Vjaġġ twil

L-Avventura tal-Milied

It-tema tat-tielet ġimgħa tal-Avvent, hija l-Ferħ. Din hija kelma li Papa Franġisku jħobb juża ħafna. Il-ferħ ma huwiex il-gost li drabi nħossu meta jiġrilna xi ħaġa sabiħa, iżda huwa stat li nkunu fih anke meta l-affarijiet ma jmorrux kif nixtiequ aħna. Dan il-ferħ jiġi minn Ġesù, meta nafdaw il-ħajja tagħna f’idejh. Għalhekk huwa ferħ dejjiemi, u mhux momentarju. Il-ferħ li jrid jagħtina Ġesù, huwa l-ferħ li naqraw dwaru fil-ktieb tal-Ġenesi, qabel ma Adam u Eva waqgħu għat-tentazzjoni. Id-dnub serqilhom il-ferħ li kienu qed iħossu qabel. Id-dnub firidhom minn Alla. Iżda għal Alla din ma kinitx sitwazzjoni aċċettabbli, għalhekk sar bniedem bħalna, biex isalvana, biex jirbaħ il-mewt u jkollna l-ferħ f’qalbna. Għalhekk meta l-anġli marru jwasslu l-aħbar tat-twelid ta’ Ġesù lir-rgħajja, qalulhom, “Tibżgħux, għax araw, qiegħed inħabbrilkom ferħ kbir, ferħ li se jkun għall-poplu kollu. Illum, fil-belt ta’ David, twildilkom Salvatur, li hu l-Messija, il-Mulej.” (Luqa 2, 10-11).

Aqra/itlob Salm 126, dwar il-ħsibijiet ta’ persuna li tħalli lilha nnifisha għar-rieda ta’ Alla.

Qari mill-Evanġelju skont San Luqa 2, 1-5

F’dik il-ħabta Ċesari Awgustu ħareġ digriet biex isir ċensiment fid-dinja kollha. Dan kien l-ewwel ċensiment li sar meta Kirinu kien gvernatur tas-Sirja. U kulħadd mar biex jinkiteb, kull wieħed fil-belt tiegħu. Ġużeppi wkoll mar mill-Galilija, mill-belt ta’ Nazaret, u tala’ l-Lhudija, fil-belt ta’ David jisimha Betlehem – għax hu kien mid-dar u l-familja ta’ David – biex jinkiteb flimkien ma’ Marija l-għarusa tiegħu, li kienet tqila.

Il-Kelma tal-Mulej
Tifħir lilek Kristu

Bl-għajnuna tal-puppets, it-tfal jirrakuntaw il-ġrajja tal-vjaġġ ta’ Ġużeppi u Marija lejn Betlehem.

Jekk matul l-Avvent, qegħdin tużaw il-girlanda tal-Avvent, din il-ġimgħa tintegħel ix-xemgħa r-roża li tirrappreżenta l-ferħ, ferħ li dalwaqt wasal il-Milied, Ġesù jitwieled fostna. Staqsu lit-tfal x’jagħmilhom ferħanin.

Staqsuhom kif jistgħu jagħmlu nies oħra ferħana … lill-ġenituri, lil ħuthom, lin-nanniet, lill-ħbieb. Inkoraġġuhom, biex matul din il-ġimgħa jippruvaw kemm jista’ jkun iġibu ferħ lil ta’ madwarhom.

  1. Kulħadd jieħu gost bir-rigali. Matul din il-ġimgħa għinu lit-tfal jagħmlu l-Christmas Crackers (jekk tfittxu fuq l-internet issibu kif tagħmluhom). Ikollkom bżonn rollijiet vojta tat-toilet paper, jew tal-kitchen towels (dawn jekk filkas aqsmuhom fi tnejn), gloj, wrapping paper, żigarella, xi affarijiet żgħar u/jew ħelu li jistgħu jitpoġġew fil-crackers. Waqt li qegħdin jagħmlu l-crackers, isimgħu s-song, I’ve got the joy.
  2. Sibu x’inhu l-messaġġ misterjuż (ara hawn taħt)
PrintoutNiżżel

Kemm tħobbna Ġesù li tridna nkunu dejjem ferħana! Illum qrajna dwar il-vjaġġ li Marija u Ġużeppi kellhom jagħmlu biex imorru Betlehem. Nisimgħu dwar ħafna nies li jkollhom jagħmlu vjaġġi twal, li jkollhom jitilqu mid-dar tagħhom, u b’hekk ma jkunux ferħana. Nitolbu Mulej, biex dawn in-nies isibu lil min jilqagħhom u jkun ħabib magħhom.

Ammen.
Tpenġija tar-raġel tal-lukandaNiżżel

Għandna bżonn

  • Il-lapbook
  • Gloj / imqass
  • Lapes / kuluri
  • Kartonċina safra
  • Templates (xemgħa, pocket, stilel, hexagon accordian)
xemgħatDownload
stilel Download
Small Hexagon AccordionDownload

Attività

  • Ipprintja t-templates ta’ din il-ġimgħa u aqtgħahom
  • Ix-xemgħa agħtiha l-kulur roża u ikteb FERĦ, waħħalha fit-tielet paġna
  • Itwi l-pocket u l-hexagon accordian
  • Aqta’ t-tliet stilel mill-kartonċina safra, u poġġihom fil-pocket (uża t-template tal-istilel)

Il-3 Ħadd tal-Avvent

Wasalna f’nofs l-Avvent, għalhekk nixgħelu t-tielet xemgħa, din id-darba r-roża. Din ix-xemgħa jsejħulha wkoll ix-xemgħa tar-rgħajja. Niftakru fil-ferħ li esperjenzat id-dinja meta twieled Ġesù, kif ukoll il-ferħ li qed inħossu aħna hekk kif qed toqrob il-festa tal-Milied. Dan il-Ħadd insejħulu il-Ħadd Gaudete, illum is-saċerdot jilbes ir-roża, mhux il-vjola, kif jagħmel fil-bqija tal-Avvent. 

Nagħjtu bil-ferħ, kif għamlu r-rgħajja, meta wasslu l-aħbar li twieled il-Messija. Matul l-ewwel ġimgħa ffukajna fuq il-profeti li stennew lil xi ħadd li baqgħu qatt ma raw. Il-ġimgħa l-oħra ffukajna fuq Marija u Ġużeppi li kienu qed jistennew it-twelid tat-tarbija tagħhom. Matul din il-ġimgħa niffukaw fuq ir-rgħajja fl-għelieqi, ‘l barra minn Betlehem, li waqt li kienu qed jieħdu ħsieb in-nagħaġ, inbidlitilhom ħajjithom. Dehrilhom anġlu u l-glorja ta’ Alla ddiet madwarhom. Minjaf x’esperjenza sabiħa għaddew minnha! Madanakollu xorta beżgħu u l-anġlu qalilhom: “Tibżgħux, għax araw, qiegħed inħabbrilkom ferħ kbir, ferħ li se jkun għall-poplu kollu. Illum, fil-belt ta’ David, twildilkom Salvatur, li hu l-Messija, il-Mulej. U bħala sinjal ikollkom dan; issibu tarbija mfisqija u mimduda f’maxtura. F’daqqa waħda ngħaqdu mal-anġlu għadd kbir ta’ qtajja’ tas-sema, ifaħħru lil Alla u jgħidu: ‘Glorja lil Alla fl-ogħla tas-smewwiet,

u sliem fl-art lill-bnedmin li jogħġbu lilu!’” Ifakkrukom f’xi ħaġa dawn il-kliem? Waqt il-quddiesa aħna ngħidu talba li nsejħula l-Glorja. Din fiha wkoll dawn il-kliem. Fil-fatt tibda hekk: “Glorja lil Alla fil-għoli tas-smewwiet, u paċi fl-art lill-bnedmin ta’ rieda tajba.”

Meta l-anġli telqu, ir-rgħajja ddeċidew li jmorru Betlehem biex ifittxu lis-Salvatur. Huma sabu lil Marija u lil Ġużeppi u lit-tarbija f’maxtura. Meta telqu minn ħdejhom, marru jgħidu lil kulħadd x’raw u x’esperjenzaw, kulħadd kien mistagħġeb. Marija żammet kollox f’qalbha. Ir-rgħajja marru lura fl-għelieqi jfaħħru u jigglorifikaw lil Alla għall-affarijiet li kienu raw. 

Immġinaw kif ħassewhom ir-rgħajja meta dehrulhom l-anġli f’dak il-lejl. X’aktarx kienet tal-biża’, u fl-istess ħin spettakolari u esperjenza speċjali wkoll. Huma fehmu l-importanza tal-ġrajja. Huma kienu qed jagħmlu xogħolhom, jieħdu ħsieb in-nagħaġ matul il-lejl, jistennew li jisbaħ. Xi kultant, waqt li nkunu qed nagħmlu x-xogħol tagħna, bħal inkunu l-iskola u nkunu qed nistennew bil-ħerqa li jasal il-ħin li mmorru d-dar, meta Alla jintervjeni f’ħajitna u jiġrielna xi ħaġa tal-iskantament. Jista’ jkun li Alla jwieġeb it-talb tagħna, jew xi ħadd ikun ġentili magħna meta ma stennejniehx, jew xi ħadd jagħmlilna l-ġurnata tagħna ferm aħjar milli kienet. Tajjeb li nistennew xi ħaġa mhux mistennija li sseħħ. Għalhekk, fl-Avvent, nistennew b’ferħ it-twelied ta’ Ġesù Bambin. Ftakru li Alla dejjem qiegħed jaħdem f’ħajjitna, għalkemm mhux dejjem nindunaw. Għalhekk nistennew b’ferħ it-twelid ta’ Ġesù, mgħallem u salvatur tagħna. 

Din ix-xemgħa se tixgħel fid-dar,

għax Ġesù ġej dalwaqt fuq din l-art!

Se nisimgħu bħar-rgħajja l-aħbar,

li Ġesù jinsab fqajjar fil-għar.

Għażiż Mulej, aħna ninkwetaw fuq ħafna affarijiet li jdejquna. Għinna biex inkunu bħar-rgħajja li wieġbu għall-Glorja tiegħek. Għinna nisimgħu l-wegħdiet ta’ paċi u rieda tajba ta’ dan iż-żmien tal-Avvent u b’hekk nirċievu d-don tal-ferħ, waqt li nistennew bil-ħerqa t-twelid ta’ Ġesù. Ammen.

  • Tistgħu tiktbu din it-talba, jew waħda li tagħmlu intom, fuq it-tielet paġna tal-lapbook
  • Waħħal il-pocket taħt it-talba, u fuqu iktbu Glorja lil Alla fil-għoli tas-smewwiet
  • Fuq it-tliet stilel sofor iktbu kif tistgħu tippreparaw qalbkom għat-twelid ta’ Ġesù. Pereżempju: tgħid xi talba li mhux soltu tgħid ma’ xi ħadd, taqra l-ġrajja tal-Milied mill-Bibbja, tmur il-quddies
  • Waħħal il-hexagon accordian fuq ix-xemgħa, fuq kull hexagon ikteb kif, matul din il-ġimgħa, tista’ tagħmel lil xi ħadd ferħan. Ipprova kun kreattiv.
  • Isma’ is-song, God came down on this glorious night