
Katerina twieldet f’Ġenova, l-Italja fis-sena 1447. Kienet l-iżgħar fost ħames aħwa. Missierha Jacopo Fieschi u ommha Francesca di Negro kienu ġejjin minn familji nobbli.
Meta Katerina kellha 13-il sena, forsi biex issegwi fuq l-eżempju ta’ oħtha li kienet daħlet soru Agostinjana, talbet lill-konfessur tagħha biex tidħol soru Agostinjana hi wkoll. Peress li kienet għadha żgħira ma gietx aċċettata. Qatt ma reġgħet ippruvat tidħol fil-monasteru.
Missierha miet meta Santa Katerina kellha biss 16-il sena. Kien f’dan iż-żmien li Katerina żżewwġet lil Giuliano Adorno, li kien irritorna f’Ġenova wara l-vjaġġi tiegħu fil-Lvant Nofsani, fejn kien involut fil-kummerċ u fis-servizz militari. Dan kien żwieġ irranġat minn ħuha, x’aktarx biex tintemm il-firda bejn iż-żewġ familji rivali. Dan iż-żwieġ kien esperjenza morra għal Katerina. Huma ma kellhomx tfal. Żewġha Giuliano ma kienx eżemplari fil-ħajja taż-żwieġ. Minbarra li kien infidil lejn martu, kien bniedem li jaħli flusu u kellu tempra vjolenti. Katerina kienet miżerabbli ħafna; u għal ħames snin sofriet fis-skiet it-traġejda taż-żwieġ tagħha. Meta ma setgħetx tibqa’ tissaporti aktar, bdiet tfittex il-firda miż-żwieġ tagħha. Wara ħames snin, kienet waslet fi stadju ta’ ħajjitha fejn bdiet titlob lil Alla biex jibgħatilha marda li żżommha fis-sodda għall-bqija ta’ ħajjitha.
Kien proprju meta kienet għaddejja minn dan iż-żmien, meta fetħet qalbha ma’ oħtha s-soru, u ħeġġitha, biex tmur għand il-konfessur tal-kunvent u tqerr għandu. Waqt din il-qrara hija esperjenzat ‘sens qawwi tal-imħabba ta’ Alla għaliha’. Din kienet il-konverżjoni tagħha.
Ħajjitha nbidlet kompletament u saret ħajja ta’ għaqda kontinwa ma’ Alla permezz tat-talb u tal-penitenza, titqarben kważi kuljum, prattika rari f’dawk iż-żminijiet. Bdiet tieħu ħsieb il-morda fi sptar f’Ġenova. Din il-bidla f’ħajjitha kellha effett fuq l-istil ta’ ħajja ta’ żewġha. Hu kkonverta u saħansitra sar Terzjarju Franġiskan, minbarra li ngħaqad magħha fis-servizz volontarju li jgħin lill-morda. Minħabba l-infiq eċċessiv tal-flus li kien għamel Giuliano, fallew finanzjarjament. Għalhekk iddeċidew li jmorru jgħixu ġo sptar kbir fejn ddedikaw ħajjithom għas-servizz tal-morda.
Wara l-mewt ta’ żewġha fis-sena 1497, Katerina, ħadet f’idejha t-tmexxija tal-isptar, u fl-istess ħin kompliet tiddedika ħajjitha għall-morda u għall-bżonnijiet tal-isptar kollox għall-imħabba ta’ Alla.
Katerina mietet fil-15 ta’ Settembru 1510, wara li baqgħet tbati u eżawrita mid-dedikazzjoni sħiħa tagħha għall-foqra, il-morda u dawk fil-bżonn.