San Ġużeppi Moscati

12 ta' April

San Ġużeppi Moscati (1880-1927)  ġie kkanonizzat fl-1987, u għalhekk jista’ jitqies bħala qaddis ta’ żmienna.  Dak li nafu dwaru hu reali, ibbażat fuq il-fatti u dokumentat. Hu jispikka b’mod uniku għaliex joffri eżempju ta’ kif il-fidi u x-xjenza jistgħu ‘jimxu id f’id’ u jikbru flimkien. Huwa kien professur universitarju tal-mediċina, jispikka fil-qasam tal-bijokimika, u riċerkatur xjentifiku li l-istudji tiegħu wasslu għall-iskoperta tal-insulina — trattament li jsalva l-ħajja għal dawk bid-dijabete.

Hu kien is-seba’ wild fost disa’ itfal imwielda f’familja aristokratika Kattolika. Kienu jgħixu f’Napli u missieru kien jaħdem bħala avukat u maġistrat. Il-familja tiegħu xtaquh isir bħal missieru, imma hu ried isir tabib biex ikun jista’ jfejjaq lin-nies bħat-tobba li għenu lil ħuh li kien ġarrab ġrieħi kbar f’rasu wara li waqa’ minn fuq żiemel.

Bħala żagħżugħ kattoliku, waqt li kien qed  jistudja fl-Università ta’ Napli, hu kompla jipprattika r-reliġjon avolja kien imdawwar b’nies li ma jemmnux u b’attitudnijiet negattivi lejn ir-reliġjon. Qatt ma falla l-quddiesa ta’ kuljum. Kien iżomm il-kuruna tar-Rużarju fil-but, peress li kien jemmen li għandu jitlob l-għajnuna mingħand Ġesù u l-Madonna meta jkollu jieħu deċiżjonijiet kruċjali. F’mument minnhom, huwa kkunsidra li jsir Ġiżwita, iżda mbagħad iddeċieda li l-vokazzjoni tiegħu kienet fid-dinja tal-mediċina, u għażel li jingħaqad mal-Franġiskani Lajċi.  Hu qatt ma żżewweġ.

Hu baqa’ jaħdem ta’ tabib fl-isptar u rriffjuta promotions għal pożizzjonijiet  ogħla, biex jibqa’ jaħdem mal-morda speċjalment dawk li l-mard tagħhom kien jitqies diffiċli biex jitfejjaq. Huwa magħruf bħala ‘it-tabib tal-fqar’ jew ‘it-tabib mimli mħabba’ għaliex kien jikkura lill-pazjenti l-aktar fil-bżonn u lill-foqra mingħajr ma jitlob ħlas, u spiss kien itihom anke l-flus biex jixtru l-mediċini.

Hu kien fuq quddiem nett biex jgħin lill-morda fl-epidemija tal-kolera fl-1911 u ħadem mas-suldati midruba fl-Ewwel Gwerra Dinjija. F’kull ċirkostanza, huwa dejjem wera qalb tajba u kompassjoni.

Miet f’Napli meta kellu biss 46 sena.

San Ġwanni Pawlu II faħħar lil San Ġużeppi Moscati mhux biss għax kien tabib tajjeb imma wkoll għax “waqt li kien ifejjaq lill-morda, hu wera l-umanità tiegħu u x-xhieda tal-fidi tiegħu.’’

Waqt li kien qed ifejjaq lill-morda bħala tabib, San Giuseppe Moscati rrifletta l-imħabba u l-kompassjoni li wera Ġesù meta wettaq mirakli u fejjaq lil dawk li wrew fidi fih.

Ġesù jfejjaq – it-tfal jistgħu jkunu jafu stejjer dwar il-mirakli tal-fejqan ta’ Ġesù. Fittxuhom fil-Bibbja tat-Tfal. Tistgħu tissuġġerixxu li tfittxu:

  • Ir-raġel paralizzat imniżżel mis-saqaf. (Mattew 9, 1-8)
  • Il-fejqan tal-għaxar lebbrużi – li kienu jbatu minn marda serja tal-ġilda (Luqa 17, 11-19)
  • Il-qawmien mill-mewt tat-tifla ta’ Ġajru jmur lil hinn mill-fejqan.

It-tobba jiktbulna l-mediċini biex jgħinuna nfiqu, u aħna nfiqu bl-għajnuna ta’ Alla. Ġesù jisma’ t-talb tagħna u ifejjaqna b’modi oħra. Hu ‘jfejjaq’ is-sentimenti tagħna meta nħossuna mdejqin, inkwetati, beżgħana, għajjenin, diżappuntati, jew imweġġgħin minn ħaddieħor.

Ħeġġeġ lit-tfal jitkellmu dwar l-esperjenzi tagħhom stess, meta ħassew li kellhom bżonn dan il-fejqan mingħand Ġesù.

Ħin tat-Talb mal-Familja

  • Nitolbu għax-xjentisti biex Alla jibqa’ jgħinhom biex isibu kura tal-mard li jikkawżaw pandemiji u mard fit-tul.
  • Biex jagħti saħħa u kuraġġ lit-tobba u lill-ħaddiema kollha li waqt diżastri naturali u traġedji jkunu minn ta’ quddiem nett biex isalvaw il-ħajja tan-nies.

Għin lit-tfal biex jitolbu kull meta jkollhom bżonn ta’ fejqan bħal dan ukoll.

Attività:

Aħna lkoll nistgħu nagħmlu affarijiet sbieħ u kbar! Illum ser nsajjru soppa tajba u ser nagħmlu kraft żgħir. 

Għall-kraft ser niġu bżonn kartonċina A4 (kulur ċar), kuluri jew markers, permanent marker iswed u mqass.

Instruzzjonijiet:
1. Penġi l-palma ta’ idek fuq il-kartonċina
2. Aqta’ bl-imqass id-dawra ta’ barra ta’ ma’ idejk
3. Fuq ġewwa tal-palma tal-idejn penġi qalb kbira u bil-marker iswed ikteb: “Inservi b’imħabba.”

Insajru flimkien: Agħżel waħda minn dawn ir-riċetti u flimkien ma’ xi ħadd adult insajru flimkien din is-soppa!

Meta tkunu lesti, agħtu platt lil xi ħadd ma jifħlax jew li jinsab waħdu u agħtihom ukoll waħda mill-krafts tiegħek!

Tinsiex taqsam magħna dan il-kraft, bili tibagħtulna ritratt 🙂

Colouring pageNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.