San Domenico Savio

6 ta' Mejju

Domenico Savio twieled fit-2 ta’ April, 1842, f’Riva, raħal fit-tramuntana tal-Italja. Il-familja tiegħu kienet fqira u ħabrieka; missieru kien ħaddied u ommu kienet ħajjata.

Kellu tfulija normali ħafna. Kien jieħu ġost imur l-iskola u student intelliġenti. Kien iħobb jilgħab u popolari ħafna fost sħabu. Wera kwalitajiet sbieħ ta’ tmexxija u responsabbiltà.  Sa minn età żgħira, Domenico kellu attitudni ta’ talb u spiritwalità li għamluh eżempju tajjeb għal sħabu.

Tgħallem jgħin fil-Quddiesa minn meta kien għadu żgħir ħafna u għalkemm dak iż-żmien it-tfal kienu jirċievu l-Ewwel Tqarbina meta kien ikollhom tnax-il sena, Domenico rċieva l-Ewwel Tqarbina tiegħu meta kellu seba’ snin.  Dan għaliex il-kappillan tal-knisja fejn kienet tmur il-familja tiegħu, innota d-dispożizzjoni spiritwali u l-għarfien tal-fidi tiegħu.

Il-proponimenti li għamel Domenico qabel l-Ewwel Tqarbina tiegħu baqgħu magħrufa u marbuta sew ma’ ismu. Hu ried li jmur iqerr u jitqarben spiss, li jħares l-Ħdud u l-Festi Kmandati b’mod speċjali, li jżomm lil Ġesù u lil Marija bħala l-ħbieb tiegħu u li jippreferi li jmut milli jagħmel id-dnub. 

Meta kellu tnax-il sena, beda jattendi l-Oratorju ta’ Don Bosco. L-intenzjoni tiegħu kienet li jibda l-istudji għas-sacerdozju. Beda jieħu l-ħajja spiritwali tiegħu bis-serjetà ħafna, u beda jaħseb li biex isir qaddis irid ‘ibati għal Kristu’.  Don Bosco induna b’dan u tah dan il-parir: “Il-mod kif issir qaddis hu li tkun dejjem ferrieħi, twettaq dmirijietek bl-aħjar mod li tista’, u tagħti eżempju tajjeb lil sħabek. Ftakar li l-Mulej Ġesù qiegħed miegħek u jixtieq il-ferħ tiegħek.”

Hu baqa’ l-Oratorju għal ftit aktar minn sentejn. Imma Domenico ma kellux isir qassis. Beda jbati minn sogħla persistenti u saħħtu bdiet tmur lura.  Kellu jirritorna d-dar peress li kien qed ibati minn marda respiratorja serja, probabbilment it-tuberkulożi. Dak iż-żmien, it-trattament bl-antibijotiċi ma kienx jeżisti.  Żammewh id-dar għax saħħtu kompliet tmur għall-agħar.

Kien qed joqrob li jagħlaq ħmistax-il sena, meta fid-9 ta’ Marzu 1857, Domenico Savio mar jiltaqa’ ma’ Ġesù, l-Akbar Ħabib Tiegħu.

Wara li tispiċċa l-istorja, staqsi lit-tfal: “Tridu ssiru qaddisin?”

  • Staqsihom jekk jiftakrux il-proponimenti li għamel San Domenico Savio fl-Ewwel Tqarbina tiegħu.
  • Issuġġerilhom jagħżlu wieħed minnhom u jagħmluh il-motto tagħhom.
  • Tista’ tiktibulhom u huma jiddekorawh u jżommuh bħala ‘bookmark’.
  • Iddiskuti magħhom kif jistgħu jpoġġuh fil-prattika fil-ħajja tagħhom ta’ kuljum. 

Domenico kien jieħu pjaċir jingħaqad ma’ sħabu u jilagħbu flimkien u jagħmlu ħafna tlielaq fit-toroq. Dak iż-żmien dawn l-attivitajiet sportivi kienu komuni. Imma, spiss, is-subien kienu jispiċċaw jagħmlu ħafna storbju u jidħlu f’tilwim jaħraq, li xi kultant kien isir anke vjolenti. F’dawn il-mumenti, Domenico kien jintervjeni biex iġib il-paċi bejniethom.

Iddiskuti mat-tfal kif jistgħu jkunu huma dawk li jġibu l-paċi:

  • jużaw kliem sabiħ u pożittiv meta jitkellmu ma’ tal-familja u mal-ħbieb,
  • jiddefendu lil xi ħadd li qed jiġi mwaqqa’ għaċ-ċajt,
  • ma jitkellmux b’mod negattiv dwar persuna oħra,
  • jkunu qalbhom tajba anke meta jkun diffiċli.

Ħin tat-Talb mal-Familja:

Għinhom jitolbu għal min idejjaqhom jew miġġieled magħom.

Kantaw Peace Like a River. 

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.