Ħelow tfal!
Ġie li kellkom xi proġett tal-iskola? Tiftakru kif minn titlu ta’ kelma jew tnejn sibtu informazzjoni u stampi? Bl-informazzjoni u l-istampi imbagħad għaqqadtu l-proġett fuq kartonċina jew scrapbook, għalhekk dan it-titlu kiber iktar u issa għandu tifsira differenti milli biss żewġ kelmiet.
L-istess jagħmel Ġesù meta jġib eżempji biex jurina x’inhi s-Saltna t’Alla, u kif naħdmu għaliha. Fl-Evanġelju tal-lum, Ġesù iqabbel is-Saltna t’Alla maż-żerriegħa tal-mustarda u jgħallimna li għalkemm din iż-żerriegħa hija żgħira ħafna, meta tinżera’ fil-ħamrija ssir l-ikbar waħda fost il-ħxejjex kollha u l-għasafar jibnu l-bejtiet tagħhom fil-friegħi kbar u b’saħħithom tagħha.
Il-prayer space tal-lum jisimha: Jiena żerriegħa
Għaliha għandna bżonn:
- mp3 bil-ħsejjes tal-għasafar
- ħames żerriegħat (jistgħu jkunu ta’ kull tip ta’ pjanta jew frotta)
- mudell ta’ bejta tal-għasafar
- pinna jew lapes
- kolla
Ħu l-ħames żerriegħat f’idejk u waqt li tħares ftit lejhom, aħseb f’ħames karatteristiċi sbieħ jew talenti li għandek.
Waħħal iż-żerriegħa fuq il-mudell tal-bejta u taħt kull żerriegħa ikteb karatteristika jew talent li għandek.
Itlob lil Alla jgħinnek biex tagħraf tuża’ dawn il-karatteristiċi/ talenti biex tgħin u tferraħ lill-oħrajn.
Pawza miġburin fit-talb.
Saħħa ħbieb sakemm nerġgħu niltaqgħu!
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
