Ħafna minna forsi jħossuhom iktar “liberi” li issa huwa l-Għid. “Daqsekk sawm. Daqsekk sagrifiċċji”. F’ċertu sens, f’dan il-jum huwa tabilħaqq xieraq li nesperjenzaw sens ta ‘serħan. Madankollu, ir-raġuni li nħossuna liberi m’għandniex tkun għax mhux se jkollna bżonn nagħmlu aktar sagrifiċċji (i.e., peress li se jkollna bżonn nagħmlu sagrifiċċji xorta waħda!); għandna inħossuna “liberi” għax dan il-jum jurina verità importanti ħafna.
Din il-verità hija l-imħabba perfetta li Kristu għandu għalina. Żgur mhix l-ewwel darba li smajt il-frażi, “Alla jħobbok”. Għalkemm illum, ħu mument biex tirrifletti fuq il-grazzji li inti miftuħ/a biex tirċievi kawża tal-passjoni, il-Qawnien, u l-imħabba perfetta ta’ Ġesù.
Il-passjoni ta’ Kristu hija l-qofol tal-imħabba tiegħu. It-tbatija tiegħu, għalhekk, mhix xi ħaġa li għandna nibżgħu minnha, jew nithassruha. Fil-passjoni, m’għandniex naraw sempliċiment bniedem li qed jgħaddi minn ħafna uġigħ, imma lil Alla li qed iħobbna u jsalvana. Fil-passjoni, nirrealizzaw li Ġesù, li hu bniedem, huwa wkoll Alla. U fil-passjoni nistgħu wkoll naraw l-Ispirtu tal-Qawmien (i.e., l-ispirtu tal-Għid) preżenti diġà! Id-divinità ta ‘Ġesù baqgħet anki meta hu ħa fuqu d-dnub kollu – huwa għalhekk li fl-aħħar mill-aħħar hu seta’ jirxoxta. Imma li tirxoxta xi jfisser verament għalina l-bnedmin? Kif għandna nħarsu lejh dan il-fenomenu?
Meta nirriflettu fuq is-sejħa tagħna biex inkunu bnedmin irxoxtati, hemm żewġ affarijiet li rridu nżommu f’moħħna. L-ewwel hu l-fatt li “lkoll kemm aħna” ġejna maħluqa biex inkunu eterni. Ħafna drabi għandna t-tendenza li ninsew dan, imma rridu nżommu f’moħħna li, qabel il-waqgħa, l-ewwel bnedmin kienu eterni – u kienu wkoll ħielsa mill-uġigħ, mil-mard u mid-dnub. Dan huwa fil-fatt dak li lkoll nixtiequ fil-fond ta’ qalbna. U għandna din ix-xewqa proprju għax dan hu dak li aħna maħluqin għalih! Huwa għax il-bnedmin dineb, għax kiser ir-relazzjoni tiegħu ma ‘Alla, li beda jesperjenza karatteristiċi negattivi. Għalhekk, hu minħabba li d-dinja tagħna għandha relazzjoni miksura ma ‘Alla li għandha l-ħażen, it-tbatija, u l-mewt. Kieku r-relazzjoni tagħna ma’ Alla kienet perfetta, kieku dan l-uġigħ u l-ħażen kollu ma kienx jeżisti.
B’differenza minna, Ġesù għandu relazzjoni perfetta mal-Missier. Hu minħabba dan li Hu biss seta jirxoxta. Huwa għalhekk li nqabblu lil Ġesù mal-“ewwel Adam”, għax Hu, bħall-ewwel bnedmin, għandu relazzjoni perfetta ma’ Alla – jeżisti bħalma Alla ried li aħna lkoll neżistu. Li jfisser dan kollu hu li huwa biss jekk insiru “bħal Ġesù”, li nistgħu nesperjenzaw il-ħajja ta’ dejjem u nirxoxtaw. Huwa biss jekk nilbsu l-ħwejjeġ ta ‘Alla u nsiru divini, li nistgħu nesperjenzaw l-eternita u s-saħħa li toffri l-ħajja ta’ dejjem. Dan huwa l-qofol tal-ħajja nisranija essenzjalment. Il-ħajja Nisranija hija vjaġġ li permezz tiegħu kull wieħed minna jsir aktar perfett u eqreb lejn il-bniedem oriġinali. Kristu jgħinna niskopru xi jfisser li tkun bniedem – ifakkarna li li tkun bniedem huwa, f’ċertu sens, li wieħed jieħu sehem fid-divinità trinitarja.
U fl-aħħarnett, lil dawk minnkom li għadhom iħossuhom maqbudin fid-dnub, Ġesù qed jestendi l-imħabba u l-mogħdrija profonda Tiegħu għalikom ukoll. Qed jistennik b’idejh miftuħin! Mela itlaq kull dispjaċir, itlaq kull ħaġa li qed iżżommok maħkum bil-mistħija, u iftaħ lilek innifsek biex tirċievi l-purita u l-maħfra sħiħa li Alla biss jista’ jagħti. Dan l-Għid, ħalli lilek innifsek tilbes lil Kristu. Ifraħ bl-għarfien li l-imħabba hija dejjem u dejjem rebbieħa!
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
