Ħamis ix-Xirka

Attivitajiet Speċjali għall-familja kollha

Introduzzjoni

F’dan il-jum aħna niftakru fl-Aħħar Ikla li Ġesù għamel mad-dixxipli tiegħu. Bil-ġest tal-ħasil ta’ riġlejn l-appostli, Ġesù jgħallimna wkoll li aħna rridu naqdu lill-oħrajn. F’dan il-jum Ġesù waqqaf żewġ sagramenti: l-Ordni Sagri (simbolizzat fil-ħasil tar-riġlejn) u l-Ewkaristija, meta Ġesù nnifsu bidel il-ħobż u l-inbid fil-ġisem u d-demm imqaddes tiegħu u ta dan l-ikel speċjali lill-appostli li kienu miegħu.

Intom qatt kellkom xi ikla speċjali? 
Meta? 
Kif kienet din l-ikla? 
Għalfejn kienet speċjali u differenti minn ikliet oħra? 
Tiftakar x’kiltu dakinhar? 

Jekk kienet speċjali, jista’ jkun li anke ħadtu xi ritratti ta’ din l-okkazzjoni, arawhom u tkellmu dwar kif ħassejtukom dak in-nhar. 

Ġesù wkoll kellu ikla speċjali mal-ħbieb tiegħu. Insejħulha l-Aħħar Ċena. Tant kienet speċjali li kull sena l-Knisja terġa tfakkarna fiha, fil-verità, niftakru fiha f’kull quddiesa, iżda f’Ħamis ix-Xirka niċċelebrawha b’mod aktar kbir. 

Waqt kull quddiesa, is-saċerdot jerġa jirrepeti l-istess kliem li qal Ġesù fl-Aħħar Ikla: “Ħudu u kulu lkoll minn dan, għax dan huwa ġismi li jingħata għalikom. Ħudu u ixorbu minnu lkoll, għax dan huwa l-kalċi ta’ Demmi: tal-patt il-ġdid li jibqa’ għal dejjem. Id-Demm li jixxerred għalikom u għall-bnedmin kollha għall-maħfra tad-dnubiet. Agħmlu dan b’tfkira tiegħi.” Bil-qawwa tal-Ispirtu s-Santu, Ġesù jibdel il-ħobż u l-inbid f’ġismu u demmu stess. Xejn ma jinbidel la fid-dehra u lanqas fit-togħma, iżda nemmnu li issa l-ħobż u l-inbid saru Ġesù.

Dakinhar qabel ma bdew l-ikla Ġesù ħasel riġlejn l-appostli. Din kienet xi ħaġa li dejjem kienet issir. Dak iż-żmien, it-toroq kienu maħmuġa u b’ħafna trab, ma kinux jilbsu żraben u peduni, kellhom sandlijiet. Biex jieklu, ġeneralment ma kienux joqgħodu madwar mejda fuq is-siġġijiet, imma mal-art, fuq xi twapet u cushions. Għalhekk kienet ħaġa tajba li jaħslu saqajhom meta jidħlu ġewwa. Il-qaddej, kien jieħu ħsieb li jaħsel saqajn kulmin jasal id-dar. 

Meta Ġesù ħasel saqajn il-ħbieb tiegħu, ried jurihom li jħobbhom ħafna, u ried jgħallimhom ukoll. Ġesù jgħidilhom biex huma jagħmlu dak kollu li rawh jagħmel magħhom u mal-oħrajn: jaqdi lin-nies u jħobbhom. Ġesù, ħasel saqajn l-appostli kollha, anke ta’ Ġuda, meta kien jaf li dan kien ser jittradih! 

Talba u qari tal-Evanġelju

Irroddu s-salib

Grazzi Ġesù, li inti tħobbna ħafna. Grazzi li inti mhux għidtilna biss li tħobbna, imma wrejtna wkoll li tħobbna, meta mitt fuq is-salib, biex aħna, xi darba, inkunu nistgħu niġu miegħek fil-ġenna. 

(nota lill-ġenituri: għażlu liema l-aħjar li tagħmlu flimkien mat-tfal: taraw il-clip, taqraw l-Evanġelju jew inkella taqraw il-ġrajja mill-Bibbja tat-tfal)

Lent 40 – Jesus Washes his Disciples' Feet – CatholicBrain.com
During the Passover meal Jesus stood up from the table and tied a cloth around his waist. He poured some water into a basin, and walked over to one of his disciples and began to wash their feet. When Jesus reached Peter, Peter would not let Jesus wash his feet. Jesus answered that if he did not wash Peter's feet he would have no part of Jesus. Peter then said that Jesus should not only wash his feet, but his hands and head as well. Runtime : 4:35 mins
malta.catholicbrain.com

Qari mill-Evanġelju skont San Ġwann (Ġw 13, 1-15) 

Qabel il-festa tal-Għid, billi kien jaf Ġesù li waslet is-siegħa tiegħu biex jgħaddi minn din id-dinja għal għand il-Missier, hu, li kien ħabb lil tiegħu li kienu fid-dinja, ħabbhom għall-aħħar.

Kienu qegħdingħall-ikel. Ix-Xitan kien ġa webbel lil Ġuda ta’ Xmun l-Iskarjota u daħħallu f’rasu li jittradih. Ġesù kien jaf li l-Missier tah kollox f’idejh, u li hu kien ġie mingħand Alla u kien sejjer għand Alla. Qam minn fuq il-mejda, neħħa l-mantar minn fuqu, ħa fardal u rabtu ma’ qaddu. Imbagħad ferra’ l-ilma fil-lenbija, u beda jaħsel saqajn id-dixxipli u jixxuttahomlhom bil-fardal li kellu ma’ qaddu.

Mela wasal fuq Xmun Pietru, u dan qallu: “Int, Mulej, taħsilli saqajja?”. Ġesù wieġbu: “Int għalissa ma tafx x’qiegħed nagħmel jien; tifhmu aktar ’il quddiem”. Qallu Pietru: “Ma jkun qatt li inti taħsilli saqajja!” 

Wieġbu Ġesù: “Jekk ma naħsillekx saqajk, ma jkollokx x’taqsam miegħi”. Qallu Xmun Pietru: “Mulej, mhux saqajja biss, imma idejja u rasi wkoll”. Qallu Ġesù: “Min hu maħsul, ma għandux għalfejn jinħasel kollu, ħlief saqajh, għax hu kollu kemm hu nadif, u intom indaf, imma mhux ilkoll”. Għax hu kien jaf min kien sejjer jittradih; għalhekk qal: “M’intomx ilkoll indaf”.

Wara li ħaslilhom saqajhom, libes il-mantar u raġa’ qagħad fuq il-mejda; u qalilhom: “Tafu x’għamiltilkom? Intom issejħuli l-Imgħallem u l-Mulej, u tgħidu sewwa, għax hekk jien. Mela jekk jien, li jien il-Mulej u l-Imgħallem ħsiltilkom saqajkom, hekk intom għandkom taħslu saqajn xulxin. 15Għax jien tajtkom eżempju, biex kif għamilt jien magħkom, hekk tagħmlu intom ukoll”.

Il-Kelma tal-Mulej
Tifħir lilek Kristu

Lent 41 – Jesus Gives us the Eucharist – CatholicBrain.com
Jesus Gives us the Eucharist. Runtime: 3:26 minutes.
malta.catholicbrain.com

Qari mill-Evanġelju skont San Mark (Mk 14, 22-25)

Huma u jieklu, ħa l-ħobż f’idejh, qal il-barka, qasmu, newwilhulhom u qal: “Ħudu, dan hu ġismi.” Mbagħad ħa kalċi f’idejh, radd il-ħajr, u newwilhulhom, u lkoll xorbu minnu. U qalilhom: “Dan huwa demmi, id-demm tal-patt, li jixxerred għal ħafna. Tassew ngħidilkom, li ma nixrobx iżjed mill-frott tad-dielja sa dak in-nhar li nixrob inbid ġdid fis-Saltna ta’ Alla.”

Il-Kelma tal-Mulej
Tifħir lilek Kristu

Issa kulħadd ineħħi ż-żraben u l-peduni. Il-mama u l-papa l-ewwel jaħslu saqajn it-tfal u jixxutawhomlhom, imbagħad it-tfal jaħslu saqajn xulxin u dawk tal-ġenituri wkoll u jixxuttawhom, u l-ġenituri jaħslu saqajn xulxin u jixxuttawhom. Min jixtieq jista’ jżid l-att ta’ umiltà, u wara li jaħsel riġlejn l-ieħor, ibushomlu. 

Nota lill-ġenituri: Dan il-ħin tal-ħasil tar-riġlejn nżommuh kemm jista’ jkun dinjituż. Nistgħu nħallu mużika fl-isfond (Ubi caritas). Ukoll biex il-ħin ma jkunx twil iżżejjed, tinħasel sieq waħda ta’ kulħadd u mhux it-tnejn, it-tfal ikunu diġà ħafjien, b’żarbun ta’ ġewwa li jitneħħa malajr.

Kif ħassejtukom? Meta ħsiltu saqajn l-oħrajn u meta ħaslu tagħkom?

Dejjem faċli li taċċettaw li ħaddieħor jagħmel l-affarijiet għalikom?

Għalfejn ġieli nħossuha diffiċli li naċċettaw l-għajnuna? Hija ħaġa tajba, li aħna nitgħallmu nagħmlu kollox, imma hemm drabi li jkollna bżonn lil min jurina, hemm drabi meta għandna bżonn l-għajnuna tal-oħrajn. Niftakru, li meta aħna nirrifjutaw din it-tip ta’ għajnuna, nkunu qegħdin inċaħħdu lill-persuna l-oħra li tgħinna, kif jixtieq Ġesù. 

Kif nistgħu ngħinu lill-oħrajn? (kulħadd jingħata ċans jagħti eżempji, anke l-ġenituri jagħtu l-eżempji tagħhom. Il-ġenituri jieħdu ħsieb li l-eżempji li jagħtu t-tfal huma reali u parti mill-ħajja tagħhom ta’ kuljum, u mhux għajnuna li tista’ tingħata darba kultant)

Waqt din l-aħħar ikla, Ġesù waqqaf is-sagrament tat-tqarbin. Is-saċerdot, waqt il-konsagrazzjoni, jerġa’ jirrepeti l-kliem li qal Ġesù. F’kull quddiesa, l-Ispirtu s-Santu jbiddel il-ħobż u l-inbid, u dawn isiru Ġesù. Diffiċli ħafna li nifhmu dan il-miraklu, speċjalment meta l-ħobż u l-inbid jibqgħu jidhru l-istess u anke t-togħma ma tinbidilx. Imma aħna nemmnu li jsiru vera Ġesù. 

Ġesù, inti wrejtna kemm tħobbna. Għallimtna wkoll li għandna nħobbu mhux biss lilek imma wkoll lil xulxin. Għinna biex inħobbu anke lil dawk li għal raġuni jew oħra qed insibuha diffiċli biex nuruhom imħabba. Dan nitolbuh f’ismek. Ammen.

Ngħidu t-talba tal-Missiera u nieqfu ftit fuq il-kliem Ħobżna ta’ kuljum agħtina llum.
Nisimgħu, Love one another.

X’nistgħu nagħmlu aktar llum?

L-ikla tal-familja nagħmluha aktar speċjali, nitfu l-mobiles, tablets, television, u noqgħodu nitkellmu bejnietna. Kulħadd jingħata ċans li jgħin, fil-preparazzjoni tal-ikel u fit-tqegħid tal-affarijiet fuq il-mejda.

Għalkemm b’mod virtwali, nattendu għall-quddiesa tal-lum, niġbdu l-attenzjoni tat-tfal waqt il-konsagrazzjoni.

Fl-aħħar nistaqsu: Illum il-quddies spiċċat b’mod differenti. Indunajtu x’kien hemm differenti? 

Bħal-lum il-knisja tkun żarmata mit-tiżjin kollu u s-slaleb jitgħattew. Jekk għandkom xi salib jew kurċifiss, għamlu purċissjoni sa ħdejh, kantaw xi innu bħal Ġesu tiegħi u għattu s-salib bid-drapp il-vjola.