Dejjem magħna

Fl-Evanġelju ta’ din il-ġimgħa insibu punt fundamentali. “Morru u agħmlu dixxipli mill-ġnus kollha” – jgħid Ġesù, u jidderieġi dan il-kliem lilna lkoll. Għalhekk ilkoll kemm aħna għanna din is-sejħa biex “nevanġelizzaw”, jiġifieri biex nagħtu xhieda ta’ Ġesù u nwasslu l-ispirtu tiegħu lil kull persuna. Il-mistoqsija hi, kif, eżattament, nistgħu nagħmlu dixxipli mil-ġnus kollha? F’dan iż-żmien li hu partikularment sekulari, x’nistgħu nagħmlu biex verament inkunu ‘sajjieda tal-bnedmin’ – kif nistgħu nkunu pontijiet li jiggwidaw lill-oħrajn lejn Sidna Ġesu?

Forsi l-ewwel ħaġa li rridu nżommu f’moħħna hija l-wegħda ta’ Ġesù; li se jkun “magħna dejjem, sal-aħħar taż-żmien”. Irridu niftakru dan, speċjalment fi żminijiet li jinħassu u jidhru koroh. Ġesù għadu magħna, u hija din l-preżenza tiegħu b’mod partikolari – u dik tal-Ispirtu s-Santu – li tista’ tgħinna nkunu pontijiet u evanġelizzaturi.

L-evanġelizzar ma jfissirx li mmorru nħabbtu l-bibien biex nitkellmu man-nies dwar Kristu. Ma jfissirx li wieħed jaqbad megafon u jistieden lin-nies biex “jikkonvertu”, kif kultant naraw individwi jagħmlu fit-toroq. Pjuttost, l-evanġelizzazzjoni vera hija ħafna aktar sottili. Irridu nifhmu li hemm modi differenti ta’ evanġelizzazzjoni u li kultant, saħansitra, biex nevanġelizzaw jeħtieġ li ma “nsemmux” il-kliem “Ġesù jew Alla”. Dan għaliex, kultant l-evanġelizzazzjoni ssir billi nkunu xhieda bl-imġieba tagħna. Xi drabi, l-iktar mod effi1jenti biex nuru lil Ġesù huwa billi nkunu bħalu fil-persuna tagħna. Biex nagħmlu dan, jeħtieġ li nkunu tempji tal-ispirtu qaddis; jirrikjedi li ngħixu ħajja ta’ talb u ta’ komunjoni sinċiera mat-Trinità. Aħsbu f’Modre Theresa – ħafna drabi kienet l-imħabba tagħha li wriet lil Alla lil ħaddieħor, mhux id-diskors tagħha dwaru!

B’dan f’moħħna, irridu nfakkru wkoll f’Pietru 3:15, “kun dejjem lest li tagħti tweġiba lil kull min jistaqsik tagħti r-​raġuni għat-​tama li għandek. Imma agħmel dan b’ġentilezza u rispett”. Aspett ieħor importanti tal-evanġelizzazzjoni huwa li nkunu kapaċi nipprovdu spjegazzjonijiet u raġunijiet għaliex nemmnu u għandna l-fidi. Naturalment, dan kollu jiddependi fuq il-vjaġġ tagħna ma’ Alla – iżda huwa importanti ħafna li nkunu nistgħu nagħtu tweġibiet raġonevoli lil dawk li jistaqsuna għaliex aħna Kristjani. Dan huwa meħtieġ b’mod speċjali fil-kultura tagħna – peress li hemm ħafna persuni b’nuqqas ta twemmin, u li għalhekk jeħtieġ li jaraw ukoll ir-raġuni tal-fidi tagħna. F’dan id-​dawl, ir-​raġunijiet tagħna jistgħu jvarjaw minn dawk xjentifiċi għal dawk personali, u saħansitra għal oħrajn aktar filosofiċi u skritturali. Alla huwa wkoll Alla tal-għarfien – għalhekk ikun xieraq li nifhmu kif, per eżempju, ix-xjenzi u l-fidi tagħna jirrelataw. Hawnhekk wieħed jista’ jikkonsulta xi wħud mix-xjenzati kontemporanji ewlenin bħal Robert Spitzer, Seymore Garte, u Yoav Vaknin. Dawn huma lkoll Kattoliċu u juru kif ix-xjenza u l-fidi imorru id f’id. 

Fl-aħħarnett, punt dwar il-vjaġġ li flimkien mexjin lejh – Pentekoste. Għadna fil-perjodu tal-Għid. Qegħdin niċċelebraw lil Kristu Rxoxt u l-ferħ u l-paċi li ġġib magħha l-preżenza tiegħu. U hekk kif nagħmlu dan kollu, msejħin ngħixu b’mod li jiftaħna aktar għat-tielet persuna tat-Trinità – l-Ispirtu s-Santu – il-“l-għassies tal-verità”, kif jirreferi għalih Ġesù. Mingħajr l-Ispirtu, is-sagramenti ma jkunux possibbli – u lanqas l-kapaċità tagħna li jkollna l-fidi! Mela ejja nippruvaw inkunu aktar miftuħa għall-Ispirtu, ejjew nitolbu għad-doni Tiegħu biex insiru xhieda aħjar u, bħala riżultat, evanġelizzaturi aħjar:

Intom il-melħ tal-art! Intom id-dawl tad-dinja! Araw li l-poplu jiġi edifikat bl-eżempju tagħkom, bis-safa ta’ ħajjitkom, bil-moderazzjoni tal-imġieba tagħkom, u bil-brillanza tal-qdusija tagħkom! – Papa San Piju V.