Jien nemmen!

It-Tieni Ħadd tal-Għid

Illum nisimgħu silta mill-Evanġelju skont San Ġwann. Dan l-istess qari, nisimgħuh kull tieni Ħadd tal-Għid u jenfasizza l-importanza tad-dehriet lid-dixxipli minn Kristu Rxoxt. Dan il-qari joffrielna sfida biex nimxu fuq dak li ngħidu li nemmnu. Iċ-ċentru tal-Evanġelju ta’ San Ġwann, huwa ‘t-twemmin’ tagħna li Ġesù huwa Bin Alla. Fil-fatt, il-vers li nsibu fi Ġwanni 3:16, “Għax Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem,” huwa sintesi tal-Evanġelju kollu. Xi wħud jistgħu ma jemmnux f’Alla, iżda Alla jemmen fihom. In-nuqqas ta’ twemmin huwa komuni fil-ġurnata tal-lum. Dan huwa differenti milli wieħed ikollu d-dubji. Aħna għandna moħħ biex naħsbu u nirraġunaw u nevalwaw il-fidi tagħna. Aħna għandna sfida quddiemna, li nwieġbu għas-sejħa ta’ Ġesù. Dan nagħmluh meta nemmnu li Ġesù huwa s-Salvatur tagħna. Dan hu dak li Ġesù jgħallem lid-dixxipli fl-Evanġelju tal-lum.

Wara li Ġesù kien imsallab u miet fuq is-salib, id-dixxipli beżgħu li huma wkoll jinqabdu u jingħataw il-mewt. Għalhekk issakkru ġewwa. Minkejja dan, Ġesù jidher fosthom. Ġesù ma kkritikahomx, iżda minflok, tahom ir-rigal tal-paċi u d-don tal-Ispirtu s-Santu. Tahom ukoll identità u missjoni ġdida. Hu ried li huma jkomplu dak li kien beda hu. Din il-kontinwazzjoni tal-missjoni ta’ Ġesù, hija parti essenzjali tal-Knisja. Papa Franġisku l-ħin kollu jfakkar li aħna dixxipli missjunarji, li naqsmu l-Evanġelju ma’ oħrajn b’umiltà u rispett. Aħseb ftit dwar dan u ara intix dixxiplu missjunarju. Jien għandi l-Ispirtu ta’ Alla ġewwa fija? Jekk vera nemmnu, l-Ispirtu s-Santu jkompli jqawwilna l-fidi.

Tumas ma kienx mad-dixxipli l-ewwel darba li dehrilhom Ġesù. Għalhekk tilef din il-laqgħa mal-Mulej. Sabha diffiċli li jemmen dak li qalulu d-dixxipli. Hu ddubita mix-xhieda tagħhom. Meta Ġesù deher lil Tumas, id-dubju tiegħu inbidel fi twemmin. Lil Tumas, Ġesù qallu, “tkunx bniedem bla fidi, iżda emmen.” Tumas wieġbu: “Mulej tiegħi u Alla tiegħi!” Aħna wkoll imsejħa biex nemmnu mingħajr ma naraw. Il-fidi tagħna tkun ittestjata kemm il-darba, speċjalment fi żmien diffiċli jew ta’ mard. Nistgħu ukoll niddubitaw mill-imħabba ta’ Alla, jew mill-fatt li għandu pjan għalina u li jieħu ħsiebna. Bħal Tumas, għandna bżonn lil Ġesù biex imexxina mid-dubji, għall-fidi. Għandna bżonn il-messaġġ tal-Evanġelju biex jidħol fina u jbiddilna. Permezz tad-don tal-Ispirtu s-Santu li rċevejna fil-magħmudija, aħna fost il-ħenjin li nemmnu għalkemm ma narawx. Illum huwa l-Ħadd tal-Ħniena Divina. Biex tkun taf aktar dwar din il-festa, ara hawn taħt. Swor Fawstina ddikjarat, “Ġesù, jiena nafda fih.” Aħna permezz tal-magħmudija msejjħa wkoll biex nafdaw (nemmnu) u nżommu mal-verità li Ġesù qam mill-mewt u huwa ħaj.  

Ħniena DivinaNiżżel

Qari mill-Evanġelju skont San Ġwann (Ġwann 20: 19-31) 

Dakinhar filgħaxija, fl-ewwel jum tal-ġimgħa, meta d-dixxipli kienu flimkien imbeżżgħa mil-Lhud, bil-bibien magħluqa, ġie Ġesù u qagħad f’nofshom; u qalilhom: “Is-sliem għalikom!”. Kif qal hekk, uriehom idejh u ġenbu. Id-dixxipli ferħu meta raw lill-Mulej. Imbagħad Ġesù tenna jgħidilhom: “Is-sliem għalikom! Kif il-Missier bagħat lili, hekk jien nibgħat lilkom”. Kif qal hekk, nefaħ fuqhom u qalilhom: “Ħudu l-Ispirtu s-Santu. Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma”.

Tumas, wieħed mit-Tnax, jgħidulu t-Tewmi, ma kienx magħhom meta ġie Ġesù. Għalhekk id-dixxipli l-oħra qalulu: “Rajna lill-Mulej”. Iżda hu qalilhom: “Jekk ma narax f’idejh il-marka tal-imsiemer u ma nqigħedx sebgħi fuq il-marka tal-imsiemer u idi fuq ġenbu, jien ma nemminx”. Tmint ijiem wara, id-dixxipli reġgħu kienu ġewwa, u Tumas magħhom. Il-bibien kienu magħluqa, imma Ġesù daħal, qagħad f’nofshom, u qalilhom: “Is-sliem għalikom!”.

Imbagħad qal lil Tumas: “Ġib sebgħek hawn u ara jdejja, u ressaq idek u qegħedha fuq ġenbi; tkunx bniedem bla fidi, iżda emmen”. Wieġeb Tumas u qallu: “Mulej tiegħi u Alla tiegħi!” Qallu Ġesù: “Emmint għax rajtni! Henjin dawk li ma rawx u emmnu”.

Hemm ħafna sinjali oħra li Ġesù għamel quddiem id-dixxipli tiegħu u li mhumiex imniżżla f’dan il-ktieb. Iżda dawn inkitbu sabiex intom temmnu li Ġesù hu l-Messija l-Iben ta’ Alla, u biex bit-twemmin tagħkom ikollkom il-ħajja f’ismu.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Tumas emmen għax ra lil Ġesù. Kien hemm trasformazzjoni, mid-dubju għat-twemmin. Il-fidi tiegħek hija trasformattiva? Dejjem tistqarr lil Ġesù bħala Sid tiegħek?
  4. X’inhuma l-veritajiet li għandi nħabbar fil-familja, fuq il-post tax-xogħol u fil-komunità? Il-verità tal-Evanġelju hi li Alla hu mħabba u li Alla jħobbok. Agħmel din it-talba tiegħek ta’ kuljum, “Mulej, jien naf li tħobbni u li inti mitt għalija. Agħtini għarfien aktar profond u fehim tal-ħniena divina tiegħek. Ammen.” 
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (20: 1-31)
    ii. Xemgħa
    iii. Il-mejda fejn hemm il-Bibbja, miksija bi drapp abjad
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum, ser nisimgħu, li wara, li Ġesù qam mill-mewt, huwa deher lid-dixxipli li kienu mbeżża’ u msakkrin ġo kamra. Kif Ġesù daħal ħdejhom, qalilhom, “Is-sliem għalikom.” Meta raw lil Ġesù, id-dixxipli kienu ferħanin ħafna.

  • Meta mmorru l-knisja u niċċelebraw il-quddiesa, niltaqgħu ma’ Ġesù bl-istess mod li ltaqgħu miegħu d-dixxipli fl-Evanġelju tal-lum
  • Printout tal-knisja
  • Kartonċina
  • Gloj/imqass
  • Lapes / kuluri
PrintoutNiżżel

Il-Ħadd hija l-ġurnata meta għandna mmorru l-knisja, flimkien mal-familja tagħna, biex niċċelebraw il-quddies. Jista’ jkun li mhux dejjem ikollna aptit. Forsi ma jkollokx aptit tqum mis-sodda, għax tkun għajjien jew tkun tixtieq tara t-television, jew tilgħab fuq il-kompjuter jew tilgħab barra bir-rota. Madanakollu hemm ħafna raġunijiet għalfejn m’għandekx titlef li tmur il-knisja. Tista’ taħseb x’jistgħu ikunu dawn ir-raġunijiet? Fil-quddiesa nisimgħu il-qari mill-Bibbja, inkantaw u nfaħħru lil Alla, nitolbu għalina u għall-oħrajn, ngħidu lil Alla li jiddispjaċina ta’ dak li għamilna ħażin matul il-ġimgħa li tkun għaddiet. Niltaqgħu ukoll mal-ħbieb tagħna u mal-bqija tal-komunità tal-parroċċa, niltaqgħu mas-saċerdot u mal-katekisti tagħna. Tafu x’inhi l-aktar raġuni għalfejn m’għandniex nitilfu l-quddiesa tal-Ħadd? Fil-quddiesa, aħna nirċievu xi ħaġa speċjali ħafna mingħand Alla. Fil-quddiesa aħna niltaqgħu ma’ Ġesù, u meta nibdew nitqarbnu, se nkunu nistgħu nirċievu aħna wkoll dan ir-rigal ta’ Ġesù. Meta nitqarbnu inkunu qegħdin niltaqgħu ma’ Ġesù. Jekk ma mmorrux il-knisja nhar ta’ Ħadd, se nkunu qegħdin nitilfu l-istess ħaġa li tilef Tumas. Ma niltaqgħux ma’ Ġesù, l-istess mod li ma ltaqax miegħu Tumas.

Ġimgħa wara li Ġesù miet, id-dixxipli kienu flimkien imsakkrin ġo kamra. Huma kienu qed jibżgħu li jkunu arrestati huma wkoll. F’daqqa waħda, Ġesù deher ħdejhom u qalilhom, “is-sliem għalikom.” Huma kienu ferħanin ħafna li raw lil Ġesù. Wieħed mid-dixxipli, Tumas, ma kienx magħhom. Għalhekk kif rawh, qalulu x’kien ġara. Iżda Tumas ma emminx li kienu raw lil Ġesù, u qalilhom, “Jekk ma narax f’idejh il-marka tal-imsiemer u ma nqigħedx sebgħi fuq il-marka tal-imsiemer u idi fuq ġenbu, jien ma nemminx”.

Ġimgħa wara, id-dixxipli, reġgħu kienu fil-kamra, u Tumas kien magħhom, u reġa’ ġara l-istess ħaġa. Ġesù deher ħdejhom, għalkemm kullimkien kien imsakkar. Kif Ġesù ra lil Tumas, qallu, “Ġib sebgħek hawn u ara jdejja, u ressaq idek u qegħedha fuq ġenbi; tkunx bniedem bla fidi, iżda emmen”. Tumas niżel għarkobtejh u qal, “Mulej tiegħi u Alla tiegħi!”

Qabel ma Ġesù tela’ s-sema ħdejn Alla l-Missier, lid-dixxipli qalilhom xi ħaġa importanti ħafna. Hu qalilhom li meta tnejn jew tlieta jkunu miġbura f’ismu, hu jkun hemm ukoll. Meta nhar ta’ Ħadd (jew fi ġranet oħra) immorru għall-quddiesa u nfaħħru u nqimu lil Ġesù, inkunu qegħdin niltaqgħu miegħu kif għamlu d-dixxipli fl-Evanġelju tal-lum. Għalhekk, meta ma mmorrux għall-quddies, nitilfu dak li tilef Tumas. Hu kien tilef iċ-ċans li jkun ma’ Ġesù.

Ejjew niċċelebraw li mmorru għall-quddies tal-Ħadd, billi nagħmlu l-attività tal-lum. Ipprintjaw il-knisja, agħtuha l-kulur u aqtgħuha. Aqtgħu l-bieb minn fuq u min-nofs, biex il-bieb ikun jista’ jinfetaħ u jingħalaq. Waħħal l-istampa tal-knisja fuq kartonċina u ħalli l-bieb miftuħ. Pinġi n-nies ġewwa, jew inkella wċuħ daħkana, li jirrappreżentaw lilna meta mmorru għall-quddies. Waqt li qegħdin tagħmlu din l-attività, isimgħu, Every Move I Make.

Inroddu s-salib.

Mulej Alla, għini biex ma nkunx bħal Tumas u nitlef iċ-ċans li nkun ma’ Ġesù, meta dehrilhom l-ewwel darba wara li qam mill-mewt. Jiena naf li meta mmur għall-quddies u nitqarben, inkun qed niltaqa’ ma’ Ġesù. Għini biex nilqgħu ġo qalbi. Ammen.
Illum il-Knisja tiċċelebra l-festa tal-Ħniena Divina. Din il-festa tfakkar meta Ġesù deher lil Santa Fawstina, soru umli Pollakka. F’dawn id-dehriet, Ġesù talab biex din il-festa tal-Ħniena Divina tkun iċċelebrata u b’hekk in-nies isibu l-paċi fil-ħniena bla tarf tal-imħabba ta’ Alla. Tistgħu taqraw aktar dwar Santa Fawstina, hawnhekk.

Il-ġimgħa l-oħra ċċelebrajna l-qawmien ta’ Ġesù mill-mewt. Illum nisimgħu x’ġara l-ewwel darba li deher lid-dixxipli. Huma kienu flimkien, imsakkrin ġo kamra għaliex kienu qed jibżgħu li jiġu arrestati. Tumas ma kienx magħhom u tilef din il-ġrajja speċjali.

  • Ġesù qam mill-mewt, hu d-dawl tad-dinja
  • Aħna nsejħa biex nemmnu f’Ġesù u nwasslu d-dawl ta’ Ġesù lill-oħrajn
  • Printout tal-attività tal-lum – stampa ta’ xemgħa
  • Lapes/kuluri
stampa ta’ xemgħaNiżżel

Illum huwa t-tieni Ħadd ta’ Żmien il-Għid. L-Għid mhux iċċelebrat f’jum wieħed, iżda żmien il-Għid huwa twil 50 ġurnata, sakemm niċċelebraw Pentekoste, meta l-Ispirtu s-Santu jinżel fuq l-appostli.

Il-Blandun, jinxtgħel matul iż-żmien tal-Għid, kif ukoll fil-magħmudijiet u waqt il-funerali. Din ix-xemgħa tirrappreżenta l-qawmien ta’ Ġesù.

L-istess kif xemgħa mixgħula ddawwal kamra mudlama, id-dawl ta’ Ġesù, huwa preżenti fid-dinja kollha. Aħna ma rajniex lil Ġesù mqajjem mill-mewt. Madanakollu aħna nemmnu li hu qam mill-mewt u nemmnu wkoll li l-Ispirtu s-Santu jgħix fostna u għalhekk nemmnu wkoll li d-dawl ta’ Kristu huwa dejjem magħna.

Il-messaġġ ewlieni tal-qari kollu tal-lum, huwa li Ġesù qam mill-mewt u t-twemmin tagħna fih, ibiddlilna ħajjitna u jagħtina spirtu ta’ ferħ. L-ewwel qari jiddeskrivi l-ewwel appostli, li issa ma kienux aktar imbezza’ u l-mod kif bidlu l-ħajja tan-nies bil-fejqan u bit-tkeċċija tax-xjaten. Kif għamlu dan kollu? Fl-Evanġelju naqraw, li dan għamluh għax huma raw lil Kristu Rxoxt u hu nefaħ fuqhom u tahom il-qawwa tal-Ispirtu s-Santu. L-Evanġelju jiddeskrivi kif wara tmint ijiem mill-qawmien tiegħu, Ġesù deher lid-dixxipli għat-tieni darba. Huma reġgħu kienu msakkrin f’kamra u din id-darba, Tumas kien magħhom. Tumas ma kienx magħhom, l-ewwel darba li dehrilhom Ġesù u ma kienx emminhom li Ġesù kien daħal ħdejhom. Hu kien insista li biex jemmen, ried imiss il-pjagi tiegħu. Ġesù stieden lil Tumas biex imiss il-pjagi ta’ jdejh u ġenbu. Tumas għaraf li kien Ġesù u emmen. Aħna ma rajniehx lil Kristu Rxoxt, iżda nemmnu li Ġesù qam mill-mewt u li l-Ispirtu s-Santu jgħix fostna. Nemmnu li d-dawl ta’ Kristu huwa preżenti fid-dinja kollha u li aħna msejħin biex inwasslu d-dawl tiegħu għand l-oħrajn.

Biex niftakru li Ġesù hu d-dawl li jmexxina kull ħin, agħmlu printout tax-xemgħa. Fuq ix-xemgħa, iktbu ĠESÙ HU D-DAWL TAD-DINJA. Madwar ix-xemgħa iktbu kif, matul din il-ġimgħa, tistgħu twasslu d-dawl ta’ Ġesù lill-oħrajn. Ftakru li intom ukoll irċevejtu d-don tal-Ispirtu s-Santu fil-magħmudija u rċevejtu wkoll il-paċi, l-ferħ, l-imħabba, il-paċenzja u l-ħniena. Dawn huma l-frott tad-don tal-Ispirtu s-Santu. Dan għandu jgħinkom f’dak li ser tiktbu. Waqt li qegħdin tagħmlu din l-attivita, isimgħu, Light of the World.

Inroddu s-salib.

Alla tad-dawl, għinna biex ngħixu b’mod li nuru li aħna nemmnu li Ġesù qam mill-mewt. Tħalliniex niddubitaw bħal Tumas. Għinna nħallu d-dawl ta’ Ġesù jmexxina u għinna nwasslu dan id-dawl għand oħrajn. Dan nitolbuh, f’isem Ġesù Rxoxt. Ammen. 

Illum il-Knisja tiċċelebra l-festa tal-Ħniena Divina. Din il-festa tfakkar meta Ġesù deher lil Santa Fawstina, soru umli Pollakka. F’dawn id-dehriet, Ġesù talab biex din il-festa tal-Ħniena Divina tkun iċċelebrata u b’hekk in-nies isibu l-paċi fil-ħniena bla tarf tal-imħabba ta’ Alla. Tistgħu taqraw aktar dwar Santa Fawstina, hawnhekk.

Fulejtt Għid-02Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.