San Kristofru

San Kristofru għex fit-tieni jew it-tielet seklu, dak li nafu fuqu hu ibbażżat fuq stejjer, tradizzjonijiet u leġġendi li waslu għandna, għalhekk m’għandna xejn ċert dwar il-ħajja u l-mewt tiegħu.  Madankollu, skont l-istorja ma nistgħux niċħdu li kien jeżisti martri magħruf bħala San Kristofru.  Fil-fatt huwa maħsub li ismu seta kien Reprobus jew Offerus, imma beda jissejjaħ Kristofru li bil-lingwa Griega jfisser dak li jġorr lil Kristu!

Skont dawn it-tradizzjonijiet huwa mifhum li Kristofru/Reprobus anki bħala tfajjel kien twil u b’saħħtu, għalhekk kien magħruf bħala ‘ġgant’.  Meta kiber mar ifittex dak li kien jixraq li jikkommetti ruħu għalih.  Id-deċiżjoni tiegħu kienet li jsir suldat u jaqdi l-aqwa re, din id-deċiżjoni wasslitu biex jibda isservi lil dak li kien imexxi l-inħawi ta’ fejn kien jgħix.  Imma beda jinduna li il-mexxej li kien jemmen li kien b’saħħtu u qawwi kien jibża meta xi ħadd issemmi ix-xitan.  Għalhekk Kristofru beda jaħseb li ix-xitan kien aqwa mill mexxej li kien qed isservi.  Għalhekk mar biex isservi ix-xitan!  Kristofru ingħaqad ma grupp ta’ ħallelin li il-mexxej tagħhom kien issejjaħ lilu nnifsu ‘xitan’.  Imma meta dan il-mexxej qabdu l-biża meta ra is-Salib, Kristofru beda jaħseb li is-Salib għandu iktar qawwa mix-‘xitan’.  Għalhekk Kristofru beda ifittex biex issib xi jfisser is-Salib.

Fl-aħħar iltaqgħa ma eremita li laqqgħu ma’ Kristu, ir-Re tar-Rejiet.  Kristofru ħaddan il-Fidi Nisranija u tgħammed.  Billi Kristofru kien raġel kbir u dejjem bil-ġuħ, ma setgħax jilqa is-suġġeriment ta l-eremita u iqatta ħajtu isum u jitlob.  Għalhekk iddeċieda li kien ser jaqdi lil Kristu billi jgħin lin-nies jaqsmu xmara perikoluża li ħafna nies kienu jipperikolaw ħajjithom biex jaqsmuha.  

Darba tfajjel żgħir staqsa lil Kristofru biex jgħinu jaqsam ix-xmara.   Mingħajr ma qagħad jaħsibha refa’ it-tfajjel fuq spaltu u beda jaqsam ix-xmara.  Kien b’diffikulta li Kristofru wassal it-tfajjel in-naħa l-oħra għax hu u miexi it-tfajjel aktar beda jitqal u l-ilma beda jogħla għal livell perikoluż.  Meta Kristofru staqsa it-tifel għalfejn kien daqshekk tqil, il-bixra ta’ wiċċ it-tifel inbidel u żvela li hu kien Kristu Nnifsu; għalhekk meta Kristofru kien qiegħed jerfa t-Tfajjel Ġesu’ kien qiegħed jerfa wkoll it-toqol tad-dinja.

Wara din l-esperjenza, huwa mifhum li Kristofru mar jevanġelizza ġewwa Lycia (illum It-Turkija).  Kien hawn, madwar is-sena 251WK li Kristofru sofra l-martirju għax ma riedx joffri sagrifiċċju lil Emperatur Decius.

San Kristofru, skont it-tradizzjoni, hu il-Qaddis Ġgant u dak  li refa l-Kristu huwa meqjum bħala wieħed mill-14 il-Qaddis Awżiljaturi – l-Assistenti Qaddisa.