Il-Kuraġġ

L-ewwel karattri fil-mixja tagħna waqt ir-Randan

Bdejna r-Randan! L-ewwel ġurnata tar-Randan, minħabba li hi ġurnata ta’ sawm u astinenza, diġà tinħass ġurnata itwal mill-oħrajn. Il-bidu tar-Randan, minnu nnifsu qisu jurina li deħlin għal mixja twila mhux ħażin, fejn bejn inkunu nixtiequ nikkommettu ruħna għal xi sagrifiċċju jew għal xi prattika tajba ġdida u bejn naqtgħu qalbna li se jirnexxilna nagħmlu dan sa ma jasal l-Għid il-Kbir.

Din is-sena, hemm min qed iħossha iżjed diffiċli għaliex għal ħafna nies, ir-Randan tas-sena 2020 li eżatt f’nofsu nqfilna ġod-djar tagħna ma spiċċax mal-Għid il-Kbir imma baqa’ qisu Randan twil li għadu ma spiċċax. Jekk hemm xi ħaġa li kkaratterizzat din is-sena, kienet tassew l-inċertezza. Inċertezza dwar saħħitna, dwar l-edukazzjoni ta’ wliedna, dwar il-ħajja soċjali tagħna, dwar ix-xogħol tagħna, dwar il-vaċċin, dwar il-varjanti eċċ. Aħna l-bnedmin qisu nippreferu ħafna iżjed li jkollna tweġibiet ċari għall-mistoqsijiet tagħna.

Illum qed jiġu ppreżentati lilna n-nisa li waqt il-ħajja pubblika tiegħu, imxew wara Ġesù u kienu jaqduh kif jistgħu. Dawn saħansitra baqgħu miegħu sa taħt is-salib – f’mument fejn ħdax mill-Appostli tiegħu lanqas biss kienu hemm! Tgħid dawn in-nisa kienu jafu d-dettalji kollha dwar fejn se twassalhom il-mixja wara Ġesù? Kienu jafu kemm kienu se jaraw meravilji? Bħal meta kien ifejjaq lin-nies jew iqajjem lin-nies mill-mewt? Kienu jafu kemm kienu se jkunu xhieda ta’ mumenti iebsa, bħal meta Ġesù kien ikollu xi jgħid mall-Fariżej u fuq kollox li l-Imgħallem tagħhom kien se jispiċċa msallab fuq Salib wara Passjoni tant ħarxa?

Wisq probabbli, dawn ma kinux jafu b’dak kollu li kienu se jgħaddu minnu u forsi aħjar hekk, għaliex kieku kienu jafu minn qabel, forsi ma kinux isibu l-kuraġġ biex jibqgħu mexjin u jħarsu ’l quddiem. Żgur li dan il-ħsieb hu familjari ma’ ħafna minna. Min jaf kemm-il darba ħarisna lura wara ġurnata, jew wara numru ta’ ġimgħat, jew wara xhur fejn irrealizzajna li wasalna fejn qatt ma konna naħsbu li kapaċi naslu. Għal xi wħud minna dawn il-mument setgħu kienu l-ewwel xhur ta’ ħajja ta’ wliedna, ikkaratterizzati minn iljieli bla rqad; għal xi wħud setgħu kienu ġimgħat jew xhur ta’ mard fil-familja; ġimgħat ta’ kwarantina fejn kull ġurnata tidher twila d-doppju; mumenti fejn il-bilanċ bejn ix-xogħol u l-familja deher li se jkun impossibbli jew mumenti oħra fejn kellna nlaħħqu max-xogħol, studju u t-tfal.

Fil-bidu tar-Randan aħna m’aħniex imsejħa biex nagħmlu mixja perfetta. Se jkun hemm ġranet fejn se nkunu aħna li qed insuqu l-ajruplan ta’ ħajjitna iżda se jkun hemm mumenti oħra fejn se nħossuna li dak li qed itajjar il-ġwienaħ tagħna hu l-auto-pilot. L-importanti hu li, sew f’mumenti faċli u sew f’mumenti inqas faċli li se ngħaddu minnhom matul dawn il-ġimgħat tar-Randan, nibqgħu mexjin u nibqgħu nħarsu ’l quddiem. Hawn nifakar fl-ewwel omelija li l-Papa Franġisku għamel bħala Papa fejn fiha qal dawn il-kliem: ‘ħajjitna hija mixja u meta nieqfu, hemm xi ħaġa ħażina’. Jalla bħan-nisa li mxew b’tant fedeltà wara Ġesù, sewwasew sa fuq il-Golgota aħna wkoll nimxu din il-mixja tar-Randan warajh u kif ukoll miegħu, pass wara pass.

Mużika ta’ Jacob Portelli

Matul din il-ġimgħa tistgħu wkoll titolbu l-Venerazzjoni tas-Salib flimkien bħala familja. Segwi kif hawnhekk.

Taħt is-salib kien hemm grupp żgħir ta’ nisa. Però dawn ma kienux ma’ Ġesu taħt is-salib biss. Dawn imxew il-passjoni kollha miegħu. Meta ħafna mid-dixxipli ta’ Ġesu beżgħu u ħarbu jiġru, dawn in-nisa b’ħafna kuraġġ baqgħu dejjem maġenb Ġesù. Dawn ma qagħdux jgħajtu, tafux! Ma qagħdux jiġġieldu. Iżda baqgħu mexjin maġenb Ġesù huwa u jġorr is-salib u jbati. Il-preżenza tagħhom kien ir-rigal tagħhom għal Ġesù.

Però dawn baqgħu ma’ Ġesu fil-passjoni tiegħu kollha għax kienu ilhom ħafna jafuh sew, u jimxu warajh u jħobbuh. Huma kienu esperjenzaw l-imħabba ta’ Ġesù għalihom u issa huma riedu jħobbuh lura billi jibqgħu miegħu sal-aħħar. Riedu juruh li jħobbuh ta’ veru billi jibqgħu ħdejh u jbatu miegħu. Huma batew ħafna wkoll għax li tara lil xi ħadd li tħobb qiegħed ibati mhix ħaga faċli. Jien naħseb li huma riedu jgħallmuni li anki jekk ħafna drabi ma jidher li nistgħu nagħmlu xejn, fil-fatt nistgħu nagħmlu ħafna billi nkunu viċin ta’ min qiegħed ibati. Bħal dawn in-nisa aħna wkoll imsejħin biex l-imħabba li Alla juri magħna, issa aħna nuruha ma’ min qiegħed ibati.

Dawn in-nisa baqgħu ma’ Ġesu fil-passjoni tiegħu kollha għax kienu ilhom ħafna jafuh sew, u jimxu warajh u jħobbuh matul ħajtu

Waqt li npinġu t-tpinġija ta’ dawn in-nisa li kienu taħt is-salib, niftakru u nitolbu f’dawk kollha li qegħdin ibatu. Niftakru u nitolbu wkoll għal dawk li mhux kuraġġużi biżżejjed biex ikunu ħdejn min qed ibati: niftakru fihom u nitolbu għalihom biex huma wkoll jitgħallmu jgħixu fuq l-eżempju ta’ dawn in-nisa taħt is-salib.

Dawn huma l-ewwel karattri mill-Passjoni ta’ Ġesù li se nkunu qed niddiskutu fi żmien ir-Randan. Żur is-sit tagħna l-ġimgħa d-dieħla biex titgħallem fuq karattri oħra, u sal-aħħar tar-Randan ikollok ix-xena kollha tal-Passjoni ta’ Ġesù!

In-nisa taħt is-salibNiżżel

L-Ewwel-Ġimgħa-tar-RandanNiżżel