Post għall-kenn

L-Avventura tal-Milied

It-tema ta’ din il-ġimgħa hija l-Paċi. Il-paċi li jġib Ġesù ma tfissirx nuqqas ta’ konflitt u diffikultajiet. Il-paċi u ferħ ta’ Ġesù jimxu id f’id. Meta nafdaw il-ħajja tagħna f’idejh, inkunu fil-paċi, anke jekk madwarna hemm ħafna taqlib. Matul dawn l-erba’ ġimgħat rajna dak kollu li għaddew minnu Marija u Ġużeppi. F’dak iż-żmien, Marija setgħet tkun imħaġġra għall-mewt. It-tnejn li huma ġew f’ilsien in-nies. Iżda kellhom il-paċi għax kienu qed jagħmlu r-rieda ta’ Alla.Aqra/itlob Numri 6, 24-26. Ħafna jitolbu din il-barka fuq it-tfal tagħhom, idraw itolbuha intom ukoll fuq it-tfal tagħkom. 

Il-ġrajja tal-lukanda li hija tant parti mill-istorja tal-Milied, li naraw fi plays u films, mhix irrakuntata fil-Bibbja, ħlief għar-referenza f’Luqa 2 vers 7: “u wildet l-ewwel iben tagħha, fisqietu u medditu f’maxtura, għax ma kienx hemm post għalihom fil-lukanda.”

Jekk għandkom Bibbja tat-tfal, x’aktarx ikun hemm din il-ġrajja, li jistgħu/tistgħu jaqraw/taqraw lit-tfal.

Il-Kelma tal-Mulej
Tifħir lilek Kristu

Bl-għajnuna tal-puppets, it-tfal jużaw l-immaġinazzjoni tagħhom u jirrakuntaw il-ġrajja ta’ meta Ġużeppi u Marija ma sabux post fil-lukanda. 

Il-Milied huwa l-birthday ta’ Ġesù. It-tfal ma jistgħux jagħtu rigal lil Ġesù, iżda ngħidulhom, li darba hu kien qal li dak kollu li nagħmlu mal-oħrajn inkunu qegħdin nagħmluh miegħu (‘Kull ma għamiltu ma’ wieħed mill-iżgħar fost dawn ħuti, għamiltuh miegħi’ Mattew 25, 40). F’dak il-ħin li Marija u Ġużeppi ħassew li ma kellhom imkien fejn jistkennu, żgur li kienu nkwetati u mdejqa ħafna. Il-post li ġew offruti, ma kien xejn kbir u speċjali, iżda kien biżżejjed għalihom. Għal min offrih, forsi kienet ħaġa żgħira, għalihom imma, kienet kbira. Għallmu lit-tfal li dejjem għandna ngħinu, anke jekk naħsbu li dak li nagħmlu mhux ser jagħmel differenza. Matul dawn il-ġranet tal-Milied, ikun hawn ħafna kampanji ta’ ġbir ta’ flus jew oġġetti. Sibu xi kampanja li qed tiġbor flus u oġġetti għat-tfal. Ħajru lit-tfal jagħtu mill-pocket money tagħhom u/jew jagħtu xi ġugarell tagħhom, minn dawk li għandhom jew li jaqilgħu fil-Milied. Dan huwa r-rigal tagħhom lil Ġesù. L-eżempju jkaxkar. Uruhom li anke intom qegħdin tgħinu bi flus u b’azzjonijiet, lil min hu fil-bżonn.

  1. Dalwaqt wasal il-Milied. Għinu lit-tfal jagħmlu kartolini tal-Milied, għalikom, għan-nanniet u/jew ħbieb. Ħallu l-imaġġinazzjoni tat-tfal timraħ fit-tiżjien li jixtiequ jagħmlu fuq il-kartolini. Tajjeb li nfakkruhom li l-Milied huwa l-birthday ta’ Ġesù, għalhekk huwa xieraq li jkun parti mill-kartolini li jagħmlu. 
  2. Sib it-triq, wasslu lil Marija u lil Ġużeppi sal-istalla (ara hawn taħt)
printoutNiżżel

It-tema ta’ din il-Ġimgħa hija l-paċi. Għat-talba tal-lum sibu ambjent għall-kwiet. Ilbsu sew, u filgħaxija itilgħu fuq il-bejt. Ittellgħux mobiles magħkom. Jekk ittellgħu xi kutra poġġuha mal-art u kulħadd jimtedd fuqha jħares lejn is-sema. Ibqgħu għal ftit ħin, fis-skiet. Għamlu talb spontanju, ibdew intom u rringrazzjaw lil Alla, għall-paċi u ferħ li għandkom minħabba l-familja tagħkom, it-tfal jistgħu jkomplu anke billi jgħidu grazzi lil Alla u jsemmu isem ta’ ħuhom/oħthom, nanniet, ħbieb. Irringrazzjaw lil Alla għal paċi li hawn f’pajjiżna, itolbu għal dawk li jgħixu f’pajjiżi fejn hemm il-gwerer. Kemm tistgħu ħallu lit-tfal ikomplu fit-talb. Erġgħu għalqu dan il-ħin billi toqgħodu fis-skiet. Qabel ma tispiċċaw kulħadd jgħid talba f’qalbu, u spiċċaw “Grazzi Mulej, li inti dejjem tisma’ t-talb tagħna, anke meta ngħiduhom f’qalbna. Ammen.” Minflok bil-lejl tistgħu tagħmlu din it-talba aktar kmieni, morru flimkien x’fi post fejn tkunu għall-kwiet u tistgħu pereżempju taraw ix-xemx nieżla, jew b’veduta sabiħa. L-importanti li jkun post mingħajr distrazzjonijiet. 

Niżżel u pprepara il-personaġġi minn hawn taħt:

Marija u bambin ĠesùNiżżel
ĠużeppiNiżżel
ĦmaraNiżzel
BaqraNiżżel

Għandna bżonn

  • Il-lapbook
  • Gloj / imqass
  • Lapes / kuluri
  • Kartonċina kkulurita
  • Templates (xemgħa, pocket, Ġesù Bambin, salib)
Ġesù BambinDownload
salibDownload

Attività

  • Għamel printout tat-templates ta’ din il-ġimgħa, aqtgħuhom
  • Ix-xemgħa penġuha vjola u iktbu PAĊI kbira fuqha, din titwaħħal fir-raba’ paġna tal-lapbook
  • Itwi l-pocket u s-salib skont l-istruzzjonijiet
  • Agħti l-kulur lit-3 stampi ta’ Ġesù Bambin u waħħalhom fuq kartonċina, aqta’ man-naħa ta’ barra

Ejjew naqraw dwar ir-raba’ ġimgħa tal-Avvent

Din hija r-raba’ u l-aħħar ġimgħa tal-Avvent u t-tema hija l-PAĊI.

Illum nixgħelu l-aħħar xemgħa vjola u b’hekk l-erba’ xemgħat ikunu mixgħula. Din ix-xemgħa tissejjaħ ix-xemgħa tal-Anġli. Il-ġimgħa l-oħta ffukajana fuq ir-rgħajja li kienu fl-għelieqi bil-lejl, jieħdu ħsieb il-merħla tagħhom, meta raw dehra tal-għaġeb u mhux tas-soltu. L-għada l-ħajja tagħhom inbidlet għal dejjem, wara li sabu lil Ġesù tarbija f’maxtura. Din il-ġimgħa ħa niffukaw fuq l-anġli nfushom. Din ix-xemgħa hija wkoll ix-xemgħa tal-paċi. Tfakkarna fil-paċi li jagħtina Ġesù.

L-Anġli huma messaġġiera ta’ Alla. Huma bħal medjaturi; jaqdu lil Alla billi jwasslu l-messaġġi tiegħu lill-bnedmin. Araw dan il-video biex titgħallmu aktar dwar l-anġli. 

Nisimgħu ħafna dwar l-anġli fir-rakkont tal-Milied. Anġlu jidher lil Żakkarija u qallu li hu u l-mara tiegħu, Eliżabetta, kien ser ikollhom tarbija u li hu kien se jsemmiha Ġwanni (Ġwanni l-Battista). Nistgħu naqraw din il-ġrajja fl-Evanġelju ta’ San Luqa (Luqa 1, 8-20). L-Anġlu Gabrijel deher lil Marija u għarrafha dak li xtaq Alla, jiġifieri li hi ssir omm Ġesù (Luqa 1, 26-38). Anġlu deher ukoll lil Ġużeppi u qallu biex ma jinkwetax li Marija kien ser ikollha tarbija (Mattew 1, 20-25). 

Aktar tard, kif rajna l-ġimgħa l-oħra, anġlu deher lir-rgħajja, u madwarhom iddiet il-Glorja ta’ Alla, waqt li qalilhom biex ma jibżgħux. Fis-sema dehru qtajja ta’ anġli, ifaħħru u jigglorifikaw lil Alla; huma kienu qegħdin iħabbru t-twelid ta’ Ġesù.

Wara t-twelid ta’ Ġesù, anġlu deher lil Ġużeppi f’ħolma u qallu biex jieħu lil Marija u lil Ġesù ‘l bogħod minn Betlehem, u mar l-Eġittu minħabba li r-re Erodi ried joqtol lil Ġesù (Mattew 2, 13-15). Tindunaw, għalhekk, kif Alla għen lill-bnedmin permezz tal-anġli. Fil-lejl qabel ma twieled Ġesù, l-anġli kienu l-messaġġiera ta’ Alla, u wasslu aħbar ta’ paċi u mħabba. Intom lesti biex tirċievu dan il-messaġġ ta’ paċi? Fl-Avvent nistennew u nħejju qalbna għat-twelid ta’ Ġesù, li hu l-Mulej u s-Salvatur tagħna. L-Avvent hu żmien kemmxejn twil, imma wasalna fl-aħħar. Meta l-anġli ħabbru t-twelid ta’ Ġesù, id-dinja nbidlet għal dejjem, bl-aħbar it-tajba ta’ tama, imħabba, ferħ u paċi. L-anġli jgħinuna nqimu u naħsbu dwar il-glorja ta’ Alla u r-rigal tiegħu ta’ Ġesù, Salvatur u Mulej. Il-messaġġ tagħhom huwa ta’ paċi u rieda tajba.

Din ix-xemgħa se tixgħel fid-dar,

għax Ġesù ġej dalwaqt fuq din l-art!

Żdied id-dawl, żdied il-ferħ u s-sliem,

għax Ġesù ġej biex jagħti l-ħelsien.

Għażiż Mulej, l-imħabba tiegħek hija bla tarf. Twassalna għall-akbar rigal tagħna, Ġesù. Nitolbu biex d-dawl tal-imħabba tiegħek jiddi fuqna u permezz tagħna, biex b’hekk nagħtuk ġieħ u glorja. Dan nitolbuh f’isem Ġesù. Ammen.

  • Tistgħu tiktbu din it-talba, jew waħda li tagħmlu intom, fuq ir-raba’ paġna tal-lapbook
  • Waħħal il-pocket taħt it-talba u fuqu ikteb, Twieled Salvatur, li hu Kristu l-Mulej
  • Fuq wara tat-tliet stampi tal-Bambin Ġesù, ikteb (matul din il-ġimgħa), kif tista’ iġġib il-paċi. Tista’, per eżempju, terġa’ tagħmel ħbieb ma’ xi ħadd li kellek xi argument; inkella ċempel lil xi ħadd li qed iħossu waħdu; l-iskola agħmel ħabib ġdid; ipprova li ma tirrabjax. 
  • Waħħal is-salib mitwi fuq ix-xemgħa. Meta tiftħu hemm ħames kwadri. F’tan-nofs, ikteb, Emmanuel “Alla magħna”. Fl-oħrajn ikteb l-ismijiet ta’ Ġesù, Re tar-Rejiet, Messija, Prinċep tal-Paċi, Kunsillier tal-Għaġeb.

Il-Lapbook tal-Avvent, issa lest. Jekk tixtieq tista’ tiddekorah aktar, skont il-gosti tiegħek. Fl-ewwel ġimgħa kellek aktar attivitajiet x’tista’ tagħmel.

Matul dawn l-erba’ ġimgħat stennejna bil-paċenzja biex niċċelebraw it-twelid ta’ Ġesù, stennejna flimkien mal-profeti, ma’ Marija u Ġużeppi, mar-rgħajja u mal-anġli. Kollha kienu ħerqana għat-twelid ta’ Ġesù, il-Messija mwiegħed, u issa wassluna sal-Milied. Stennejna b’tama, imħabba, ferħ u paċi. Ftakarna fil-passat u issa nħarsu lejn il-futur. Ċertament ħejjejna t-triq għall-Mulej, qalbna lesta biex tirċievi l-barkiet tat-twelid ta’ Ġesù, u tħeġġiġna biex nistennew it-tieni miġja tiegħu.

Biex tiċċelebraw il-birthday ta’ Ġesù, fil-25 ta’ Diċembru, waħħlu l-istampa tal-Bambin Ġesù, fil-maxtura li għandkom fuq quddiem tal-Lapbook. 

Żomm il-lapbook bħala tifkira ta’ dan iż-żmien speċjali tal-Avvent.