San Vinċenz de Paul

Il-prinċipju fundamentali li jsawwar il-missjoni ta’ San Vinċenz de Paul kienet il-virtù tal-KARITÀ. Li tikber f’dan il-virtù jmur lil hinn minn sempliċiment tagħmel ftit karità; tfisser ħafna aktar minn sempliċiment tkun ġeneruż/a billi tagħti xi donazzjonijiet lil għaqdiet tal-karità. Il-karità tinvolvi l-ħbiberija bejn il-bniedem u Alla, li l-bniedem ikun kapaċi jħobb kif iħobb Alla. Il-karità tfisser li taċċetta lil kulħadd b’qalb miftuħa, mingħajr distinzjoni ta’ razza jew kulur. Tfisser wkoll li tagħmel differenza pożittiva.

Oħloq opportunità biex tiddiskuti mat-tfal jekk jistgħux jagħrfu persuni li jafu li jistgħu jilqgħu u jagħtuhom ċans jiftħu qalbhom magħhom. Dawn in-nies jistgħu jkunu ġirien li huma weħidhom, anzjani fil-Parroċċa, immigranti li jistgħu jħossuhom mhux milqugħa mill-komunità, tfal oħra fl-iskola u/jew f’attivitajiet sportivi li għandhom it-tendenza jinqatgħu għalihom. Jistgħu jkunu wkoll membri oħra tal-familja li ma tantx imorru tajjeb magħhom. Ħallihom jiskopru modi ta’ kif jistgħu jgħinu lill-oħrajn iħossuhom aċċettati, milqugħa u maħbuba.

Għin lit-tfal isiru jafu dwar gruppi fil-Parroċċa u organizzazzjonijiet oħra li joperaw fuq livell nazzjonali u li l-għan tagħhom hu li jgħinu lil min hu fil-bżonn u lill-vulnerabbli (bħal Puttinu Cares u d-Dar tal-Providenza). Enfasizza l-fatt li l-biċċa l-kbira ta’ dawn l-entitajiet, għalkemm jimpjegaw nies għal servizzi speċjalizzati, jibqgħu għaddejjin grazzi għall-appoġġ ta’ għadd ta’ volontiera.

Il-karità tibda mid-dar! Issuġġerixxi modi kif it-tfal jistgħu jkunu ta’ servizz għall-oħrajn. Id-dar jistgħu joffru li:

• jagħmlu xi faċenda li mhux soltu jagħmlu;
• jippreparaw il-mejda għall-ikel;
• jekk kbar biżżejjed, jgħinu fit-tqassim tal-ikel;
• joffru li jnewlu xi affarijiet neqsin;
• jaħmu xi kejk u jservuh lill-familja bħala ħaġa speċjali!

Għinhom iżejnu kartonċina, bi stampa kkulurita ta’ qalb u fiċ-ċentru tagħha jiktbu l-kliem “Alla jħobbok”, u ħalli l-membri tal-familja kollha jiktbu “Anke jiena” madwarha.

Ħin tat-talb mal-Familja

Għin lit-tfal biex jesprimu fi kliem, il-ħsibijiet tagħhom f’talbiet, mhux biss għal dawk fil-bżonn u għall-vunerabbli, iżda wkoll għall-voluntiera kollha li joffru l-ħin u l-enerġija tagħhom għas-servizz tal-oħrajn.