqt l-Aħħar Ikla jgħid lid-dixxipli, li ser jibgħatilhom għajnuna, lid-difensur. Fil-magħmudija aħna nirċievu dan ir-rigal tal-Ispirtu s-Santu, li jagħtina l-għajnuna, meta nistaqsuh, biex iwassalna għand il-Missier (Alla).

Intom qatt kellkom lil xi ħadd li tafu, u mar jgħix il-bogħod minn Malta u għalhekk ma stajtux tiltaqgħu kull darba li tixtiequ? Jekk iva, forsi qed tħossukom imdejqa jew diżappuntati li ma għandhomx miegħek. Jista’ jkun li qabel ma telqu tawk xi ħaġa biex tibqa’ tiftakar fihom. Dan hu, li Ġesù jwiegħed lid-dixxipli fl-Aħħar Ikla. Ġesù jgħidilhom li wara li jmut, huma kellhom jirċievu rigal speċjali, lil dan ir-rigal isejjaħlu difensur. Difensur hu xi ħadd li jaqbeż għall-oħrajn. Id-difensur li qiegħed iwiegħed Ġesù, hu l-Ispirtu tal-Verità, l-Ispirtu s-Santu.

Ġesù jgħid li għalkemm ser jitlaqhom, qatt ma kien ser iħallihom waħedhom. Huma kellhom jirċievu għajnuna li turihom l-imħabba l-kbira li kien hemm bejn il-Missier, l-Iben u d-dixxipli. Huwa l-Ispirtu s-Santu li jmexxina fit-triq li Alla jrid li ngħixu. L-Ispirtu s-Santu jiġi għandna b’mod speċjali fil-Magħmudija u fl-Ġriżma tal-Isqof. Hu jmexxina matul ħajjitna kollha, hu jgħinna nobdu l-kmandamenti ta’ Alla. Permezz tal-Ispirtu s-Santu, Ġesù baqa’ mad-dixxipli u magħna. Jekk inħallu lill-Ispirtu s-Santu, hu jgħinna nifhmu r-relazzjoni li Alla għandu ma’ Ibnu, u jgħinna nimxu warajh. 

Illum huwa Jum l-Omm, forsi tixtiequ tagħmlu kartolina speċjali biex tiftakru fl-Evanġelju tal-llum, u tagħtuha lill-mama biex turuha kemm tħobbuha. 

Waħħlu l-istampa tal-qlub (aqtgħu max-xifer) fuq il-kartonċina. Fil-qlub iktbu Alla l-Missier, Ġesù l-Iben, l-Ispirtu s-Santu.

Fuq wara tal-kartolina iktbu isimkom u dan il-vers mill-Bibja, “Ħa jsir kollox fostkom bl-imħabba” (1 Korintin 16, 14). Aqgħtu l-kulur lill-kartolina, u ddekorawha skont kif tixtiequ.

Isimgħu, Holy Spirit Fire.

Inroddu s-salib

Ejja, Spirtu s-Santu, imla l-qlub tal-fidili tiegħek, u ħeġġeġ fihom in-nar ta’ mħabbtek. Ibgħat l-Ispirtu tiegħek u huma jinħalqu. U inti ġġedded il-wiċċ tal-art. Ammen.

Fuljett Għid 06Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.