Hosanna

Ħadd il-Palm

Illum Ħadd il-Palm u għalhekk nagħti bidu għall-Ġimgħa Mqaddsa. Dawn huma ġranet, meta aħna nimxu wara Ġesù fil-vjaġġ tiegħu lejn is-salib, u li jwassluna wkoll għall-qawmien tiegħu fl-Għid il-Kbir. Il-Liturġija tibda b’purċissjoni bil-palm biex niftakru fid-daħla trijonfali ta’ Ġesù, f’Ġerusalemm. Ġesù daħal Ġerusalemm riekeb fuq ħmara, waqt li n-nies kienu qed ixejru l-friegħi tal-palm u firxu l-mantari tagħhom fit-triq biex Ġesù jgħaddi minn fuqhom. L-għajjat tagħhom ta’ “Hosanna,” kif, fi ftit ġranet tinbidel f’“ssallbu”? Ġesù kien sejjer lejn is-salib, fejn kellu permezz tat-tislib, jerfa’ miegħu lil kull persuna. Il-purċissjoni tal-lum, tinkoraġġina biex nimxu ma’ Ġesù fil-ġrajjiet tal-Ġimgħa Mqaddsa u l-Għid.

Il-qari huwa dejjem l-istess, għalkemm l-Evanġelju jinbidel skont iċ-ċiklu. Fis-Sena A, nisimgħu r-rakkont tal-passjoni ta’ Ġesù, skont San Mattew. Kull evanġelista jirrakkonta din il-ġrajja mill-perspettiva tiegħu. Mattew jikteb għall-insara Lhud, meta huma kienu qed jinqatgħu mis-sinagoga. Mattew jassigurhom li l-passjoni ta’ Ġesù kienet twettaq dak li kien hemm miktub fl-iskrittura Lhudija. Il-mewt kiefra ta’ Ġesù ma kienitx xi kumbinazzjoni, iżda parti mill-misteru tal-pjan ta’ Alla. Bi ħsieb, Mattew jikkwota l-iskrittura Lhudija biex juri li Ġesù kien verament il-Messija mwiegħed. Mattew irid juri li l-passjoni u l-mewt umiljanti ta’ Ġesù kienu “jagħmlu sens.” Hu jagħmel dan billi jenfasizza li l-passjoni ta’ Ġesù, kienet parti mill-pjan ta’ Alla għas-salvazzjoni tad-dinja kollha. Qalb Ġesù kienet mimlija bl-imħabba li Alla għandu għal kull wieħed u waħda minna. Hu miet fuq is-salib għax iħobbna. Interessanti li wieħed jinnota t-tweġibiet ta’ Ġuda u ta’ Pietru meta huma jiġu wiċċ imb’wiċċ maċ-ċaħda ta’ Ġesù. Xi drabi aħna bħal Ġuda li ttradixxa lil Ġesù u ddispjaċih. Xi drabi nkunu bħal Pietru u qal li ma kienx jafu, jew bħad-dixxipli li raqdu meta Ġesù kien f’siegħa ta’ dlam fil-ġnien taż-Żebbuġ, iżda kellhom reazzjoni vjolenti meta Ġesù ġie arrestat. Hemm drabi meta nkunu bħal Xmun, li kien sfurzat iġorr is-salib ta’ Ġesù. Ġieli nkunu bħall-mexxeja li beżgħu minn Ġesù, jew bħal Ponzju Pilatu li ħasel idejh mill-biċċa kollha. Hemm ġranet meta nsibuha diffiċli li nkunu ġenituri, iżda l-lezzjoni li nitgħallmu llum, mill-passjoni ta’ Ġesù, hi li, ir-rikonċiljazzjoni u l-fejqan iġibulna aktar ferħ, milli l-imrar tad-disprament. Alla jrid li nemmnu f’Ġesù, nimxu warajh u nadurawh, waqt li nagħrfuh bħala l-Mulej u Salvatur tagħna. Aħna msejħa nerfgħu s-salib tagħna u nimxu wara Ġesù, u nbatu bħalma għamel hu. Matul din il-Ġimgħa Mqaddsa, kollha kemm aħna, nistgħu nikbru fl-imħabba, devozzjoni u qima lejn Ġesù imsallab. L-imsallab li hu s-Salvatur tad-dinja.

Qari mill-Evanġelju skont San Mattew (Mt 26: 14-27:66)

Verżjoni iqsar, 27: 11-54

Tista’ taqra l-Evanġelju minn hawn https://laikosblog.org/2022/09/27/qq_020423/ 

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Matul din il-ġimgħa poġġu l-kurċifiss ħdejn Bibbja miftuħa fuq l-Evanġelju tal-lum, biex tiftakru fid-determinazzjoni li jrid ikollna li kuljum irridu nkunu xhieda tal-mewt u qawmien ta’ Ġesù, fil-ħajja tal-familja tagħna.
  4. Papa Franġisku staqsiena noqgħodu bil-wieqfa quddiem il-kurċifiss id-dar u “ħarsu lejn il-Kurċifiss, kejl tal-imħabba ta’ Alla għalina. Quddiem Alla li jaqdina sal-punt li jagħti ħajtu għalina, nitolbu, aħna u nħarsu lejn il-Kurċifiss, il-grazzja li ngħixu biex naqdu.”
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mattew (Mt 26:14-27:66; jew il-verżjoni iqsar 27:11-54)
    ii. Xemgħa
    iii. Il-mejda fejn hemm il-Bibbja, miksija bi drapp aħmar
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Illum nagħtu bidu għall-ġimgħa speċjali, insejħulha l-Ġimgħa Mqaddsa. Matul din il-ġimgħa niftakru dwar il-passjoni u l-mewt ta’ Ġesù fuq is-salib. Id-dwejjaq li nħossu minħabba l-mewt tiegħu, ser jinbidlu f’ferħ meta niċċelebraw il-qawmien tiegħu fl-Għid. Illum niċċelebraw Ħadd il-Palm.

  • Il-Ġimgħa Mqaddsa tibda b’Ħadd il-Palm, meta niftakru fil-ġrajja meta Ġesù daħal Ġerusalemm riekeb fuq ħmara u l-folla tan-nies ferħu b’Ġesù u bdew jgħajtu “Hosanna.”
  • Meta nilqgħu lill-oħrajn, inkunu qed nilqgħu lil Ġesù.
  • Platt tal-kartun
  • Printout tas-simboli
  • Printout tal-weraq tal-palm
  • Imqass/gloj/lapsijiet tal-kulur

Illum Ħadd il-Palm. Illum niċċelebraw meta Ġesù daħal Ġerusalemm bħala Re, għalkemm kien riekeb fuq ħmara. Kienet ġurnata li tat bidu għal ġimgħa speċjali, ġimgħa fejn Ġesù kien milqugħ b’ferħ, imbagħad ġie arrestat, interrogat, imsawwat, ikundannat u msallab. Iżda meta spiċċat din il-ġimgħa bdiet oħra, bħalma bdiet ta’ qabilha…b’ċelebrazzjoni wkoll, għax Ġesù qam mill-mewt. 

F’Ħadd il-Palm, is-saċerdot ġeneralment jibda bit-tberik tal-friegħi tal-palm u qabel ma tibda l-quddiesa, ikun hemm purċissjoni. Aħna nġorru l-palm, biex niftakru meta n-nies qatgħu l-friegħi u poġġewhom fit-triq biex Ġesù jgħaddi minn fuqhom, waqt li bil-ferħ, huma għajtu, “Hosanna, lil Bin David! Imbierek min ġej f’isem il-Mulej! Hosanna fl-ogħla tas-smewwiet!”

Nisimgħu kif Ġesù bagħat lid-dixxipli fir-raħal ta’ Betfaġe ħdejn l-Għolja taż-Żebbuġ, fejn kellhom isibu ħmara u felu marbuta; huma kellhom iħolluhom u jeħduhom lil Ġesù, u jekk iwaqqafhom xi ħadd, kellhom jgħidulu, “il-Mulej jeħtieġhom.” Id-dixxipli għamlu kif qalilhom Ġesù u poġġew mantar fuq il-ħmara, biex Ġesù jirkeb fuqha. Il-ħmar huwa annimal umli, mhux tant speċjali, li jirkeb fuqu xi re. Iżda Ġesù għażel li jirkeb fuq ħmara għax hu kien re speċjali u dan kien li Alla xtaqu jagħmel. In-nies, kollha kienu ferħana jilqgħu lil Ġesù u qatgħu friegħi tal-palm u poġġew il-mantar tagħhom fit-triq bħala sinjal ta’ rispett. Huma xejru l-palm u bdew jgħajtu kliem ta’ tifħir, meta Ġesù għadda minn ħdejhom. Kieku inti x’kont tagħmel, kieku kont f’din il-folla? Kont tkun ferħan li tara lil Ġesù? Alla ħalaqna lkoll, ma tagħmilx differenza fejn twelidna. Ġesù jħobb lil kull wieħed u waħda minna, u qiegħed fina lkoll. Għalhekk, kull darba li niltaqgħu ma’ xi ħadd u nilqgħuh, inkunu qed nilqgħu lil Ġesù. X’tista’ tagħmel matul din il-ġimgħa, biex tilqa’ lil xi ħadd?

Biex tiftakar x’ġara matul il-Ġimgħa Mqaddsa, għamel girlanda bis-simboli tal-Ġimgħa Mqaddsa. Agħmel ċirklu fuq il-platt tal-kartun u aqtgħu barra, iċ-ċirku ta’ barra ser tużah bħala bażi tal-girlanda. Tista’ jekk tixtieq tagħtih il-kulur. Imbagħad aqta’ l-weraq tal-palm u agħtihom il-kulur ukoll, aqta’ wkoll is-sitt simboli. Irranġahom fuq iċ-ċirku, għamel werqa tal-palm bejn kull simbolu u waħħalhom. Dendel il-girlanda fil-kamra tiegħek biex tiftakar fil-ġrajjiet tal-Ġimgħa Mqaddsa.

Isma’ s-song, Hosannah rock.

Inroddu s-salib

Għażiż Alla, grazzi li inti bagħat lil Ibnek, Ġesù. Aħna nilqgħuh f’qalbna kif għamlu n-nies ta’ Ġerusalemm, bħalhom nilqgħuh b’rispett, imħabba u ferħ. Għinna niftakru li inti qiegħed f’kull wieħed u waħda minna, u għalhekk għandna nilqgħu lil kulħadd. Ammen.

Illum Ħadd il-Palm jew Ħadd il-Passjoni. Huwa l-aħħar Ħadd tar-Randan u l-bidu tal-Ġimgħa Mqaddsa, meta niftakru fil-passjoni, mewt u qawmien ta’ Ġesù. L-attenzjoni tagħna llum tmur fuq id-daħla solenni ta’ Ġesù Ġerusalemm, kif ukoll id-dwejjaq tat-tbatija tiegħu u l-mewt fuq is-salib. Iżda dawn huma mbagħad mibdula f’ferħ kbir kif niċċelebraw il-qawmien tiegħu fl-Għid.

  • Din hija l-Ġimgħa Mqaddsa fil-kalendarju tal-Knisja. Niftakru fl-aħħar ġranet ta’ Ġesù f’din id-dinja, fit-tbatija u fil-mewt tiegħu fuq is-salib
  • Is-salib ta’ Ġesù huwa simbolu ta’ rebħa
  • Il-printout tas-salib
  • Printout tas-simboli
  • Kartonċina
  • Imqass/gloj/lapsijiet tal-kulur

Illum Ħadd il-Palm, xi kultant imsejjaħ ukoll Ħadd il-Passjoni. Nibdew il-Ġimgħa Mqaddsa, żmien meta niftakru f’dak li ġara matul l-aħħar ġimgħa ta’ Ġesù, niftakru fit-tbatija u l-mewt tiegħu fuq is-salib. Iżda l-istorja ma tieqafx hawn. Il-ġimgħa d-dieħla, fl-Għid, niċċelebraw il-qawmien mill-mewt ta’ Ġesù. Jekk fl-isports day, tieħu sehem f’tellieqa u tirbaħ, x’tistenna? Jekk għidt xi medalja jew tazza, għandek raġun. Jista’ jkun li xi wħud minnkom irbaħtu xi tazza l-iskola jew fil-football, basketball jew ballet. It-tazza hija simbolu ta’ rebħa, meta tkun għamilt xi ħaġa li eċċellajt fiha. X’taħsbu li hu s-simbolu ta’ rebħa nisranija? Xi tazza tleqq jew xi medalja? Le mhijiex. Is-simbolu nisrani tar-rebħa huwa s-salib ta’ Ġesù, il-kurċifiss (Ġesù fuq is-salib). Forsi taħsbu li din hi ħaġa stramba, għax Ġesù miet fuq is-salib wara li bata, kien umiljat mis-suldati. Kif jista’ jkun li ġrajja bħal din tkun rebħa? It-tweġiba hija, li wara tlett ijiem, Ġesù qam mill-mewt. Il-qawmien biddel simbolu ta’ mistħija, f’wieħed ta’ kif aħna nerġgħu nsiru ħbieb ma’ Alla. It-tbatija, il-mewt u l-qawmien ta’ Ġesù, salvaw lil kulħadd mid-dnub u l-qawmien hija r-rebħa fuq il-mewt, li fetħitilna t-triq għall-ħajja ġdida fil-ġenna. Dan kollu kien possibbli minħabba l-imħabba kbira li Alla għandu għalina. Għalhekk, meta tħarsu lejn kurċifiss, ma għandkomx għalfejn tħossukom imdejqa, għax dan ma kienx it-tmiem. Il-passjoni ta’ Ġesù kienet parti mill-pjan ta’ Alla għas-salvazzjoni tad-dinja u hija l-akbar rebħa.

Forsi tixtiequ taraw il-video ta’ Brother Francis, The Stations of the Cross,

jew forsi tixtiequ tagħmlu salib biex tiftakru dak li ġara matul il-Ġimgħa Mqaddsa. Ipprintjaw is-salib u waħħluh fuq kartonċina. Imbagħad ipprintjaw ukoll is-simboli u waħħluhom fuq is-salib u poġġuh fil-kamra tagħkom.

Isimgħu s-song, Victory.

Inroddu s-salib

Mulej Ġesù, b’umiltà ninżel għarkobtejja quddiemek bi tpattija għall-dnubieti. Grazzi tas-sagrifiċċju fuq is-salib. Meta naħseb dwar kemm batejt għalija, qalbi tinqasam. Għinni, sabiex inħobbok u nobdik, bħalma inti ħabbejt u obdejt lil Alla Missier. Ammen. 

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.