Il-Paċi

Għalkemm ċertu kliem inkunu familjari miegħu sa minn meta nkunu għadna tfal, hu normali li aħna u nikbru ċerti tifsiriet jitwessgħu jew saħansitra jinbidlu. Jekk issemmi l-kelma ‘paċi’ mat-tfal, x’aktarx li jgħidulek li din tfisser armonija mal-ħbieb tagħhom u ma’ ħuthom jew anke l-oppost tal-ġlied u l-gwerer. Aħna u nikbru x’aktarx il-kelma paċi tibda tfisser ukoll mumenti ta’ ‘kwiet’, bħal meta wara ġurnata xogħol tpoġġi fuq is-sufan u tieħu tazza te ‘fil-paċi’. Tibda tfisser mumenti li fihom ma jkunx hemm ħsibijiet tqal jew żejda, imma fejn il-moħħ jibda jistrieħ.

Mingħajr ma nindunaw, it-tifsira tal-kelma paċi tibda toqrob aktar lejn is-sinjifikat ta’ din il-kelma hekk kif insibuha fil-Bibbja. Dak il-lejl li fih seħħ it-twelid ta’ Ġesù, naraw l-anġli jħabbru ‘l-paċi’ fuq l-art lill-bnedmin ta’ rieda tajba. Fit-tarf l-ieħor tal-ħajja ta’ Ġesù naraw lilu stess isellem lid-dixxipli tiegħu bil-kelma ‘Shalom’, li tfisser paċi. Fl-aħħar diskors tiegħu, li nsibu fl-Evanġelju ta’ San Ġwann, Ġesù jurina b’mod ċar li jixtieq li dak li jħallilna jkun proprju ‘l-paċi tiegħu’. Dan jurina li din il-paċi hi rigal tassew speċjali, u la hi rigal, mhix xi ħaġa li nistgħu nixtru bil-flus, jew li mhix aċċessibbli għalina. Biex nirċievu rigal hemm bżonn biss li ninfetħu għalih, li niftħu idejna u qlubna biex nilqgħu dak li qed jingħatalna.

Ħafna drabi, bħala ġenituri, f’dan iż-żmien tal-Milied insibu ruħna naħsbu għar-rigali ta’ kulħadd – ta’ wliedna, tal-qraba tagħna, ta’ xi kollegi tax-xogħol, tal-għalliema u diversi persuni oħra. Minħabba f’hekk għal diversi minna hu ħafna aktar faċli li nagħtu rigali milli nirċevuhom. Dan ir-raba’ Ħadd tal-Avvent li hu l-aħħar pass qabel niċċelebraw il-festa tal-Milied, qed jistedinna biex ninfetħu għal dawk id-doni li l-Mulej jixtieq jagħti lil kull wieħed u waħda minna.  Tkun tassew ħasra jekk qed niġu mogħtija rigali hekk sbieħ iżda ma nindunawx bihom jew inħallu idejna magħluqa flok niftħuhom biex nilqgħu dak li qed jingħatalna.

Din il-ġimgħa lit-tfal se nippreżentawlhom il-figuri ta’ Marija u Ġużeppi. Jekk aħna li qed ngħixu fl-2020 nistgħu ngħidu li din kienet sena kerha u ta’ min jinsieha, Marija u Ġużeppi żgur mhumiex barranin għad-diffikultajiet tal-ħajja. Fis-sena li fiha twieled Ġesù, Marija kellha tħabbat wiċċha ma’ tqala mirakoluża, ħaġa li qatt u qatt ma ġrat fl-istorja tal-umanità; tqala li għal min ma riedx jemmen dak li qed jiġri setgħet tfissrilha sentenza tal-mewt. Kellha taffaċċja vjaġġ għand il-kuġina tagħha Eliżabetta, vjaġġ ieħor twil lejn Betlem, ħlas ġo stalla u vjaġġ ieħor twil b’tarbija lejn l-Eġittu. Min-naħa tiegħu Ġużeppi kellu jaffaċċja r-realtà ta’ għarusa li qed iġġorr tarbija li mhix tiegħu; anġli li jħabbrulu veritajiet li ħadd aktar ma seta’ jifhimhom għax id-dinja qatt ma kienet rat bħalhom; responsabbiltà ġdida u kbira li jkun il-missier putattiv ta’ Ġesù u parteċipazzjoni mill-qrib f’misteru li kien ħafna ikbar minnu.

Is-sbuħija tal-familja Mqaddsa hi li ma kinitx familja ‘perfetta’ iżda familja qaddisa, u dan għandu jagħmlilna ħafna kuraġġ, għax filwaqt li ma nistgħux inkunu perfetti, nistgħu tassew inkunu qaddisa jekk inkunu kapaċi ngħixu d-diffikultajiet tal-ħajja tagħna fid-dawl tal-fidi.  Marija u Ġużeppi laqgħu għandhom il-prinċep tal-paċi, iżda mhux biex iżommuh għalihom, imma biex jagħtuh lid-dinja kollha. Jalla f’dawn il-ġranet nidħlu f’attitudni ta’ riċettività għal dawn id-doni hekk kbar li qed jiġu mogħtija lilna f’dan iż-żmien qaddis tal-Avvent u l-Milied.