Fi triqtom!

It-Tielet Ħadd tal-Għid

L-Evanġelju tal-lum meħud minn San Luqa, u bħal tal-ġimgħa l-oħra juri kif l-ewwel komunità tad-dixxipli saru jemmnu li Ġesù verament qam mill-mewt. Għinna naraw ukoll, kif bdiet din l-ewwel komunità tal-Knisja. Turina li Ġesù dejjem ħa l-inizjattiva u jiġi għandna f’sitwazzjonijiet differenti u stadji differenti tal-ħajja tagħna. Anke jekk mixjin għall-għonq it-triq!

Il-ġrajja tirrakkonta l-istorja ta’ żewġ dixxipli li telqu minn Ġerusalemm lejn Għemmaws, wara l-mewt ta’ Ġesù. Il-vjaġġ tagħhom huwa wieħed uman għall-aħħar, huma kienu mnikktin għall-mewt u telfa ta’ Ġesù. Il-persuna li kienu mxew warajha, sostnewha u ddedikaw ħajjithom għaliha, kienet ingħatat mewt l-aktar kiefra. Wiċċhom kien xhieda ta’ din it-telfa, “ħarsa ta’ niket fuq wiċċhom.” Xi darba jew oħra, aħna lkoll mxejna dan il-vjaġġ ta’ telfa. Hawn pajjiżi sħaħ li mexxjin dan il-vjaġġ flimkien, minħabba l-gwerra. Mingħajr ma jintebħu, il-persuna li kienu poġġew it-tama kollha tagħhom fiha, kienet miexja magħhom, tinkorraġġihom biex jitkellmu dwar din it-telfa tagħhom. Din il-persuna kienet qed tirrivela stampa ħafna aktar ta’ tama, minn dak li kien hemm miktub fl-Iskrittura. Kienet ġrajja li spiċċat fil-glorja u mhux bil-mewt. Il-kliem ta’ dan il-barrani, kebsitilhom qalbhom. F’din il-laqgħa, aħna għandna mudell għal-Liturġija tal-Kelma li niċċelelbraw meta ninġabru bħala komunità għall-quddiesa. Fil-parti l-oħra ta’ din il-ġrajja, insibu mudell għal-Liturġija Ewkaristika. Id-dixxipli jistiednu lil dan il-barrani (Ġesù) biex jibqa’ magħhom, u fil-qsim tal-ħobż jagħrfu min kien dan l-istranġier. Fil-qsim tal-ħobż, għajnejn id-dixxipli nfetħu, u jagħrfu li l-istranġier kien Ġesù. Meta aħna niċċelebraw il-Liturġija Ewkaristika, Ġesù jiġi fostna, ikun preżenti f’nofsna. Kristu Rxoxt, dejjem qiegħed magħna, kemm jekk qegħdin il-knisja, id-dar, l-isptar jew sempliċiment waqt mixja fit-triq. Hu jfarraġna meta nkunu mdejqa, mbeżża, waħedna, inċerti, eċitati. L-inizjattiva dejjem jeħodha hu, u hekk kif id-dixxipli reġgħu lura Ġerusalem biex jirrakuntaw l-esperjenza li kellhom ma’ Kristu Rxoxt, aħna wkoll mibgħuta mill-quddiesa biex naqsmu l-esperjenza ta’ Ġesù, ma’ oħrajn, u nwieġbu għas-sejħa tiegħu.

Qari mill-Evanġelju skont San Luqa (Lq 24: 13-35)

Dakinhar stess fl-ewwel jum tal-ġimgħa, ġara li tnejn mid-dixxipli kienu sejrin lejn raħal jismu Għemmaws, xi sittin stadju bogħod minn Ġerusalemm, jitħaddtu bejniethom fuq kull ma kien ġara. Huma u jitħaddtu u jitkixxfu bejniethom, Ġesù nnifsu resaq lejhom u baqa’ miexi magħhom. Imma għajnejhom kellhom xi jżommhom u ma setgħux jagħrfuh. U hu qalilhom: “X’intom tgħidu bejnietkom intom u miexja?”. U huma waqfu, b’ħarsa ta’ niket fuq wiċċhom. Imbagħad wieħed minnhom, jismu Kleofa, wieġeb u qallu: “Inti waħdek il-barrani f’Ġerusalemm li ma tafx x’ġara hemmhekk f’dawn il-jiem?”.

“X’ġara?”, staqsiehom Ġesù. Qalulu: “Dak li ġara lil Ġesù ta’ Nazaret, li kien profeta setgħan fl-għemil u fil-kliem quddiem Alla u quddiem il-poplu kollu, kif il-qassisin il-kbar u l-kapijiet tagħna tawh f’idejn il-gvernatur biex ikun ikkundannat għall-mewt u sallbuh. Aħna konna nittamaw li hu kien dak li kellu jifdi lil Iżrael; iżda issa, fuq kollox ġa għaddew tlitt ijiem minn dawn il-ġrajja!

Issa wkoll xi wħud min-nisa tagħna ħasduna, għax marru kmieni ħdejn il-qabar u l-katavru tiegħu ma sabuhx; ġew jgħidu wkoll li dehrulhom xi anġli li qalulhom li hu ħaj. Imbagħad marru ħdejn il-qabar xi wħud minn tagħna u sabu kollox kif kienu qalu n-nisa, imma lilu ma rawhx!”.

Qalilhom Ġesù: “Kemm intom boloh u tqal biex temmnu kulma qalu l-profeti! U ma kellux il-Messija jbati dan kollu u hekk jidħol fil-glorja tiegħu?”. U beda minn Mosè u l-profeti kollha jfissrilhom kulma kien hemm fl-Iskrittura fuqu.

Meta qorbu lejn ir-raħal fejn kienu sejrin hu għamel tabirruħu li kien se jibqa’ sejjer aktar ’il bogħod. Iżda huma ġegħluh jibqa’ magħhom u qalulu: “Ibqa’ magħna, għax issa sar ħafna ħin u l-jum ġa wasal biex jintemm”. Imbagħad daħal biex joqgħod magħhom. U waqt li kien fuq il-mejda magħhom, qabad il-ħobż, qal il-barka, qasmu u tahulhom. Imbagħad infetħulhom għajnejhom u għarfuh, iżda hu għab minn quddiemhom. U wieħed lill-ieħor bdew jgħidu: “Ma kinitx imkebbsa qalbna ġewwa fina huwa u jkellimna fit-triq u jfissrilna l-Iskrittura?”.

Dak il-ħin stess qamu u reġgħu lura Ġerusalemm. Hemm sabu lill-Ħdax u lil sħabhom miġbura flimkien, u dawn qalulhom: “Il-Mulej qam tassew, u deher lil Xmun!”. U huma wkoll tarrfulhom x’kien ġralhom fit-triq, u kif kienu għarfuh fil-qsim tal-ħobż.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. It-tema tal-lum hija ċ-ċelebrazzjoni tal-Ewkaristija. X’inhu l-impenn tiegħi biex tal-anqas, kull nhar ta’ Ħadd nattendi għall-quddiesa, flimkien mal-familja? It-tfal iħarsu lejn il-ġenituri bħala mudell għalihom. X’eżempju qed tagħti lit-tfal rigward l-importanza li jiċċelebraw il-liturġija tal-Ewkaristija?
  4. L-ikla flimkien, tista’ ssir laqgħa ta’ talb. Tibqax lura milli qabel l-ikel trodd is-salib u tgħid talba ta’ ringrazzjament. Għandek tagħmel dan, anke jekk qed tiekol ġo restaurant.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn  San Luqa (24, 13-35)
    ii. Xemgħa
    iii. Il-mejda fejn hemm il-Bibbja, miksija bi drapp abjad
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Illum nisimgħu dwar żewġ dixxipli, li wara l-mewt ta’ Ġesù, telqu minn Ġerusalemm biex imorru f’raħal jismu Għemmaws. Matul it-triq, huma jiltaqgħu ma’ xi ħadd speċjali, iżda għall-ewwel ma jagħrfuhx. Ejjew nisimgħu l-ġrajja biex naraw min kien.

  • Aħna lkoll maħluqa fuq xbieha ta’ Alla, u Ġesù qiegħed f’kull wieħed u waħda minna, iżda xi drabi, aħna, dan ninsewh
  • Għajnejna jistgħu jinfetħu bħalma għamlu tad-dixxipli fl-Evanġelju tal-lum, jekk nisimgħu l-Kelma ta’ Alla u niċċelebraw ir-rigal ta’ Ġesù fil-quddiesa
  • Printout tal-qalb
  • Lapes / kuluri
  • Imqass 
Printout tal-qalbNiżżel

L-istorja tal-Evanġelju tal-lum, tiġri ftit wara li salbu lil Ġesù, u hu miet fuq is-salib. Tnejn minn dawk li kienu jkunu miegħu, kienu mixjin lejn raħal jismu Għemmaws, qrib ta’ Ġerusalemm. Kienu qegħdin jitkellmu dwar dak li kien ġara fl-aħħar jiem. Waqt li kienu mixjin, raġel li ma kienux jafuh beda miexi ħdejhom. Fil-fatt kien Ġesù, iżda huma ma għarfuhx mal-ewwel. Ġesù staqsiehom dwar xhiex kienu qegħdin jitkellmu. Huma kienu mdejqa u sorpriżi li dan ir-raġel ma kienx jaf x’kien ġara lil Ġesù ta’ Nazaret. Huma qalulu dwar il-mewt ta’ Ġesù, fuq is-salib, u kif xi nisa li kienu marru ħdejn il-qabar, sabuh vojt. Minbarra hekk qalu li raw xi anġli li qalulhom li hu kien ħaj. Kif seta’ jkun dan? Ġesù beda jispjegalhom dak li kien hemm miktub dwaru fl-Iskrittura, u beda mill-ktieb ta’ Mosè. Hu spjega l-Iskrittura biex huma jifhmu li Ġesù kien qam mill-mewt. Iżda xorta waħda, id-dixxipli baqgħu ma għarfuhx. Fl-aħħar id-dixxipli staqsew lil Ġesù biex jibqa’ magħhom u jiekol magħhom. Waqt l-ikel, Ġesù ħa l-ħobż, bierku, qasmu u tahulhom. F’daqqa waħda, f’dan il-ħin, huma għarfu li dan ir-raġel kien Ġesù li kien qam mill-mewt. Għalfejn taħsbu li għarfu lil Ġesù f’dak il-ħin? Tiftakru xi ġrajja oħra, meta Ġesù qasam l-ikel mal-ħbieb tiegħu? Meta bierek u qasam il-ħobż magħhom? Dan għamlu fl-aħħar ikla, fil-lejl qabel ma miet. Aħna lkoll maħluqa fix-xbieha ta’ Alla, u Ġesù qiegħed f’kull wieħed u waħda minna, għalkemm aħna, xi drabi, dan ninsewh. Aħna bħad-dixxipli ta’ Għemmaws, ma nagħrfux lil Ġesù fin-nies li niltaqgħu magħhom. Iżda għajnejna jistgħu jinfetħu, bħalma għamlu tad-dixxipli li dwarhom qrajna llum. Irridu l-ħin biex insiru nafu lil dawk ta’ madwarna, meta naqsmu l-ikel ma’ oħrajn, dan huwa mod tajjeb biex insiru nafuhom. Meta nieklu flimkien, aħna naqsmu idejat u esperjenzi. Waqt il-quddiesa nisimgħu l-Iskrittura, u flimkien niċċelebraw ir-rigal ta’ Ġesù, meta naqsmu din l-ikla speċjali flimkien. Xi wħud minnkom qed tippreparaw għall-Ewwel Tqarbina, u xi wħud forsi diġà tqarbintu għall-ewwel darba; dejjem ftakru, li din hija ikla speċjali, fl-Ewkaristija aħna niċċelebraw ir-rigal ta’ Ġesù.

Agħmlu printout tal-qalb u fuqha iktbu talba qasira biex tgħiduha qabel l-ikel. Kull darba li tieklu jew taqsmu l-ikel, ftakru biex tfittxu lil Ġesù fl-oħrajn u aħsbu f’dawk in-nies kollha li taw sehemhom biex jasal l-ikel għandek. Ftakru f’dak li kabbru, ipproduċew u ppreparawh.

Isimgħu s-song, Jesus is alive.

Inroddu s-salib

Għażiż Ġesù, inti d-dawl tagħna, u dak li turina t-triq. Iftħilna għajnejna, biex nagħrfuk fin-nies li niltaqgħu magħhom kuljum. Iftħilna qalbna biex naqsmu b’ġenerożità dak li għandna, mal-oħrajn. Ammen.

Fl-Evanġelju tal-lum nisimgħu ġrajja ta’ żewġ dixxipli ta’ Ġesù,  li, wara l-mewt tiegħu, huma telqu minn Ġerusalem. Kienu mixjin lejn raħal jismu Għemmaws; kien madwar 7 mili ’l bogħod minn Ġerusalem. Waqt li kienu qed jitkellmu u jaħsbu dwar dak li kien ġara, Ġesù beda miexi ma’ ġenbhom. Iżda huma ma għarfuhx.

  • Il-ġrajja tal-Evanġelju tal-lum tfakkarna f’dak li jiġri waqt il-quddiesa
  • Kull darba li niċċelebraw il-quddiesa, nagħrfu li Ġesù huwa preżenti kemm fil-Kelma, kif ukoll b’mod speċjali ħafna, fl-Ewkaristija
  • Printout tal-ostja
  • Imqass / gloj
  • Kuluri 
  • Brad fastener (butterfly clip)
PrintoutNiżżel

Meta Ġesù ingħata l-mewt, xi dixxipli telqu minn Ġerusalemm. Kif taħsbu li kien qed iħossuhom, wara dak li kienu raw? X’aktarx kienu konfużi u diżappuntati. Waqt li kienu sejrin lejn Għemmaws, raġel beda jimxi ma ġenbhom. Kien Ġesù, li kien qam mill-mewt, iżda huma ma għarfuhx. Ġesù tkellem mad-dixxipli u staqsiehom jirrakuntawlu dak li kien ġara Ġerusalemm. Wara Ġesù beda jispjegalhom dak li kien hemm miktub fl-Iskrittura dwar dak li ġara. Ħassewhom vera tajjeb waqt li Ġesù kien qiegħed ikellimhom, u fil-fatt, meta waslu fir-raħal, staqsewh jibqa’ magħhom għall-ikel. Ġesù baqa’ magħhom u waqt l-ikel, bierek il-ħobż u qasmu u newwlu lid-dixxipli. F’dan il-mument, għajnejn id-dixxipli nfetħu, u huma għarfu li kien Ġesù nnifsu. Huma reġgħu marru lura Ġerusalemm biex jgħidu lid-dixxipli l-oħra li huma kienu raw lil Ġesù. Din il-ġrajja tfakkarna dwar dak li jiġri f’quddiesa. Aħna nisimgħu l-Kelma ta’ Alla mill-Iskrittura, fil-parti msejħa l-Liturġija tal-Kelma. Wara naqsmu ikel speċjali, u nagħmlu dak li kien għamel Ġesù. Is-saċerdot ibierek u jaqsam il-ħobż, din il-parti nsejħulha l-Liturġija Ewkaristika. Kull darba li niċċelebraw il-quddiesa, nagħrfu li Ġesù huwa preżenti fil-Kelma u b’mod speċjali fl-Ewkaristija. Fl-aħħar tal-quddiesa, is-saċerdot jgħid, “Morru fil-paċi ta’ Kristu.” Din il-parti tissejjaħ il-Rit tal-Għeluq. Bħad-dixxipli li kienu sejrin Għemmaws, aħna mibgħuta biex naqsmu l-aħbar tajba ta’ Ġesù mal-oħrajn. 

Biex niftakru l-messaġġ tal-lum, agħmlu printout tal-istampa. Aqtgħu l-partijiet kollha u agħtuhom il-kulur. Waħħlu l-istampa ta’ Ġesù (3) f’nofs l-ostja (1), aqtgħu l-ostja (4) min-nofs, u waħħlu kollox bil-brad fastener, biex b’hekk meta tinfetaħ, jidher Ġesù. Fuq wara tal-ostja (1) waħħlu l-kliem, “għarfuh fil-qsim tal-ħobż.” (2)

Isimgħu s-song, Jesus is Alive.

Inroddu s-salib

Alla Missier, għinna nagħrfu li Ġesù huwa preżenti fl-Iskrittura u fl-Ewkaristija. Għinna biex bħad-dixxipli li ltaqgħu ma’ Ġesù fit-triq lejn Għemmaws, aħna wkoll naqsmu l-esperjenza ta’ Ġesù mal-oħrajn. Ammen.

FuljettNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.