Ġesù jgħallimna nitolbu

Naqraw

Luqa 11, 1-13  

¹Darba kien qiegħed xi mkien jitlob. Kif spiċċa mit-talb, wieħed mid-dixxipli tiegħu qallu: “Mulej, għallimna nitolbu, bħalma Ġwanni wkoll għallem lid-dixxipli tiegħu.” ²U qalilhom: “Meta titolbu, għidu,

‘Missier, jitqaddes ismek,

tiġi Saltnatek.

³Ħobżna ta’ kuljum agħtina kuljum.

⁴U aħfrilna dnubietna,

għax aħna wkoll naħfru lil kull min

hu ħati għalina,

u la ddaħħalniex fit-tiġrib.’ ”

⁵Qalilhom ukoll: “Wieħed minnkom ikollu ħabib li jiġih f’nofs ta’ lejl u jgħidlu, ‘Ħabib, islifni tliet ħobżiet, ⁶għax ġie għandi wieħed ħabib tiegħi mill-vjaġġ u ma għandix x’nagħtih.’ ⁷U l-ieħor iwieġbu minn ġewwa u jgħidlu, ‘Iddejjaqnix; issa l-bieb magħluq, u wliedi qegħdin fis-sodda miegħi; ma nistax inqum nagħtik.’⁸Ngħidilkom jien, li jekk ma jqumx jagħtih għax ħabib tiegħu, iqum u jagħtih kulma jkollu bżonn minħabba l-wiċċ sfiq tiegħu. U jiena ngħidilkom: ⁹Itolbu u jingħatalkom, fittxu u ssibu, ħabbtu u jiftħulkom. ¹⁰Għax min jitlob, jaqla’; min ifittex, isib; u min iħabbat, jiftħulu. ¹¹Min hu dak il-missier fostkom li, jekk ibnu jitolbu ħuta, minflok ħuta jagħtih serp? ¹²Inkella jekk jitolbu bajda jagħtih skorpjun? ¹³Mela jekk intom, nies ħżiena bħalkom, tafu tagħtu lil uliedkom ħwejjeġ tajba, kemm aktar il-Missier mis-smewwiet jagħti spirtu qaddis lil dawk li jitolbuhulu!”

Nitolbu

Għażiż Ġesù, għinni nitlob it-talba speċjali tal-Missierna kuljum, għax meta nagħmel dan, inkun qed nitkellem ma’ Alla u nersaq aktar fil-qrib tiegħu. Ammen. 

Ngħixu

Fit-talba tal-Missierna, nitolbu lil Alla biex jagħtina ‘l-ħobż ta’ kuljum.’ Il-ħobż tagħna ta’ kuljum, huma l-bżonnijiet tagħna. Hawn tfal li huma foqra, ma għandhomx ikel biżżejjed, jew ħwejjeġ biex ikunu jistgħu jgħixu sew. Alla jrid jużana biex ngħinu lil dawn it-tfal. 

Illum nagħtu flus għall-karità. 

Attività