San Polikarpu

23 ta' Frar

Biex niltaqgħu ma’ San Polikarpu, irridu mmorru lura fiż-żmien sas-sena 68 W.K.  Dan il-perjodu kien magħruf bħala l-Era Appostolika tal-Knisja. Kien żmien meta, wara l-mewt u l-qawmien ta’ Ġesù u l-Appostli bdew jivvjaġġaw biex ixerrdu l-Aħbar it-Tajba.

Kien f’dan iż-żmien li San Polikarpu twieled f’familja Nisranija li kienu aċċettaw il-Fidi Nisranija mit-tagħlim tal-Appostli stess.

Fil-Magħmudija ngħata l-isem ta’ Panagratios, mhux Polikarpu.  L-isem Polikarpu ngħatalu iktar tard.

Hu trabba mimli ħeġġa u sod fil-fidi. Sar saċerdot u assistant personali tal-Isqof ta’ Żmirna li kienet belt fil-Greċja. Illum din il-belt tissejjaħ Iżmir u tagħmel parti mit-Turkija. 

Darba minnhom, Żmirna u l-inħawi tal-madwar kienu qed ibatu minn nixfa tant qawwija li n-nies kienu ser biex imutu minħabba n-nuqqas ta’ ilma.  Panagratios, flimkien mal-Isqof, mexxa lill-komunità ta’ Żmirna fi tlett ijiem ta’ sawm u talb, biex tagħmel ix-xita.  Meta għamlet ix-xita u reġa beda jikber il-frott u l-ħxejjex, il-poplu emmen li Alla wieġeb għat-talb u l-penitenza ta’ Panagratios.  Minn dak iż-żmien beda jissejjaħ Polikarpu li jfisser ‘ħafna frott’.

Meta kellu 40 sena, Polikarpu nħatar l-Isqof ta’ Żmirna.  Sar magħruf għall-qalb tajba u l-ġenerożità tiegħu; kien jevita l-konflitti u jfittex li jsolvi l-kwistjonijiet b’mod paċifu.   Huwa għadda l-biċċa l-kbira ta’ ħajtu jiddefendi l-Fidi.  Il-qawwa tal-Fidi tiegħu ġiet mill-fatt li kien dixxiplu ta’ San Ġwann Appostlu. It-tagħlim tiegħu jinsab f’ittra li kiteb lill-Filippin. F’din l-ittra ħeġġiġhom biex iżommu sħaħ fil-Fidi Nisranija tagħhom.

Sas-sena 155 W.K., il-persekuzzjoni tal-Insara kienet laħqet Żmirna ukoll.  Polikarpu ġie akkużat li kien qed ixerred il-Fidi Nisranija, inqabad u ġie arrestat. Hu ġie meħud ġo amfiteatru, fejn poġġewh fuq il-ħatab biex jinħaraq, peress li rrifjuta li jiċħad it-twemmin tiegħu fl-Alla Wieħed u Veru.  B’mod mirakoluż, in-nirien ma għamillu ebda ħsara u nqatel b’xabla. Miet fl-età ta’ 86 sena.

Wara li taqraw l-istorja ta’ San Polikarpu, iddiskutu mat-tfal, kif aħna, bħala Insara nuru li aħna segwaċi ta’ Ġesù.

  • Għinhom jiskopru li s-Sinjal tas-Salib huwa s-sinjal tal-Insara.
  • Iddiskuti mat-tfal dwar dak li jagħmilna segwaċi ta’ Ġesù permezz ta’ dak li ngħidu, dak li nagħmlu u kif inġibu ruħna. Ħeġġiġhom biex jagħtu eżempji mill-esperjenzi tagħhom stess.

Faħħarhom għall-isforzi tagħhom, u għinhom jirrealizzaw li mhux dejjem faċli li tkun segwaċi ta’ Ġesù! 

Meta l-pajjiż kellu bżonn ix-xita, Polikarpu u l-Isqof irrikorrew għat-talb u s-sawm, b’fidi qawwija li Alla kien ser jisma’ t-talb tagħhom. 

Tkellem mat-tfal dwar it-talb: Jistgħu jgħidulkom li t-talb ifisser li tgħid ir-Rużarju jew it-talba ta’ qabel l-ikel.

  • Għidilhom li t-tifsira vera tat-talb hi: li TITKELLEM MA’ ĠESÙ. Dwar xiex?

Ġesù jismagħna dejjem.  Tkellem Miegħu, aqsam kollox Miegħu, kellmu meta tkun ferħan/a jew inkwetat/a.  Nistgħu nitolbuh il-bżonnijiet tagħna jew nirringrazzjawh għall-mumenti sbieħ f’ħajjitna.  Tista’ tfaħħru jew titolbu maħfra.

ĦIN TAT-TALB MAL-FAMILJA

  • Agħti importanza speċjali ta’ kif trodd is-Sinjal tas-Salib, speċjalment mat-tfal.  Il-Papa Franġisku kien ħeġġeġ lill-Kattoliċi kollha biex jagħtu importanza dwar kif nagħmlu s-Sinjal tas-Salib, biex dan ikun  fih aktar tifsira!
  • Komplu b’mument ta’ silenzju fejn tħeġġeġ lit-tfal biex jitkellmu ma’ Ġesù.

Ġesù nnifsu għallimna kif għandna nitolbu.  Aqraw l-episodju mill-Evanġelju ta’ San Mattew 6, 9-13.

Kantaw flimkien it-Talba tal-Missierna.

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.