Ix-xhieda

Il-lum niċċelebraw it-tielet Ħadd tal-Avvent. Dan il-Ħadd nixgħelu x-xemgħa r-roża u nsejħulu ‘Ħadd il-Gaudete’ jew Ħadd il-Ferħ. Għalkemm minħabba ċ-ċirkostanzi li qegħdin ngħixu fihom bħalissa, wieħed ma tantx qiegħed iħoss ferħ ġo fih, il-messaġġ tal-lum jibqa’ wieħed li jrid inissel it-tama u jagħti l-ferħ. Fil-qari u talb tal-lum, il-kelma ferħ ser tkun irrepetuta numru ta’ drabi. Qegħdin nifirħu għax il-festa tal-Milied qegħda fil-qrib. Nifirħu ħafna aktar għax Alla sar l-Għimmanu-el, Alla huwa magħna, qiegħed jimxi magħna anke f’dawn iż-żminijiet ta’ inċertezza, mard u diffikultajiet. Nifirħu għax hu x’inhu ż-żmien, Alla sar bniedem, Alla jħobbna, Ġesù huwa dak li jkeċċi d-dlamijiet l-aktar suwed mill-ħajja tagħna u minflok jimliena bit-tama, imħabba, ferħ u paċi. Nifirħu għax Ġesù salvana.

L-Evanġelju tal-lum jitkellem dwar id-dawl. Ġesù huwa d-dawl tagħna, huwa wkoll issimbolizzat fix-xemgħat tal-girlanda. Aktar ma nersqu qrib tal-Milied, aktar qed jinxtegħlu xemgħat, aktar jinxtegħel dawl fit-toroq u fid-djar, fil-ħwienet u fil-postijiet tax-xogħol, allura aktar hemm dawl. Aktar ma nersqu qrib ta’ Ġesù, aktar ser inkunu ċari f’dak li hu mistenni minna, it-triq tagħna ma tibqax mudlama, imma mdawwla bid-dawl ta’ Kristu.

Il-lum il-qari jerġa jlaqqagħna ma’ Ġwanni l-Battista. Qegħdin jistaqsuh min hu. Ġwanni seta’ wieġeb u qalilhom li kien Elija, jew profeta, jew anke l-Messija. Kieku ried seta’ jieħu l-unur ta’ xi ħadd minn dawn u jgħid li kien wieħed minnhom. Xi drabi aħna naqgħu f’din in-nassa li nieħdu l-prosit ta’ xi ħaġa li ma kinetx tagħna. Id-dinja tagħti unuri lil dawk li jirnexxu u li jagħmlu isem għalihom infushom. Id-dinja ftit tagħti kas ta’ kif wieħed kiseb is-suċċess. Alla differenti. Għal Alla aħna kollha importanti u speċjali. Alla uriena kemm-il darba li anke dawk li f’għajnejn ħaddieħor jistgħu ikunu insinjifikanti, għalih, huma speċjali. Jekk inħarsu biss lejn l-istorja tal-Milied, kienu ir-rgħajja, nies sempliċi, u mwarrba il-persuni ewlenin li rċevew l-aħbar mingħand l-anġli. David ukoll kien ragħaj, u għax ħalla lil Alla jmexxih, David sar re kbir.

David għamel żbalji f’ħajtu, imma għaraf dak li kien l-aktar importanti. Mhux is-saltna ta’ din l-art kienet l-aktar importanti, lanqas il-kliem fieraħ tan-nies ta’ madwaru, imma dak li ried Alla minnu, għalhekk meta għaraf l-iżbalji tiegħu, nidem u kompla dak li ried Alla. 

Ġwanni ma fittixx unuri, speċjalment dawk li ma kienux tiegħu. Minflok ħalla lil Alla jużah. U dan wassal biex Ġesù jfaħħru u jgħid, “Tassew, ngħidilkom, li fost ulied in-nisa ħadd ma qam akbar minn Ġwanni l-Battista.”  (Mt 11, 11)

Ġieli nisimgħu l-kelma dixxerniment. Tfisser li wieħed ikun jaf jagħżel bejn ħaġa u oħra. Li wieħed jifli sew is-sitwazzjoni quddiemu u jagħraf jekk dik il-ħaġa hijiex tajba għalih, hijiex għażla aħjar minn oħra. Imbagħad hemm dixxerniment spiritwali, fejn wieħed jagħmel għażla u jieħu deċiżjonijiet, skont ir-rieda ta’ Alla. Iħalli lill-Ispirtu s-Santu jmexxih fl-għażliet tiegħu, iħalli lil Ġesù jkun id-dawl tat-triq tiegħu. Ikun hemm drabi fejn minbarra t-talb, ikollna bżonn ta’ għajnuna oħra, biex naslu li nieħdu dawn id-deċiżjonijiet. Is-saċerdot li mmorru nqerru għandu, jew id-direttur spiritwali tagħna, jgħin u jiggwidana f’dan ir-rigward.