Il-Fidi

Bħal dawn il-ġranet, f’xi rokna mudlama tad-djar tagħna, hemm ċans kbir li nsibu ż-żerriegħa tal-ġulbiena, impoġġija fuq ftit tajjar jew ħamrija. Forsi aħna l-adulti niftakru meta konna tfal u żrajna l-ġulbiena għall-ewwel darba u kif ftit konna nobsru kif din kienet se tikber f’temp tant qasir ta’ ftit ġimgħat. Madanakollu, issa li aħna adulti, dan il-proċess nagħmluh b’ħafna aktar konvinzjoni, għaliex ma jkollniex dubju li ftit ġimgħat wara li nkunu żrajna ż-żerriegħa, se jkollna ġulbiena bajda u sabiħa.

Matul din il-ġimgħa, aħna mistednin nirriflettu dwar il-fidi. Ħafna drabi, fil-ħajja tagħna, insibu ruħna maqbuda bejn dak it-tifel li qed jiżra’ l-ġulbiena għall-ewwel darba, xettiku u mimli mistoqsijiet, u dak l-adult li qed jagħmel l-istess proċess, imma b’qalbu qawwija minn dak li se jsib ftit ġimgħat wara.

Ftit ġimgħat oħra, aħna se niċċelebraw l-ewwel miġja ta’ Ġesù fostna bħala tarbija – fatt storiku, li m’hemm l-ebda dubju fuqu, insibuh anke f’sorsi u kitbiet pagani! Madanakollu, fil-Milied niċċelebraw ukoll il-fidi tagħna li Ġesù għad jerġa’ jiġi, kemm fl-aħħar taż-żmien u wkoll illum, fil-ħajja tagħna.

F’nofs pandemija globali, lejn l-aħħar ta’ sena b’tant sfidi li komplew iżidu t-taħbit li niltaqgħu miegħu fil-ħajja ‘normali’ tagħna, jista’ jkun li niddubitaw f’kemm Ġesù tassew irid jiġi għandna u jagħmel differenza fil-ħajja tagħna. Għalina l-bnedmin, dan hu normali, u m’għandniex għalfejn ninkwetaw iżżejjed li kultant nonqsu mill-fidi. Tant hu minnu dan, li hu għalhekk li l-Knisja – ta’ kull sena – tagħtina ż-żmien tal-Avvent – biex bis-simboli tiegħu u bil-qari tant sabiħ mill-Iskrittura, nerġgħu nagħmlu kuraġġ, inqawwu fina t-tama, u kif ukoll il-fidi f’Dak li diġà salvana u rebaħ id-dinja.

Din il-ġimgħa, it-tfal se nippreżentawlhom l-annimali li nsibu fil-presepju – il-baqra, il-ħmara u n-nagħaġ. Ma nafx qattx staqsejtu kif, minn tant annimali, huma dawn il-ftit annimali li sabu posthom fil-presepju! Li kien għal xi wħud minn uliedna, żgur kienu jpoġġu xi qattus, kelb jew anke xi dinosawru! Il-baqra u l-ħmara jissemmew fl-ewwel kapitlu tal-ktieb tal-profeta Isaija, fejn naraw kif “il-gendus jagħraf lil sidu, u l-ħmar il-maxtura ta’ sidu, imma Iżrael ma jagħrafx”. Il-fidi hi dik li tagħtina ‘għajnejn ġodda’ – li naraw dak li bla fidi ma tistax tara; li nifhmu dak li bla fidi diffiċli tifhem; u li nagħmlu esperjenza li bla fidi jkun diffiċli li nesperjenzaw.

F’dan iż-żmien li ninsabu fih fil-pandemija, ħafna qed jgħixu dawn il-ġranet bir-restrizzjonijiet kollha li għandna, b’fidi li ftit ġimgħat jew xhur oħra se jkollna vaċċin li se jbiddel din ir-realtà iebsa. Ejja ngħixu dan l-Avvent ukoll b’fidi, b’fidi li minkejja dak kollu li għaddejjin minnu, Ġesù jista’ tassew jitwieled fil-qlub tagħna u jimliehom b’dak il-ferħ u b’dik it-tama li jista’ jagħti hu biss.

Fl-aħħar nett nixtieq nispiċċa bil-kliem tal-Papa Franġisku, li ftit ġranet ilu għamel riflessjoni sabiħa ħafna dwar il-fidi: “il-fidi hi l-kuntrarju tal-medjokrità: hija xewqa ardenti għal Alla, hija kuraġġ kontinwu li tikkonverti, hija kuraġġ li tħobb, dejjem miexja ’l quddiem. Il-fidi mhix ilma li jitfi, hija n-nar li jaqbad; mhix sedattiv għal dawk li huma stressjati, hi storja ta’ mħabba għal dawk li huma nnamrati”.

Il-mużika ġiet meħuda minn The Christmas Song, ġabra ta’ mużika ta’ żmien il-Milied minn Jacob Portelli u Fiorella Camilleri b’risq Dar Bjorn