Fl-Evanġelju tal-lum, raġel jersaq lejn Ġesù u jistaqsih x’kellu jagħmel biex jikseb il-ħajja ta’ dejjem. Ġesù jgħidlu li kellu jobdi l-kmandamenti, u r-raġel iwieġeb li dan kien diġà jagħmlu. Għalhekk Ġesù jgħidlu li ħaġa waħda kien jonqsu, jagħti l-ġid li kellu lill-foqra u jimxi warajh. Din kienet wisq għal dan ir-raġel li spiċċa telaq minn quddiem Ġesù mdejjaq.
Dan l-Evanġelju jista’ jagħmilna skomdi dwar il-flus u l-ġid li għandna. Fl-istess ħin tajjeb li nieħdu din l-opportunità biex naħsbu dwar kif qegħdin nużaw dan kollu. Aħna qed ngħinu lill-oħrajn? Kemm huwa important il-ġid, għalina? Nirriflettu, kemm dwar dak li għandna, kif ukoll ix-xewqa li nakkumulaw ta’ aktar u aktar flus. Ġesù ma jikkundanax il-fatt li wieħed hu sinjur, jew li wieħed għandu ġid materjali. Fil-fatt, Ġesù, “xeħet fuqu ħarsa ta’ mħabba.” Ġesù jwissi dwar il-mod li aħna nużaw dan il-ġid, u l-importanza li nagħtuh. Dan il-ġid jista’ jġib miegħu l-ferħ, iżda meta l-akkwist tal-flus isir waħda mill-aktar affarijiet importanti fil-ħajja tagħna, dan ser itellifna mill-ferħ vera. F’dan il-każ huwa l-ġid li jikkontrolla lilna u mhux aħna lilu! Il-ferħ li jibqa’ nsibuh biss fl-imħabba ta’ Alla u fil-qadi lill-oħrajn. Fl-aħħar mill-aħħar, meta naslu quddiem il-ħallieq ma aħna se nuruh l-ebda ktieb tal-bank u lanqas il-ġid li akkwistajna, nuru biss dak li għamilna mal-oħrajn u fejn wasalna fir-relazzjoni tagħna ma’ Alla.
Ġesù jaf li l-ġibda tal-flus u l-akkwist tal-ġid materjali hija kbira. Għalhekk jgħid li huwa “Eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla.” Din il-ġibda tista’ ttellef lil dak li jkun mill-iskop vera tal-ħajja: li jgħix bħala iben Alla.
Għalkemm dan l-Evanġelju jirreferi għall-ġid materjali, jista’ wkoll jgħinna nirriflettu dwar dak li jista’ jiġi bejnna u bejn Alla. L-ewwel kmandament jgħid hekk, ‘jiena Alla sidek, ma jkollokx Alla ieħor għajri.’ Qalbna ma xiex hija l-aktar marbuta? Ġesù mhux qed jistenna li nagħtu dak kollu li għandna, iżda jrid li nħobbu lil Alla u lill-proxxmu tagħna u nqaċċtu minn ħajjitna dak li qiegħed iżommna lura milli nagħmlu dan.
Qari mill-Evanġelju skont San Mark (Mk 10, 17-30)
F’dak iż-żmien, Ġesù kien se jaqbad it-triq lejn Ġerusalemm, meta mar fuqu wieħed jgħaġġel, niżel għarkupptejh quddiemu u qallu: “Mgħallem tajjeb, x’għandi nagħmel biex nikseb il-ħajja ta’ dejjem?”
Qallu Ġesù: “Għaliex qiegħed issejjaħli tajjeb? Ħadd mhu tajjeb ħlief Alla biss. Inti l-kmandamenti tafhom: la toqtolx, la tiżnix, la tisraqx, la tixhidx fil-falz, la tiħux bil-qerq dak li hu ta’ ħaddieħor; weġġaħ lil missierek u ’l ommok”.
U dak wieġbu u qallu: “Mgħallem, jiena dan kollu ili nħarsu minn żgħożiti”. Imbagħad Ġesù xeħet fuqu ħarsa ta’ mħabba u qallu: “Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; imbagħad ejja u imxi warajja”. Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.
Ġesù mbagħad ħares ħarsa madwaru u qal lid-dixxipli tiegħu: “Kemm hi iebsa għall-għonja li jidħlu fis-Saltna ta’ Alla!” Id-dixxipli stagħġbu għal din il-kelma, imma Ġesù raġa’ qalilhom: “Kemm hi iebsa, uliedi, li wieħed jidħol fis-Saltna ta’ Alla! Eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla”. Huma stagħġbu wisq aktar, u bdew jgħidu wieħed lill-ieħor: “Mela min jista’ jsalva?” Ġesù ħares lejhom u qalilhom: “Għall-bnedmin dan ma jistax ikun, imma għal Alla iva; għax għal Alla kollox jista’ jkun”.
Qabeż Pietru u qallu: “Tajjeb! Aħna ħallejna kollox u ġejna warajk”. Qallu Ġesù: “Tassew ngħidilkom, li fost dawk kollha li minħabba fija u l-Evanġelju jħallu lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, ma hemm ħadd fosthom li minn issa, f’din id-dinja stess, ma jirċevix, għal mitt darba iktar, djar, aħwa, subien u bniet, ommijiet, ulied u għelieqi flimkien ma’ persekuzzjonijiet, u l-ħajja ta’ dejjem fiż-żmien li ġej”.
Il-Kelma tal-Mulej
Tifħir lilek Kristu
Istruzzjonijiet u għan
- Aqra sew l-Evanġelju biex issir aktar familjari miegħu.
- Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
- X’importanza tagħti lill-flus u l-ġid? Taħdem biex tgħix, jew tgħix biex taħdem u biex ikollok aktar u aktar ġid?
- Jekk il-flus u l-ġid ma humiex l-alla tiegħek, hemm xi ħaġa oħra li qed ittelfek mir-relazzjoni tiegħek ma’ Alla? Ftakar, li bħalma Ġesù ħares lejn dak ir-raġel b’imħabba, l-istess qiegħed jagħmel miegħek. Ġesù ma jridx jikkundana, iżda jgħin. Dak li waħdek tarah impossibli, “għal Alla kollox jista’ jkun,” hu jista’ jgħinnek tinbidel u tqaċċat kull rabta li għandek u li qegħda tbedek minnu.
- Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
i. Bibbja bil-qari minn San Mark (10, 17-30)
ii. Xemgħa
iii. Il-mejda fejn hemm il-Bibbja, miksija bi drapp aħdar
iv. Computer/laptop bil-qari u clips - Mur fil-parti tat-tfal skont l-etajiet u għamilha flimkien magħhom
- Addatta din il-parti skont kif hemm bżonn, tiddejjaqx tkun kreattiv
- Mur fil-parti Itlob id-dar għall-mument ta’ talb flimkien bħala familja
Illum naqraw li Ġesù ltaqa’ ma’ raġel sinjur ħafna. Ejjew naraw x’ser jistaqsi dan ir-raġel u kif se jwieġeb Ġesù.
- Ġesù jrid li aħna nkunu ħbieb kbar tiegħu
- Mhux dejjem faċli li nkunu ħbieb kbar ta’ Ġesù
- Ġesù jixtieq li naqsmu dak li għandna mal-oħrajn
- Pakketti tal-ħelu, l-aktar favoriti tat-tfal
- Envelop
- Karta u lapes
Nota lill-ġenituri: qabel ma tibdew din l-attività mat-tfal, ippreparaw in-nota li titpoġġa fl-envelop. Fin-nota iktbu post fejn it-tfal jistgħu jsibu l-paketti tal-ħelu, ħlief wieħed għax dan jintuża fil-bidu.
Tfal hawnhekk għandkom pakkett tal-ħelu li jogħġobkom ħafna. (ġenituri, agħtuhom il-pakkett tal-ħelu li warrabtu minn mal-oħrajn).
Hawnhekk għandi dan l-envelop. Jien nista’ nagħtikom dan l-envelop u dak li hemm fih, jekk intom tagħtuni l-pakkett tal-ħelu. Ma jistax ikollolkom it-tnejn, jew tibqgħu żżommu l-ħelu, jew l-envelop.
Jekk ikunu lesti li jpartu, kompli hekk: Bravi, din kienet deċiżjoni tajba, għax fl-envelop hemm miktub fejn intom se ssibu mhux pakkett wieħed tal-ħelu, imma aktar!
Jekk ikunu jridu jibqgħu iżommu l-pakkett tal-ħelu, kompli hekk: Ħasra li ma ridtux tagħtuhuli, għax kieku minflok kien se jkollkom aktar minn pakkett wieħed tal-ħelu!
Ir-raġel tal-Evanġelju tal-lum, ġralu xi ħaġa bħalkom. Dan ir-raġel, mhux pakkett tal-ħelu kellu, imma kien sinjur ħafna. Ġesù mhux aktar ħelu ried jagħtih imma xi ħaġa ħafna aħjar. Dan ir-raġel iżda ma riedx li jagħti l-ġid. Il-flus li kellu kienu wisq għal qalbu. Madanakollu fl-istess ħin, ried ukoll li jkun ħabib ta’ Ġesù. Ġesù kien jaf li dawn il-flus kienu wisq importanti għal dan ir-raġel u ma kienux qegħdin iħalluh ikun ħabib tiegħu. Ir-raġel għażel il-flus u mhux li jkun ħabib kbir ma’ Ġesù.
Ġesù kien jaf li din ma kinitx faċli għal dan ir-raġel. Minkejja dan kien jaf ukoll li kieku ried vera jkun ħabib tiegħu, Alla kien jagħtih il-qawwa biex jirnexxilu jagħti l-flus tiegħu lill-fqar. L-istess bħalna, ma kinitx faċli li nagħtu l-pakkett tal-ħelu mingħajr ma nafu eżatt x’kien hemm fl-envelop! Jekk irnexxielkom tagħtu l-pakkett tal-ħelu u tieħdu l-envelop, għamiltu hekk, għax intom tafu li l-mama u l-papa jħobbukom ħafna u dak li jagħtukom huwa biex intom tkunu ferħana. Intom tafdawhom lill-ġenituri tagħkom. Dan ir-raġel kien jagħmel l-istess kieku kien jafda ħafna lil Alla u kieku kien jaf li meta jagħti l-ġid tiegħu, Alla se jagħtih xi ħaġa ħafna aħjar.
Ġesù, illum jgħidilna li għalkemm ma jridx li aħna ma nżommu xejn għalina u nagħtu kollox lill-oħrajn, hu jixtieq li aħna naqsmu dak li għandna. Tafu li intom tistgħu tagħmlu dan mhux biss meta tagħtu xi flus jew xi toys lil min hu fil-bżonn? Jekk tafu tpinġu, tistgħu tagħmlu cards u tagħtuhom lil xi ħadd li tafu li ħadd ma jibgħatlu card fil-birthday u fil-Milied; jekk tafu li n-nanniet jieħdu gost ħafna meta ċċemplulhom u toqgħodu titkellmu magħhom, minflok taraw xi programm fuq it-television jew tilgħabu fuq il-computer, ċemplu lin-nanniet; jew għinu lill-mama u lill-papa mingħajr ma jistaqsukom. Tistgħu taħsbu f’xi affarijiet oħra li tistgħu tagħmlu?
Dalwaqt jasal il-Milied. Intom tieħdu gost meta tirċievu r-rigali? Hawn Malta hawn tfal li ma jaqilgħux rigali. Fi żmien il-Milied ikun hawn għaqdiet li jiġbru toys u flus għal dawn it-tfal. Ftiehem mal-ġenituri tiegħek u għamel promise magħhom li fi żmien il-Milied tagħti wieħed mir-rigali li tkun qlajt lil dawn it-tfal. Ġesù jaf li din mhux ser tkun faċli għalik, imma Ġesù, illum qalilna li meta nitolbu, Alla jagħtina l-kuraġġ biex nagħmlu dak li nsibu diffiċli. Għalhekk, mil-lum ibda itlob lil Alla biex jagħtik il-kuraġġ li taqsam dak li għandek mal-oħrajn.
Inroddu s-salib.
Grazzi Ġesù li inti tgħallimna kemm iħobbna Alla u kemm jgħinna biex nagħmlu affarijiet tajba anke meta dan ikun diffiċli għalina. Grazzi ta’ dak kollu li għandna, agħtina l-kuraġġ biex inħobbu lill-oħrajn u naqsmu magħhom l-affarijiet li għandna.
Biex infaħħru lil Alla, nisimgħu u nkantaw, My God is so big.
Introduzzjoni
Fl-Evanġelju tal-lum, raġel jersaq lejn Ġesù u jistaqsih x’kellu jagħmel biex jikseb il-ħajja ta’ dejjem.
- Aħna dejjem għandna nagħmlu dak li jogħġob lil Alla
- Kaxxa tal-kartun
- Wrapping paper
- Dekorazzjonijiet għall-kaxxa
- Karti kkuluriti
- Lapes
Meta r-raġel staqsa lil Ġesù x’kellu jagħmel biex ikollu l-ħajja ta’ dejjem, Ġesù x’wieġeb? (li dan ir-raġel kellu jobdi l-kmandamenti)
Ir-raġel wieġeb u qallu li hu kien diġà jagħmel dan. Ġesù x’jgħidlu? Jgħidlu li huwa qiegħed jagħmel sewwa u li żgur se jkollu l-ħajja ta’ dejjem, jew jistaqsih biex jagħmel xi ħaġa oħra wkoll? (Ġesù jitlob lil dan ir-raġel biex ibiegħ il-ġid li kellu u l-flus jagħtihom lill-fqar)
X’għamel dan ir-raġel? Għamel dak li qallu Ġesù? (le)
Għalfejn taħsbu li dan ir-raġel ma obdiex lil Ġesù? (ma ridtx jagħti l-ġid u flus li kellu lill-oħrajn)
Kif kien qiegħed iħossu dan ir-raġel meta telaq minn ħdejn Ġesù? (imdejjaq)
ll-lum Ġesù jgħallimna li jista’ jkun li l-ġid u flus li jkollna, jkunu aktar importanti għalina, milli nħobbu lil Alla u nagħmlu dak li jixtieq hu. Aħsbu ftit dwar kif tqattgħu l-ġurnata tagħkom. L-ewwel iddeskrivu ġurnata ta’ matul il-ġimgħa … ibdew minn x’ħin tqumu, sakemm terġgħu tidħlu fis-sodda (għinu lit-tfal jiddeskrivu ġurnata tipika tagħhom)
Issa ddeskrivu kif ġeneralment tqattgħu l-ħin mis-Sibt filgħaxija sal-Ħadd meta tmorru torqdu.
Kien hemm ħin matul dawn il-ġranet tagħkom fejn mortu l-quddies? Kellkom ħin matul il-ġurnata biex titolbu u taqraw xi ġrajja mill-Bibbja?
Kien hemm ħin li mortu għal-laqgħa ta’ katekeżi?
Kien hemm ħin li għentu fid-dar u għentu lill-ħaddieħor ukoll?
Jew il-ħin tagħkom tużawh biex tmorru l-iskola, tmorru għall-football, kant, żfin u affarijiet oħra bħal dawn, tagħmlu l-homework, u tilgħabu?
Dawn l-attivitajiet huma kollha tajbin. Imma Ġesù, illum qiegħed jgħidilna li jista’ jkun li aħna qed nagħtuhom importanza żejda. Inħossu li huwa aktar importanti għalina li mmorru għall-football jew nitgħallmu niżfnu, milli mmorru għal-laqgħa ta’ katekeżi, inkella li l-Ħadd noħorġu bħala familja u ma nsibux il-ħin biex imorru għall-quddies. Dawn mhux dejjem ikunu għażliet faċli u Ġesù jafu dan. Għalhekk jgħid li “eħfef li ġemel jgħaddi minn għajn ta’ labra”! Ġesù jaf li dawn l-attivitajiet iħajruna ħafna u diffiċli li ngħidu le għalihom, anke jekk dawn qed jeħdulna mill-ħin li aħna nsiru nafu lil Ġesù aktar u lanqas ma jħallulna ħin biex ngħinu lill-oħrajn.
Meta l-ġenituri tagħkom jaqilgħu l-paga għax-xogħol li jagħmlu, jinvestu parti mill-flus biex wara xi żmien, ikollhom aktar flus milli jkunu nvestew. Meta aħna nqassmu l-ħin tagħna b’tali mod fejn Alla nagħtuh ħafna importanza, allura matul il-ġurnata, nitolbu, imorru l-quddies, imorru għal-laqgħat ta’ katekeżi, naqraw mill-Bibbja, ngħinu lill-oħrajn, nagħtu flus lill-foqra, inkunu qegħdin ninvestu biex aktar ’il quddiem ikollna l-ħajja ta’ dejjem.
Qatt rajtu xi film, fejn ipoġġu oġġetti prezzjużi ġo kaxxa sabiħa … ġo treasure chest (kaxxa tat-teżor)? Dawk l-affarijiet tajba li nagħmlu, huma bħal dawn l-oġġetti prezzjużi, u Alla jerfgħahom kollha ġol kaxxa tat-teżor tagħna, biex xi darba dawn insarfuhom fil-ħajja ta’ dejjem. Fl-attività tal-lum ser nagħmlu din il-kaxxa tat-teżor. Iksu l-kaxxa tal-kartun u żejnuha biex tiġi sabiħa u tixbah lill-kaxxa tat-teżor. Aħsbu ftit dwar dawk l-affarijiet tajba li għamiltu matul din il-ġimgħa u bihom tajtu pjaċir lil Alla. Iktbu dawn l-affarijiet fuq il-biċċiet tal-karti u poġġuhom fil-kaxxa. Din il-kaxxa ħalluha fil-kamra tagħkom. Kull ġimgħa, jew aktar ta’ spiss, aħsbu dwar dak li għamiltu u li bih tkunu għoġobtu u obdejtu lil Alla. Iktbuhom fuq karti separati u poġġuhom fil-kaxxa, ftit ftit tibdew timlew din il-kaxxa u tkunu qegħdin tagħmlu l-maqlub ta’ dak li għamel ir-raġel li qrajna dwaru fl-Evanġelju tal-lum. Dak ir-raġel ma riedx jagħti dak li kellu, imma intom meta tkunu qegħdin tagħtu mill-ħin tagħkom biex issiru tafu lil Anna u anke tagħtu minn dak li għandkom għal Alla u għall-oħrajn tkunu qegħdin tobdu lil Ġesù.
Waqt li qegħdin tagħmlu din l-attività, isimgħu, Treasure quest.
Inroddu s-salib.
L-4 ta’ Ottubru hija l-festa ta’ San Franġisk t’Assisi. Dan il-qaddis għandu talba li fiha jurina dak li nistgħu nagħmlu biex niksbu l-ħajja ta’ dejjem. Dan kollu jirnexxielna nagħmluh bl-għajnuna ta’ Alla, għax “għal Alla kollox jista’ jkun.”
Tista’ ssib it-talba ta’ San Franġisk, hawnhekk.
Dalwaqt.
Kif tuża din il-paġna
Dwar 
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
