Qalbu f’idu

Ħelow tfal!

Qatt sibt lilek innifsek tiddubita minn xi ħaġa jew xi ħadd?  Kemm hu sabiħ li ssib lil xi ħadd miegħek u jatik serħan il-moħħ meta jkollok ħafna dubji u mistoqsijiet.

Tumas ma emminx li Ġesù huwa ħaj.  Huwa ddubita li Ġesù qam mill-mewt u deher lill-appostli.  Emmen biss meta rah hu stess u mess il-feriti f’idejh u fil-ġenbu.

Ġesù ma rrabjax ma Tumas għax ma emminx u tah ċans ieħor.  Huwa jibqa’ jħobbna ankè meta niddubitaw u jridna nitkellmu miegħu waqt it-talb dwar id-dubji tagħna.

Il-prayer space li ser nagħmlu llum fimkien ma dawk li jgħixu magħna jisimha – Qalbu f’Idu u għaliha għandna bżonn:

• Karta vojta daqs ta’ A4
• Lapes, markers u kuluri
• Imqass 

Ibda billi taħseb dwar meta kellek dubji dwar l-imħabba ta’ Alla.  

Pawza ta’ 5 sekondi 

Itwi l-karta A4 minn nofs u poġġi idejk fuqha.  Ara li tpoġġi s-saba l-kbir  u l-werrej mat-tarf li huwa mitwi u agħmel sinjal madwar il-pala ta’ idejk bil-lapes.

Qasqas il-forma ta’ idejk waqt li żżomm il-karta mitwija min-nofs.  Iftaħ il-karta.  Dawn l-idejn se jfakkruna f’Idejn Ġesù. Fuq kull pala pinġi qalb li tfakkarna fil-feriti ta’ Ġesù. 

Issa  tista’ tikteb talba lil Ġesù biex jgħinnek temmen li hu miegħek ankè meta tħossu ħafna ‘l bogħod minnek.