Merfugħ Bin il-bniedem

Festa tal-Eżaltazzjoni tas-Salib Imqaddes, Sena Ċ

Illum, l-14 ta’ Settembru, il-Knisja tiċċelebra l-festa tal-Eżaltazzjoni tas-Salib Imqaddes. Għada, imbagħad niċċelebraw il-festa tad-Duluri.

Din il-festa bdiet fil-Knejjes tal-Lvant; fis-seklu ħamsa, f’Ġerusalemm, kienet issir b’solennità kbira daqs dik tal-Għid il-Kbir fl-anniversarju tad-dedikazzjoni tal-Bażilka tal-Qabar ta’ Kristu, il-jum li fih skont it-tradizzjoni nstab is-Salib, li hu s-sinjal tar-rebħa li Kristu għamel bil-misteru tal-Għid.

L-Uffiċċju tal-Qari tal-ġurnata tal-lum, jibda b’innu li jgħid hekk:

Ħajr, għuda mqaddsa, sebħ u ġid tad-dinja;
int tama tagħna għax rebbaħtna l-ġenna;
għax int sinjal ta’ rebħ, li l-hemm li jkiddna
għad ifarraġna, w jinbidlilna f’benna.

Fi żmien Ġesù, mewt fuq is-salib kien mod mill-aktar krudili u ta’ tbatija. L-agħar nies kienu jingħataw din il-kundanna. Iżda wara l-mewt ta’ Ġesù, dan is-salib sar simbolu ta’ tama, għall-insara. Fil-fatt, meta nitolbu t-Talba tat-Triq tas-Salib (il-Via Sagra), nirrepetu ma’ kull stazzjon: “Nadurawk o Ġesù, u nberkuk għax b’salibek u l-mewt tiegħek inti fdejtna.” Din hija r-raġuni għaliex aħna l-insara neżaltaw is-salib li fuqu miet Ġesù.

Fl-Evanġelju tal-lum, Ġesù jfakkarna li hu ġie fid-dinja biex kulħadd isalva. Hu ma ġiex fid-dinja biex jikkundana, għax “Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.”

Minbarra li din il-festa tal-lum, tfakkarna fl-imħabba kbira ta’ Alla għalina, is-salib ukoll ifakkarna fit-tbatija. Kulħadd ibagħti, mhux aħna l-kbar biss, iżda wkoll it-tfal. Kif nifaċċjaw it-tbatija tagħna, anke dawk is-sagrifiċċji żgħar u kbar li niltaqgħu magħhom kuljum? X’inhu l-parir tagħna, lit-tfal meta huma għaddejjin minn żmien ta’ tbatija jew iltaqgħu ma’ xi kuntrarju? Għandna noffru dawn is-sagrifiċċji. Tiftakar xi ħadd jgħidlek, “Offrieha għall-dnubietek”? Dan mhux kliem fieraħ, iżda li jagħmel sens. Meta aħna noffru t-tbatijiet tagħna, inkunu qegħdin ningħaqdu mas-sagrifiċċju ta’ Ġesù fuq is-salib, u nistgħu noffru din it-tbatija għall-oħrajn, jew anke għalina biex insiru persuni aħjar. Li noffru t-tbatija tagħna, hija ta’ għajnuna biex jirnexxielna ngħaddu żmien diffiċli u mudlam. Ġesù bata u miet għalina, meta noffru t-tbatija tagħna għall-oħrajn, inkunu qegħdin insiru aktar bħal Ġesù.

Qari mill-Evanġelju skont San Ġwann (Ġw 3, 13-17)

F’dak iż-żmien, Ġesù qal lil Nikodemu: «Ħadd ma tela’ s-sema ħlief Bin il-bniedem, li niżel mis-sema. U kif Mosè rafa’ s-serp fid-deżert, hekk jeħtieġ li jkun merfugħ Bin il-bniedem, biex kull min jemmen fih ikollu l-ħajja ta’ dejjem. Għax Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem.» Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.»

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Minn fuq is-salib, Ġesù ħafer lil dawk li salbuh. Ilek ma tmur tqerr? Mur qerr flimkien mal-familja tiegħek.
  4. Is-salib narawh madwarna, għandna fid-djar tagħna wkoll. Iżda qatt waqaft quddiemu u rrifflettejt dwar ir-raġuni għalfejn Ġesù wasal li jaċċetta li jmut fuq is-salib? Matul din il-ġimgħa sib ħin biex toqgħod għall-kwiet quddiem il-kurċifiss.
  5. Ipprova mur ukoll f’xi kappella tal-adorazzjoni u aħseb fuq dawn il-kliem: “Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.” Xi jfisser dan il-kliem għalik personali. Jekk jistgħu jiġu miegħek il-bqija tal-familja, tant l-aħjar.
  6. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (3, 13-17)
    ii. Xemgħa
    iii. Il-mejda fejn hemm il-Bibbja, miksija bi drapp aħmar
    iv. Computer/laptop bil-qari u clips
  7. Mur fil-parti tat-tfal skont l-etajiet u għamilha flimkien magħhom
  8. Addatta din il-parti skont kif hemm bżonn, tiddejjaqx tkun kreattiv 😊

Illum il-Knisja tiċċelebra l-festa tal-Eżaltazzjoni tas-Salib Imqaddes. Kliem diffiċli hux hekk? X’taħsbu li tfisser eżaltazzjoni?

Eżaltazzjoni fi kliem ħafif tfisser li tifraħ. Allura tagħmel sens li aħna nifirħu meta naraw lil Ġesù msallab fuq is-salib? Ejjew ħalli nisimgħu l-Evanġelju tal-lum, u naraw nifhmux ftit aktar għalfejn meta nħarsu lejn il-kurċifiss, aħna għandna nifirħu.

  • Ġesù miet fuq is-salib għax iħobbna
  • Kuljum għandna nippruvaw insiru aħjar

● Il-printout tal-attività

● Kuluri

● Gel/glitter pens

● Kartonċina

● gloj

PrintoutNiżżel

Tfal, jekk xi ħadd qiegħed isajjar, x’juża bħala għajnuna? (riċetta)

Jekk xi ħadd irid jasal minn post għall-ieħor, x’juża? (mappa)

Affarijiet bħal traffic lights, lighthouse, tabelli fuq prodotti tal-ikel, għalfejn għandna bżonnhom? (traffic lights u lighthouse, jgħinuna nevitaw il-periklu, tabelli fuq prodotti tal-ikel biex inkunu nafu x’fih l-ikel u nevitaw prodotti li forsi jagħmlulna ħażin)

Fl-Evanġelju Ġesù semma’ ġrajja li kienet saret ħafna u ħafna snin qabel. Din ġrajja li nsibuha fit-Testment il-Qadim. Fi żmien Mosè, ġara li n-nies bdew jiġu migduma mis-sriep u jmutu. Alla ġietu ħniena min-nies u qal lil Mosè biex jagħmel serp tal-bronż u meta n-nies li jkunu migduma mis-serp iħarsu lejn is-serp tal-bronż, ifiequ. Għalhekk bħalma naqraw ir-riċetta, jekk irridu li l-ikel jiġina tajjeb, u nħarsu lejn il-kulur tat-traffic lights jekk irridu naqsmu t-triq mingħajr periklu, in-nies li ngidmu mis-sriep kellhom iħarsu lejn is-serp tal-bronż biex ifiequ.

Imma Ġesù ma waqafx hemm. Ġesù jsemmi s-salib (hekk jeħtieġ li jkun merfugħ Bin il-bniedem) u wkoll it-tagħlim tiegħu. Hu jgħid li jekk irridu mmorru l-ġenna rridu nagħmlu dak li qalilna hu. Mela hekk kif il-ktieb tar-riċetti, il-mappa u t-traffic lights huma ta’ għajnuna għalina fil-ħajja ta’ kuljum, Ġesù huwa l-għajnuna tagħna biex aħna mmorru l-ġenna.

Biex niftakru kemm iħobbna Ġesù, tfal illum se tagħmlu salib, se tpinġuh sabiħ biex wara li jkun lest tpoġġuh fil-kamra tagħkom, u kull darba li tħarsu lejh, troddu s-salib u tiftakru kemm iħobbkom Ġesù. Agħmlu printout tal-attività. Jekk tridu tistgħu twaħħlu din il-karta fuq kartonċina biex toqgħod aħjar fil-kamra tagħkom. Penġu s-salib u l-qlub. Bil-gel jew glitter pens iktbu fuq il-kliem li hemm fin-naħa ta’ isfel tal-istampa, dawn huma kliem li smajna llum fl-Evanġelju.

Inroddu s-salib (għal dawk it-tfal li għadhom ma jafux iroddu s-salib, żuru hawn għall-għajnuna)

Ngħidu bil-qalb, waqt li nħarsu lejn is-salib (nirrepetu din it-talba tliet darbiet)

Nadurawk o Ġesù u nberkuk, għax b’salibek u l-mewt tiegħek inti fdejtna.

Nisimgħu s-song, John 3:16, dwar il-vers li għandna kif penġejna.

Illum niċċelebraw il-festa tal-Eżaltazzjoni tas-Salib. Il-Knisja tiċċelebra din il-festa kull sena fl-14 ta’ Settembru.

Tfal intom tafu min hi Santa Liena? Min hu minn B’kara jaf min hi din il-qaddisa. Santa Liena kienet dik li sabet is-salib li kien imsallab Ġesù fuqu. Sabitu Ġerusalemm. Il-festa tal-lum tiċċelebra din is-sejba, u aktar minn hekk l-imħabba kbira ta’ Ġesù, li miet fuq is-salib biex isalvana. Il-kelma eżaltazzjoni tfisser tfaħħar, is-salib ma fihx xi tfaħħar, imma s-salib li miet Ġesù iva, dan is-salib huwa simbolu ta’ salvazzjoni. Għalina li nemmnu f’Ġesù, is-salib huwa simbolu ta’ rebħ fuq il-mewt u l-ħajja ta’ dejjem ma’ Ġesù fil-ġenna.

  • Alla tana rigal kbir meta Ġesù sar bniedem bħalna
  • Aħna naċċettaw dan ir-rigal meta nħobbu u nemmnu f’Ġesù
  • Kartonċina, daqs A4
  • Printout tal-paġna fejn hemm stampa tad-dinja
  • Kartonċina blu
  • Kartonċina kannella
  • Printout tas-salib fuq kartonċina bajda
  • Printout tal-qalb fuq kartonċina ħamra
  • Imqass
  • Gloj
  • Kuluri
  • Lapes ikkulurit / gel pens
  • Double sided foam tape (mhux bilfors)
Printout Niżżel

Fl-Evanġelju niltaqgħu ma’ Ġesù li qiegħed jitkellem ma’ Nikodemu. Ġesù jfakkar lil Nikodemnu dwar ġrajja li kienet seħħet ħafna snin qabel, fi żmien Mosè, meta n-nies kienu qed imut minħabba gdim mis-sriep. Alla ordna lil Mosè biex jagħmel serp tal-bronż, u dawk li kienu migduma kellhom iħarsu lejn is-serp tal-bronż u jfiequ. Ġesù, imbagħad iqabbel lilu nnifsu ma’ dak is-serp tal-bronż. Hu wkoll kien se jkun merfugħ il-fuq bħas-serp. Tafu meta Ġesù kien merfugħ il-fuq? (meta sallbuh fuq is-salib) Ġesù miet fuq is-salib biex aħna nsalvaw. Ġesù miet fuq is-salib għal kulħadd.

Ġesù kompla u qal li dawk kollha li jimxu warajh, jiġifieri jagħmlu dak li jixtieq hu, isalvaw. Li nsalvaw tfisser li ngħixu miegħu għal dejjem fil-ġenna. Ġesù sar bniedem bħalna biex jurina kif għandna ngħixu, u mhux biex joqgħod jikxef u jipponta lejn in-nies li kienu qegħdin jgħixu

ħajja ħażina. Hekk kif in-nies fi żmien Mosè fiequ meta ħarsu lejn is-serp, min iħares lejn Ġesù, u jagħmel bħalu, isalva.

Ma hemmx rigal akbar mill-ħajja ta’ dejjem. Meta aħna nagħmlu dak li jixtieq Ġesù, inkunu qed naċċettaw ir-rigal li tana Alla. X’jiġikom f’moħħkom meta ngħidu ‘xi ħadd ġie merfugħ’? X’aktarx xi player li jkun għen biex tintrebaħ logħba, jintrefa’ fuq l-ispallejn, għax kulħadd ikun ferħan bih. Hekk ukoll ikollna ferħ kbir meta niftakru li Ġesù ma baqax mejjet, imma hu qam mill-mewt u tela’ s-sema.

Jekk qatt irbaħtu xi medalja jew tazza għax ġejtu l-ewwel f’xi ġirja jew f’xi ħaġa oħra, ma taħbux it-tazza jew medalja, imma tagħmluha fejn tidher, biex tiftakru f’dan il-mument sabiħ, u sewwa tagħmlu. Bl-istess mod, fid-dar tagħna għandu jkollna s-salib jew kurċifiss (salib b’Ġesù fuqu) biex ifakkarna kemm iħobbna Ġesù. Fl-attività tal-lum se tagħmlu salib u tpoġġuh fil-kamra tagħkom, biex kif tqumu filgħodu u qabel ma torqdu, tiftakru f’Ġesù.

Mill-kartonċina blu (baħar) aqtgħu ċ-ċirku tad-dinja. Mill-printout bl-istampa tad-dinja aqtgħu fejn hemm l-art, u dawn aqtgħuhom mill-kartonċina kannella. Waħlu l-artijiet fuq il-baħar. Dan il-globu tad-dinja waħħluh fuq il-kartonċina ta’ daqs A4. Aqtgħu s-salib u l-qalb. Bil-gel pens jew kuluri għaddu minn fuq il-kliem li hemm fil-qalb. Waħħlu s-salib fuq il-globu u l-qalb fuq is-salib. Biex tiġi isbaħ minflok ma tużaw gloj biex twaħħlu s-salib u l-qalb, tistgħu tużaw biċċiet ta’ double sided foam tape. Dendlu din l-istampa jew poġġuha fil-kamra tagħkom, u ftakru roddu s-salib meta tqumu u qabel ma torqdu.

Waqt li qed tagħmlu din l-attività, isimgħu John 3:16.

Inroddu s-salib.

Grazzi Mulej li inti tant tħobbna li bagħat lil Ibnek Ġesù biex isalvana. Għinna biex nikbru fl-imħabba lejn l-oħrajn. Dan nitolbuh f’isem Ibnek Ġesù.

Ngħidu bil-qalb, waqt li nħarsu lejn is-salib (nirrepetu din it-talba tliet darbiet)

Nadurawk o Ġesù u nberkuk, għax b’salibek u l-mewt tiegħek inti fdejtna.

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.