Teżor moħbi li jinstab

Is-17-il Ħadd ta’ Matul is-Sena

Ġesù l-lum jirrakkuntalna xi stejjer oħra biex jurina li s-Saltna tas-Smewwiet hija għalina bħal teżor. Ma xiex iqabbilha s-Saltna Ġesu’? (Iqabbilha ma’ raġel li kien qed ifittex perli prezzjużi, kif ukoll iqabbilha ma’ teżor li jinstab moħbi f’għalqa.)

Ejjew naħsbu ftit ieħor dwar l-istorja li jgħidilna Ġesù. Huwa jgħid li s-Saltna tas-Smewwiet hija bħal teżor moħbi f’għalqa li xi ħadd ikun sab.

Kif taħseb li tħossok kieku inti ssib xi teżor prezzjuż? X’tagħmel kieku jiġrilek xi ħaġa bħal din?

Fl-istorja li jirrakkuntalna Ġesù, il-persuna li ssib it-teżor tmur u terġa taħbih, u mbagħad tmur u tbiegħ dak kollu li għandha biex tixtri t-teżor li sabet u li reġgħet ħbiet fl-għalqa. Għalfejn għamlet hekk din il-persuna?

Għamlet hekk għaliex kellha tant entużjażmu għat-teżor li kienet sabet u kienet skopriet li dan kien jiswa ħafna iżjed mill-affarijiet kollha li kellha qabel! It-teżor li hija sabet kien l-aqwa ħaġa li qatt seta jkollha – xejn ma jista’ jitqabbel ma’ dan it-teżor!

Ġesu’ l-lum qed jgħidilna li s-Saltna tas-Smewwiet hija teżor li aħna nistgħu insibu jekk aħna nagħmlu ħilitna biex ngħixu ħajjitna kif jixtieqna ngħixuha Alla.

Ilkoll għandna teżori fil-ħajja tagħna. Inti x’teżori għandek? Għalfejn tqis li dawn it-teżori huma tant speċjali għalik? (Il-ġenituri jistgħu jitkellmu mat-tfal dwar xi ħaġa li hija tassew għal qalbhom sabiex it-tfal jingħataw eżempju li jgħinhom jifhmu x’inhuwa jgħid Ġesu’ b’dawn il-parabboli). Fost l-awqa teżori li għandna, żgur insibu l-imħabba tal-persuni li huma qrib tagħna, il-familjari tagħna, il-ħbieb tagħna u dawk kollha li lilna jridulna l-ġid u li jgħinuna ngħixu sewwa. Ma’ dawn il-persuni, hemm teżori oħrajn bħalma huma l-paċi, is-saħħa, il-ġustizzja u l-ħajja li ngħixu flimkien fil-komunitajiet tagħna. Meta noffru spazju lil Alla biex hu jkun preżenti fil-familji tagħna, fil-ħajja personali tagħna, fil-komunitajiet tagħna, hemmhekk inkunu sibna it-teżor li hija s-Saltna tas-Smewwiet. Din mhijiex Saltna tas-Smewwiet għaliex m’għandhiex x’taqsam mal-art! Anzi bil-maqlub! Hija s-Saltna tas-Smewwiet għaliex lilna li għadna ngħixu fid-dinja, bl-isfidi kollha li fiha, tagħtina ċ-ċans induqu ftit mill-paċi u l-imħabba smewwija li Alla waħdu jista’ jdewwaqna f’ħajjitna u li xi darba għad ingawdu għal dejjem miegħu fil-ġenna.

Qari mill-Evanġelju skont San Mattew (Mt 13, 44-52)

F’dak iż-żmien Ġesù qal lid-dixxipli tiegħu: “Is-Saltna tas-Smewwiet tixbah lil teżor moħbi f’għalqa, li wieħed raġel isibu u jaħbih, u kollu ferħan imur ibigħ kull ma jkollu u jixtri dik l-għalqa.

Tixbah ukoll is-Saltna tas-Smewwiet lil wieħed neguzjant ifittex ġawhar fin; meta sab ġawhra tiswa ħafna, mar biegħ kull ma kellu u xtara lilha.

Tixbah ukoll is-Saltna tas-Smewwiet lil xibka mitfugħa l-baħar li fiha jinġabar minn kollox. Meta timtela jtellgħuha x-xatt, u joqogħdu bilqiegħda, jiġbru fil-kannestri dak li jkun tajjeb u jarmu l-ħażin. Hekk jiġri fi tmiem id-dinja: l-anġli joħorġu jifirdu l-ħżiena mill-ġusti, u jixħtuhom fil-ħuġġieġa tan-nar; hemmhekk ikun hemm il-biki u t-tgħażżiż tas-snien.

Kollu fhimtuh dan?” “Iva”, qalulu. U hu qalilhom: “Għalhekk kull kittieb li jkun sar dixxiplu tas-Saltna tas-Smewwiet jixbah lil wieħed sid li, mill-ħażna tiegħu, joħroġ sew il-ġdid u sew il-qadim”.

Il-Kelma tal-Mulej
Tifħir lilek Kristu

  1. Aqra sew l-Evanġelju biex issir midħla tiegħu
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. X’qiegħed tfittex il-ħajja tiegħek. Tħoss li m’għandek bżonn xejn jew tħoss il-bżonn li tfittex xi ħaġa li tmur lilhinn minn dak li għandek?
  4. X’inti tagħmel biex inti ssib it-teżor tas-Saltna u tgħin lil ħaddieħor jiskoprieh miegħek?
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    a. Bibbja bil-qari minn San Mattew (13, 44-52)
    b. Xemgħa mixgħula
    ċ. Il-mejda jew post fejn hemm il-Bibbja u xemgħa, miksija bi drapp aħdar
    d. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti tal-Prayer Spaces għall-mument ta’ talb flimkien bħala familja

“Naqraw l-Evanġelju.  Naqraw l-Evanġelju.  Tkellimna dwar dan, tiftakru?  Kull jum naqraw pass mill-Evanġelju; u nġorru magħna kopja żgħira tal-Evanġelju, fil-but, fil-basket, fhiex jidhrilna, f’post li nsibuh mill-ewwel.  U hemm, fil-qari ta’ silta, insibu lil Ġesù.  Kollox jibda’ jagħmel sens meta, hemm, fl-Evanġelju, ssib dan it-teżor li Ġesù jsejjaħlu “s-Saltna t’Alla”, jiġifieri Alla li jsaltan f’ħajtek, f’ħajjitna; Alla li hu mħabba, paċi u ferħ f’kull bniedem u fil-bnedmin kollha.  Dan irid Alla, din hi r-raġuni għaliex Ġesù ta lilu nnifsu, biex jeħlisna mis-setgħa tad-dlamijiet u jeħodna fis-saltna tal-ħajja, tal-ġmiel, tat-tjubija, tal-ferħ.  Meta naqraw l-Evanġelju nsibu lil Ġesù u jkollna l-ferħ Nisrani li hu don tal-Ispirtu s-Santu.”

Fl-Evanġelju tal-lum Ġesù se jkompli jkellimna dwar is-Salta tas-Smewwiet u jgħidilna li hi teżor prezzjuż li aħna rridu nfittxuh u li nkunu lesti nċedu affarijiet oħra minħabba fih.

  • Li Ġesu’ jixtieq li jkun magħna u jagħtina ħafna ferħ. Dik hi s-Saltna tas-Smewwiet!
  • Biex dan jiġri, aħna rridu nfittxu lil Ġesu’ qabel kollox għaliex Hu huwa l-ikbar teżor tagħna
  • Xi drabi rridu nbatu biex dan it-teżor insibuh, iżda meta nsibuh, inkunu sirna verament sinjuri
  • Xi oġġetti li huma prezzjużi għat-tfal (xi ġugarelli, soft-toys, digital games eċċ.)
  • Nidentifikaw postijiet fejn nistgħu naħbu dawn l-oġġetti msemmija (nagħmlu attenzjoni li jkunu postijiet siguri)
  • Xi sinjali li jistgħu jindikaw lit-tfal fejn l-aħjar li jfittxu dawn l-oġġetti

Nistaqsu: tafu xi tfisser il-kelma Saltna? Is-Saltna hija post li jkun taħt il-ħakma tas-Sultan jew ir-Re. Is-Saltna tas-Smewwiet tissejjaħ hekk għaliex is-Sultan il-kbir u s-Sultan tassew huwa Alla. Din is-Saltna mhix f’xi post jew pajjiż viċin jew imbiegħed. Din is-Saltna hija fostna, fina, fil-qalb tagħna stess! Ġesù jixtieq li aħna nħobbuh u li Hu jkun Ħabib li jkellimna, jieħu ħsiebna u jagħmilna ferħanin.

Hawnhekk nistgħu ngħinu lit-tfal biex imorru jfittxu l-oġġetti li għalihom huma prezzjużi u li ġew moħbija f’xi postijiet siguri. Inħallu lit-tfal jesperjenzaw id-diffikulta sakemm isibu dawn l-oġġetti.

Hekk kif isibuhom, nistaqsu din il-mistoqsija: Tiftakru x’kienu l-istejjer li Ġesù qalilna fl-Evanġelju l-lum? (Fakkar lit-tfal fit-teżor moħbi fl-għalqa u fil-perla prezzjuża li nstabet).

Imbagħad ngħidu lit-tfal: Kif intom fittixtu u sibtu dawn l-oġġetti li huma tant għal qalbkom, hekk ukoll tistgħu tfittxu is-Saltna tas-Smewwiet. Hekk ukoll tistgħu tfittxu lil Ġesù u żżommuh bħala l-aqwa ħabib tagħkom.

Nistaqsu: Kien dejjem faċli li ssibu dawk l-oġġetti li kienu moħbija? Kien hemm żgur xi diffikultajiet. Anki biex inħallu lil Ġesù jkun ħabib tagħna, irridu nirbħu affarijiet li jkunu diffiċli (Għin lit-tfal isemmu affarijiet sempliċi li jistgħu itellfuhom milli jkunu ħbieb ta’ Ġesù).

Nistaqsu wkoll: Issa li sibtu l-affarijiet li tħobbu, x’se tagħmlu? Jekk dawn l-affarijiet se tibżgħu għalihom u żżomuhom f’post li fih ikunu safe, anki ma’ Ġesù rridu nagħmlu l-istess. Irridu naħdmu biex nibqgħu ħbieb tiegħu.

Nistgħu nagħlqu l-attivita’ billi nistaqsu x’għen jew x’tellef lit-tfal fit-tfittxija għat-teżor tagħhom u minn dan nieħdu spunt biex niskopru x’jista’ jgħinna jew itellifna fl-iskoperta tat-teżor tas-Saltna tas-smewwiet.

Grazzi Ġesù li tixtieq tagħmilna dejjem kuntenti u ferħanin. Grazzi li tridna nkunu miegħek minn issa u li Int trid tibqa’ ħabib magħna u ma titlaqna qatt

Fl-Evanġelju tal-lum Ġesù se jkompli jkellimna dwar is-Salta tas-Smewwiet u jgħidilna li hi teżor prezzjuż li aħna rridu nfittxuh u li nkunu lesti nċedu affarijiet oħra minħabba fih.

  • Li Ġesù jixtieq li jkun magħna u jagħtina ħafna ferħ. Dik hi s-Saltna tas-Smewwiet!
  • Biex dan jiġri, aħna rridu nfittxu lil Ġesu’ qabel kollox għaliex Hu huwa l-ikbar teżor tagħna
  • Xi drabi rridu nbatu biex dan it-teżor insibuh, iżda meta nsibuh, inkunu sirna verament sinjuri
  • Xi oġġetti li huma prezzjużi għat-tfal (xi logħob diġitali,oġġetti personali eċċ.)
  • Nidentifikaw postijiet fejn nistgħu naħbu dawn l-oġġetti msemmija (nagħmlu attenzjoni li jkunu postijiet siguri)
  • Xi sinjali li jistgħu jindikaw lit-tfal fejn l-aħjar li jfittxu dawn l-oġġetti
  • Jekk huwa possibbli, nikoraġġixxu biex it-tfittxija ssir fi grupp ta’ tfal

Nistaqsu: tafu xi tfisser il-kelma Saltna? Is-Saltna hija post li jkun taħt il-ħakma tas-Sultan jew ir-Re. Is-Saltna tas-Smewwiet tissejjaħ hekk għaliex is-Sultan il-kbir u s-Sultan tassew huwa Alla. Din is-Saltna mhix f’xi post jew pajjiż viċin jew imbiegħed. Din is-Saltna hija fostna, fina, fil-qalb tagħna stess! Ġesu’ jixtieq li aħna nħobbuh u li Hu jkun Ħabib li jkellimna, jieħu ħsiebna u jagħmilna ferħanin.

Hawnhekk nistgħu ngħinu lit-tfal biex imorru jfittxu l-oġġetti li għalihom huma prezzjużi u li ġew moħbija f’xi postijiet siguri. Inħallu lit-tfal jesperjenzaw id-diffikulta sakemm isibu dawn l-oġġetti.

Hekk kif isibuhom, nistaqsu din il-mistoqsija: Tiftakru x’kienu l-istejjer li Ġesu qalilna fl-Evanġelju l-lum? (Fakkar lit-tfal fit-teżor moħbi fl-għalqa u fil-perla prezzjuża li nstabet).

Imbagħad ngħidu lit-tfal: Kif intom fittixtu u sibtu dawn l-oġġetti li huma tant għal qalbkom, hekk ukoll tistgħu tfittxu is-Saltna tas-Smewwiet. Hekk ukoll tistgħu tfittxu lil Ġesu’ u żżommuh bħala l-aqwa ħabib tagħkom.

Nistaqsu: Kien dejjem faċli li ssibu dawk l-oġġetti li kienu moħbija? Kien hemm żgur xi diffikultajiet. Anki biex inħallu lil Ġesu’ jkun ħabib tagħna, irridu nirbħu affarijiet li jkunu diffiċli (Għin lit-tfal isemmu affarijiet sempliċi li jistgħu itellfuhom milli jkunu ħbieb ta’ Ġesu’).

Nistaqsu wkoll: Issa li sibtu l-affarijiet li tħobbu, x’se tagħmlu? Jekk dawn l-affarijiet se tibżgħu għalihom u żżomuhom f’post li fih ikunu safe, anki ma’ Ġesu’ rridu nagħmlu l-istess. Irridu naħdmu biex nibqgħu ħbieb tiegħu.

Nistaqsu lit-tfal jekk il-fatt li kienu qed ifittxu dawn l-oġġetti flimkien mal-oħrajn, kienx ta’ għajnuna għalihom. Nistgħu nitgħallmu minn dan il-mod ta’ tfittxija dwar kif għandna nfittxu s-Saltna tas-Smewwiet?

Nistgħu nagħlqu l-attività billi nistaqsu x’għen jew x’tellef lit-tfal fit-tfittxija għat-teżor tagħhom u minn dan nieħdu spunt biex niskopru x’jista’ jgħinna jew itellifna fl-iskoperta tat-teżor tas-Saltna tas-smewwiet.

Grazzi Ġesù li tixtieq tagħmilna dejjem kuntenti u ferħanin. Grazzi li tridna nkunu miegħek minn issa u li Int trid tibqa’ ħabib magħna u ma titlaqna qatt.

Flimkien ngħidu t-talba ta’ Santu Wistin:

Lilek Biss inħobb, Mulej, warajk biss irrid nimxi.
Lilek biss irrid infittex, u lilek biss irrid naqdi.
Nitolbok, Mulej, ikkmandani dak li trid.
Irrid naqdik bil-ferħ kollu ta’ qalbi
Għaliex mhux l-indiema, imma l-imħabba qiegħda ssejjaħli lejk.
Agħmel, Mulej, li nkun kapaċi nisma’ dak li int tixtieq minni.
Għinni ngħix dak li tikkmandani, u ikkmandani dak li trid.
Agħmel li nsibuk, għax qabel ma nsibuk, ma nistriħux.
Fik biss tinsab il-hena u l-mistrieħ tagħna.
Int għamiltna għalik, o Alla,
U qalbna ma ssib qatt kwiet,
Jekk ma tistrieħx fik.

Bħal kull ġimgħa l-Prayer Corner se tgħinna biex nifhmu aktar it-tema tal-Evanġelju.

Fujett Ħadd-17Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.