Intom min tgħidu li jien?

Solennità ta’ San Pietru u San Pawl, Appostli

Illum nagħtu ġieh lil żewġ qaddisin kbar, li bejniethom l-missjoni tal-Knisja titwassal kemm lil-Lhud (Pietru) u lill-Ġentili (Pawlu), fi kliem ieħor, lid-dinja kollha. It-tnejn huma personaġġi importanti fil-Knisja tal-bidu. San Pietru li Ġesù jsejjaħlu “blata” huwa dak li Ġesù jafdalu l-Knisja u jagħtih, “l-imfietah tas-Saltna tas-Smewwiet.” San Pawl (magħruf bħala Sawl) sar nisrani fit-triq lejn Damasku, wara li l-ltaqa’ ma’ ‘Kristu rxoxt’ u vjaġġja bla waqfien biex jippriedka lil Kristu.

Fl-Evanġelju, Ġesù jistaqsi lid-dixxipli, in-nies min kien jgħidu li hu. Dak in-nhar kienu fl-inħawi ta’ Ċesarija Filippi, fit-tramuntana tal-Baħar tal-Galilea. Din il-ġrajja nsibuha kemm fl-Evanġelju ta’ San Mark, kif ukoll f’ta’ San Mattew. Għal din il-mistoqsija, Pietru jwieġeb, li Ġesù huwa l-Messija, l-Iben t’Alla. Din hija l-istqarrija ta’ fidi ta’ Pietru. Fl-Evanġelju skont San Luqa, din il-mistoqsija ssir waqt li Ġesù kien qiegħed jitlob. Ġesù jistaqsi lid-dixxipli, min kienu jaħsbu li hu, u Pietru, għan-nom tal-oħrajn jgħid li Ġesù huwa il-“Kristu”. ‘Kristu’ hija l-kelma Griega, għall-kelma ‘Messija’ bl-Ebrajk, u din tfisser ‘il-midluk.’ Ġesu jagħti isem ġdid lil Pietru (dak iż-żmien dan l-isem kien għadu mhux magħruf) u jagħtih ukoll missjoni biex jgħallem. Din hija l-ewwel referenza għall-kelma ‘Knisja’ fit-Testment il-Ġdid. Il-Knisja, fil-persuna ta’ Pietru magħqud mal-appostli (u llum l-Isqfijiet magħqudin mal-Papa u mmexxijin minnu) ingħatat il-qawwa tal-‘imfietaħ’ tas-salta tas-Sema, jiġifieri l-qawwa li ‘torbot’ u ‘tħoll’ fejn tidħol il-maħfra tad-dnubiet. Pietru ngħata rwol speċjali u għalhekk ingħata l-grazzja li jagħraf l-identità vera ta’ Ġesù. Pietru huwa l-pedament tal-Knisja (l-ewwel Papa). San Pawl ukoll ixandar lil Ġesù bħala l-Iben ta’ Alla’ wara l-konverżjoni tiegħu u jagħmilha l-missjoni tiegħu li jwassal dan il-messaġġ lill-ġentili. Fit-tieni qari tal-lum, fl-ittra ta’ Pawlu, mill-ħabs, lil Timotju, hu jitkellem dwar it-tbatija li kien għaddej minnha u l-mewt li kienet fil-viċin. Pawlu huwa sod fil-fidi tiegħu, u jibqa’ bla waqfien, ifaħħar u jagħti glorja lil Alla.

It-tradizzjoni tgħid li kemm Pietru u anke Pawlu, ingħataw il-martirju f’Ruma. Ir-responsabbiltà għat-tkomplija tal-istqarrija tal-fidi ġiet mgħoddija lill-Isqof ta’ Ruma, il-Papa, kap tal-Knisja Kattolika.

Qari mill-Evanġelju skont San Mattew (Mt 16: 13-19)

F’dak iż-żmien: Meta wasal fl-inħawi ta’ Ċesarija ta’ Filippu, Ġesù staqsa lid-dixxipli tiegħu u qalilhom: “In-nies min jgħidu li hu Bin il-bniedem?” U huma weġbuh: “Xi wħud Ġwanni l-Battista, oħrajn Elija, u oħrajn Ġeremija jew wieħed mill-profeti.” “Imma intom,” qalilhom, “intom min tgħidu li jien?” U qabeż Xmun Pietru u qallu: “Inti l-Messija, l-Iben ta’ Alla ħaj.” U wieġbu Ġesù u qallu: “Imbierek int, Xmun, bin Ġona, għax mhux il-laħam u d-demm urewk min jien, imma Missieri li hu fis-smewwiet. U min-naħa tiegħi ngħidlek: Inti Pietru, u fuq din il-ġebla jiena nibni l-Knisja tiegħi, u l-bibien tal-infern ma jegħlbuhiex. Lilek nagħtik l-imfietah tas-Saltna tas-Smewwiet, u kulma torbot fuq l-art ikun marbut fis-smewwiet, u kulma tħoll fuq l-art ikun maħlul fis-smewwiet.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. It-tfal jħarsu lejn il-ġenituri tagħhom biex jaraw kif se jġibu ruħhom. Huma jġibu ruħhom mal-oħrajn, skont l-imġieba u kliem tagħna. Bl-istess mod, kif aħna nwieġbu għat-tagħlim ta’ Ġesù, se jifforma l-fidi tagħhom. Itolbu għall-għerf biex tagħmlu deċiżjonijiet tajba. Stiednu lil Ġesù fil-ħajja tal-familja tagħkom.
  4. Żommu stampa tal-Papa fid-dar. Matul din il-ġimgħa tgħallmu xi ħaġa ġdida dwar Papa Ljun XIV. Fehmu lit-tfal li hu, huwa suċċessur ta’ San Pietru.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mattew (16: 13-19)
    ii. Xemgħa
    iii. Il-mejda fejn hemm il-Bibbja, miksija bi drapp aħmar
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Illum festa ta’ żewġ qaddisin kbar, Pietru u Pawlu; niċċelebraw din il-festa kull sena, fid-29 ta’ Ġunju. San Pietru kien sajjied, li Ġesù għażel biex isir appostlu. Pawlu sar nisrani meta kien sejjer Damasku, wara li kellu dehra minn Ġesù. Pawlu mar ħafna pajjiżi jgħallem dwar l-imħabba ta’ Ġesù.

  • Xmun Pietru jagħraf li Ġesù kien Iben Alla
  • Ġesù jagħti lil Xmun, isem ġdid (Pietru) u jgħidlu li fuqu, kien se jwaqqaf il-Knisja tiegħu.

Fl-Evanġelju tal-lum, nisimgħu lil Pietru jsejjaħ lil Ġesù, “l-Iben ta’ Alla,” u nisimgħu wkoll l-isem li Ġesì jagħti lil Pietru, “blata”. Ġesù jagħmel lil Pietru, il-blata li fuqha jibni l-Knisja tiegħu. Ġesù ried jibni l-Knisja tiegħu fuq art soda u l-blat huwa matejal tajjeb biex tibni fuqu. Pietru ngħata dan ix-xogħol u għalhekk ingħata l-grazzja li jagħraf u jemmen li Ġesù kien il-Messija mwiegħed. Hu kellu fidi f’Ġesù. Pietru emmen lil Ġesù u ried jimxi warajh u jaqdih. Pietru kellu rwol important fil-bini tal-Knisja, wara li Ġesù tela’ s-sema. Hu għallem lin-nies, il-verità dwar Ġesù. Kemm Pietru, kif ukoll Pawlu, kienu mibgħuta biex ikomplu x-xogħol li kien beda Ġesù f’din id-dinja.

Aħna nemmnu li l-Papa huwa s-suċċessur ta’ Pietru. Il-Papa jgħix il-Vatikan li qiegħed Ruma. Il-Papa huwa r-ragħaj ewlieni li jieħu ħsieb il-Poplu ta’ Alla. Hu jmexxina u jgħallimna kif għandna nimxu wara Ġesù. Tafu x’jismu l-Papa? Hu jismu Ljun XIV. Matul din il-ġimgħa staqsu lill-ġenituri tagħkom jgħinnukom titgħallmu xi ħaġa ġdida dwar il-Papa.

Radd tas-salib

Mulej, hekk kif Pietru emmen fik, irridu nagħmlu aħna wkoll. Nitolbu għall-mexxejja tad-dinja biex huma jaqdu tajjeb lin-nies tagħhom, u jaħdmu biex jieqaf il-faqar. Nitolbu wkoll għas-saċerdoti, biex huma jaqdu l-missjoni tagħhom b’imħabba u sinċerità. Ammen

Araw dan il-video biex titgħallmu aktar dwar San Pietru u San Pawl.

Illum niċċelebraw żewġ qaddisin kbar: San Pietru u San Pawl. Pietru kien sajjied li Ġesù kien għażel bħala appostlu u mexxej tal-Knisja. Pawlu sar nisrani waqt li kien sejjer Damasku. Wara dan, hu mar ħafna postijiet oħra, jippriedka dwar Ġesù. F’erbatax-il sena, hu għamel erba’ vjaġġi kbar.

  • Aħna nemmnu li t-tmexxija tal-Knisja ġiet mgħoddija minn Pietru lill-mexxejja l-oħra li kellhom il-ministeru ta’ Isqfijiet ta’ Ruma.
  • Permezz ta’ Pietru u Pawlu, u permezz tat-tagħlim u l-martirju tagħhom, Kristu waqqaf il-Knisja tiegħu.
  • Arma u spjega
  • Kuluri
Attività 1Niżżel
Attività 2Niżżel

Fl-Evanġelju tal-lum, Pietru jgħid lil Ġesù li hu jaf li hu kien il-Messija, l-Iben t’Alla. Ġesù jaf li Pietru kien ingħata dan l-għarfien mingħand Alla u jgħidlu hekk, “Inti Pietru, u fuq din il-blata jiena nibni l-Knisja tiegħi.” Ġesù jagħmel lil Pietru l-pedament tal-Knisja tiegħu. Pietru ngħata dan ir-rwol speċjali u ngħata il-ħila li jgħallem il-verità dwar Ġesù, u jkompli l-missjoni ta’ Ġesù wara l-mewt u l-qawmien tiegħu. Ġesù bagħat lil Pietru, kif ukoll lil Pawlu biex ikomplu x-xogħol li hu kien beda fid-dinja. Dawn iż-żewġ mexxejja mietu f’Ruma minħabba l-fidi tagħhom. Għal din ir-raġuni, il-kap tal-Knisja jgħix il-Vatikan, fil-qalba tal-belt ta’ Ruma.

Aħna nemmnu li l-Papa huwa s-suċċessur ta’ San Pietru u l-isqfijiet huma s-suċċessuri tal-appostli. Il-Papa huwa r-ragħaj tal-Poplu ta’ Alla; il-Papa u l-isqfijiet jaqdu l-Poplu ta’ Alla madwar id-dinja kollha. Is-sagrament tal-Ordni Sagri, jikkonsagra raġel bħala qaddej tal-Knisja. Dan is-sagrament ikompli x-xogħol li Ġesù għadda lill-appostli. Minaħa l-oħra, għandna nifrakru li aħna kollha għandna sehem mix-xogħol ta’ Ġesù. Flimkien, naħdmu biex inwaslu l-imħabba ta’ Alla għand kulħadd. Matul din il-ġimgħa, ipprova tgħallem xi ħaġa ġdida dwar Papa Ljun XIV. Għamel printout tal-attività u din ukoll se tgħinek titgħallem xi ħaġa.

Inroddu s-salib.

Għażiż Alla, hekk kif Pietru u Pawlu, għenu biex jibnu l-Knisja tiegħek, għamel li aħna nkunu ‘blat’ ta’ fidi. Għinna nibqgħu sodi u nkunu spirati minnhom biex naqdu lill-oħrajn bil-ferħ u niddefendu dak li nemmnu fih.

Ammen.

Nisimgħu Hosanna Rock.

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.