Ħajja ġdida ma’ Ġesù

It-13-il Ħadd ta’ Matul is-Sena

L-Evanġelju tal-lum jista’ jinħass diffiċli u jħawwdek xi ftit kif taqrah għall-ewwel darba. Irridu nifhmu li dan l-Evanġelju nkiteb primarjament għal udjenza Lhudija. Il-Lhud kienu ilhom jistennew lill-Messija, iżda ħafna m’aċċettawx lil Ġesù bħala Iben Alla, il-Messija mwiegħed. F’dan l-isfond, wieħed aktar jifhem meta Ġesù iwissi li “Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi.” Minħabba li kien hemm ħafna mil-Lhud li ma aċċettawx lil Ġesù, allura kien hemm sitwazzjonijiet fejn membri mill-istess familja emmnu f’Ġesù u oħrajn le. Minabba f’hekk, feġġew diversi firdiet, kif ukoll f’deċiżjonijiet iebsa, fejn wieħed kellu jitbiegħed minn dawk għeżież għalih.

F’din is-silta, Ġesù qiegħed jenfasizza żewġ affarijiet: l-ewwel li l-fidi tagħna għandha tingħata priorità f’ħajjitna u t-tieni li rridu naċċettaw lil xulxin – li jkun hemm l-ospitalità bejnietna. Ġesù jsemmi s-salib li rridu nġorru. Biex nimxu warajh ma nistgħux naċċettaw kompromessi. Ma nistgħux inkunu sieq l-hemm u sieq ‘l hawn.

Qari mill-Evanġelju skont San Mattew (Mt 10, 37-42)

F’dak iż-żmien, Ġesù qal lill-appostli tiegħu: “Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi. U min ma jerfax salibu u jimxi warajja ma jistħoqqlux li jkun miegħi.

Min isib lil ħajtu, jitlifha; u min jitlef lil ħajtu minħabba fija jsibha. Min jilqa’ lilkom jilqa’ lili, u min jilqa’ lili jkun jilqa’ lil dak li bagħatni. Min jilqa’ profeta għax hu profeta, ħlas ta’ profeta jieħu; u min jilqa’ bniedem ġust għax hu ġust, ħlas ta’ wieħed ġust jieħu. U kull min jagħti mqar tazza ilma frisk lil xi ħadd minn dawn l-iżgħar għax hu dixxiplu, tassew ngħidilkom li ma jitlifx il-ħlas tiegħu”.

Il-Kelma tal-Mulej
Tifħir lilek Kristu

  1. Aqra sew l-Evanġelju biex issir midħla tiegħu
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Kif nista’ nkun peruna aktar ospitabbli? U bħala familja kif nistgħu nikbru f’din il-virtù?
  4. Bħala familja kif nitkellmu pereżempju dwar ir-refuġjati? Dwar il-faqar f’Malta?
  5. Nisimgħu u nirriflettu (The least of these)
  6. Ġesù illum qiegħed jistaqsi “Inti lili qiegħed tilqani? Tilqa’ lil dawk li jien nibgħat bil-messaġġ tiegħi?”
  7. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    a. Bibbja bil-qari minn San Mattew (10, 37-42)
    b. Xemgħa mixgħula
    ċ. Il-mejda jew post fejn hemm il-Bibbja u xemgħa, miksija bi drapp aħdar
    d. Computer/laptop bil-qari u clips
    e. Tazza u buqar bl-ilma, li aktar tard jintużaw fil-parti tal-Prayer Spaces
  8. Mur fil-parti tat-tfal skont l-etajiet u għamilha flimkien magħhom
  9. Addatta din il-parti skont kif hemm bżonn, tiddejjaqx tkun kreattiv 😊
  10. Mur fil-parti tal-Prayer Spaces għall-mument ta’ talb flimkien bħala familja

Fl-evanġelju tal-lum se nisimgħu lil Ġesù jkellimna dwar id-diffikultajiet fil-ħajja tagħna meta nagħmlu dak li jixtieq hu. Ġesù jurina wkoll li jridna nkunu ħbieb ma’ kulħadd.

  • Ġesù jaf li biex nagħmlu bħalu mhux se tkun dejjem faċli
  • Ġesù jrid li nilqgħu lil kulħadd, li nkunu ħbieb ma’ kulħadd
  • Stampa ta’ Ġesù (ara aktar ’l isfel)
  • Kuluri
  • Karti vojta
  • Kartonċina
  • Gloj
Stampa ta’ ĠesùNiżżel

Qabel ma nidħlu d-dar, għandna tapit? Hemm xi ħaġa miktuba fuqu? Għandu l-kelma WELCOME? Jekk tad-dar tagħna ma fihx din il-kelma, ġieli rajna xi tapit bħal dan? Xi drabi minflok tapit, ikun hemm plakka ħdejn il-bieb ta’ barra b’din il-kelma. X’aktarx f’ħafna ħwienet li mmorru naraw din il-kelma mal-bieb ta’ barra. X’taħsbu li tfisser?

Ġesù qalilna li min jagħmel xi ħaġa tajba ma’ xi ħadd ikun qiegħed jagħmilha miegħu. Inħallu lit-tfal isemmu kif jistgħu jagħmlu dan. Ngħinuhom biex jagħtu eżempji konkreti li verament jistgħu jagħmluhom. L-adulti jistgħu wkoll jagħtu eżempji mill-ħajja tagħhom. Il-messaġġ ta’ Ġesù hu għal kulħadd.

Nistaqsu: dejjem faċli li nagħmlu dawn l-affarijiet li semmejna?

Ġesù jaf li mhux faċli, u jieħu gost ħafna bina meta jarana nippruvaw nagħmlu dak li jixtieq hu u jwegħdna li jkun magħna. Wara nagħtu ċans biex it-tfal ipenġu l-istampa ta’ Ġesù. Fuq karti oħra jpenġu xi wħud mis-sitwazzjonijiet li ssemmew. Jekk jixtiequ, il-membri kollha tal-familja jistgħu jpinġu (jew jiktbu) xi ħaġa, mhux it-tfal biss. Fl-aħħar jitwaħħal kollox fuq kartonċina u din titpoġġa f’post fejn wieħed jista’ jaraha ta’ sikwit u jiftakar li Ġesù jridna nilqgħu u nkunu ħbieb ma’ kulħadd.

Inroddu s-salib.

Ngħidu t-talba tal-Missierna u niftakru li Alla jħobb lil kulħadd u huwa l-papà ta’ kulħadd.

Nisimgħu s-song, Jesus is my friend.

Illum Ġesù jgħidilna li biex inkunu dixxipli tiegħu u nagħmlu bħalu se jkollna wkoll żminijiet diffiċli. Meta jkun hemm xi tbatija fil-ħajja tagħna, din insejħula “is-salib tagħna”. Ġesù qatt ma jwegħdna li jekk inħobbuh u nagħmlu dak li jixtieq hu, mhux se jkollna mumenti diffiċli, iwegħdna biss li se jkun magħna u jagħtina l-għajnuna.

Darba kien hemm raġel li ħass li meta kien iqabbel lilu nnifsu ma’ dawk ta’ madwaru, hu kien qiegħed ibati wisq. Għalhekk dar fuq il-Mulej u qallu:

“Ġesù, jien ma nistax inkompli hekk. Dan is-salib tqil wisq u jien ma niflaħx inġorru aktar!”

U l-Mulej wieġbu:

“Mela le, ibni. Ara qed tarah dak il-bieb hemmhekk? Iftħu u poġġi s-salib tiegħek hemm ġew. Ħdejh hemm bieb ieħor, iftħu, hemm ġew se ssib ħafna slaleb, għażel wieħed li trid inti.”

Dan ir-raġel lanqas ried jemmen! U għamel kif qallu Ġesù. Tiegħu poġġih ġo kamra u daħal fil-kamra l-oħra biex jagħżel ieħor. Kien se joqgħod attent ħafna fl-għażla tiegħu, ma riedx jispiċċa agħar minn qabel. F’din il-kamra kien hemm ħafna u ħafna slaleb, slaleb ta’ kull daqs. Ma riedx xi wieħed kbir, allura dam idur u jqis. Fl-aħħar f’kantuniera ra salib, li f’moħħu deher iżgħar mill-oħrajn. “Dak irrid!” u mar ħdejn il-Mulej u wrieh ix-xewqa tiegħu.

Il-Mulej tbissem u qallu: “Mela le, ibni, ħu dak is-salib li għażilt, imma għandek tkun taf li huwa l-istess wieħed li inti ħallejt warajk!”

Fil-ħajja, dejjem se jkun hemm mumenti diffiċli. L-aħjar mod li nistgħu ngħixu dawn il-mumenti huwa li nafdaw f’Alla.

  • Forom maqtugħin ta’ slaleb ta’ daqs differenti, bħala numru jkun hemm aktar minn wieħed kull wieħed
  • Lapsijiet
  • Kurċifiss

Nistaqsu: x’taħsbu dwar dik l-istorja li smajna?

X’inhuma s-slaleb tagħna? Inħallu lil kulħadd jitkellem. Jista’ jkun li s-sitwazzjoni li qed ngħixu bħalissa, li ma nistgħux imorru fejn irridu, li rridu nżommu distanza minn oħrajn, hija ta’ salib tqil għat-tfal. Inħalluhom jesprimu dawn id-diffikulatjiet tagħhom u anke l-adulti jitkellmu dwar it-tbatijiet tagħhom.

X’wegħdna Ġesù? (li meta nerfgħu s-salib tagħna huwa se jkun magħna żgur) Kulħadd jagħżel wieħed mis-slaleb u fuqu jikteb dik it-tbatija li għaddej minnha bħalissa. Meta jkun lest kulħadd, jittieħdu s-slaleb l-oħra u fuqhom jinkitbu tbatijiet ta’ nies partikolari; jistgħu jkunu speċifiċi, per eżempju marda li għaddejja minnha xi zija jew aktar ġeneriċi, bħat-tbatijiet tar-refuġjati, jew ta’ nies f’pajjiżi fejn hemm il-faqar. Dawn is-slaleb kollha jitpoġġew f’riġlejn il-kurċifiss. Ġesù ma hu qed jistaqsina xejn li qabel ma għaddiex minnu hu. Il-wegħda li għamlilna, jiġifieri li meta nafdaw fih huwa jkun dejjem magħna, hija realtà.

Flimkien nisimgħu, Footprints in the sand .

Inroddu s-salib.

Grazzi Mulej, li inti ma titlaqna qatt. Għallimna nafdaw fik, agħtina l-fidi biex qatt ma ninsew li aħna dejjem ninsabu fil-preżenza tiegħek. Ammen.

Fl-Evanġelju tal-lum, Ġesù jgħid li min jagħmel xi ħaġa partikolari, se jkun ippremjat u li żgur “ma jitlifx il-ħlas tiegħu”. X’inhi din il-ħaġa li wieħed irid jagħmel biex jirbaħ dan il-premju mingħand Ġesù?

Correct! Wrong!

Xi jridna nerfgħu Ġesù, biex inkunu dixxipli u ħbieb veri tiegħu?

Correct! Wrong!

Ġesù jistieden lid-dixxipli u lil dawk li jħobbuh biex iħobbuh iżjed minn kollox u iżjed milli jħobbu lil kulħadd. Ġesù jgħid li rridu nħobbuh saħansitra iżjed milli nħobbu:

Correct! Wrong!

Skont Ġesù, biex inti “issib” lil ħajtek (jiġifieri jkollok il-paċi f’qalbek li tkun mimlija bl-imħabba t’Alla), x’għandek bżonn tagħmel?

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.