San Kristofru

San Kristofru għex fit-tieni jew it-tielet seklu, għalhekk dak li nafu dwaru huwa bbażat fuq stejjer, tradizzjonijiet u leġġendi  li ġew mgħoddija tul iż-żmien. M’hemm xejn ċert dwar ħajtu u mewtu.  Madankollu, skont sorsi storiċi, ma nistgħux niċħdu li kien jeżisti martri magħruf bħala San Kristofru.  Fil-fatt, huwa maħsub li jista’ jkun li oriġinarjament kien jismu Reprobus jew Offerus, iżda spiċċa magħruf bl-isem ta’ Kristoforu – isem li ġej mill-Grieg u jfisser “Dak li jġorr lil Kristu”!

Hekk kif kiber u sar żagħżugħ b’saħħtu u ta’ statura kbira, beda jfittex skop li jistħoqqlu l-lealtà tiegħu. Iddeċieda li, bħala suldat, kellu jservi lill-akbar sultan, u għalhekk daħal fis-servizz tal-ħakkiem ta’ artu. Madankollu, innota li dan il-ħakkiem – li hu kien jemmen li kien b’saħħtu u setgħan – kien juri biża’ malli tissemma l-kelma ‘xitan’. Għalhekk, Kristofru kkonkluda li x-xitan kien aktar setgħan mill-ħakkiem tiegħu, u ddeċieda li jmur iservi lix-xitan! Huwa ngħaqad ma’ grupp ta’ ħallelin li l-kap tagħhom kien isejjaħ lilu nnifsu ‘Xitan’. Iżda meta dan il-kap wera biża’ malli ra Salib, Kristofru kkonkluda li s-Salib kien saħansitra aktar setgħan mix-‘Xitan’.

Għalhekk Kristofru beda jfittex it-tifsira tas-Salib.

Maż-żmien, huwa ltaqa’ ma’ eremita li wasslu biex isir jaf lil Kristu, is-Sultan tas-Saltniet. Huwa sar nisrani u tgħammed. Iżda Kristofru, li kien raġel ta’ statura kbira u dejjem iħossu bil-ġuħ, ma setax iżomm mal-parir tal-eremita li jqatta’ ħajtu fis-sawm u t-talb. Minflok, iddeċieda li jogħġob lil Kristu billi jgħin lill-vjaġġaturi jaqsmu xmara perikoluża, fejn in-nies kienu jipperikolow ħajjithom biex jaqsmuha.

Darba waħda, tifel talab lil Kristofru biex jgħinu jaqsam ix-xmara. Mingħajr ebda eżitazzjoni, huwa refa’ lit-tifel fuq spallejh u beda jġorru biex jaqsmu n-naħa l-oħra. Kien bi sforz kbir li Kristofru rnexxielu jwassal lit-tifel f’post sigur, għax it-tifel beda jidher li qed isir itqal hekk kif hu kien qed jitħabat biex jaqsam ix-xmara, li f’daqqa waħda għolliet il-livell tagħha b’mod perikoluż. Meta Kristofru staqsa lit-tifel għalfejn kien daqshekk tqil, it-tifel biddel id-dehra tiegħu u wera li kien Kristu nnifsu; b’hekk, meta Kristofru kien qed jerfgħu, kien qed jerfa’ wkoll il-piż tad-dinja kollha.

Wara din l-esperjenza, huwa maħsub li Kristofru vvjaġġa biex iwassal il-Bxara t-Tajba, u wasal sa Liċja (it-Turkija tal-lum). Kien proprju hawnhekk li, għall-ħabta tas-sena 251 W.K., Kristofru miet martri wara li rrifjuta li joffri sagrifiċċju lill-Imperatur Deċju. San Kristofru, il-Qaddis Ġgant u dak li refa’ lil Kristu  skont it-tradizzjoni, huwa meqjum bħala wieħed mill-Erbatax-il Qaddis Awżiljarju – jew il-Qaddisin li Jgħinu.