L-Anġli Kustodji

L-anġli għandhom rwol importanti fl-Iskrittura. Ħeġġeġ lit-tfal biex jagħmlu lista tal-istejjer kollha li jiftakru mill-Bibbja u li fihom jissemmew l-anġli. Ħarsa ħafifa lejn stampi minn Bibbja tat-tfal tgħinhom jaraw ir-realtà tal-anġli mill-kuntest tal-Evanġelju.

Dawn l-istejjer jinkludu:

• L-Anġlu Gabrijel iħabbar lil Marija t-twelid ta’ Ġesù,
• Anġlu messaġġier deher lil Ġużeppi f’ħolma biex jgħidlu li t-Tifel ta’ Marija Hu bin Alla u qallu biex isemmi lit-tifel “Ġesù” u aktar tard ordnalu biex jaħrab lejn l-Eġittu. għax Erodi ried joqtol lit-tifel,
• L-anġli għandhom rwoli importanti fin-narrattivi tat-Twelid ta’ Kristu: mar-rgħajja u mal-Maġi;
• L-anġli li dehru lil Ġesù fid-deżert, waqt l-agunija tiegħu fil-Ġetsemani, u fil-mument tal-Qawmien Tiegħu.

L-Anġli Kustodji huma anġli li ntgħażlu biex jaqdu lil Alla b’missjoni speċjali. Huma qatt ma kienu bnedmin li saru anġli; kienu anġli minn dejjem. Alla jaf lil kull wieħed u waħda minna individwalment, u għalhekk Alla jassenja Anġlu Kustodju lil kull persuna biex jiggwidana u jżommna qrib tiegħu u fit-triq it-tajba lejh, filwaqt li jipproteġina mill-ħsara u mill-ħazen.

F’waħda mill-meditazzjonijiet li kien jagħmel ta’ kull filgħodu l-Papa Franġisku f’Santa Marta, hu rrefera għall-Anġlu Kustodju bħala “kumpann tal-vjaġġ.” Il-Papa stqarr li ħafna drabi l-ispirazzjonijiet pożittivi li nesperjenzaw huma “l-vuċi tal-Anġlu Kustodju tagħna.” Ir-rwol tal-Anġlu Kustodju hu li jiggwidana, jipproteġina u jsostnina. Alla jipprovdilna wkoll nies madwarna li jaġixxu magħna bħal Anġlu Kustodju.

Ħeġġeġ lit-tfal jagħmlu lista ta’ dawn in-nies, li jistgħu jkunu:

• dawk li jieħdu ħsiebna d-dar;
• qraba tagħna;
• l-għalliema u l-katekisti;
• sħabna.

Jekk għandhom ħuthom jew kuġini iżgħar minnhom, ħeġġeġ lit-tfal iġibu ruħhom magħhom bħall-Anġlu Kustodju. Iddiskuti kif jistgħu jagħmlu dan. Isma’ dak li għandhom xi jgħidu.

Waqt il-ħin ta’ talb, issuġġerixxi lit-tfal biex jagħlqu għajnejhom u jimmaġinaw li qed jaraw lill-Anġlu Kustodju tagħhom. X’jixtiequ jgħidulu jew jistaqsuh? Tista’ tħeġġiġhom jitkellmu dwar dan jew sempliċiment jagħmlu dan l-eżerċizzju fil-kwiet. Ġesù jafna individwalment. Għinhom jibnu pediment ta’ relazzjoni personali ma’ Ġesù billi jibdew it-talba b’dan il-mod: “Ġesù, jiena (l-isem tat-tifel/tifla). Jiena naf li inti tafni għax tajtni Anġlu Kustodju biex jieħu ħsiebi.” Ħeġġiġhom ikomplu din it-talba billi jesprimu tifħir u ringrazzjament lil Alla.

Il-ġenituri u dawk li jieħdu ħsieb lit-tfal huma mħeġġa jbierku lit-tfal tagħhom u jitolbu l-protezzjoni tal-Anġlu Kustodju tagħhom fuqhom.