Ġesù għażel tnax ir-raġel biex ikunu miegħu waqt il-ħidma tiegħu fid-dinja. Dawn kienu l-appostli li wieħed minnhom kien jismu Mattew, magħruf ukoll bħala Levi, bin Alfew. Qabel ma’ mar wara Ġesù, Mattew kien jiġbor it-taxxi għall-Imperu Ruman.
Kif spiċċa Mattew, li kien Lhudi, jiġbor it-taxxi għar-Rumani?
Dak iż-żmien, il-Palestina kienet immexxija mir-Rumani li kienu jitolbu l-ħlas tat-taxxi mingħand il-Lhud kollha. Dawn it-taxxi kienu somom ta’ flus mitluba mill-flus li kienu jaqilgħu, suppost għall-benefiċċju u l-manutenzjoni tal-provinċja. L-irġiel impjegati mir-Rumani biex jiġbru dawn it-taxxi kienu jissejħu kolletturi tat-taxxa jew pubblikani. Dawn l-irġiel kienu meqjusa bħala tradituri u midinba għax minħabba li kienu meqjusa bħala kollaboraturi mar-Rumani, ħafna minnhom kienu jitolbu aktar flus mingħand sħabhom f’taxxi li kienu dovuti u imbagħad il-flus żejda kienu jżommuhom għalihom!
Mattew kien wieħed minn dawn l-irġiel. Ħajtu nbidlet meta darba waħda Ġesù rah bilqiegħda quddiem il-mejda tat-taxxi u qallu: ʺEjja warajjaʺ (Mattew 9:9). Dak qam u mar warajh. Sa filgħaxija stess, Mattew stieden lil Ġesù għall-ikla fid-dar tiegħu mal-appostli l-oħra u l-pubblikani, taħt il-ħars ikrah tal-Fariżej.
Mattew baqa’ ma’ Ġesù bħala wieħed mill-appostli tiegħu; fejn kien xhud ta’ mirakli u t-tagħlim tiegħu; ra l-Qawmien ta’ Kristu Rxoxt, irċieva l-Ispirtu s-Santu f’Għid il-Ħamsin u ra lil Ġesù jitla’ s-sema u flimkien mal-appostli l-oħra ntbagħat biex jippriedka l-Evanġelju.
Huwa maħsub li Mattew telaq mill-Palestina x’aktarx għall-Etjopja (mhux dik tal-Afrika iżda ta’ ħdejn il-Baħar Kaspru) fejn kompla jippriedka u jikkonverti lin-nies għat-twemmin f’Ġesù Kristu bħala l-Messija, is-Salvatur tad-Dinja.
San Mattew kiteb l-Ewwel Vanġelu. Kitbu bl-Aramajk, l-ilsien antik tal-Palestina u li bih kien jitkellem Ġesù. Is-simbolu tiegħu hu figura ta’ bniedem bil-ġwienaħ jew anġlu għax il-Vanġelu tiegħu jibda bil-ġenealoġija ta’ Ġesù.
Id-dettalji ta’ kif miet San Mattew mhumiex ċari. Hemm min jgħid li miet martri fl-Etjopja u min jgħid li miet fil-paċi wara ħajja twila. Irrispettivament minn kif miet San Mattew, il-Knisja temmen li huwa għex ħajja qaddisa u li issa huwa interċessur qawwi fis-Sema.
San Mattew huwa l-qaddis Patrun tal-accountants, tal-bankiera u tal-kolletturi tat-taxxa.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
