Sliem għalik!

L-Immakulata Kunċizzjoni

Illum huwa t-tieni Ħadd tal-Avvent. Iżda taħbat ukoll il-festa tal-Kunċizzjoni, it-tnissil bla tebgħa tal-Verġni Mqaddsa. Din il-festa tfakkarna li Alla għażel mill-bidu nett lil Marija biex tkun omm Ġesù; mit-tnissil tagħha, il-Madonna kienet mingħajr tebgħa’ ta’ dnub. 

Fl-istqarrija tad-domma tat-tnissil bla tebgħa tal-Madonna, ipproklamata fl-1854, mill-Papa Piju IX, hemm miktub hekk:

“L-Imqaddsa Verġni Marija, sa mill-ewwel mument tat-tnissil tagħha, bi grazzja u favur singulari ta’ Alla li jista’ kollox, f’ġieħ il-merti magħrufin minn qabel ta’ Ġesù Kristu, is-Salvatur talbnedmin kollha, kienet għal kollox meħlusa minn kull tebgħa taddnub tan-nisel.”

Fl-Evanġelju tal-lum, nisimgħu meta Alla bagħat lill-messaġġier tiegħu Gabrijel biex iħabbar lil Marija li kien għażilha bħala dik li kellha tkun omm Ġesù. Marija, ma kienet ħadd speċjali f’Nazaret. Ma kinitx xi tfajla magħrufa minn kulħadd. Li kellha speċjali ma kienx dak li jidher. Hi kienet lesta li tobdi r-rieda ta’ Alla, anke meta ma fehmithiex, anke meta l-ewwel ħsibijiet li ġewha f’moħħa dwar dan kollu, mhux bilfors kienu inkoraġġanti. Alla talabha ssir omm, f’ċirkustanzi li setgħu wassluha saħansitra biex tiġi mħaġġra. Marija kienet fil-libertà li tirrifjuta dak li kien mitlub minna. Dan ma kienx xi destin li Marija ma setgħetx taħrab minnu. L-iva ta’ din it-tfajla, magħrufa minn ħadd, waslet għas-salvazzjoni tal-umanità kollha. 

Marija, bħal kulħadd, żgur li kellha ħolm dwar kif ser tkun il-ħajja tagħha. Meta saret omm Alla, dan il-ħolm sfaxxa fix-xejn. L-iva tagħha għamel possibbli dak li kien impossibbli. L-istess jagħmel Alla magħna, meta jitlobna xi ħaġa u aħna nwieġbu ‘iva, ikun li trid int’. Xi drabi, iżda l-pjani tagħna jkunu wisq għal qalbna, ma nkunux lesti li nibdluhom. Marija setgħet tgħid ‘iva’, għax il-fidi tagħha, u r-rieda tagħha li tobdi dak li Alla ried minnha, kienu wisq akbar minn dak li kienet fasslet għall-ħajja tagħha hi stess. 

Dak li jitlob Alla minna mhux dejjem faċli. Madanakollu nemmnu li hu qiegħed dejjem magħna, u kif qal l-anġlu “għal Alla ma hemm xejn li ma jistax isir.” Fit-talb Alla, jurina dak li jixtieq minna. L-‘iva’ tagħna, trid tkun bħal ta’ Marija, marbuta mal-ebda kondizzjoni.

Qari mill-Evanġelju skont San Luqa (Lq 1, 26-38) 

F’dak iż-żmien, Alla bagħat l-anġlu Gabrijel f’belt tal-Galilija, jisimha Nazaret, għand xebba, mgħarrsa ma’ raġel jismu Ġużeppi mid-dar ta’ David. Dix-xebba kien jisimha Marija. L-anġlu daħal għandha u qalilha: “Sliem għalik, mimlija bil-grazzja, il-Mulej miegħek”.

Hi tħawdet ħafna għal dan il-kliem, u bdiet taħseb bejnha u bejn ruħha x’setgħet qatt tfisser din it-tislima. Iżda l-anġlu qalilha: “Tibżax, Marija, għax int sibt grazzja quddiem Alla. Ara, int se tnissel fil-ġuf u jkollok iben u ssemmih Ġesù. Hu jkun kbir, u jkun jissejjaħ Bin l-Għoli. Il-Mulej Alla jagħtih it-tron ta’ David missieru, u jsaltan għal dejjem fuq dar Ġakobb, u ma jkunx hemm tmiem għas-saltna tiegħu”.

Iżda Marija qalet lill-anġlu: “Kif ikun dan, ladarba ma nagħrafx raġel?”. Wieġeb l-anġlu u qalilha: “L-Ispirtu s-Santu jiġi fuqek, u l-qawwa tal-Għoli tixħet id-dell tagħha fuqek. U għalhekk dak li jitwieled minnek ikun qaddis, u jissejjaħ Bin Alla. Ara, l-qariba tiegħek Eliżabetta, fi xjuħitha, hi wkoll nisslet iben fil-ġuf, u ġa għandha sitt xhur dik li għaliha kienu jgħidu li ma jistax ikollha tfal, għax għal Alla ma hemm xejn li ma jistax isir”.

Imbagħad qalet Marija: “Ara, jien il-qaddejja tal-Mulej: ħa jsir minni skont kelmtek!” U l-anġlu telaq minn quddiemha.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Għid il-Magnificat, l-innu li Marija tfaħħar lil Alla bih. Wara għamel lista ta’ dak li inti tixtieq tfaħħar lil Alla għalih.

Ruħi tfaħħar il-kobor tal-Mulej,
U l-ispirtu tiegħi jifraħ f’Alla s-Salvatur tiegħi.
Għax hu xeħet għajnejh fuq iċ-ċokon tal-qaddejja tiegħu.
Iva, minn issa ’l quddiem kull nisel jibda jsejjaħli hienja.
Għax is-Setgħani għamel miegħi ħwejjeġ kbar;
Qaddis hu l-isem tiegħu.
Il-ħniena tiegħu tinfirex f’kull żmien
Fuq dawk li jibżgħu minnu.
Hu wera l-qawwa ta’ driegħu,
Xerred lil dawk li huma mkabbra f’qalbhom.
Niżżel is-setgħana minn fuq it-tron tagħhom,
U għolla ċ-ċkejknin.
Mela b’kull ġid lil min hu bil-ġuħ,
U l-għonja bagħathom ’il barra b’xejn.
Ħa ħsieb Iżrael, qaddej tiegħu,
Għax ftakar fil-ħniena tiegħu
-bħalma wiegħed lil missirijietna –
B’risq Abraham u nislu għal dejjem.
Glorja lill-Missier, u lill-Iben
U lill-Ispirtu s-Santu.
Kif kien mill-bidu, issa u dejjem,
U jibqa’ għal dejjem ta’ dejjem. Ammen.

  1. Aħseb dwar dak li Alla qiegħed jistaqsik bħalissa. X’qiegħed jistenna mingħandek bħala ġenitur? Itlob lill-Ispirtu s-Santu għall-għerf sabiex tinduna dak li Alla qiegħed jitolbok u għall-kuraġġ biex tagħmel dak li jixtieq.
  2. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Luqa (1, 26-38)
    ii. Girlanda tal-Avvent, illum huwa t-tieni Ħadd tal-Avvent, nixgħelu t-tieni xemgħa vjola.
    iii. Il-mejda fejn hemm il-Bibbja, miksija bi drapp vjola
    iv. Computer/laptop bil-qari u clips
  3. Mur fil-parti tat-tfal skont l-etajiet u għamilha flimkien magħhom
  4. Addatta din il-parti skont kif hemm bżonn, tiddejjaqx tkun kreattiv 😊
  5. Mur fil-parti Itlob id-dar għall-mument ta’ talb flimkien bħala familja

Illum, għalkemm huwa t-tieni Ħadd tal-Avvent, niċċelebraw ukoll il-festa tal-Immakulata Kunċizzjoni. Din hija festa li turina li Alla kien għażel lill-Madonna biex tkun il-mama ta’ Ġesù, minn qabel ma twieldet!

L-Evanġelju tal-lum, mhux dwar din il-ġrajja, iżda ser nisimgħu kif Alla bagħat anġlu għand Marija u qalilha xi ħaġa li hi qatt ma stenniet.

  • Ġesù jrid li bħall-mama tiegħu, Marija, aħna nagħmlu dak li jixtieq Alla
  • karti daqs ta’ A4, biex it-tfal ipinġu fuqhom
  • Lapes
  • Kuluri
  • Bambin Ġesù f’maxtura

Tafu x’inhu anġlu? (it-tfal jgħidu l-ħsibijiet tagħhom)

Anġlu huwa messaġġier ġej mingħand Alla. Fl-istampi u fil-knisja narawhom bħala tfal jew anke nies akbar, ġeneralment ikollhom il-ġwienaħ. Il-ġwienaħ juru li l-anġli jwasslu l-messaġġ mingħand Alla malajr kemm jista’ jkun. 

L-anġlu tal-Evanġelju tal-lum, kien jismu Gabrijel. Huwa mar għand tfajla li kien jisimha Marija u qalilha li kien ser ikollha baby u ser issemmih Ġesù. Intom tafu min kien Ġesù hux hekk? Meta kiber, Ġesù kien jgħin lil kulħadd u kien jgħallem lin-nies dwar Alla. Ġesu’, l-Iben t’Alla, sar bniedem bħalna, twieled u ġie fid-dinja għalina! Meta l-anġlu mar għand Marija biex jgħidilha li ser tkun omm Ġesù, hija ma fehmitx eżatt x’kien qiegħed jgħidilha, imma hija kienet tħobb ħafna lil Alla, għalhekk lill-anġlu qaltlu li hi ser tagħmel dak li qiegħed jistaqsiha Alla. Bħalkom tfal, intom mhux dejjem tifhmu x’qed jistaqsukom tagħmlu l-mama u l-papa, imma għax intom tħobbuhom, u għax tafu li huma jħobbukom, tagħmlu dak li jgħidulkom, anke jekk ma tifhmux għalfejn qegħdin jistaqsukom tagħmlu hekk.

U għax Marija, qalet iva lil Alla, Ġesù seta’ jitwieled. Kieku riedet Marija setgħet tgħidlu le lil Alla, imma ma għamlitx hekk. Lilna Alla wkoll jibgħatilna nies biex iwasslulna messaġġi mingħandu. Għandna l-ġenituri tagħna u lin-nanniet, li jgħinuna biex nagħmlu dak li hu tajjeb. L-iskola, l-għalliema wkoll jgħinuna biex nagħmlu għażliet tajba. Il-katekisti u s-saċerdoti wkoll ikellmuna dwar Ġesù u jgħidulna dwar kif jixtieq li ngħixu biex inkunu tfal bravi. Ma kienitx faċli għal Marija biex tgħid ‘iva’ lil Alla, imma hija lil Alla kienet tħobbu ħafna u riedet li tobdih. 

Alla ħa gost ħafna meta Marija qalet ‘iva’ u jixtieq li aħna ngħidulu ‘iva’ wkoll. Aħna ngħidu ‘iva’ lil Alla kull darba li nagħmlu xi ħaġa tajba.

Tistgħu ssemmu xi affarijiet li Alla jixtieq li nagħmlu? (nagħtu ċans lit-tfal jagħtu eżempji mill-ħajja tagħhom, importanti li l-eżempji li jagħtu jkunu jistgħu jagħmluhom, jekk le niggwidawhom aħna)

Intom tafu li Ġesù twieled f’maxtura. Ma kellux saqqu artab u komdu! Minflok kellu tiben iniġġeż! Ma tantx naħseb li kien komdu hux hekk? Meta aħna nagħmlu xi ħaġa tajba, lil Ġesù inkunu qegħdin nuruh kemm inħobbuh. Fil-ġranet li baqa’ sal-Milied, se nippruvaw nagħmlu affarijiet sbieħ u tajbin biex nuru lil Ġesù kemm tħobbuh, u bħal Marija, tkunu qegħdin tgħidu ‘iva’. 

Għandkom il-karti. Kull waħda minn dawn il-karti aqsmuha f’erba’. Kull darba li tagħmlu xi ħaġa tajba, ħudu waħda minn dawn il-karti u pinġu fuqha dak li għamiltu. Xi affarijiet li tistgħu tagħmlu huma, pereżempju titolbu, tgħinu, tieħdu ħsieb pet, tilgħabu ma’ ħutkom, tagħmlu kartolina għan-nanniet. Meta tlestu t-tpinġija, bl-għajnuna tal-ġenituri tagħkom, poġġu din il-karta taħt il-bambin Ġesù. Aktar ma nagħmlu affarijiet tajba, aktar se nagħmlulu sodda komda lil Ġesù. Minflok tiben iniġġeż taħtu, Ġesù, se jkollu l-imħabba tagħkom. X’rigal sabiħ se tagħtu lil Ġesù għall-birthday tiegħu!Waqt li qegħdin tpinġu, isimgħu din is-song dwar meta l-anġlu Gabrijel mar għand Marija, An Angel came from heaven.

Inroddu s-salib.

Għażiż Ġesù dalwaqt niċċelebraw il-birthday tiegħek. Aħna rridu nagħtuk rigal sabiħ. Irridu nkunu tfal bravi ħafna, għax nafu, li hekk, inti tieħu ħafna gost bina. Aħna nixtiequ li nibqgħu nkunu bravi anke wara l-Milied, għax aħna nħobbuk. Grazzi Ġesù ta’ dan iż-żmien sabiħ tal-Milied.

Ngħidu t-talba tas-Sliema.

Illum it-tieni Ħadd tal-Avvent, imma wkoll festa sabiħa, qegħdin niċċelebraw il-festa tal-Immakulata Kunċizzjoni. X’inhi din il-festa tal-lum?

Din il-festa tfakkarna li Alla għandu pjan għal kull wieħed u waħda minna. Dan il-pjan kien f’moħħ Alla qabel ma aħna twelidna. Alla għalhekk kien għażel lill-Madonna bħala l-mama ta’ Ġesù minn qabel ma twieldet. U minħabba li kienet se tkun Omm Alla, Marija twieldet mingħajr dnub, mingħajr id-dnub oriġinali. Din hija l-festa tal-lum: Marija twieldet mingħajr dnub, għax hi kellha tkun il-mama ta’ Ġesù. Alla ried li Marija tkun l-aqwa fost il-bnedmin kollha. Dan ma jfissirx li Alla lilna ma jħobbniex daqs kemm iħobb lill-Madonna. Aħna nafu li tana s-sagramenti bħala rigal. Hekk kif nitgħamdu nkunu bħala Marija, mingħajr dnub oriġinali, u mhux hekk biss, Alla tana r-rigal tal-qrar, biex meta nagħmlu għażliet ħżiena nistgħu mmorru nqerru u nerġgħu nkunu mingħajr dnub! Kemm iħobbna Alla!

Fl-Evanġelju tal-lum, nisimgħu kif il-pjan li kellu Alla jseħħ. Permezz tal-anġlu Gabrijel, Alla jistaqsi lil Marija biex tkun il-mama ta’ Ġesù

  • Bħal Marija, Alla għażel lilna wkoll u jridna li ngħinu lill-oħrajn biex isiru jħobbu lil Ġesù
  • L-anġli jwasslu messaġġi mingħand Alla, aħna wkoll nistgħu inwasslu messaġġi sbieħ lil ħaddieħor
  • Printout tal-mudell tal-anġlu
  • Imqass 
  • Kuluri
  • Glitter glue u affarijiet oħra li jistgħu jintużaw biex jiżżejjen l-anġlu
  • Lapes jew felt pen
  • Kwotazzjonijiet mill-Bibbja
PrintoutNieżel
Kwotazzjonijiet Nieżel

Min bagħat l-anġlu Gabrijel għand Marija?

Għalfejn taħsbu li għall-ewwel Marija beżgħet?

Xi twieġeb Marija?

Taħsbu li Marija qalet ‘iva’ għax kienet taf li Alla ma kienx ser iħalliha waħedha, għax hi kienet tafda f’Alla?

Alla seta’ jagħżel lil min ried biex tkun omm Ġesù. Marija kienet tfajla bħall-oħrajn, kienet toqgħod f’raħal żgħir, jismu Nazaret. Għalkemm għall-bqija tan-nies, Marija kienet tfajla sempliċi, għal Alla kienet speċjali ħafna, għax għażel lilha biex tkun omm il-Mulej Ġesù. 

Alla għażel lilna wkoll, anke lilkom it-tfal, biex nagħmlu xi ħaġa kbira u importanti ħafna. Hu jrid li nuru li aħna nħobbu lil Ġesù, li aħna nagħmlu bħal Ġesù, għalhekk inħobbu u ngħinu lill-oħrajn. Minbarra dan, meta aħna nħobbu lil Ġesù, aħna nitolbu u nħajru lill-oħrajn jitolbu magħna, per eżempju, li bħala familja ngħidu talba qabel ma nibdew nieklu, li nhar ta’ Ħadd immorru għall-quddiesa. Jekk ikun hemm quddiesa qabel ma tibda l-iskola, inħajru lill-sħabna u morru flimkien. Il-Madonna lil Alla qaltu, ‘jien ser nagħmel dak li tixtieq inti’. Lilna qiegħed jistaqsina rridux nagħmlu dak li jixtieq hu. Aħna kif ser inwieġbuh?

L-anġli huma messaġġiera ta’ Alla. Huma jwasslu il-messaġġi li jixtieq jagħtina Alla. Ġeneralment fl-istampi u fl-istatwi, narawhom bil-gwienaħ, dan biex juru li huma ma jitilfux żmien, il-messaġġ iwassluh kemm jista’ jkun malajr. Aħna wkoll nistgħu inkunu messaġġiera ta’ Alla, u speċjalment f’dan iż-żmien li fih niftakru fit-twelid tal-Mulej, inwasslu aħbar tajba. Kulħadd jieħu gost jirċievi aħbar tajba. Meta nagħmlu kuraġġ lil xi ħadd li hu mdejjaq, inkunu messaġġiera ta’ Alla. Meta nċemplu lin-nanniet li forsi bħal issa ma tantx qegħdin narawhom u jkunu waħedhom u noqgħodu nitkellmu magħhom, inkunu messaġġiera ta’ Alla. Meta nitkellmu ma’ xi ħadd dwar Ġesù, inkunu bħall-anġli mibgħuta minn Alla.

Fl-attività ta’ din il-ġimgħa ser inkunu bħall-anġlu Gabrijel. Għandkom stampa ta’ anġlu, aqtgħuha. Għandkom ukoll numru ta’ kwotazzjonijiet mill-Bibbja. Intom tafu li Alla jkellimna permezz tal-Bibbja. Mela jekk inwasslu kwotazzjoni mill-Bibbja lil xi ħadd, inkunu qegħdin inwasslulu messaġġ mingħand Alla, inkunu qegħdin nagħmluha ta’ anġli! Għażlu waħda minn dawn il-kwotazzjonijiet u iktbuha fuq l-anġlu. Agħtuh il-kulur u żejnuh kif tixtiequ. Itwuh, kif hemm fl-istampa u agħtu dan l-anġlu lil xi ħadd, b’hekk tkunu wassaltulu messaġġ mingħand Alla. Tistgħu tagħmlu aktar minn anġlu wieħed. Aktar ma tagħtu anġli, aktar tkunu wassaltu messaġġi mingħand Alla! L-Aħbar it-Tajba tkun waslet għand ħafna nies. 

Waqt din tkunu qegħdin tagħmlu l-anġli, isimgħu I wanna say yes.

Inroddu s-salib.

Għażiż Ġesù, aħna rridu nkunu bħal mama tiegħek Marija. Aħna nixtiequ li lil Alla ngħidulu iva għal dak kollu li jrid. Għinna biex insiru aktar bħalek. Għinna biex inħobbu lill-oħrajn u ngħinnuhom. Aħna rridu nkunu wkoll bħal anġlu Gabrijel u nwasslu messaġġi mingħand Alla. Għażiż Ġesù, għinna biex aħna ma niddejjqux nitkellmu dwarek mal-familja u mal-ħbieb. Grazzi Ġesù.

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.