Imħabba waħda

Il-Ħames Ħadd tal-Għid

L-imħabba, hija x’aktarx waħda mill-aktar kliem li nużaw u nisimgħu fil-kant. Illum Ġesù jgħidilna li għandna nħobbu lil xulxin. Iżda ma jieqafx hemm. Ġesù jikkwalifika x’tip ta’ mħabba għandu jkollna lejn l-oħrajn. Hi mħabba bħalma ħabb hu. L-imħabba li għandu Ġesù għalina, wasslitu biex jagħti ħajtu għalina u jmut fuq is-salib. Ġesù tana kull ma kellu. Aktar minn hekk, din l-imħabba ta’ Ġesù, hi għal kulħadd. Ġesù ma jħobbniex b’xi kundizzjonijiet. L-imħabba ta’ Ġesu’ hija għotja totali msejsa fuq il-qadi. Din l-imħabba ta’ Ġesù turina b’mod viżibbli l-imħabba ta’ Alla. 

L-imħabba toffri sfida kontinwa, speċjalment meta rridu nuru mħabba lil xi ħadd li skont aħna ma jistħoqlux. L-imħabba li Ġesù jridna nuru m’għandhiex taqsam ma dak li nħossu. Aħna nuru mħabba skont kif inġibu ruħna ma’ dak li jkun, nuru l-imħabba fl-azzjonijiet tagħna. L-imħabba tirrikjedi sagrifiċċju.

Dak li qiegħed jistaqsi minna Ġesù jmur kontra n-natura tagħna. Aħna nħobbu lil min iħobbna u l-istint jgħidilna biex inpattu lil min iweġġagħna jew jonqosna. Ġesù biss jista’ jgħinna biex naslu nħobbu kif qed jikkmandana hu. Waħedna mhux ser naslu żgur. Irridu nafdaw aktar fih. Irridu nersqu b’mod regolari għas-sagramenti tal-Ewkaristija u tal-Qrar, għax dawn jagħtuna l-għajnuna meħtieġa. L-Ispirtu s-Santu, li rċevejna fil-magħmudija u fil-griżma tal-Isqof, huwa l-istess Spirtu s-Santu li Ġesù kien idur lejh biex jingħata l-qawwa u l-għerf biex jgħix bil-mod li għex. L-Ispirtu s-Santu jagħtina l-kuraġġ u l-qawwa biex immorru kontra dak li tgħidilna d-dinja, u biex ngħixu skont ir-rieda ta’ Alla. 

L-Evanġelju jibda b’referenza għal Ġuda. Ġuda huwa dak il-persuna li ħalla r-regħba tagħmih. Minflok imħabba wera l-mibegħda. Hu patta l-imħabba ta’ Ġesù bi tradiment. Minjaf x’ħass Ġesù, kif ra lil Ġuda sejjer! Ġesù kien jaf x’kien sejjer jagħmel. Minflok kliem ta’ mibgħeda, Ġesù dar lejn l-appostli u kellimhom dwar l-imħabba. Anke f’dan il-mument, fejn wieħed li għex miegħu, ittradih, Ġesù juri xi tfisser li tħobb bil-fatti. Nitolbu biex aħna ma nħallux ġibdiet ħżiena, idallmulna t-triq u jeħduna l-bogħod mill-imħabba li qiegħed joffrielna Alla.

Qari mill-Evanġelju skont San Ġwann (Ġw 13, 31-33a, 34-35) 

Kif ħareġ Ġuda miċ-ċenaklu, Ġesù qal: “Bin il-bniedem huwa gglorifikat issa, u permezz tiegħu huwa gglorifikat Alla. Jekk Alla huwa gglorifikat permezz ta’ Bin il-bniedem, Alla wkoll permezz tiegħu nnifsu għad jigglorifika lilu, u dalwaqt jigglorifikah. Uliedi, ftit ieħor se ndum magħkom. Nagħtikom kmandament ġdid, li tħobbu lil xulxin. Bħalma ħabbejtkom jien, hekk ukoll ħobbu intom lil xulxin. Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. L-imħabba li Ġesù jridna nuru lill-oħrajn, hija mfissra sew fl-ittra lill-Korintin. Aqra, 1 Korintin 13, 4-7. Minflok il-kelma mħabba, poġġi ismek. Fejn tista’ tirranġa biex l-imħabba tiegħek tkun aktar tixbah lil dik ta’ Ġesù?
  4. Hemm xi ħadd li bħalissa qed issibha diffiċli li turih imħabba? Ftakar li Ġesù miet għal din il-persuna wkoll. Jekk qed issibha diffiċli li taħfer, tista’ titlob għall-għajnuna. Sib saċerdot jew direttur spiritwali li tista’ tiftaħ qalbek miegħu jew magħha (direttur spiritwali tista’ tkun mara wkoll) biex iwassluk li ssib il-paċi. 
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (13, 31-33a, 34-35)
    ii. Xemgħa bajda
    iii. Il-mejda fejn hemm il-Bibbja, miksija bi drapp abjad
    iv. Stampa jew forma ta’ qalb ħamra
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Meta l-mama jew il-papa jew xi ħadd jgħidlek li jħobbok, x’tifhem? X’jiġifieri li xi ħadd inħobbok? Illum Ġesù se jkellimna dwar l-imħabba! Ejjew nisimgħu x’ser jgħidilna Ġesù.

  • Ġesù jrid li aħna nħobbu lill-oħrajn kif iħobbna hu
  • Vażett tal-plastik, b’għonq wiesa’ jew kaxxa tal-kartun (ara l-attività aktar l-isfel biex ikollok idea tal-qisien tar-reċipjent)
  • Printouts tal-attività
  • Lapes 
  • Kuluri u dekorazzjonijiet
  • Imqass 
  • Gloj 
attivitàNiżżel

Meta xi ħadd inħobbok, ma jgħidlekx hekk bil-kliem biss, imma wkoll juri li jħobbok b’dak li jagħmel. Intom kif tafu li l-mama u l-papa jħobbukom? (ilestulkom l-ikel, jeħdukom l-iskola, jilgħabu magħkom, jixtrulkom dak li għandkom bżonn, jaraw li għandkom ħwejjeġ indaf, joħdukom postijiet fejn tieħdu gost….)

Mela l-mama u l-papa, għalkemm jgħidulkom li jħobbukom jurukom ukoll li jħobbukom, meta jagħmlu tant affarijiet għalikom.

Intom tħobbuhom lill-mama, lill-papa, lil ħutkom? X’tagħmlu biex turuhom li tħobbuhom?

Ġesù, illum jgħidilna biex aħna nħobbu lill-oħrajn kif iħobb hu. Meta Ġesù kien jgħix mal-appostli, kien iħobb lil dawk kollha li kien jiltaqa’ magħhom. Tiftakru xi eżempji, ta’ kif Ġesù kien juri lin-nies li jħobbhom? (jitkellem magħhom, jgħallimhom, kellu ħafna paċenzja, per eżempju biex jgħallem kien juża l-parabolli, ifejjaq lil dawk li kienu morda, lin-nies tahom jieklu meta kellhom il-ġuħ, kien ħabib ma’ kulħadd)

Illum, Ġesù qalilna wkoll li meta aħna nħobbu lill-oħrajn, inkunu qed nuru lin-nies li aħna l-ħbieb tiegħu! Qatt kontu tafuha din? Li bil-mod kif inġibu ruħna, in-nies ikunu jafu aħna aħniex ħbieb ta’ Ġesù jew le!

Intom tridu tkunu ħbieb ta’ Ġesù?

Tridu turu lin-nies li intom ħbieb ta’ Ġesù?

Mela, biex turu li intom ħbieb tiegħu, tridu tħobbu kif iħobb hu. L-attività ta’ din il-ġimgħa ser tgħinkom tagħmlu affarijiet li turu li tħobbu lill-oħrajn. Meta tagħmlu hekk, mhux biss qegħdin turuhom li tħobbuhom, imma turu wkoll li intom tħobbu lil Ġesù u li intom ħbieb tiegħu. Għalkemm din hi l-attività għal din il-ġimgħa, ibqgħu dejjem uru li tħobbu lill-oħrajn. Kemm jieħu gost Ġesù, jarakom tħobbu lill-oħrajn kif jixtieq hu!

Fuq il-vażett jew kaxxa li se tużaw għall-attività waħħlu l-istampa ta’ Ġesù, jgħid ‘Ħobbu lil xulxin, bħalma ħabbejtkom jien.’ Jekk tixtiequ tistgħu tiddekoraw mal-madwar. Wara, aqtgħu il-qlub. Fuq kull qalb għandkom miktub xi ħaġa. Agħtu xi eżempji ta’ kif tistgħu tagħmlu dak li hemm miktub. Per eżempju, ‘ngħinu lill-oħrajn’, tistgħu iżżommu l-affarijiet tagħkom f’posthom, tgħinu biex tlestu l-mejda għall-ikel, taraw li l-kelb għandu x’jixrob. Fuq qalb oħra hemm miktub ‘nagħmlu paċi’ dan ifisser li jekk m’intomx ħbieb ma’ xi ħadd, terġgħu tagħmlu paċi miegħu jew magħha, li tilgħabu fair, għax meta tiċċitjaw fil-logħob ma tkunux qed turu li intom paċi ma’ min qegħdin tilgħabu. Wara li tagħtu eżempju dwar dak li hemm miktub fuq il-qlub, fuq wara tal-qalb, pinġu xi wħud mill-eżempju li tkellimtu dwarhom. Meta tlestu poġġuhom fir-reċipjent. Kuljum oħorġu waħda minn dawn il-qlub u matul il-ġurnata ppruvaw għamlu dak li hemm inpinġi/miktub. Dan mhux se jkun dejjem faċli, Ġesù jaf li xi drabi nsibuha diffiċli li nħobbu lill-oħrajn. Għalhekk tajjeb li wara li tieħdu l-qalb, titolbu lil Ġesù biex jgħinkom. Ftakru li meta tkunu qegħdin tagħmlu hekk, lil Ġesù tkunu qegħdin tgħidulu li tħobbuh ukoll! Ġesù jrid li nuru li nħobbu lilu u lill-oħrajn b’dak li ngħidu u b’dak li nagħmlu.
Waqt li qegħdin tpinġu, isimgħu, Love one another.

Inroddu s-salib.

Għażiż Ġesù, aħna rridu nħobbuk, aħna rridu nkunu ħbieb tiegħek. Illum għidtilna li meta aħna nħobbu lill-oħrajn, inkunu qegħdin inħobbu lilek ukoll u nkunu qegħdin nuru li aħna l-ħbieb tiegħek. Ġesù, inti taf li mhux dejjem faċli li nħobbu lil dawk li ma jkunux ħbieb magħna. Aħna rridu nkunu bħalek u nħobbu lil kulħadd. Għinna Ġesù, biex aħna nkunu aktar bħalek. Ammen.

Kif ser nuru li aħna ħbieb ta’ Ġesù? It-tweġiba se nsibuha fl-Evanġelju tal-lum.

  • Ġesù jgħidilna biex inħobbu lill-oħrajn, jgħidilna wkoll biex nimxu fuq l-eżempju tiegħu
  • Vażett tal-plastik, b’għonq wiesa’ jew kaxxa tal-kartun (ara l-attività aktar l-isfel biex ikollok idea tal-qisien tar-reċipjent)
  • Printouts tal-attività – waħda bil-kliem ta’ Ġesù, u minn tal-qlub agħmlu kopji skont kemm ikun hemm bżonn
  • Lapes 
  • Imqass 
  • Gloj
AttivitàNiżżel

Qatt tħajjartu ssajru kejk jew twaħħlu xi nkwatru b’ritratt ta’ kantant jew attur favorit, mal-ħajt? X’tagħmlu? Tistaqsu lil xi ħadd biex jurikom?

Xi tkun l-eħfef li l-mama jew il-papa, jew xi ħadd ieħor, jogħqod magħkom u jurikom pass pass x’għandkom x’tagħmlu, jew inkella kemm jgħidilkom xi tridu tagħmlu u jħallukom tagħmlu din il-biċċa xogħol waħedkom?

Meta xi ħadd, li diġà jkollu l-esperjenza jurik kif tagħmel xi ħaġa, tgħin ħafna, għax din tiffrankalek numru ta’ żbalji li tista’ tieħu, juruk ukoll l-aħjar mod li tista’ tagħmilha. Li xi ħadd jgħinek, hija differenti minn xi ħadd jagħmillek il-ħaġa hu. Meta xi ħadd jurik kif tagħmel xi ħaġa, ikollok l-eżempju jew mudell fuqhiex timxi. Min jurik, ikollu diġà l-esperjenza ta’ kif jagħmel dik il-ħaġa. 

Illum Ġesù jagħtina kmand. Tiftakru x’kien?

Ġesù jgħidilna nħobbu lil xulxin. Imma ma jieqafx hemm. Jgħidilna x’tip ta’ mħabba trid tkun. Aħna rridu nħobbu kif ħabb hu. Ġesù ma ħabbx lill-oħrajn billi qalilhom hekk bil-kliem, iżda Ġesù wera mħabba f’dak li għamel. Mela Ġesù mhux biss qalilna li rridu nħobbu. L-ewwel ħabb hu lill-oħrajn, imbagħad lilna qalilna biex nagħmlu bħalu. Il-ħajja ta’ Ġesù, għalhekk hija l-mudell li rridu nimxu fuqu. F’dak kollu li nagħmlu u ngħidu rridu nimitaw lil Ġesù. Meta nagħmlu dan, in-nies li jarawna, jindunaw li aħna ħbieb ta’ Ġesù. 

Ġesù, kif wera li jħobb lin-nies? X’kien jagħmel? X’kien jgħid? (kien ħabib ma’ kulħadd, ma kienx jiddejjaq jersaq qrib dawk li kienu morda, waħedhom, fqar, imwarrba mill-oħrajn. Kien jgħin lil kulħadd u fejjaq ħafna nies, ra kif għamel biex il-ħajja ta’ dawk li ltaqa’ magħhom tkun aħjar, kien jgħallem lil kulħadd, kien jgħallem b’mod li jinftiehem, għalhekk kien jaddatta l-kliem tiegħu skont ma’ min kien ikun qiegħed jitkellem, kien jitlob għall-oħrajn, u għallem dwar kif wieħed jitlob, kien ħanin ma’ kulħadd…)

Wara li semmejtu kif Ġesù kien juri mħabba lejn l-oħrajn, intom kif ser turu lill-oħrajn li tħobbuhom?

Minn dawn l-eżempji li tajtu, indunajtu li mhux dejjem faċli li tħobb lill-oħrajn. Hemm drabi li rridu nagħmlu sagrifiċċju biex inħobbu lill-oħrajn. Hija diffiċli li tħobb lil xi ħadd li ma jħobbokx lura. Minkejja dan, Ġesù ħabb ukoll lil dawk li sallbuh. Minn fuq is-salib, Ġesù talab lil Alla Missier biex jaħfrilhom!

Wara li tajtu dawn l-eżempji, issa tistgħu tagħmlu l-attività tal-lum. Għandkom stampa bil-kliem ta’ Ġesù, ‘Ħobbu lil xulxin bħalma ħabbejtkom jien.’ Din se twaħħluha fuq ir-reċipjent li ppreparajtu. Għandkom il-qlub (agħmlu kopji skont kemm għandkom bżonn), aqtgħuhom u fuqhom iktbu l-eżempji li semmejtu. Meta tlestu, poġġu l-qlub fir-reċipjent. Dan l-eżerċizzju jista’ jsir minn kulħadd, għax ilkoll imsejħa li nħobbu kif ħabb Ġesù. (Għal tfal iżgħar araw l-attività fis-sezzjoni 4 sa 7 snin) Ir-reċipjent ħalluh fil-kamra fejn l-aktar li tiltaqgħu. Kull filgħodu, kulħadd jieħu qalb, jaqra dak li hemm fuqha u jerġa’ jpoġġiha lura. Matul il-ġurnata, kulħadd jagħmel l-almu tiegħu biex jgħix dak li kien hemm miktub fuq il-qalb.Wara li tkunu lesti, isimgħu s-song, We love, we love.

Inroddu s-salib.

Grazzi Ġesù li wrejtna kif għandna nħobbu lill-oħrajn. Grazzi li inti tħobbna b’imħabba speċjali. Mhux faċli li nimitawk. Hemm drabi li diffiċli li nħobbu lill-oħrajn. Għalhekk nitolbuk biex tagħtina l-għajnuna tiegħek biex negħlbu dawn l-ostakli li niltaqgħu magħhom.

Nitolbu flimkien l-Att ta’ Mħabba

Mulejja, għaliex inti tjieba bla tarf u bla tmiem, jiena nħobbok fuq kollox u nħobb il-proxxmu tiegħi bħali nnifsi, minħabba fik. Ammen. 

Fuljett tal-Ħames Ħadd tal-GħidNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.