Illum huwa l-aħħar Ħadd ta’ Żmien il-Għid. Illum niċċelebraw il-festa ta’ Pentekoste, meta nfakkru l-miġja tal-Ispirtu s-Santu fuq id-dixxipli u l-bidu tal-Knisja. Il-qari kollu tal-lum jenfasizza r-rwol tal-Ispirtu s-Santu fil-Knisja …kien l-Ispirtu s-Santu li taha l-ħajja u huwa l-istess Spirtu s-Santu li permezz tad-doni tiegħu, ikabbarha u jsaħħaha. Fl-ewwel qari mill-Atti tal-Appostli, nisimgħu dwar l-inżul tal-Ispirtu s-Santu f’forma ta’ riħ u nar. Id-dixxipli kienu magħluqa mbeżżgħin flimkien, meta riħ qawwi mela l-kamra u fuqhom dehru ilsna tan-nar. Huma mtlew b’kuraġġ kbir u ħarġu minn hemm biex iwasslu t-tagħlim ta’ Ġesù, u l-Ispirtu s-Santu ppermetta li dawk kollha li semgħuhom, jifhmuhom, għalkemm ma kienux kollha jitkellmu l-istess lingwa. Dan kien il-bidu tal-Knisja. Dak in-nhar ħafna li semgħu lid-dixxipli, emmnu u kkonvertew.
Fit-tieni qari, San Pawl jenfasizza r-rwol tad-doni mogħtija mill-Ispirtu s-Santu, mogħtija biex isaħħu u jqawwu l-ġisem ta’ Kristu, li aħna lkoll parti minnu. Aħna lkoll nirċievu dawn id-doni, imma mhux kulħadd jirċievi l-istess. Minkejja dan, ilkoll mistennija li nużaw dawn id-doni għall-ġid tal-Knisja, u mhux għall-ġid personali tagħna. San Pawl jenfasizza li għalkemm kulħadd differenti, kulħadd importanti u jqabbel il-membri tal-Knisja mal-membri tal-ġisem uman, li kollha jaħdmu flimkien b’sinerġija. Kulħadd għandu doni u talenti partikolari, u dawn huma kollha meħtieġa biex il-Knisja tinbena b’mod sħiħ. Kulħadd għandu r-rwol partikolari tiegħu u li jista’ jaqdih hu biss. Fil-Knisja ta’ Ġesù, ħadd ma hu żejjed. Din l-idea ta’ ġisem wieħed, torbot ħafna mar-rakkont tal-Atti tal-Appostli, fejn l-Ispirtu s-Santu ppermetta li dawk kollha li semgħu lill-appostli fehmuhom. Għalhekk il-festa ta’ Pentekoste tgħinna biex niftakru li għalkemm fil-Knisja hemm diversità kbira fil-membri tagħha, fl-istess ħin hemm unità fit-twemin tagħna. Nitolbu għalhekk biex l-Ispirtu s-Santu jħeġġiġna lkoll biex naqdu lill-oħrajn bit-talenti tagħna u b’hekk nibnu u nsaħħu lill-Knisja.
L-Evanġelju meħud minn San Ġwann jirrakonta l-ġrajja ta’ meta Ġesù ta l-Ispirtu s-Santu lill-appostli. Din il-ġrajja, li hi differenti minn dik rakkuntata fl-Atti tal-Appostli, ma għandix tgerfixna … Ġesù kien wiegħed lill-appostli li mhux ser iħallihom waħedhom, iżda kien ser jibgħatilhom għajnuna, u f’dan ir-rakkont narawh li żamm kelmtu. Ġesù jonfoħ fuq l-appostli u jagħtihom l-Ispirtu s-Santu; din toħodna lura għall-ġrajja tal-ħolqien meta Alla nefaħ fuq il-bniedem biex tah il-ħajja. F’dan ir-rakkont, Ġesù jonfoħ fuq l-appostli biex jagħtihom ħajja ġdida, b’qawwa tal-Ispirtu s-Santu.
F’dan l-Evanġelju nisimgħu lil Ġesù jagħti l-paċi lid-dixxipli, “Is-sliem għalikom,” jgħidilhom għal darbtejn. Imbagħad, wara li jagħtihom l-Ispirtu s-Santu, ikellimhom dwar il-maħfra. Għandna bżonn l-Ispirtu s-Santu, kemm biex ikollna l-paċi, kif ukoll biex nitolbu l-maħfra, nirċievu maħfra u naħfru lill-oħrajn. Il-maħfra u l-paċi, jimxu id f’id.
Bħala ġenituri, l-Ispirtu s-Santu jgħinnkom biex twasslu dawn id-doni ta’ paċi u maħfra, lill-familja tagħkom. Titolbu skuża lit-tfal jekk tiżbaljaw? Tgħinnuhom jaħfru lill-dawk li weġġgħuhom? X’eżempju tatuhom meta jitolbu skuża? Vera taħfrulhom, jew tibqgħu tfakkruhom f’dak li jkunu għamlu? Kif tgħinnuhom ikunu ħbieb vera?
L-istess Spirtu s-Santu li ngħata lill-appostli, ġie mogħti lilna wkoll. Hu jagħtina l-kuraġġ biex ngħixu ta’ vera nsara, biex inkunu xhieda ta’ Ġesù kemm fil-familji tagħna u ma’ kulmin inkunu. L-Ispirtu s-Santu ma ġiex mogħti lilna fil-magħmudija u fil-griżma tal-Isqof u daqshekk. L-Ispirtu s-Santu jagħti l-ħajja, jekk inħalluh jaħdem fina u permezz tagħna, hu jmexxina biex nilħqu l-milja tagħna u l-pjan li Alla għandu għal kull wieħed u waħda minna.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
