Hekk kif matul l-Ewwel Ħadd tar-Randan, il-Knisja dejjem tagħtina l-qari ta’ Ġesù fid-deżert u t-tentazzjonijiet, fit-Tieni Ħadd tar-Randan, nisimgħu dwar meta Ġesù kien trasfigurat. Din is-sena qegħdin naqraw mill-Evanġelju skont San Mark, is-sena l-oħra smajna dan il-qari skont San Mattew, u s-sena d-dieħla nisimgħu l-qari mill-Evanġelju ta’ Luqa. L-Evanġelji ta’ Mark, Mattew u Luqa jissejħu sinottiċi. Din ġejja minn kelma griega li tfisser li mad-daqqa t’għajn hemm xebh bejn dawn l-Evanġelji. Numru ta’ rakkonti, bħal dan tat-trasfigurazzjoni, insibuhom fit-tliet Evanġelji Sinottiċi li bejn wieħed u ieħor jżommu l-istess ordni ta’ kif seħħew dawn il-ġrajjiet. L-Evanġelju skont San Ġwann jieħu perspettiva kemmxejn differenti u jidħol aktar fil-fond fit-teoloġija tal-ħajja u t-tagħlim ta’ Ġesù.
Ġesù, jitla’ fuq muntanja għolja ma’ tlieta mill-appostli. Qatt ma hi faċli li titla’ muntanja, fiha ħafna strapazz, tgħejja u jista’ jkun li f’xi ħin taqta’ qalbek ukoll. Jista’ jkun li dawn kienu xi ħsibijiet li kellhom dawn it-tliet appostli huma u telgħin. Jekk qatt tlajtu fuq muntanja bil-mixi, jew tal-anqas parti minnha bil-mixi, tafu li meta tasal fuq nett u tara dik il-veduta ta’ meravilja taħtek, tgħid li vera kienet worth it! Hekk ġralhom dawn l-appostli. Meta waslu fil-quċċata, Ġesù inbidel quddiemhom. Il-bidla tant kienet tal-għaġeb u li qatt ma raw bħala, li beżżgħethom, ħawdithom u fl-istess ħin tant tathom paċi, li xtaqu jibqgħu hemm.
Din hija l-ħajja nisranija tagħna. Nimxu ma’ Ġesù. It-triq xi drabi hija għall-wita, u xi drabi oħrajn hija iebsa u wieqfa. Madanakollu, il-ġrajja tal-lum tagħtina ħafna tama, bħalma tat lil dawn it-tliet appostli. Ftit wara din il-ġrajja, huma għaddew minn prova, meta Ġesù ġie ikkundannat għall-mewt, u rawh f’dik it-tbatija kollha. Għalkemm ma fehmux dik id-dehra, dak il-ħin, fehmuha aktar tard, wara li Ġesù qam mill-mewt. Dan huwa r-Randan, nistgħu ngħidu li l-ħajja tagħna hija Randan twil, imma nafu u nemmnu li fl-aħħar hemm ir-rebħa fuq il-mewt. Kif Ġesù rebaħ lil mewt, hekk ukoll aħna għad inqumu mill-mewt biex ingawduh għal dejjem, u bħal Pietru nkunu nistgħu ngħidu: “kemm hu sew li aħna hawn!”
Kif ser nirbħu din il-mewt? Kif ser jirnexxielna nibqgħu nittamaw meta t-triq quddiema tkun kollha ostakli u diffikultajiet? Alla l-Missier, illum jagħtina wkoll din is-soluzzjoni, irridu nisimgħu l-leħen ta’ Ġesù, u nagħmlu dak li qiegħed jgħidilna hu. Kif Ġesù mexa mat-tliet appostli biex telgħu fuq il-quċċata tal-muntajna, Ġesù jimxi magħna wkoll. Lil Ġesù narawh li jinżel mill-muntanja mal-appostli wkoll. Ġesù qiegħed magħna f’kull ħin, dawk fejn inħossuna li lħaqna s-sema u wkoll dawk fejn inħossuna li mexjin f’wied mudlam.
Meta nisimgħu lil Ġesù u nimxu miegħu, insibu li ser ikun hemm ħinijiet fejn il-preżenza ta’ Alla inħossuha fil-qrib ħafna. Ikollna dik l-istess sensazzjoni li kellu Pietru, li xtaq li ma tispiċċa qatt. It-talb huwa ħin li nistgħu verament nersqu qrib tal-Mulej u nħalluh iwennisna bil-preżenza tiegħu, u jagħtina l-kuraġġ u dak li għandna bżonn biex nibqgħu telgħin il-muntanja tagħna, sakemm xi darba, naslu fil-quċċata u nkunu nistgħu ngawdu l-preżenza tiegħu għal dejjem.
1. L-Evanġelju tal-lum, jirrakkuntalna li Ġesù ħa lil xi wħud mill-appostli fuq...
2. Min kienu l-appostli li Ġesù ħa miegħu?
3. X'għamel Ġesù' waqt li hu u l-appostli kienu fil-post li marru fih?
4. Min kienu l-irġiel li dehru maġenb Ġesù waqt li kien qed jiġri dan kollu?
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
