Ħbieb li ġew mill-bogħod

L-Avventura tal-Milied

Speċjali

Attività

Il-kelma Epifanija tfisser manifestazzjoni/rivelazzjoni. Fil-fatt f’din il-festa, niċċelebraw meta Ġesù rrivela lilu nnifsu bħala s-Salvatur tad-dinja u mhux salvatur ta’ sezzjoni waħda ta’ nies. Aktar tard fl-evanġelji nsibu ‘Epifaniji’ oħra, bħall-magħmudija ta’ Ġesù, fejn leħen Alla l-Missier juri li Ġesù huwa l-iben tiegħu u t-tieġ ta’ Kana, fejn Ġesù jagħtina l-ewwel sinjal, l-ewwel miraklu.
Itolbu Salm 72, dwar is-Saltna tal-Messija.

Ejjew naraw

Ejjew nisimgħu

Qari mill-Evanġelju skont San Mattew 2, 1-12

Meta twieled Ġesù f’Betlehem tal-Lhudija, fi żmien is-sultan Erodi, xi maġi mil-lvant ġew Ġerusalemm jistaqsu: “Fejn hu dak li twieled sultan tal-Lhud? Għax rajna l-kewkba tiegħu tielgħa, u ġejna nqimuh.” Is-sultan Erodi sama’ bihom, u tħawwad hu u Ġerusalemm kollha miegħu. Ġabar flimkien il-qassisin il-kbar u l-kittieba kollha tal-poplu, u ried jaf mingħandhom fejn kellu jitwieled il-Messija. U huma qalulu: “F’Betlehem tal-Lhudija, għax hekk inkiteb mill-profeta:

‘U int, Betlehem, art ta’ Ġuda,

le, m’intix l-iżgħar fost il-bliet il-kbar ta’ Ġuda,

għax minnek joħroġ mexxej

li jirgħa l-poplu tiegħi Iżrael.’

Erodi mbagħad sejjaħ lill-maġi bil-moħbi, u tkixxef bir-reqqa kollha mingħandhom iż-żmien li fih dehritilhom il-kewkba; bagħathom Betlehem u qalilhom: “Morru, staqsu sewwa għat-tifel, u meta ssibuh ejjew għiduli, ħalli jien ukoll niġi nqimu.” Dawk, wara li semgħu lis-sultan, telqu, u ara, il-kewkba li kienu raw tielgħa bdiet miexja quddiemhom sakemm waslet u waqfet fuq il-post fejn kien hemm it-tifel. Kif raw il-kewkba mtlew b’ferħ kbir tassew. Meta mbagħad daħlu d-dar u raw lit-tifel ma’ ommu Marija, inxteħtu fl-art iqimuh; fetħu t-teżori tagħhom u offrewlu rigali deheb, inċens u mirra

Il-Kelma tal-Mulej
Tifħir lilek Kristu

Ejjew nirrakuntaw

Bl-għajnuna tal-puppets, it-tfal jirrakuntaw il-ġrajja tat-tliet għorrief u l-vjaġġ tagħhom sakemm iltaqgħu ma’ Ġesù.

Ejjew nagħmlu

Tradizzjoni marbuta mal-festa tal-Epifanija, iżda din ma tantx hija magħrufa Malta, hija t-tberik tal-ġibs. Fil-pajjiżi fejn din issir, il-ġibs jitbierek fil-knisja, u kulħadd jieħu biċċa miegħu d-dar. Imbagħad fuq il-bieb ta’ barra jinkitbu dawn l-inzjali C+M+B. Dawn huma l-inizjali tal-ismijiet tat-tliet għorrief, Caspar, Melchior u Balthassar. Dawn it-tliet ittri huma wkoll l-bidu tal-frażi, Christus mansionem benedicat, li tfisser Kristu bierek din id-dar. Dawn l-inizjali jinkitbu bejn in-numri tas-sena, għalhekk din l-Epifanija jinkitbu hekk: 20+C+M+B+23. Minħabba li din it-tradizzjoni ma tantx hija pprattikata fil-parroċċi ta’ Malta, ħudu biċċa ġibs magħkom il-knisja u wara l-quddiesa staqsu lill-qassis ibirikielkom. Ftakru li din hija ġibs imbierka, wara li tiktbu 20+C+M+B+23 fuq il-bieb ta’ barra, tpoġġuhiex mat-toys, imma erfgħuha, tistgħu tużawha s-sena ta’ wara! Wara li tiktbu dawn l-inizjali u s-sena fuq il-bieb ta’ barra, tisgħtu titolbu Salm 121.

Ejjew nieħdu gost

L-għorrief lil Ġesù ħadulu r-rigali, deheb, inċens u mirra. Dawn ir-rigali kienu jfissru li Ġesù kien re, kien Alla u kellu jbati. Imma taħsbu li Ġesù ħa gost bihom dawn ir-rigali? Kieku inti kont mal-għorrief, x’rigal kont tagħti lil Ġesù? Għalfejn kont tagħtih dan ir-rigal? Pinġi r-rigal li tagħti lil Ġesù hawnhekk
Għinu lill-għorrief isibu t-triq.
Agħmlu stilel kulur id-deheb, u fuqhom iktbu l-akbar rigal li takom Alla. Dendlu dawn l-istillel mas-siġra tal-Milied
Agħmlu kuruni tal-karti, żejnuhom u ilbsuhom waqt l-ikla tal-Ħadd

Pinġi r-rigal Niżżel

Għinu lill-għorrief isibu t-triq Niżżel

Ejjew nitolbu

It-talba se titmexxa fuq il-passi tal-logħba Pass the Parcel. Qabel ippreparaw il-‘parcel’. Ir-rigali se jkunu ħelu, araw li jkollkom ħelu għal kulħadd. Ifirdu l-ħelu b’numru ta’ karti. Ġesù lilna jagħtina ħafna rigali: ġenituri, aħwa, ħbieb, pets, fjuri, ilma, xemx, ikel … Fl-isfond ta’ din it-talba użaw il-mużika ta’ We three Kings . Għand min ikun il-pakkett meta tieqaf il-mużika, ineħħi waħda mill-karti, jekk isib il-ħelu, ipoġġih fin-nofs biex jinqasam bejn kulħadd fl-aħħar tat-talba , waqt li jgħid talba ta’ ringrazzjament (pereżempju, Grazzi Ġesù tax-xemx u l-qamar). It-talba tieqaf meta jinstab il-ħelu kollu.

Ħbieb li ġew mill-bogħod

L-Avventura tal-Milied

Din il-ġimgħa

Dwar

Talb mit-tfal

Ikkuntattjana